Pregunta di Lektor

Kiko ta e “propósito,” òf “pensamentu,” ku Yehova ta bai hinka den kurason di e nashonnan un djis akí?

Papiando tokante kon tribulashon grandi lo kuminsá, Revelashon 17:16 i 17 ta bisa: “E dies kachunan ku bo a mira i e bestia salbahe lo odia e prostituta. Nan lo kita tur kos for di dje i lag’é sunú; nan lo kome su karni i kim’é kompletamente ku kandela. Esei ta pasobra Dios a hinka den nan kurason pa kumpli ku Su propósito, [“Su pensamentu,” nota] sí, pa kumpli ku e meta ku nan tin, esta, di duna e bestia salbahe nan outoridat pa reina komo rei te ora ku e palabranan di Dios kumpli.” Den pasado, nos publikashonnan a bisa ku e “propósito,” òf pensamentu, ku Yehova ta bai hinka den kurason di e nashonnan ta pa destruí religion falsu.

Pero, nos mester ahustá nos komprondementu. Loke Yehova ta bai hinka den kurason di e nashonnan ta pa “duna e bestia salbahe nan outoridat pa reina komo rei.” Pa nos komprondé kon e profesia ei ta bai kumpli, laga nos kontestá e siguiente preguntanan.

Ken e personahenan den e profesia ta representá? “E prostituta” ta “Babilonia, e Grandi” ku ta referí na tur religion falsu. E “bestia salbahe koló kòrá bibu” ta representá Nashonnan Uní. E organisashon ei a kuminsá funshoná na 1919 ku e nòmber Liga di Nashonnan. (Rev. 17:​3-5) Anto e “dies kachunan” ta representá tur gobièrnu ku ta duna nan apoyo na e bestia salbahe.

Kiko e prostituta i e bestia salbahe koló kòrá bibu tin di haber ku otro? E prostituta ta “sintá riba” e bestia salbahe. Esei ke men ku e prostituta ta apoyá e bestia i ta purba di pon’é hasi loke e ke.

Kiko ta bai pasa ku e prostituta? E bestia salbahe huntu ku e dies kachunan “lo odia e prostituta” asina tantu ku nan lo kita tur loke e tin i saka na kla tur e kosnan teribel ku el a hasi. Djei nan ta bai destruyé kompletamente, ku ta presis loke Yehova a bisa ku lo sosodé. (Rev. 17:1; 18:8) Asina religion falsu lo yega na su fin. Pero, promé ku esei pasa, Yehova ta bai pone e nashonnan hasi algu ku nunka a yega di sosodé.

Kiko Yehova ta bai pone e nashonnan hasi? E ta bai pone “Su propósito” den kurason di e “dies kachunan.” Esei lo ta pa duna Nashonnan Uní, esta, “e bestia salbahe [koló kòrá bibu] nan poder i outoridat.” (Rev. 17:13) Esei ta nifiká ku no ta e gobièrnunan mes lo bini ku e idea pa duna e bestia salbahe nan poder i outoridat. Mas bien ta Dios mes lo pone nan hasi esei. (Pro. 21:1; kompará ku Isaías 44:28.) Esaki ta algu ku lo bai pasa rápidamente. Na e momento ei, e bestia salbahe lo kumpli ku Yehova su huisio. Sí, lo e destruí religion falsu kompletamente.

Kiko ta bai pasa? Nos no tin ku keda wak notisia pa purba di mira kon e nashonnan pokopoko ta duna mas apoyo na Nashonnan Uní. Dikon? Pasobra nos ta ferwagt ku diripiente Yehova lo hinka den kurason di e nashonnan pa duna e bestia salbahe nan poder i outoridat, sí, sin previo aviso. Ora esei sosodé, nos sa ku tribulashon grandi ta bai kuminsá. Mientrastantu, “laga nos keda lantá i mantené nos sano huisio” pasobra e kambionan ku ta na kaminda lo bini diripiente!—1 Tes. 5:6.