Loke Ta Bon i Loke Ta Malu: Beibel Ta un Guia Konfiabel

Nos no por tin sigur ku e desishonnan ku nos ta tuma relashoná ku loke ta bon i loke ta malu lo duna bon resultado si nos djis bai tras di kon nos mes ta sinti i kon otro hende ta sinti. Beibel ta splika dikon nos no por djis bai tras di loke hende ta pensa. Ademas, Beibel ta un guia konfiabel ku ta yuda nos haña sa loke ta bon i loke ta malu, i esei ta yuda nos ta felis.

NOS TIN MESTER DI DIOS SU GUIA

Den Beibel, Yehovaa Dios ta splika ku el a krea hende di tal manera ku nan tin mester di su guia; e no a krea nan pa dirigí nan mes pasonan. (Yeremías 10:23) P’esei, el a duna nos Beibel komo un guia pa nos por sa loke ta bon i loke ta malu. Dios stima hende, i e no ke pa nos tuma mal desishon ku lo kousa nos daño i ku lo hasi nos bida difísil. (Deuteronomio 5:29; 1 Huan 4:8) Ademas, komo nos Kreador, e tin e sabiduria i konosementu nesesario pa yuda nos komprondé loke ta bon i loke ta malu. (Salmo 100:3; 104:24) Sinembargo, Dios no ta fòrsa niun hende pa biba segun su normanan.

Yehova a duna e promé hòmber i muhé, Ádam i Eva, tur loke nan tabatin mester pa ta felis. (Génesis 1:28, 29; 2:8, 15) Ademas, el a duna nan instrukshon simpel, i el a ferwagt pa nan obedesé e instrukshonnan ei. Sinembargo, el a laga nan mes disidí si nan lo obedesé e instrukshonnan ei òf nò. (Génesis 2:9, 16, 17) Lamentablemente, Ádam i Eva a skohe pa biba segun nan mes normanan i no segun Dios su normanan. (Génesis 3:6) Kiko tabata e resultado? Awor ku hende ta disidí pa nan mes loke ta bon i loke ta malu, nan ta mas felis? Nò. Atraves di añanan, nos a siña ku ora hende ignorá Dios su normanan, esei no ta hiba na berdadero pas i felisidat.—Eklesiástes 8:9.

Sin importá unda nos ta biba i kon nos a ser lantá, Beibel por yuda nos tuma bon desishon relashoná ku loke ta bon i loke ta malu. (2 Timoteo 3:16, 17; wak e kuadro “Beibel Ta un Buki pa Tur Hende.”) Ban wak kon Beibel ta hasi esei.

Wak e vidio Ken Ta e Outor di Beibel? riba jw.org pa haña sa dikon ta na su lugá pa yama Beibel “e palabra di Dios.”—1 Tesalonisensenan 2:13.

DIKON HENDE POR PENSA KU BEIBEL NO TA UN BON GUIA?

Algun hende ta bisa ku Beibel no ta un bon guia pa yuda hende disidí loke ta bon i loke ta malu. Wak algun opheshon ku hende sa tin.

Opheshon: “Beibel ta kontradisí su mes.”

E bèrdat: Na prinsipio, por parse ku algun parti di Beibel ta kontradisí otro. Pero, ora bo tuma tempu pa analisá e konteksto, historia, kustumber, punto di bista di e eskritor i otro faktor, lo bo mira ku en realidat henter Beibel ta na armonia ku otro.

Pa wak algun ehèmpel spesífiko, lesa e artíkulo “Beibel Ta Kontradisí Su Mes?” riba jw.org.

Opheshon: “Hende ku ta bisa ku nan ta sigui Beibel ta hasi kos malu, pues e no por ta un bon guia.”

E bèrdat: Beibel no ta kulpabel pa e mal kondukta di hende ku no ta apliká loke nan ta siña. De echo, Beibel ta bisa ku lo tin hopi hende, inkluso lidernan religioso, ku lo bisa ku nan ta sigui Beibel, pero nan lo hasi kontrali na loke e ta bisa. Beibel ta bisa tambe ku pa e motibu ei, hende “lo papia malu” di e bèrdatnan ku tin den Beibel.—2 Pedro 2:1, 2.

Pa haña un ehèmpel di algun manera ku lidernan religioso no ta sigui loke Beibel ta bisa, lesa e artíkulo “Religion ta djis un manera pa hende gana plaka?” riba jw.org.

Opheshon: “Beibel ta promové e punto di bista ku su siguidónan no mester tolerá hende ku ta diferente for di nan.”

E bèrdat: Beibel ta animá nos pa trata tur hende ku rèspèt. Beibel no ta aprobá lo siguiente . . .

hende ku ta pensa ku nan ta superior na otro hende.—Filipensenan 2:3.
hende ku ta falta otro hende rèspèt djis pasobra nan norma i kreensianan ta diferente.—1 Pedro 2:17.
hende ku ta fòrsa otro hende bai di akuerdo ku nan punto di bista.—Mateo 10:14.

Beibel ta mustra ku Dios semper ta trata hende na un manera amabel i hustu, i Dios ke pa nos hasi meskos.—Romanonan 9:14.

Pa mas informashon, lesa e artíkulo “Beibel por yuda nos ta tolerante?” riba jw.org.

DEN BEIBEL NOS TA HAÑA GUIA DI DIOS

Beibel ta bisa nos kon Dios a trata ku hende for di komienso. Beibel ta yuda nos komprondé Dios su punto di bista di loke ta bon i loke ta malu i di loke ta benefisiá nos i loke ta kousa nos daño. (Salmo 19:7, 11) E prinsipionan ku tin den Beibel pa yuda nos disidí loke ta bon i loke ta malu nunka no ta bira antikuá, i nan ta yuda nos tuma bon desishon den nos bida diario.

Por ehèmpel, wak e prinsipio ku tin na Proverbionan 13:20: “Hende ku ta anda ku hende sabí ta bira sabí, pero hende ku tin amistat ku hende bobo lo sufri daño.” E prinsipio ei tabata bèrdat den tempu di Beibel, pero e ta bèrdat awe tambe. Beibel ta yen di e tipo di prinsipionan ei ku ta práktiko i balioso.—Wak e kuadro “Beibel Ainda Ta Yuda Nos Awe.”

Pero, kisas bo ta puntra bo mes: ‘Kon mi por tin sigur ku e konsehonan ku Beibel ta duna por yuda mi awe?’ Den e siguiente artíkulo nos lo mira algun ehèmpel di bida real.

a Dios su nòmber ta Yehova.—Salmo 83:18.

BEIBEL AINDA TA YUDA NOS AWE

Aunke nan a kaba di skirbi Beibel mas ku 2.000 aña pasá, ainda Beibel ta yuda nos awe. Semper hende ke tabata felis i tin un bon bida, esei nunka no a kambia. (Eklesiástes 1:9) E konsehonan sabí ku tin den Beibel por yuda nos tin un bida felis.

Onestidat

“Nos ke komportá nos mes na un manera onesto den tur kos.”—Hebreonan 13:18.
“Laga esun ku ta hòrta, no hòrta mas; mas bien, lag’é traha duru.”—Efesionan 4:28.

Amistat ku Otro Hende

“Laga kada hende sigui buska, no su mes benefisio, sino esun di e otro persona.”—1 Korintionan 10:24.
“Sigui soportá otro i pordoná otro libremente.”—Kolosensenan 3:13.

Kon pa Tuma Desishon

“Un hende sin eksperensia ta kere tur kos ku bo bis’é, pero un persona sabí ta pensa bon promé ku e dal un paso.”—Proverbionan 14:15.
“Un hende sabí ta mira peliger, i e ta evit’é, pero un hende imprudente no ta evitá peliger, i e ta sufri konsekuensia.”—Proverbionan 22:3.