Prediká ku Entusiasmo Meskos Ku Hesus

1. Kiko ta hasi nos diferente for di e supuesto kristiannan?

LOKE ta hasi nos diferente for di e supuesto kristiannan ta e deseo ku nos tin pa prediká. (Tito 2:14) Pero pa ta onesto, no ta tur biaha nos tin e mesun smak i entusiasmo pa prediká. Un ansiano ku ta traha hopi duru den kongregashon a atmití: “Tin biaha, mi no tin niun tiki gana di prediká.” Abo tambe a yega di sinti asina?

2. Dikon tin biaha ta difísil pa sigui prediká ku goso?

² Bo a yega di puntra bo mes dikon nos gusta traha riba proyekto di konstrukshon di Salòn di Reino, yuda nos rumannan ku pasa den desaster natural òf animá nan? Esei ta pasobra mesora nos ta mira resultado. Ademas, nos ta traha dushi i na pas ku nos rumannan i nos sa ku nan ta balorá loke nos ta hasi pa nan. Di otro banda, nos por tin hopi aña ta traha e mesun teritorio sin mira masha resultado. Ademas, nos por topa ku hende ku no ke skucha nos mensahe. Nos sa tambe ku segun e fin ta yega mas i mas serka, nos lo haña nos ku mas oposishon. (Mat. 10:22) Pues ta di komprondé dikon kisas nos gusta e otro formanan di sirbi Yehova mas ku prediká. Pero kiko por yuda nos oumentá òf evitá di pèrdè nos entusiasmo pa e trabou di prediká?

3. Kiko nos ta siña tokante Hesus for di e ilustrashon na Lukas 13:​6-9?

³ For di Hesus su ehèmpel nos por siña kon pa keda ku nos entusiasmo pa e trabou di prediká. Durante su sirbishi aki riba tera, e no a pèrdè su gana di prediká, mas bien el a oumentá su entusiasmo pa e trabou. (Lesa Lukas 13:​6-9.) El a kompará su mes ku un hòmber ku a pasa tres aña ta kuida un palu di figu ku no tabata pari fruta. Di mes manera, Hesus a pasa tres aña ta prediká na e hudiunan, pero ta masha poko di nan a bira su disipel. Sinembargo, meskos ku e hòmber no a stòp di hasi esfuerso pa purba di laga e palu pari fruta, Hesus no a stòp di hasi esfuerso ni baha man den su sirbishi. Al kontrario, el a hasi mas esfuerso ainda pa prediká na e hudiunan i yuda nan aseptá e bon notisia.

4. Kua kuater kos nos por siña for di Hesus?

⁴ Den e artíkulo akí nos lo mira kon Hesus a mustra entusiasmo den e trabou di prediká, foral den e último seis lunanan di su bida aki riba tera. Nos tambe por prediká ku entusiasmo si nos siña for di e kosnan ku Hesus a siña su disipelnan i imitá su ehèmpel. Awor, ban wak kuater kos ku nos por siña di Hesus: El a (1) focus riba hasi Yehova su boluntat, (2) tene profesianan di Beibel na mente, (3) konfia den Yehova i (4) keda positivo.

FOCUS RIBA HASI YEHOVA SU BOLUNTAT

5. Kon Hesus a mustra ku e tabata di focus riba hasi Yehova su boluntat?

⁵ Hesus semper a prediká “e bon notisia di e Reino di Dios” ku smak. Dikon? Pasobra e tabata sa ku esei ta loke Dios ke p’e hasi. (Luk. 4:43) Pa Hesus, e trabou di prediká tabata e kos di mas importante den su bida. Asta durante e lastu seis lunanan di su bida aki riba tera, e tabata “pasa di stat pa stat i di pueblito pa pueblito, siñando e hendenan.” (Luk. 13:22) Tambe el a entrená mas disipel pa prediká e bon notisia meskos ku kuné.—Luk. 10:1.

6. Aunke nos ta hasi otro trabou pa Yehova, dikon Yehova tòg ke pa nos prediká? (Wak e plachi.)

⁶ Awe tambe, e trabou di prediká e bon notisia ta e kos di mas importante ku Yehova i Hesus ke pa nos hasi. (Mat. 24:14; 28:​19, 20) Tur otro trabou ku nos ta hasi pa Yehova ta direktamente konektá ku e trabou di prediká. Por ehèmpel, nos ta traha Salòn di Reino ya asina hende ku nos prediká na dje por bin adorá Yehova einan. Anto loke nos ta hasi na Bètel i lugánan similar tambe ta yuda ku e trabou di prediká. Nos ta duna yudansa despues di un desaster natural pa hasi sigur ku nos rumannan no solamente ta haña loke nan mester, sino tambe ku nan por kuminsá reuní i prediká atrobe. Pues, ora nos kòrda ku e trabou di prediká ta e kos di mas importante ku Yehova ke pa nos hasi, nos lo haña mas gana di prediká regularmente. János, un ansiano na Hungria, a bisa: “Semper mi ta purba di keda kòrda ku niun otro trabou ku nos hasi pa Yehova no ta remplasá e trabou di prediká. Prediká ta nos trabou i asignashon di mas importante.”

7. Dikon Yehova ke pa nos sigui prediká? (1 Timoteo 2:​3, 4)

⁷ Si nos stima hende manera Yehova ta stima nan, nos gana i smak di prediká lo bira mas fuerte. Yehova ke pa mas tantu hende posibel skucha e bon notisia i asept’é. (Lesa 1 Timoteo 2:​3, 4.) Komo ku e bon notisia akí por salba bida di hende, Yehova ta yuda nos mehorá nos manera di papia ku hende tokante e notisia ei. Por ehèmpel, e foyeto Stima Hende—Yuda Hende Bira Disipel ta siña nos kon pa kuminsá kòmbersashon pa nos yuda hende bira disipel. Asta si e hendenan no kuminsá sirbi Yehova, kisas nan lo tin chèns di hasi esei promé ku fin di tribulashon grandi. Den futuro, kisas nan por kòrda loke nos a bisa nan i skohe pa sirbi Yehova. Pero e úniko manera ku esei por pasa ta si nos sigui prediká.

TENE PROFESIANAN DI BEIBEL NA MENTE

8. Kua profesianan a yuda Hesus usa su tempu bon?

⁸ Hesus tabata sa kon profesianan di Beibel lo a kumpli. Por ehèmpel, e tabata sa ku su sirbishi aki riba tera lo a dura tres aña i seis luna so. (Dán. 9:​26, 27) Tambe e tabata sa ku lo el a sufri i muri. (Luk. 18:​31-34) Komo ku Hesus tabata sa di e profesianan, el a usa su tempu di e mihó manera posibel. Sí, ku smak el a prediká pa kumpli ku su asignashon.

9. Kon profesianan di Beibel ta yuda nos sigui prediká ku entusiasmo?

⁹ Si nos komprondé e profesianan di Beibel, nos lo keda ku gana i smak di prediká. Nos sa ku fin di e mundu malbado akí ta djis tras di porta. E kosnan ku ta pasa rònt mundu i e aktitut ku hende tin awendia ta laga nos kòrda riba loke Beibel a bisa di e último dianan. Tin un profesia ta bisa ku e rei di zùit i e rei di nort lo bringa kontra otro “den e tempu di fin.” Nos ta komprondé ku esei ta referí na e enemistat ku tin entre Potensia Mundial Angloamerikano i Rusia ku su aliadonan. (Dán. 11:40) Tambe nos ta komprondé ku pia dje estatua den e profesia di Dánièl 2:​43-45 ta representá Potensia Mundial Angloamerikano. Nos ta konvensí ku un bes akí, sí un djis akí, Dios su Reino lo destruí tur gobièrnu humano. Tur e profesianan ei ta mustra ku nos ta serka serka di e fin, i ku nos tin ku hasi bon uso di nos tempu predikando e bon notisia.

10. Den ki otro manera profesianan di Beibel ta duna nos smak di sigui prediká?

¹⁰ Den profesianan di Beibel tambe tin un mensahe ku nos tin masha gana di konta otro hende. Carrie, un ruman ku ta biba na Repúblika Dominikana, a bisa: “Ora mi pensa riba e bunita kosnan ku Yehova a primintí di hasi den futuro, mi ta sinti ku mi tin ku konta otro hende. . . . Hende ta pasa den asina tantu kos ku mi ta realisá ku nan tambe mester haña sa di Yehova su promesanan.” Profesianan di Beibel ta mustra ku Yehova ta yuda nos hasi e trabou akí, i esei ta animá nos pa sigui prediká. Leila, ku ta biba na Hungria, a bisa: “Isaías 11:​6-9 ta mustra ku Yehova por yuda kualke hende kambia. Esei ta yuda mi papia tokante e bon notisia ku tur hende, asta esnan ku ta parse di no ke skucha.” Christopher, un ruman di Zambia, a bisa: “Marko 13:10 a profetisá ku lo prediká e bon notisia rònt mundu, i pa mi ta un onor di por yuda ku kumplimentu di e profesia akí.” Kua profesia di Beibel ta duna bo smak pa sigui prediká?

KONFIA DEN YEHOVA

11. Dikon Hesus tabatin mester di Yehova su yudansa pa sigui prediká ku entusiasmo? (Lukas 12:​49, 53)

¹¹ Hesus a konfia ku Yehova lo a yud’é sigui prediká ku entusiasmo. Apesar ku Hesus semper a trata tur hende ku rèspèt, e tabata sa ku e bon notisia tokante Dios su Reino lo trese hopi diskushon i oposishon fuerte. (Lesa Lukas 12:​49, 53.) E lidernan religioso no tabata gusta loke Hesus tabata prediká niun tiki. I ta p’esei nan a purba di mat’é vários biaha. (Huan 8:59; 10:​31, 39) Pero, Hesus a sigui prediká pasobra e tabata sa ku Yehova lo a yud’é. El a bisa: “E Tata, ku a manda mi . . . no a laga mi pa mi kuenta, pasobra semper mi ta hasi loke ta agrad’é.”—Huan 8:​16, 29.

12. Kon Hesus a prepará su disipelnan pa enfrentá oposishon?

¹² Hesus a kòrda su disipelnan ku nan tambe por konfia ku Yehova lo yuda nan prediká. Vários biaha el a sigurá nan ku Yehova lo yuda nan asta ora nan enfrentá persekushon. (Mat. 10:​18-20; Luk. 12:​11, 12) Na mes momento, el a spièrta nan pa ta kouteloso. (Mat. 10:16; Luk. 10:3) Tambe, el a splika nan pa no preshoná ni fòrsa niun hende pa skucha e bon notisia. (Luk. 10:​10, 11) Ademas, el a bisa nan pa hui ora nan haña nan ku persekushon. (Mat. 10:23) Aunke Hesus a prediká ku entusiasmo i a konfia den Yehova, e no tabata hinka su mes innesesariamente den peliger.—Huan 11:​53, 54.

13. Dikon bo por tin sigur ku Yehova lo yuda bo?

¹³ Awe nos tambe mester di Yehova su yudansa pa sigui prediká ku entusiasmo apesar di oposishon. (Rev. 12:17) Pero kon nos por tin sigur ku nos lo haña e yudansa ei? Wèl, ora nos analisá Hesus su orashon na Huan kapítulo 17, nos ta mira ku Hesus a pidi Yehova pa protehá su apòstelnan. I Yehova a kumpli ku e petishon ei. Den e buki di Echonan nos ta mira kon Yehova a yuda e apòstelnan prediká ku entusiasmo apesar di persekushon. Den e mesun orashon ei, Hesus a pidi Yehova tambe pa protehá esnan ku skucha e mensahe di bon notisia i bira su disipelnan den futuro. Anto abo tambe ta parti di esei. Ketu bai Yehova ta kontestá Hesus su orashon, pues bo por tin sigur ku lo e yuda abo meskos ku el a yuda e apòstelnan.—Huan 17:​11, 15, 20.

14. Kon nos sa ku nos lo por sigui prediká ku entusiasmo? (Wak e plachi.)

¹⁴ Nos por ferwagt ku durante e último parti di e último dianan lo bira mas difísil pa nos prediká. Pero Hesus a bisa ku nos por konta ku e yudansa ku nos tin mester pa sigui prediká ku entusiasmo. (Luk. 21:​12-15) Meskos ku Hesus i su disipelnan, nos lo no preshoná ni fòrsa niun hende pa skucha nos ni tampoko nos lo no pleita ni zundra. Asta na paisnan ku nos obra ta restringí, nos rumannan ta logra sigui prediká pasobra nan ta konfia den Yehova i no riba nan mes forsa. Meskos ku den promé siglo,Yehova ta duna nos su spiritu santu pa “e obra di predikashon por keda efektuá kabalmente” te ora e bisa e trabou ta kla. (2 Tim. 4:17) Pues, bo por tin sigur ku si bo dependé riba Yehova lo bo por sigui prediká ku entusiasmo.

KEDA POSITIVO

15. Kon nos sa ku Hesus tabatin un punto di bista positivo tokante e trabou di prediká?

¹⁵ Hesus a keda ku un punto di bista positivo tokante e trabou di prediká i esei a yud’é prediká ku entusiasmo. Mas o ménos un aña despues ku el a kuminsá prediká, el a mira ku hopi hende tabata dispuesto pa skucha e bon notisia. P’esei el a kompará nan ku un kunuku ku ta kla pa kosechá. (Huan 4:35) Mas o ménos un aña despues, el a bisa su disipelnan ku “e kosecha ta grandi.” (Mat. 9:​37, 38) Un tempu despues el a bisa atrobe: “E kosecha en bèrdat ta grandi . . . Roga Doño di e kosecha pa e manda trahadó na su kosecha.” (Luk. 10:2) Ta bisto anto ku Hesus nunka a pèrdè speransa ku hende lo skucha, i el a alegrá ora esei a pasa.—Luk. 10:21.

16. Kon Hesus su ilustrashonnan a yuda su disipelnan keda positivo i sigui prediká ku entusiasmo? (Lukas 13:​18-21) (Wak e plachi.)

¹⁶ Hesus a yuda su disipelnan tambe pa keda positivo i sigui prediká ku entusiasmo. El a usa dos ilustrashon pa kòrda nan ku nan trabou lo duna bon resultado. (Lesa Lukas 13:​18-21.) Promé, el a referí na un pipita di mòster pa siña su disipelnan ku e mensahe tokante e Reino lo sigui krese i nada lo no por par’é. Kaba, el a referí na zürdeg pa siña nan ku e mensahe tokante e Reino lo wòrdu prediká rònt mundu i hende lo hasi kambio aunke esaki lo no ta bisto mesora. Ku e ilustrashonnan ei Hesus a yuda su disipelnan mira ku nan trabou lo tin bon resultado.

17. Ki motibu nos tin pa keda positivo i sigui prediká ku entusiasmo?

¹⁷ Ora nos para pensa riba ki efekto nos trabou di prediká tin rònt mundu, esei ta yuda nos sigui prediká ku entusiasmo. Por ehèmpel, kada aña, miónes di hende ta bini Memorial i ta studia Beibel ku nos. Míles di hende ta batisá tur aña i ta kuminsá prediká huntu ku nos. Nos no sa kuantu hende mas lo skucha nos i kuminsá sirbi Yehova, pero loke sí nos sa ta ku Yehova ta bezig ta reuní un multitut grandi ku lo sobrebibí e tribulashon grandi. (Rev. 7:​9, 14) Komo ku Yehova, kende ta Doño di e kosecha, ta sigui mira ku ainda tin hende ku lo aseptá e bon notisia, nos tin bon motibu pa sigui prediká.

18. Kiko nos ke pa otro hende mira?

¹⁸ E berdadero disipelnan di Hesus semper a prediká ku entusiasmo. Ora hende a mira e kurashi i entusiasmo di e apòstelnan, nan a realisá ku nan “tabata hende ku tabata kana ku Hesus.” (Echo. 4:13) Asina tambe, nos ke pa ora hende wak nos prediká, nan mira ku nos tin e mesun entusiasmo ku Hesus.