Laga Amor Motivá Bo pa Sigui Prediká!

1. Kiko nos a siña na e reunion anual 2023?

NOS reunion anual di 2023a tabata hopi interesante. Nos a haña vários komprondementu nobo. Por ehèmpel, nos a siña ku algun hende kisas lo tin oportunidat di djòin Yehova su pueblo asta despues ku Babilonia e Grandi ser destruí. Pero tambe tabatin un anunsio interesante tokante nos sirbishi. Nos a tende ku desde novèmber 2023, publikadónan no tin nodi di raportá tur nan aktividatnan di sirbishi. Pero, akaso e kambionan ei ta pone ku nos sirbishi no ta dje importante òf urgente ei mas? Apsolutamente ku nò!

2. Dikon, segun ku kada dia ta pasa, nos sirbishi ta bira mas i mas urgente? (Marko 13:10)

² Kada dia ku pasa, ta bira mas i mas urgente pa nos prediká. Dikon? Pasobra no a sobra muchu tempu mas promé ku e fin yega. Wak loke Hesus a profetisá tokante nos trabou di prediká den e último dianan. (Lesa Marko 13:10.) Di akuerdo ku e relato di Mateo, Hesus a bisa ku e bon notisia lo ser prediká den henter e tera habitá promé ku “e fin” yega. (Mat. 24:14) Ei, “e fin” ta referí na fin di henter Satanas su mundu malbado. Yehova a stipulá “e dia i ora” pa e susesonan ku pronto lo pasa. (Mat. 24:36; 25:13; Echo. 1:7) Kada dia nos ta yega mas serka di e fecha ei. (Rom. 13:11) Mientrastantu, nos mester sigui prediká.

3. Kiko ta motivá nos pa prediká?

³ Lo siguiente ta un pregunta ku kada un di nos mester pensa riba dje: ‘Dikon nos ta prediká e bon notisia?’ Simplemente bisá, debí na amor. Ora nos prediká, nos ta mustra ku nos stima e bon notisia, ku nos stima hende i, mas importante ainda, ku nos stima Yehova i su nòmber. Ban papia di nan un pa un.

NOS STIMA E BON NOTISIA

4. Ki nos ta hasi ora nos haña bon notisia?

⁴ Ta masha dushi ora bo tende ku un hende den bo famia a haña yu òf ku b’a haña nèt e trabou ku bo tabata warda riba dje. Bo ta kòrda kon b’a sinti na e momento ku bo a haña e bon notisia ei? Sin duda, bo no por a warda pa konta otro hende. No ta asina tambe a pasa ora bo a skucha e mihó notisia di tur—e bon notisia di Dios su Reino?

5. Kon b’a sinti ora b’a siña e bèrdatnan di Beibel pa promé biaha? (Wak e plachi.)

⁵ Pensa un ratu kon b’a sinti ora b’a siña e bèrdatnan di Beibel pa promé biaha. B’a bin komprondé ku bo Tata den shelu stima bo i ke pa bo forma parti di su famia di adoradónan. Tambe ku el a primintí di kaba ku doló i sufrimentu. Ademas, b’a haña e speransa di mira bo sernan stimá ku a muri den un mundu nobo i b’a siña hopi kos maravioso mas. (Mar. 10:​29, 30; Huan 5:​28, 29; Rom. 8:​38, 39; Rev. 21:​3, 4) E bèrdatnan ei a emoshoná bo. (Luk. 24:32) B’a gusta loke bo tabata siñando i kier a konta tur hende tokante nan!—Kompará ku Yeremías 20:9.

6. Kiko bo ta siña for di e eksperensia di Ernest i Rose?

⁶ Wak e eksperensia di Ernest.b Tempu e tabatin dies aña, su tata a muri. Ernest a konta: “Mi tabata puntra mi mes: ‘Ta shelu el a bai? Òf el a stòp di eksistí pa semper?’ Mi tabata envidiá otro mucha ku sí tabatin nan tata.” Ernest tabata bai santana regularmente i tabata hinka rudia na graf di su tata i resa: “Dios, por fabor, mi ke sa unda mi tata ta.” Mas o ménos 17 aña despues ku su tata a muri, un Testigu a ofresé Ernest un estudio. Mesora el a asept’é. El a siña ku e mortonan no ta konsiente di nada. Nan ta komo si fuera den un soño profundo. El a haña sa tambe ku Beibel ta primintí ku lo bai tin un resurekshon. (Ekl. 9:​5, 10; Echo. 24:15) Por fin el a haña kontesta pa e preguntanan ku tabata molesti’é pa asina tantu tempu! Ernest tabata gusta e kosnan ku e tabata siña for di Beibel masha hopi mes. Su kasá, Rose, a djòin e den e estudio, i e tambe a gusta e kosnan ku e tabata siña. Na 1978, nan tur dos a batisá. Ku entusiasmo nan tabata prediká na nan famianan, amigunan i kualke hende ku kier a skucha. Komo resultado, nan a yuda mas ku 70 hende konosé Yehova i batisá.

7. Kiko ta pasa ora nos stima loke nos siña for di Beibel? (Lukas 6:45)

⁷ Unabes bo stima loke b’a siña for di Beibel, bo no por keda sin konta otro hende tokante dje. (Lesa Lukas 6:45.) Nos ta sinti meskos ku e disipelnan di Hesus di promé siglo ku a bisa: “Nos, en todo kaso, no por stòp di papia tokante e kosnan ku nos a mira i tende.” (Echo. 4:20) Nos stima e bèrdat asina tantu, ku nos ke kompartié ku mas tantu hende posibel.

NOS STIMA HENDE

8. Dikon nos ke konta otro hende tokante e bon notisia? (Wak e kuadro “Stima Hende—Yuda Hende Bira Disipel.”) (Wak e plachi.)

⁸ Meskos ku Yehova i su Yu, nos tambe stima hende. (Pro. 8:31; Huan 3:16) Nos ta sinti hopi duele di hende ku ta “sin Dios” i ku “no [tin] speransa.” (Efe. 2:12) Nan problemanan di bida ta hoga nan i nos tin e salbabida ku nan mester, sí, nos tin e bon notisia di Dios su Reino. Debí ku nos stima nan i ta sinti duele di nan, nos ke hasi tur loke nos por pa konta nan tokante e bon notisia. Ora nan skucha e bon notisia, nan kurason ta yena ku speransa i esei lo yuda nan pa ta felis asta for di awor i ta duna nan oportunidat pa un dia disfrutá di “loke realmente ta bida,” esta, bida eterno den Dios su mundu nobo.—1 Tim. 6:19.

9. Ki spièrtamentu nos ta duna tokante futuro, i dikon? (Ezekiel 33:​7, 8)

⁹ E amor ku nos tin pa hende tambe ta motivá nos pa spièrta nan ku fin di e mundu malbado akí ta hopi serka. (Lesa Ezekiel 33:​7, 8.) Nos ta sinti duele di nos próhimo i famianan ku no ta den e bèrdat. Hopi hende ta biba pa biba, sin sa ki ta bini—“un tribulashon grandi manera no a yega di sosodé nunka, for di prinsipio di mundu te awor, i ku lo no sosodé nunka mas tampoko.” (Mat. 24:21) Nos ke pa nan sa kiko lo pasa durante e tempu ei. Pa di promé, religion falsu lo ser destruí, i djei henter e mundu malbado lo ser destruí na Armagedon. (Rev. 16:​14, 16; 17:​16, 17; 19:​11, 19, 20) Nos ta anhelá pa mas tantu hende posibel skucha loke nos ta bisa nan i skohe awor pa sirbi Yehova huntu ku nos. Pero kiko di esnan ku no skucha nos aworakí, manera nos famianan?

10. Dikon ta importante pa nos sigui spièrta hende?

¹⁰ Manera nos a mira den e artíkulo anterior, kisas Yehova ke salba hende ku kuminsá pone fe den dje ora nan mira destrukshon di Babilonia e Grandi. Si esei ta e kaso, e ora ei ta asta mas importante ainda pa nos sigui bisa hende tokante loke ta biniendo. P’esei, ta bon pa nos tene kuenta ku lo siguiente: Loke nos bisa nan aworakí, kisas ta loke nan lo kòrda n’e momento ei. (Kompará ku Ezekiel 33:33.) Kisas nan ta bai kòrda loke nos tabata bisa nan anto esei por pone ku nan lo ke sirbi Yehova huntu ku nos promé ku ta muchu lat. Meskos ku e wardadó di prezu na Filipo a pone fe den Yehova despues di “un temblor fuerte,” kisas algun hende ku no ta hasi kaso aworakí lo pone fe den Yehova despues di destrukshon di Babilonia e Grandi ku ta un suseso ku lo shòk henter mundu.—Echo. 16:​25-34.

NOS STIMA YEHOVA I SU NÒMBER

11. Kon nos ta duna Yehova gloria, onor i poder? (Revelashon 4:11) (Wak e plachi.)

¹¹ E motibu di mas importante dikon nos ta prediká e bon notisia ta pasó nos stima Yehova i su nòmber santu. Nos ta mira sirbishi komo un manera pa alabá e Dios ku nos stima. (Lesa Revelashon 4:11.) Di kurason nos ta sinti ku Yehova ta digno di risibí gloria, onor i poder di su sirbidónan leal. Nos ta duna Yehova gloria i onor ora nos ta mustra otronan ku el “a krea tur kos” i ku ta e a duna nos bida. Nos ta dun’é nos poder ora nos ta usa nos tempu, energia i loke nos tin pa prediká mas tantu posibel. (Mat. 6:33; Luk. 13:24; Kol. 3:23) Ku poko palabra, nos gusta papia tokante e Dios ku nos stima. Pero tambe nos gusta papia tokante su nòmber i e tipo di Dios ku e ta. Dikon?

12. Kon nos ta santifiká Yehova su nòmber den sirbishi?

¹² Komo ku nos stima Yehova, nos ke santifiká su nòmber. (Mat. 6:9) Esaki ta nifiká ku nos ke bisa otro hende ku e kosnan malu ku Satanas ta bisa di Yehova no ta bèrdat. (Gén. 3:​1-5; Yòb 2:4; Huan 8:44) P’esei ora nos ta prediká, nos tin masha gana di konta hende ku ke skucha nos ken Yehova ta i ki tipo di Dios realmente e ta. Nos ke pa tur hende sa ku su kualidat di mas bunita ta amor, ku su manera di goberná ta hustu i ku su Reino pronto lo kaba ku tur sufrimentu i lo trese pas i felisidat pa tur hende. (Sal. 37:​10, 11, 29; 1 Huan 4:8) Ora nos konta hende e kosnan akí den sirbishi, nos ta santifiká Yehova su nòmber. Nos ta felis tambe pasó nos sa ku nos ta hasiendo loke ta ser ferwagt di Testigunan di Yehova. Kon asina?

13. Dikon nos ta orguyoso di ta Testigunan di Yehova? (Isaías 43:​10-12)

¹³ Yehova a skohe nos pa ta su “testigunan.” (Lesa Isaías 43:​10-12.) Algun aña pasá, un karta di Kuerpo Gobernante a bisa: “E onor di mas grandi ku kualke un di nos por tin ta di ser yamá un Testigu di Yehova.”c Por ehèmpel, imaginá ku un hende a akusá bo di a hasi un kos malu, i awor bo mester di un otro hende pa testiguá ku e akusashon no ta bèrdat. Sin duda lo bo skohe un hende ku bo konosé bon, ku bo ta konfia i ku tin un bon reputashon. Pues, e echo ku Yehova a skohe nos pa ta su Testigunan ta mustra ku e konosé nos bon i ku e ta konfia nos pa testiguá ku e ta e úniko Dios berdadero. I nos ta asina orguyoso di ta su Testigunan ku nos ta hasi uso di tur oportunidat pa hasi su nòmber konosí i proba ku tur e kosnan malu ku a ser bisá tokante dje no ta bèrdat. Ora nos hasi esei, nos ta hasi loke nos nòmber ta bisa: Nos ta para komo Testigunan pa Yehova!—Sal. 83:18; Rom. 10:​13-15.

NOS LO SIGUI PREDIKÁ TE ORA E FIN YEGA

14. Ki kosnan emoshonante ta na kaminda?

¹⁴ Tin tempunan emoshonante na kaminda! Ku Yehova su bendishon, nos ta spera di mira hopi hende mas haña e bèrdat promé ku tribulashon grandi kuminsá. Tambe nos ta masha kontentu ku asta durante e tempu di mas skur di humanidat—tribulashon grandi—ainda kisas nos por mira hende bandoná Satanas su mundu malbado i djòin nos den alabá Yehova!—Echo.13:48.

15-16. Kiko nos lo sigui hasi, anto te na ki momento nos lo hasi esei?

¹⁵ Turesten, nos tin trabou pa hasi. Nos tin e privilegio di prediká e bon notisia di Dios su Reino, un trabou ku nunka mas lo ser hasí. Na mes momento nos tin ku sigui spièrta hende ku fin di e mundu malbado akí ta hopi serka. Anto ora e tempu di huisio yega, nan lo realisá ku e mensahe ku nos tabata prediká a bini di Yehova Dios.—Eze. 38:23.

¹⁶ Pues anto, kiko nos ta determiná pa hasi? Nos lo ke laga amor pa e bon notisia, amor pa hende i mas importante ainda, amor pa Yehova i su nòmber motivá nos pa sigui prediká ku sentido di urgensia i entusiasmo te ora Yehova bisa: “Basta, ta sufisiente!”