Mi Mester Stòp di Kore Outo?

BO TIN hopi aña ta kore outo? Kisas bo ta gusta ku bo tin bo mes outo. Bo por bai unda ku bo ke i ki ora ku bo ke. Pero bo famia i amigunan ta preokupá pa bo siguridat i nan ta haña ku bo mester stòp di kore outo. Abo no por komprondé dikon nan ta asina preokupá.

Si bo ta den un situashon asina, kiko por yuda bo disidí si bo mester stòp di kore outo òf nò?

Na algun pais, lei ta eksigí ku ora shofùr ku ta riba sierto edat ke renobá nan reibeweis, un dòkter mester duna aprobashon pa nan por sigui kore outo. Komo kristian, nos ta obedesé e leinan ei. (Rom. 13:1) Asta si na bo pais no tin lei asina, tin manera ku bo por sa si bo ta kore outo bon ainda.

CHÈK BO KOREMENTU DI OUTO

E website di un organisashon pa hende di edat ta sugerí pa bo hasi bo mes e siguiente preguntanan:

Mi tin problema pa wak bòrchi di tráfiko òf pa wak bon anochi?
Mi por bira mi kabes pa wak den spil i pa wak outo ku ta den mi banda?
Mi por reakshoná lihé? Por ehèmpel, mi por kita pia for di gas i primi brek lihé?
Mi ta kore outo asina pokopoko ku mi ta stroba tráfiko?
Último tempu, tabatin biaha ku mi ta kasi dal outo? Òf mi outo tin vários raspá i sla pasobra mi a dal den opheto ku mi no a mira?
Polis a para mi pa mi manera di kore outo?
Mi a yega di kabishá tras di stür?
Mi ta bebe remedi ku por afektá mi korementu di outo?
Mi famia òf amigunan a bisa mi ku nan ta preokupá pa mi manera di kore outo?

Si bo kontesta tabata “sí” riba un òf dos di e preguntanan akí, kisas lo bo tin ku hasi algun kambio. Por ehèmpel, bo por kuminsá kore outo ménos, foral anochi. Sigui chèk regularmente kon bo korementu ta. Bo por pidi un famia di bo òf un amigu pa bisa bo kiko nan ta pensa di bo manera di kore outo. Podisé bo por tuma un lès pa mehorá bo korementu di outo. Pero si bo kontesta tabata “sí” riba vários di e preguntanan, e ora ei kisas ta mihó bo stòp di kore outo.a

KON BEIBEL POR YUDA BO TUMA BON DESISHON?

Kisas bo no ta haña ku bo manera di kore outo a bai atras. Podisé bo ta haña difísil pa asta pensa riba e asuntu di no kore outo mas. P’esei bo no ke ni papia di dje tampoko. Den tal kaso, kon Beibel por yuda bo pensa kla i tuma un bon desishon? Laga nos wak dos prinsipio di Beibel ku por yuda bo.

Sea un persona modesto. (Pro. 11:2) Segun ku nos edat ta subi, nos bista, nos oido i nos múskulonan ta bai atras. Anto nos ta reakshoná hopi mas slo tambe. P’esei, hopi hende ta stòp di hunga sierto deporte ora nan edat subi, pasobra nan ta realisá ku awor nan por sufri leshon mas lihé. Awèl, mesun prinsipio ta konta pa korementu di outo. Dado momento, un persona modesto ta aseptá su limitashonnan i disidí di stòp di kore outo pa su mes siguridat. (Pro. 22:3) Anto un persona modesto ta dispuesto pa skucha ora otro hende ta bis’é ku nan ta preokupá pa su korementu di outo.—Kompará ku 2 Sámuèl 21:15-17.

Evitá di bira kulpabel di morto di otro hende. (Deu. 22:8) Un outo ta manera un arma peligroso si no maneh’é na un manera safe. Un persona ku ta sigui kore outo maske e no ta un bon shofùr mas, lo por pone su bida i bida di otro hende na peliger. Anto si e kousa un aksidente fatal, lo e por bira kulpabel di morto di otro hende.

No pensa ku lo bo no bal nada mas òf ku otro hende lo stòp di respetá bo si bo disidí di stòp di kore outo. Yehova stima bo, i e ta kontentu ku bo ta konsiente di bo limitashonnan, ku bo ta un persona humilde i ku bo ta pensa riba e bienestar di otro hende. Ademas, Yehova ta primintí ku lo e sostené bo i konsolá bo. (Isa. 46:4) Hamas lo e bandoná bo. Pues, pidié duna bo sabiduria i yuda bo usa e bon konsehonan for di Beibel pa disidí si bo ta stòp di kore outo òf no.

Kon Otro Hende Por Yuda?

Hopi biaha, un miembro di famia ta e mihó persona pa papia ku un persona di edat tokante su korementu di outo. Òf kisas abo ta un amigu di e shofùr di edat, i bo ta tende otro hende bisa ku nan ta preokupá tokante su korementu. Tuma nan komentarionan na serio. Podisé bo mes por pidi e shofùr pa bo kore kuné den outo. Si ta nesesario, papia kuné tokante su korementu. Promé ku bo papia kuné, pone bo mes den su sapatu. Tene kuenta ku su sintimentunan, pero sea franko kuné. Ora bo papia kuné, no enfoká muchu riba su edat, pero riba su manera di kore outo. Na lugá di bisa: “Bo no ta kore outo bon mas,” ta mihó bo bisa algu manera: “Mi ta preokupá tokante bo siguridat ora bo ta kore outo.” Kòrd’é di loke Beibel ta bisa tokante modestia i kulpa di sanger, i bis’é ku bo sa ku e semper ke obedesé loke Beibel ta bisa.

Nos tur mester purba di imaginá kon un hende lo sintié si e mester stòp di kore outo. Podisé e ta sinti ku el a pèrdè su libertat di bai kaminda e ke ora ku e ke. Kon nos por yud’é? Nos por mustra komprenshon i ofresé pa yud’é. (Pro. 17:17) No warda pa e persona pidi bo left, pasobra lo e por sinti ku e ta molestiá bo. Kisas bo por ofresé pa traha un skèdjel p’e pa asina semper tin un hende ku por hib’é hasi kos importante manera bai reunion, bai sirbishi, hasi kómpras i bai sita di dòkter. Sigur’é ku ta un plaser pa bo hasi esei p’e i pa pasa tempu huntu kuné.—Rom. 1:11, 12.

a Pa mas informashon, wak e artíkulo na spañó “¿Corre usted un gran riesgo de sufrir accidentes de tránsito?” den e ¡Despertad! di 22 di ougùstùs 2002.