Bo Ta Rekonosé e Bèrdat?

1. Kon abo ta sinti tokante e bèrdat?

KOMO Yehova su sirbidónan, nos stima e bèrdat ku tin den Dios su Palabra. Henter nos fe ta basá riba e bèrdat ei. (Rom. 10:17) Nos ta konvensí ku Yehova ta usa e kongregashon kristian komo “un pilá i apoyo di e bèrdat.” (1 Tim. 3:15) Anto nos ta masha kontentu pa obedesé “esnan ku ta dirigí” nos. Nan ta usa Beibel pa splika e bèrdat i ta duna nos guia ku ta yuda nos hasi Dios su boluntat.—Heb. 13:17.

2. Segun Santiago 5:​19, kiko por pasa ku nos despues ku nos haña e bèrdat?

² Pero, djis pasobra bo a aseptá ku esaki ta e bèrdat i ku Yehova ta guia su pueblo pa medio di su organisashon, no ke men ku bo no por desviá for di e bèrdat. (Lesa Santiago 5:19.) Kòrda ku no tin nada ku lo duna Satanas mas goso ku logra pone nos stòp di konfia den Beibel òf den e guia ku nos ta haña di Yehova su organisashon.—Efe. 4:14.

3. Dikon nos tin ku hasi esfuerso pa nos pega na e bèrdat? (Efesionan 6:​13, 14)

³ Lesa Efesionan 6:​13, 14. Un djis akí Satanas ta bai usa informashon falsu ku ta asina konvinsente ku tur nashon ta bai uni kontra Yehova. (Rev. 16:​13, 14) I nos por ferwagt tambe ku Satanas ta bai hasi mas esfuerso ainda pa logra engañá Yehova su pueblo. (Rev. 12:9) P’esei ta importante pa nos siña mira e diferensia entre bèrdat i mentira i pa ta obedesidu na e bèrdat. (Rom. 6:17; 1 Ped. 1:22) Nos tin ku siña hasi esei si nos ke sobrebibí tribulashon grandi.

4. Kiko nos lo analisá den e artíkulo akí?

⁴ Den e artíkulo akí, nos lo mira kua ta e dos kualidatnan ku nos tin ku traha riba dje pa nos por rekonosé e bèrdatnan di Beibel i pa aseptá guia for di Yehova su organisashon. Kaba nos lo papia tokante tres kos ku nos por hasi pa nos sigui pega na e bèrdat.

E KUALIDATNAN KU NOS MESTER

5. Kon rèspèt profundo pa Yehova lo yuda nos rekonosé e bèrdat?

⁵ Rèspèt profundo pa Yehova. Esei ke men ku nos ta stima Yehova asina tantu ku nos no ke hasi nada ku lo pon’é rabia. P’esei, nos ke sa bon e diferensia entre bon i malu, entre bèrdat i mentira, pa asina nos hasi Yehova kontentu. (Pro. 2:​3-6; Heb. 5:14) Anto komo ku nos sa ku e kosnan ku ta agradá hende mayoria di biaha ta kosnan ku Yehova ta odia, hamas nos mester permití miedu di hende bira mas fuerte ku nos amor pa Yehova.

6. Kon miedu di hende a pone dies kabesante di Israel trose e bèrdat?

⁶ Si nos miedu di hende ta mas grandi ku nos rèspèt profundo pa Yehova, nos por kuminsá bai tras di kosnan ku ta kontrali di e bèrdat. Wak por ehèmpel loke a pasa ku e 12 kabesantenan ku a bai spioná e pais ku Yehova a primintí di duna e israelitanan. Dies di nan a bisa e nashon: “Nos no por bai kontra e pueblo, pasobra nan ta muchu fuerte pa nos.” (Num. 13:​27-31) For di punto di bista di hende, ta bèrdat ku e kananeonan tabata mas fuerte ku e israelitanan. Pero bisando ku nan no por a vense e kananeonan a nifiká ku nan a laga Yehova afó. Bon mirá, e miedu ku nan tabatin di e kananeonan tabata mas fuerte ku nan amor pa Yehova. Loke e dies spionnan mester a hasi tabata focus riba loke Yehova tabata ke pa e nashon hasi. Nan mester a para pensa tambe riba tur loke Yehova a hasi pa nan poko tempu pasá. Si nan lo a hasi esei, nan lo a realisá ku e kananeonan no por a para banda di Yehova. Kontrali di e dies spionnan, Hosue ku Kálèb sí kier a agradá Yehova. P’esei nan a bisa e nashon: “Si SEÑOR ta kontentu ku nos, e ora ei E lo hiba nos na e tera akí i duna nos é.”—Num. 14:​6-9.

7. Kon nos por fortalesé nos rèspèt profundo pa Yehova? (Wak e plachi.)

⁷ Pa nos por fortalesé nos rèspèt profundo pa Yehova, nos focus mester ta pa agradá Yehova den tur nos desishonnan. (Sal. 16:8) Ora nos lesa un relato bíbliko, ta bon pa nos puntra nos mes: ‘Si ta ami tabata den e situashon ei, ki lo m’a hasi?’ Por ehèmpel, ban bèk na e relato di e 12 spionnan. Imaginá ku bo ta skuchando e dies spionnan bisa ku e israelitanan no por konkistá Kánan. Kiko abo lo a hasi? Lo bo a bai tras di loke nan a bisa i laga miedu di hende paralisá bo? Òf, bo amor pa Yehova i bo deseo pa agrad’é lo tabata mas fuerte? Ta tristu pa bisa pero e israelitanan no a kere ku Hosue i Kálèb tabata papia bèrdat. Anto debí na esei, Yehova no a laga e israelitanan ei drenta e pais ku el a primintí nan.—Num. 14:​10, 22, 23.

8. Ki kualidat nos mester traha duru pa kultivá, i dikon?

⁸ Humildat. Yehova ta revelá e bèrdat na hende humilde. (Mat. 11:25) Ora ku nos a kuminsá siña e bèrdat, nos tabata humilde i a aseptá yudansa. (Echo. 8:​30, 31) Pero, nos mester tene kuidou pa nos no bira orguyoso. Pasobra si nos ta orguyoso, nos por kuminsá pone nos opinionnan riba e mesun nivel ku e prinsipionan di Beibel i e guianan di Yehova su organisashon.

9. Kiko nos tin ku hasi pa keda humilde?

⁹ Pa nos por keda humilde, nos mester kòrda kon insignifikante nos ta, kompará ku Yehova. (Sal. 8:​3, 4) Nos por pidi Yehova tambe pa yuda nos bira mas humilde i kla pa siña. Anto Yehova di su banda lo yuda nos balorá su pensamentunan, ku ta den Beibel i ku su organisashon ta duna, mas ku esnan di nos. Ora bo ta hasiendo bo lesamentu di Beibel, ripará kon Yehova ta stima humildat i ta odia orguyo, arogansia i bromamentu. Ademas, hasi èkstra esfuerso pa keda humilde ora bo haña un asignashon ku ta duna bo un grado di outoridat òf ku ta pone ku bo ta mas bisto pa bo rumannan.

KON PA SIGUI PEGA NA E BÈRDAT

10. Kon Yehova a bin ta duna instrukshon i guia na su adoradónan?

¹⁰ Sigui konfia den e guia ku Yehova su organisashon ta duna. Den pasado, Yehova a usa Moises i despues Hosue pa duna Su pueblo, Israel, instrukshon. (Hos. 1:​16, 17) Miéntras ku e israelitanan a respetá e hòmbernan akí komo representantenan di Yehova Dios, kos tabata bai bon pa nan. Siglonan despues, ora ku a kuminsá ku e kongregashon kristian, e 12 apòstelnan tabata duna guia. (Echo. 8:​14, 15) Ku tempu, e grupo ei a bira mas grandi i a inkluí otro ansianonan na Herúsalèm. Debí ku e kongregashonnan tabata sigui e guia ku nan tabata haña for di e hòmbernan fiel ei, “e kongregashonnan a bira mas fuerte, i e kantidat di disipel a sigui oumentá.” (Echo. 16:​4, 5) Den nos tempu, Yehova ta usa su organisashon pa duna nos guia. Anto kos lo bai bon pa nos tambe si nos sigui e guianan ei. Pero, kon Yehova lo sinti si nos nenga di aseptá esnan ku el a skohe pa duna nos guia? Pa kontestá e pregunta ei, laga nos wak loke a pasa ora e israelitanan tabata na kaminda pa e pais ku Yehova a primintí nan.

11. Kiko a pasa ku e israelitanan ku a lanta kontra Moises, kende Yehova a skohe pa dirigí nan? (Wak e plachi.)

¹¹ Durante e israelitanan su biahe pa e pais ku Yehova a primintí nan, algun hòmber renombrá a kuestioná Moises i e asignashon ku Yehova a dun’é. Nan a bisa: “Henter e kongregashon [no Moises so] ta santu, kada un di nan, i SEÑOR ta meimei di nan.” (Num. 16:​1-3) Anto ta bèrdat, pa Yehova, “henter e kongregashon” tabata santu. Pero, el a skohe Moises pa dirigí Su pueblo. (Num. 16:28) Pues, ora e hòmbernan rebelde ei tabata kritiká Moises, en realidat ta Yehova nan tabata kritiká. Nan no a focus riba loke Yehova tabata ke. Mas bien, nan tabata focus riba loke nan tabata ke: mas poder i rekonosementu. Yehova a mata e kabesantenan di e rebelion i tambe míles di israelita ku a tuma parti pa nan. (Num. 16:​30-35, 41, 49) Pues, nos por tin sigur ku awe tampoko Yehova lo no keda niun tiki kontentu ku hende ku no ta aseptá guia ku su organisashon ta duna.

12. Dikon nos por sigui konfia den Yehova su organisashon?

¹² Semper nos por sigui konfia den Yehova su organisashon. Ora bira bisto ku nos mester ahustá nos komprondementu di un bèrdat bíbliko òf di e manera ku nos ta sirbi Yehova, Kuerpo Gobernante no ta duda pa hasi e kambio nesesario. (Pro. 4:18) Nan ta hasi esei pasó nan ke agradá Yehova mas ku kualke otro kos. Pero nan ta hasi esfuerso tambe pa nan desishon ta basá riba Beibel, e norma ku tur Testigu di Yehova mester pega na dje.

13. Kiko “e norma di palabra sano” ta, i kiko nos tin ku hasi kuné?

¹³ “Sigui pega na e norma di palabra sano.” (2 Tim. 1:​13, nota) “E norma di palabra sano” ta tur e siñansanan kristian den Beibel. (Huan 17:17) E siñansanan ei ta e base di tur loke nos ta kere aden. Yehova su organisashon a bin ta siña nos pa pega na e norma ei. Tanten ku nos hasi sigur di hasi esei, kos lo bai bon ku nos.

14. Kiko a laga ku algun kristian a lòs for di “e norma di palabra sano”?

¹⁴ Kiko lo pasa si nos lòs for di “e norma di palabra sano”? Ban wak algu ku a pasa den promé siglo. Parse ku entre algun di e kristiannan tabata kore e rumor ku e dia di Yehova a yega. Ta parse ku ta un karta—ku supuestamente Apòstel Pablo a skirbí—a bisa esei. Sin pèrdè pa gana, algun ruman na Tesalónika a kere e rumor i asta a kont’é na otronan. Pero nan lo no a bai tras di e rumor si nan a kòrda e kosnan ku Pablo a siña nan tempu e tabata serka nan. (2 Tes. 2:​1-5) Pues, Pablo a manda konsehá su rumannan na Tesalónika pa no kore kere tur loke nan tende. Anto pa yuda nan ta prepará pa futuro, el a kaba su di dos karta ku el a skirbi nan asin’akí: “At’akí mi kumindamentu—di ami, Pablo—skirbí ku mi mes man, ku ta un señal den tur karta; ta asin’akí mi ta skirbi.”—2 Tes. 3:17.

15. Ki nos tin ku hasi pa protehá nos mes di mentira ku parse di ta bèrdat? Duna un ehèmpel. (Wak e plachi.)

¹⁵ Kiko nos por siña for di loke Pablo a bisa e rumannan na Tesalónika? Ku ora nos skucha algu ku no ta kuadra ku loke nos a siña for di Beibel òf ora nos tende un rumor ku ta shòk nos, nos tin ku usa sabiduria. Por ehèmpel, tempu di Union Soviétiko, nos enemigunan a duna algun ruman un karta ku supuestamente a bini di nos sede mundial. E karta a bisa ku lo ta bon pa e rumannan lanta un organisashon di Testigunan di Yehova ku no tin ku sigui guia di e sede mundial. Aunke e karta riba su mes a parse outéntiko, e rumannan fiel a realisá ku loke e tabata bisa no ta kuadra ku loke nan a bin ta siña. Awe, enemigunan di e bèrdat tin biaha ta usa kosnan manera Internet i retnan sosial pa purba di konfundí i dividí nos. P’esei, nos mester analisá si loke nos ta tende òf lesa ta kuadra ku e bèrdatnan ku ya nos a siña. Asina ei, nos ta protehá nos mes i lo “no pèrdè kabes muchu lihé.”—2 Tes. 2:2; 1 Huan 4:1.

16. Kiko nos mester hasi si un ruman ta plama informashon ku ta bai kontra e bèrdat? (Romanonan 16:​17, 18)

¹⁶ Keda uní ku esnan ku ta leal na Yehova. Nos Dios ke pa nos ta uní den nos adorashon na dje. Anto esei lo ta e kaso tanten nos sigui pega na e bèrdat. Esnan ku plama kualke informashon ku ta bai kontra e bèrdat ta kousa desunion den e kongregashon. P’esei Yehova ta spièrta nos pa “evitá nan.” Si nos no hasi esei, nos mes por kuminsá kere kosnan ku no ta bèrdat i bira lomba pa Yehova.—Lesa Romanonan 16:​17, 18.

17. Dikon ta bon pa nos rekonosé e bèrdat i pega na dje?

¹⁷ Ora nos rekonosé e bèrdat i pega na dje, nos lo keda serka Yehova i sigui tene nos fe fuerte. (Efe. 4:​15, 16) Satanas lo no por engañá nos ku siñansanan ni informashon falsu. Durante e tribulashon grandi, nos lo ta safe bou di Yehova su kuido. P’esei, sigui pega na loke ta bèrdat i “e Dios di pas lo ta ku [bo].”—Flp. 4:​8, 9.