Loke Ta Bon i Loke Ta Malu: Un Desishon Ku Nos Tin Ku Tuma
E desishon ku nos tuma relashoná ku loke ta bon òf loke ta malu lo tin un influensia grandi riba nos bida; esei lo determiná si nos lo tin un bida felis òf nò. Yehova Dios sa esei. P’esei, e ke pa nos biba segun su normanan, esta, loke e ta bisa ku ta bon i malu.
Yehova ke pa nos disfrutá di pas i felisidat.
“Ami, Yehova, ta bo Dios, kende ta siña bo pa bo mes bon, kende ta guia bo den e kaminda ku bo mester kana. Mare bo por presta atenshon na mi mandamentunan! E ora ei, bo pas lo bira manera un riu, i bo hustisia lo bira manera e olanan konstante di laman.”—Isaías 48:17, 18.
Komo nos Kreador, Dios sa kon ta e mihó manera pa nos biba. E ke pa nos sigui su guia pasobra e sa ku esei lo benefisiá nos. Ora nos sigui Dios su guia, nos no mester preokupá si nos desishon lo duna bon resultado. Ora nos ta sigui Dios su guia, semper nos lo ta tumando e bon desishon, esun ku ta hiba na pas i felisidat.
Yehova nunka no ta puntra nos pa hasi algu ku nos no por hasi.
“E mandamentu akí ku mi ta ordená bo awe no ta muchu difísil pa bo, ni e no ta fuera di alkanse.”—Deuteronomio 30:11.
Pa nos biba segun Dios su normanan, nos mester kambia nos manera di pensa i loke nos ta hasi. Sinembargo, Yehova no ta eksigí muchu di nos. Pasobra, komo nos Kreador, e sa kiko nos por hasi. Ademas, segun ku nos ta siña konosé Yehova, nos lo mira pa nos mes ku “su mandamentunan no ta pisá.”—1 Huan 5:3.
Yehova ta primintí ku lo e yuda hende ku ta skohe pa biba segun su normanan.
“Ami, Yehova bo Dios, ta kohe bo man drechi tene; ami ta e Persona ku ta bisa bo: ‘No tene miedu. Lo mi yuda bo.’”—Isaías 41:13.
Ta posibel pa nos biba segun Dios su normanan, pasobra lo e yuda nos. E por yuda nos pa medio di su Palabra, Beibel, ku ta duna nos animashon i speransa.
Miónes di hende rònt mundu a bin realisá ku ora nan biba segun e normanan di Beibel, nan bida a bira mihó. Dikon bo no ta tuma un poko tempu pa siña mas tokante e konsehonan práktiko ku Beibel ta duna? Un manera ku bo por hasi esei ta di analisá e foyeto basá riba Beibel Bo Por Disfrutá di Bida pa Semper! ku ta disponibel grátis riba jw.org. Den e foyeto ei bo por haña e siguiente lèsnan:
Kon Beibel Por Yuda Bo?
Beibel Ta Primintí un Futuro Maravioso
Bo Por Konfia Loke Beibel Ta Bisa?
Segun ku bo ta analisá Dios su Palabra, Beibel, lo bo realisá ku e no ta antikuá, e “ta konfiabel, awor i pa semper.” (Salmo 111:8) E mihó manera pa nos biba ta di sigui e normanan ku tin den Beibel. Sinembargo, Dios no ta fòrsa nos pa hasi esei. (Deuteronomio 30:19, 20; Hosue 24:15) E ta un desishon ku kada un di nos tin ku tuma.