Pregunta di Lektor

Unda e 70 disipelnan ku Hesus a manda prediká tabata ora el a introdusí e Sena di Señor? Nan a bandon’é?

Nos no tin motibu pa pensa ku djis pasó nan no tabata t’ei ora Hesus a introdusí e Sena di Señor, ta nifiká ku nan a bandon’é òf ku Hesus no tabata kontentu ku nan. Hesus djis tabata ke ta huntu ku su apòstelnan.

Tantu e 12 nan komo e 70 nan tabata Hesus su disipel. Promé, el a skohe for di su hopi disipelnan 12 hòmber ku el a yama apòstel. (Luk. 6:​12-16) E tabata na Galilea ora “el a manda yama e 12 apòstelnan” i “a manda nan bai prediká e Reino di Dios i kura hende.” (Luk. 9:​1-6) Despues, ora ku e tabata na Hudea, el “a nombra 70 otro disipel i a manda nan dos dos.” (Luk. 9:51; 10:1) Pues, den diferente lugá Hesus tabatin disipel ku tabata prediká tokante dje.

E hudiunan ku a bira disipel di Hesus a sigui selebrá e Pasku Hudiu tur aña, probablemente huntu ku nan famia. (Éks. 12:​6-11, 17-20) Djis promé ku Hesus a muri, e huntu ku su apòstelnan a bai Herúsalèm. Pero e no a pidi tur su disipelnan di Hudea, Galilea i Perea pa bin selebrá e Pasku huntu ku nan. Ta parse ku Hesus djis ke tabata huntu ku su apòstelnan na e okashon ei. El a bisa nan: “Mi tabatin masha deseo di tene e sena di Pasku akí ku boso promé ku mi sufri.”—Luk. 22:15.

Pero, dikon e tabata ke ta huntu ku su apòstelnan so? E tabata sa ku lo no a tarda mashá ku lo el a muri komo “e Lamchi di Dios ku ta kita piká di mundu.” (Huan 1:29) Esei mester a pasa na Herúsalèm, unda pa basta tempu tabata ofresé sakrifisio na Dios. Hesus su morto lo a logra un liberashon hopi mas grandi ku e liberashon ku e israelitanan a haña despues ku nan a kome e lamchi e anochi ku nan a sali for di Egipto. (1 Kor. 5:​7, 8) Loke Hesus a hasi ei a permití e 12 apòstelnan bira parti di e fundeshi di e kongregashon kristian. (Efe. 2:​20-22) Ta interesante pa nota ku e stat santu, Herúsalèm, tin “12 piedra di fundeshi,” i riba nan tin “e 12 nòmbernan di e 12 apòstelnan di e Lamchi” skirbí. (Rev. 21:​10-14) Pues, e fiel apòstelnan lo tabatin un funshon importante den kumplimentu di Dios su propósito. P’esei, ta di komprondé dikon Hesus tabata ke ta huntu ku nan pa su último Pasku Hudiu i, djis despues, pa introdusí e Sena di Señor.

E otro disipelnan, inkluso e 70, no tabata presente na e okashon ei. Pero, tur disipel ku a keda fiel lo a benefisiá di e Sena di Señor. Tur e disipelnan ei ku ku tempu a bira kristian ungí lo a forma parti di e pakto pa un reino, e pakto ku Hesus a papia di dje ku e apòstelnan e anochi ei.—Luk. 22:​29, 30.