Mantené Bo Goso den Bo Behes

1-2. Kiko Yehova ta pensa di nos fiel rumannan di edat? (Salmo 92:​12-14; wak e plachi.)

NA ALGUN parti di mundu, ta un onor pa bira bieu. Na otro lugá, hende ta hasi tur loke ku nan por pa nan no mustra bieu. Por ehèmpel, si nan mira un kabei blanku, nan ta kore rank’é! Pero ni maske kiko nan hasi, nan no por stòp e proseso di bira bieu.

² Pero kiko nos amoroso Tata den shelu ta pensa di nos rumannan di edat? (Pro. 16:31) E ta bisa ku nan ta bunita manera palu ku ta bona i duna fruta. (Lesa Salmo 92:​12-14.) Dikon e ta bisa esei? Pasobra palu bieu hopi biaha ta masha bunita. Nan tin hopi blachi i flor. Por ehèmpel, na Hapon tin palu di flor sakura ku ta saka flor masha bunita. Algun di nan ta mas ku mil aña bieu, i ta nan ta esnan di mas bunita. Pa Yehova, nos fiel rumannan di edat ta mes bunita ku e palunan ei. Yehova no ta enfoká riba e kabeinan blanku. Mas bien, e ta apresiá nan bunita kualidatnan, manera nan perseveransia i lealtat. Nan a sirbié pa hopi aña, i nan a keda fiel na dje den bon i den malu.

3. Duna ehèmpel di e manera ku Yehova a usa hende di edat avansá pa kumpli ku su propósito.

³ Yehova ta sigui balorá nos segun ku nos edat ta subi.a Hopi biaha, Yehova a usa hende di edat pa kumpli ku su propósito. Por ehèmpel, Sara tabata di edat avansá ora ku Yehova a bisa ku lo e bira mama di un nashon poderoso i antepasado di e Mesías. (Gén. 17:​15-19) Moises tabatin basta edat ora ku Yehova a dun’é e tarea pa libra e israelitanan for di Egipto. (Éks. 7:​6, 7) Anto Apòstel Huan tambe tabata di edat avansá ora Yehova a us’é pa skirbi sinku buki di Beibel.

4. Segun Proverbionan 15:​15, kiko por yuda ruman di edat trata ku e problemanan ku nan ta enfrentá? (Wak e plachi.)

⁴ Nos rumannan di edat kada bes ta haña nan mes ku problema nobo segun ku nan edat ta subi. Un ruman muhé a bisa: “Bira grandi no ta wega.” Pero si nos rumannan di edat tin goso,b esei por yuda nan soportá e difikultatnan ku behes ta trese kuné. (Lesa Proverbionan 15:15.) Den e artíkulo akí, nos lo trata algun kos práktiko ku ruman di edat por hasi pa mantené nan goso. Nos lo trata tambe kon otro ruman por yuda e rumannan di edat den nan kongregashon. Promé, nos ta bai wak dikon no ta fásil pa mantené nos goso segun ku nos edat ta subi.

KON BEHES TA AFEKTÁ BO GOSO?

5. Kiko ta pone algun ruman di edat pèrdè nan goso?

⁵ Kiko lo por pone bo pèrdè bo goso? Kisas bo ta sinti bo tristu pasobra bo no por hasi e kosnan ku un tempu bo tabata hasi. Kisas bo ta blo pensa: ‘Mare mi tabata yòn i bon di salú manera ántes.’ (Ekl. 7:10) Por ehèmpel, un ruman ku yama Ruby a bisa: “Mi tin masha problema pa bisti paña, pasobra mi no por move bon i tin doló tur kaminda. Algu simpel manera hisa pia pa bisti mea ta masha difísil pa mi. Mi mannan ta hasi hopi doló i mi no por usa mi dedenan bon. P’esei ta masha difísil pa mi hasi asta kos simpel.” Harold, kende tabata sirbi na Bètel, a bisa: “Tin biaha, mi ta sinti mi hopi frustrá pasobra mi no por hasi tur e kosnan ku ántes mi tabata gusta hasi. Tempu mi tabata yòn, mi tabatin bon kondishon. Mi tabata gusta hunga beisbòl. Hende tabatin kustumber di bisa: ‘Duna Harold e bala, e por yuda nos gana e wega.’ Pero awor, mi ta kere mi no por ni tira un bala.”

6. (a) Menshoná algun otro motibu ku ruman di edat por sinti nan tristu. (b) Kiko por yuda ruman di edat disidí si nan tin ku stòp di kore outo òf nò? (Wak den e edishon di e revista akí e artíkulo titulá “Mi Mester Stòp di Kore Outo?”)

⁶ Kisas bo ta sinti bo tristu pasobra awor ta otro hende mester hasi kos pa bo, kos ku ántes bo mes tabata hasi. Esei ta asina foral ora bo tin mester di un hende pa kuida bo òf bo tin ku bai biba serka un di bo yunan. Kisas bo no por kore outo mas ni sali bo so mas, pasobra bo salú òf bo bista a bai hopi atras. Esei ta hopi tristu! Bèrdat bo no por hasi hopi di e kosnan ku bo tabata hasi ántes. Pero no lubidá ku bo ta keda masha balioso den bista di Yehova i di e rumannan. Ademas, bo por tin sigur ku Yehova ta komprondé kon bo ta sinti. Loke ta mas importante pa Yehova ta loke tin den bo kurason, esta, e amor grandi ku bo tin pa Yehova i pa bo rumannan.—1 Sám. 16:7.

7. Kiko lo yuda ruman di edat ku ta tristu pasobra nan ta pensa ku nan lo no ta na bida ora e fin bini?

⁷ Loke por ta hasi abo tristu ta ku kisas lo bo no ta na bida pa mira fin di e mundu malbado akí. Kiko por yuda bo si bo ta sinti asina? Wèl, purba di kòrda ku Yehova tin motibu pakiko e ta warda ku pasenshi pa trese e fin. (Isa. 30:18) Su pasenshi ta duna miónes di hende chèns di siña konos’é i skohe pa sirbié. (2 Ped. 3:9) Ora bo ta sinti bo tristu, purba di pensa riba tur e hendenan ku lo benefisiá di Yehova su pasenshi. Kisas asta algun di bo famianan lo benefisiá di esei.

8. Kiko ta algun kos ku ruman di edat sa hasi ora nan tin doló òf nan ta malu?

⁸ Sea ku nos ta yòn òf di edat avansá, ora nos ta malu òf nos tin doló, tin hopi chèns ku nos lo bisa òf hasi algu ku despues nos ta lamentá. (Ekl. 7:7; Sant. 3:2) Tuma por ehèmpel, e hòmber fiel Yòb. Ora e tabata sufri, el a “papia sin pensa.” (Yòb 6:​1-3) Ademas, debí na malesa òf remedi, hende di edat por hasi òf papia kos ku normalmente nan lo no hasi ni papia. Klaru ku niun di nos lo no ke usa nos edat òf nos salú komo un èksküs pa trata otro hende malu òf pa bira eksigente. Anto si nos sa ku nos a papia malu ku un hende, ta bon pa nos pidi despensa mas pronto posibel.—Mat. 5:​23, 24.

KON BO POR MANTENÉ BO GOSO?

9. Dikon bo mester aseptá yudansa di otro hende? (Wak e plachi.)

⁹ Aseptá yudansa di otro hende. (Gal. 6:2) Kisas bo ta haña difísil pa hasi esei. Un ruman ku yama Gretl a bisa: “Tin biaha, ta duru pa mi pidi hende yuda mi, pasobra mi ta pensa ku lo mi ta stroba nan. A tuma tempu pa mi kambia mi manera di pensa i aseptá ku mi tin mester di yudansa.” Ora bo ta aseptá yudansa di otro hende, bo ta duna nan chèns pa sinti e goso ku ta bini di duna. (Echo. 20:35) Anto bo lo keda kontentu pa mira ku tin hende ta stima bo i nan ke kuida bo.

10. Dikon bo mester kòrda mustra gratitut? (Wak e plachi.)

¹⁰ Mustra ku bo ta gradisidu. (Kol. 3:15; 1 Tes. 5:18) Nos ta keda masha kontentu ora hende yuda nos. Pero tin biaha, nos por lubidá di bisa danki. Kòrda ku ora nos smail ku nos rumannan i yama nan danki, nan lo sa ku nos ta apresiá nan. Leah, kende ta kuida ruman di edat na Bètel, a bisa: “Un di e ruman muhénan ku mi ta kuida semper ta duna mi kartika pa yama mi danki. E palabranan ta masha lif; mi gusta haña nan. Mi ta keda kontentu ku e ta apresiá mi yudansa.”

11. Kon bo por yuda otro hende? (Wak e plachi.)

¹¹ Purba di yuda otro hende. Ora bo ta pensa riba otro hende i bo ta purba di yuda nan, lo bo pensa ménos riba bo mes problemanan. Un dicho afrikano ta kompará hende di edat ku un biblioteka yen di buki ku por siña hende lès balioso. Pero si hende no lesa e bukinan ei, nan no por benefisiá. Asina tambe, e hóbennan no por siña e lèsnan balioso si nos no papia ku nan i kompartí nos konosementu i eksperensia ku nan. Siña konosé e hóbennan. Bo por hasi nan pregunta, i skucha kiko nan ta konta bo tokante nan bida. E ora ei, konta nan kon Yehova a yuda bo, i splika nan ku nan lo ta felis si nan obedesé Yehova. Sin duda, lo bo sinti bo felis ora bo animá i fortalesé e hóbennan.—Sal. 71:18.

12. Segun Isaías 46:​4, kiko Yehova ta primintí ku lo e hasi pa su sirbidónan di edat? (Wak e plachi.)

¹² Pidi Yehova duna bo forsa. Tin biaha, bo por sinti bo kansá òf suak, i esei por desanimá bo. Pero kòrda ku Yehova tin energia pa no kaba. Beibel ta bisa ku Yehova nunka “no ta kansa ni keda agotá.” (Isa. 40:28) Pues, e por duna su fiel sirbidónan di edat tur e forsa ku nan tin mester. (Isa. 40:​29-31) Es mas, el a primintí di yuda nan. (Lesa Isaías 46:4.) I Yehova semper ta kumpli ku su palabra. (Hos. 23:14; Isa. 55:​10, 11) Ora bo pidi Yehova yuda bo, lo e duna bo e yudansa ku bo tin mester. E ora ei, lo bo sinti kuantu Yehova ta stima bo, i esei sigur lo duna bo goso.

13. Segun 2 Korintionan 4:​16-18, kiko nos tin ku keda kòrda? (Wak e plachi.)

¹³ Kòrda ku lo bo no keda bieu pa semper. Ora nos keda kòrda ku un situashon difísil ku nos ta pasando aden ta algu temporal, ta mas fásil pa nos want’é. Beibel ta sigurá nos ku behes i malesa ta kos temporal. (Yòb 33:25; Isa. 33:24) Pues, bo por mantené bo goso si bo keda kòrda ku den futuro lo bo ta mas salú, mas fuerte i mas bunita ku nunka. (Lesa 2 Korintionan 4:​16-18.) Pero kiko otro hende por hasi pa yuda?

KON OTRO HENDE POR YUDA?

14. Dikon ta importante pa bishitá i bèl nos rumannan di edat?

¹⁴ Bishitá i bèl e rumannan di edat regularmente. (Heb. 13:16) Hende di edat por sinti soledat. Un ruman hòmber ku yama Camille ta sinti asina. El a bisa: “Henter dia, mi ta será den kas. Mi ta sinti mi anshá i frustrá pasobra mi no por sali for di kas i mi no tin masha kos di hasi. Mi ta sinti mi manera un leon será den kouchi.” Ora nos ta bishitá nos rumannan di edat, nan ta sinti ku nos ta stima nan i balorá nan. Probablemente, nos tur ta kòrda un biaha ku nos tabatin intenshon di bèl òf bishitá un ruman di edat, pero nos no a hasié. Nos tur tin un bida drùk. Pues, kiko por yuda nos hasi “e kosnan mas importante,” manera bishitá nos rumannan di edat? (Flp. 1:10) Kisas ta bon pa bo pone un nota den bo kalènder pa bo kòrda manda un mensahe òf bèl un ruman di edat den bo kongregashon. Ademas, bo por programá un dia pa bishitá nan pa bo no lubidá.

15. Kiko asina ruman yòn ku ruman di edat por hasi huntu?

¹⁵ Kisas bo ta yòn, i bo no sa kiko pa papia òf hasi ku un ruman di edat. Pero no wòri muchu. Djis purba di ta un bon amigu òf amiga. (Pro. 17:17) Papia ku e rumannan di edat sea promé òf despues di reunion. Kisas bo por puntra nan kua ta nan teksto di Beibel faborito, òf pidi nan konta bo un kos prèt ku a pasa ku nan tempu nan tabata mucha. Bo por invitá nan pa wak JW Broadcasting^® huntu ku bo. Lo bo por yuda nan tambe ku kos ku nan mes no por hasi. Por ehèmpel, bo por yuda nan update nan tablet òf nan telefòn, òf bo por download e publikashonnan ku nan mester pa reunion. Un ruman muhé ku yama Carol a bisa: “Bo por ofresé e rumannan di edat pa hasi kos huntu ku nan ku abo ta haña leuk. Maske mi ta di edat, ainda mi ke disfrutá di bida. Mi gusta hasi kómpras, bai kome i bai den naturalesa.” Un otro ruman ku yama Maira a bisa: “Mi tin un amiga di 90 aña. E ta 57 aña mas grandi ku mi. Pero hopi biaha mi ta lubidá esei, pasobra nos ta pasa masha dushi huntu. Nos ta hari i wak pelíkula huntu. Anto ora nos tin un problema, nos ta pidi otro konseho.”

16. Dikon ta bon pa nos kompañá ruman di edat ora nan ta bai dòkter?

¹⁶ Kompañá ruman di edat ora nan ta bai dòkter. Bo por hiba nan dòkter, pero bo por keda ku nan tambe pa hasi sigur ku e personal médiko ta trata nan bon i duna nan e atenshon ku nan mester. (Isa. 1:17) Bo por yuda hasiendo nota di loke dòkter ta bisa. Un ruman di edat ku yama Ruth a bisa: “Hopi biaha, ora mi bai dòkter mi so, dòkter no ta tuma mi na serio. Tin biaha, dòkter ta bisa mi: ‘Bo no falta nada; ta bo idea ku bo ta malu.’ Pero ora un hende kompañá mi, e ora ei sí dòkter ta trata mi bon. Mi ta masha gradisidu ku mi rumannan ta saka tempu pa kompañá mi bai dòkter.”

17. Den ki maneranan bo por prediká huntu ku nos rumannan di edat?

¹⁷ Traha ku ruman di edat den sirbishi. Tin ruman di edat ku no tin forsa pa prediká di kas pa kas. Kon nos por yuda nan? Por ehèmpel, nos por invitá un ruman muhé di edat pa prediká ku nos ku garoshi. Nos por asta bini ku un stul p’e por sinta banda di e garoshi. Òf nos por pidi un ruman hòmber di edat kompañá nos na un estudio di Beibel, i kisas nos por asta tene e estudio na su kas. E ansianonan por hasi areglo pa tene salida pa sirbishi na kas di ruman di edat, ya asina ta mas fásil pa nan tambe sali den sirbishi. Yehova ta keda kontentu ora nos ta hasi esfuerso pa mustra amor i rèspèt na nos rumannan di edat.—Pro. 3:27; Rom. 12:10.

18. Kiko nos lo trata den e siguiente artíkulo?

¹⁸ E artíkulo akí a kòrda nos ku Yehova ta stima i balorá nos rumannan di edat. Anto nos tur den kongregashon tambe ta stima nan i balorá nan. Rumannan di edat, maske boso ta haña boso ku hopi difikultat, Yehova lo yuda boso mantené boso goso. (Sal. 37:25) Ta un animashon grandi pa sa ku den futuro boso lo ta mas salú, mas fuerte i mas bunita ku nunka! Pero kiko si bo ta duna kuido na hende malu? Kisas bo ta kuida un famia di edat, un mucha òf un amigu ku ta malu? Kon bo por mantené bo goso? Nos lo trata kontesta riba e preguntanan ei den e siguiente artíkulo.