Kon Bo Por Kombatí e Kansansio Ku Pandemia Ta Kousa?

Bo a kuminsá kansa di biba bou di e miedu konstante di COVID-19? Si ta asina, no ta bo so. Pa hopi luna kaba, hende rònt mundu mester a adaptá nan bida pa motibu di e pandemia akí. Dr. Hans Kluge, direktor regional di Organisashon Mundial di Salú pa Europa a bisa ku hopi hende “a hasi sakrifisio grandi pa por yuda stòp COVID-19 di plama.” El a sigui bisa: “Den sirkunstansia asina, ta fásil i normal pa sinti bo desanimá i sin smak di hasi nada, loke ta señal di kansansio.

Si bo ta eksperensiá e kansansio ku e pandemia akí ta kousa, no desesperá. Beibel ta yudando hopi hende trata ku e periodo yen di strès akí, i e por yuda bo tambe.

Kiko e kansansio ku pandemia ta kousa ta enserá?

E echo ku un hende ta sintié kansá debí na e pandemia no ta nifiká ku e tin un malesa. E kansansio ta un reakshon natural di hende. Dikon? Pasobra un pandemia ta kambia un hende su bida pa un periodo largu i por pone hende sinti nan insigur tokante futuro. Kada persona ta reakshoná diferente, pero algun di e síntomanan mas komun ta:

Falta di motivashon
Kambio den kustumber di kome i di drumi
Mal beis; kla pa rabia
Strès ora tin ku hasi tarea ku ántes no tabata niun problema
Problema pa konsentrá
E sintimentu ku no tin speransa

Dikon e tipo di kansansio ei ta peligroso?

Kansansio ku pandemia ta kousa por ta peligroso pa nos mes i pa otro hende. Si nos no lucha kontra dje, pokopoko nos por kuminsá pèrdè motivashon pa kumpli ku e medidanan di protekshon kontra COVID. Ku tempu, nos por kuminsá neglishá e peliger di e vírùs, apesar ku e ta sigui plama i mata hende. Kansá di biba bou di restrikshon, kisas nos ta bai buska mas libertat, loke por pone nos bida i bida di otro hende na peliger.

Den e periodo difísil akí, hopi hende ta mira pa nan mes ku di bèrdat ta manera Beibel ta bisa: “Si bo desmayá den e dia di angustia, bo forsa ta keda limitá.” (Proverbionan 24:10) Pero den Beibel tin vários prinsipio ku por yuda nos trata ku situashon ku por desanimá nos, manera e pandemia akí.

Ki prinsipio di Beibel por yuda bo kombatí e kansansio ku pandemia ta kousa?

Mantené distansia físiko, pero keda sí den kontakto ku bo amistatnan

Loke Beibel ta bisa: “Un amigu . . . ta nasí pa tempu di atversidat.”—Proverbionan 17:17.

Dikon esei ta importante: Amigu di bèrdat ta animá nos. (1 Tesalonisensenan 5:11) Pero si nos ta nos so pa hopi tempu, esei ta pone nos salú na peliger.—Proverbionan 18:1.

Purba esaki: Mantené kontakto ku bo amigunan sea via yamada di telefòn, yamada via vidio, e-mail òf mensahe via telefòn. Si bo tin un mal dia, tuma kontakto ku nan. Pero puntra nan tambe riba un base regular kon ta bai ku nan. Kompartí idea tokante kiko ta yuda boso trata ku e situashon di pandemia. Pensa riba algu bon ku bo por hasi pa un amigu òf amiga, esei sigur lo alegrá boso tur dos su dia.

Loke algun hende a bisa

“Mi ta purba di palabrá ku mi amigunan pa nos papia ku otro online via yamada di vidio. Tin biaha, mi ta papia ku un hende so. Pero tin biaha mi ta haña ta leuk pa forma un grupo, i nos ta hunga wega òf gewon kòmbersá. Klaru ku esei no ta meskos ku mira otro en persona, pero e ta yuda sí. E pandemia a hasi bida difísil pa nos tur, p’esei ta importante pa nos mantené kontakto ku nos amigunan i laga nan sa onestamente kon nos ta sinti. Esei kisas por ta difísil pa hasi, pero ta nos tur tin mester di yudansa.”—Megan, Canada.

“Nos ta sinti falta di nos famia i amigunan, pero nos a haña otro manera pa laga nan sa ku nos ta stima nan. Komo famia, nos a traha pa hopi di nos amigunan karchi ku teksto di Beibel di animashon i saku chikitu ku regalito pa laga nan sa ku nos ta kòrda riba nan. Nos a sinti nos masha felis! E tempu ku nos ta pasa hasiendo kos pa otro hende ta yuda nos lubidá nos mes preokupashonnan i problemanan.”—Emma ku su kasá, Nathan, huntu ku nan yunan, Eli i Hope, Merka.

Hasi lo mihó ku bo por den bo sirkunstansia

Loke Beibel ta bisa: “[Usa] boso tempu di e mihó manera.”—Efesionan 5:16.

Dikon esei ta importante: Ora bo ta usa bo tempu bon, esei por yuda bo keda positivo i no preokupá di mas.—Lukas 12:25.

Purba esaki: En bes di konsentrá riba loke bo no por hasi mas, pensa riba e kosnan ku sí bo por hasi awor. Por ehèmpel, kisas awor bo tin tempu pa hasi un hòbi òf un proyekto personal. Òf awor bo por pasa mas tempu ku bo famia.

Loke algun hende a bisa

“Nos a logra hasi hopi kos na kas, manera planta bèrdura i speserei, hasi obra di man i fèrf kas.”—Evan ku su kasá, Samantha, i nan yunan Eli i Adam, Suráfrika.

“Nos tin 30 aña kasá, pero nunka ami ku mi kasá no a pasa dje tantu tempu huntu manera aworakí. Danki na esei, awor nos konosé otro mihó, tantu nos puntonan fuerte komo nos puntonan débil, i nos stima otro muchu mas tantu. Awor nos ta mihó prepará pa apoyá otro si bini mas krísis den futuro.”—Ivan ku su kasá, Eve, Italia.

Mantené un rutina

Loke Beibel ta bisa: “Laga tur kos tuma lugá . . . na un manera ordená.”—1 Korintionan 14:40.

Dikon esei ta importante: Hopi hende ta sinti nan mas trankil i felis si nan tin un sierto rutina.

Purba esaki: Traha un programa basá riba bo situashon aktual. Reservá tempu spesífiko pa hasi tarea di skol i trabou òf di kas, pero tambe tempu pa dediká na asuntu spiritual. Ademas, inkluí otro aktividat ku ta bon pa bo, manera pasa tempu ku bo famia, hasi kos pafó di kas den aire liber i tempu pa ehersisio. Kada tantu tempu, analisá bo programa i hasi kambio nesesario.

Loke algun hende a bisa

“Mi a keda ku kasi mesun rutina ku mi tabatin promé ku e pandemia. Awor, mi ta hasi ehersisio na lugá di algun kos ku ántes mi tabata hasi, pero mi a sigui lanta na mesun ora mainta. Mi rutina ta yuda mi pa no keda pensa riba e pandemia i pa konsentrá riba mi famia i amigunan.”—Kgaogelo, Suráfrika.

“Mi gusta lanta mainta i prepará mi desayuno ku kòfi manera kustumber. Despues, mi ta bisti mi paña i drecha mi kurpa komo si fuera mi ta sali for di kas. Esei ta laga mi sinti mi bon ku mi mes i ta yuda mi keda mas alerta durante dia.”—Carmel, Fransia.

Adaptá bo mes na kambio di temporada di aña

Loke Beibel ta bisa: “Un hende prudente ta mira maldat i ta skonde.”—Proverbionan 22:3.

Dikon esei ta importante: Lus di solo i aire fresku ta bon pa bo salú físiko i mental. Pero, dependiendo di unda bo ta biba i di e temporada di aña, kisas no tin hopi chèns pa bo disfrutá di solo i aire fresku.

Purba esaki: Si temporada di wenter ta aserká, purba di reorganisá bo sala òf lugá di traha di tal manera ku bo ta haña mas tantu lus di solo posibel. Plania aktividat ku bo por hasi den aire liber maske wer ta friu. Si ta posibel, buska paña di wenter ku ta laga bo pasa mas tantu tempu pafó.

Ora temporada di zomer ta aserká, tene kuenta ku lo tin mas hende pafó di kas, pues tene hopi kuidou. Plania unda bo ta bai, i skohe pa bai na e oranan ku lo tin ménos aglomerashon di hende.

Loke algun hende a bisa

“Kaminda mi ta biba, áwaseru ta kai hopi. P’esei, mi mester tin un rutina fleksibel. Asina ku mi mira solo sali, mi ta probechá sali for di kas. Un ratu den solo, sea ta pa un kaminata kòrtiku òf pa kore baiskel, ta laga mi sinti muchu mas mihó.”—Sameena, Fransia.

“Zomer tabata mas fásil, pasobra tabatin hopi kos ku mi por a hasi pafó di kas. Pero, awor ku wenter ta bini, mi ta trahando un lista di proyekto ku lo mi por hasi den kas.”—Tiffany, Canada.

Sigui kumpli ku e medidanan pa prevení COVID

Loke Beibel ta bisa: “E bobo ta arogante i sin kuidou.”—Proverbionan 14:16.

Dikon esei ta importante: COVID-19 ta mata hende. Si nos bira ménos alerta, nos ta kore riesgo di pega ku e malesa.

Purba esaki: Konsultá regularmente ki medida i restrikshon e outoridatnan lokal tin na vigor i puntra bo mes si ainda bo ta mes kuidadoso ku promé. Pensa riba e efekto ku loke bo hasi lo tin riba bo mes, bo famia i otro hende.

Loke algun hende a bisa

“Ami ta hasi mi parti pa evitá ku e vírùs ta plama. Maske otro hende no ta hasi kaso di e restrikshonnan, ami ta konsentrá riba loke mi por hasi pa protehá mi mes i mi famia.”—Daryn, Suráfrika.

Fortalesé bo amistat ku Dios

Loke Beibel ta bisa: “Hala serka Dios, i lo e hala serka boso.”—Santiago 4:8.

Dikon esei ta importante: Dios por yuda bo trata ku kualke situashon difísil.—Isaías 41:13.

Purba esaki: Lesa un tiki for di e Palabra di Dios tur dia. Bo por usa e programa akí di lesamentu di Beibel pa yuda bo kuminsá.

Bo tabata sa ku Testigunan di Yehova a sigui tene nan reunionnan meimei di e pandemia akí? Rònt mundu, via Internet, nan ta usa konekshon di vidio pa tene nan reunionnan semanal, kongreso anual i konmemorashon anual di e morto di Hesus. Si bo tambe ke disfrutá di e reunionnan ei, bo por tuma kontakto ku nan.

Algun teksto di Beibel ku por yuda bo trata ku e kansansio ku pandemia ta kousa

Isaías 30:15, Tradukshon di Mundu Nobo: “Boso lo tin forsa si boso keda kalmu i demostrá konfiansa den mi.”

Nifikashon: Si nos ta konfia e konsehonan di Dios, esei por yuda nos keda kalmu den tempu difísil.

Proverbionan 15:15: “Tur e dianan di esun ku ta afligí ta malu, ma esun di kurason kontentu semper tin fiesta.”

Nifikashon: Si nos ta konsentrá riba kos positivo, esei por yuda nos ta felis asta den tempu difísil.

Proverbionan 14:15: “E hende simpel ta kere tur kos, ma e hòmber prudente ta wak bon unda e ta bai.”

Nifikashon: Nos tin ku obedesé e medidanan pa protehá nos salú, i no pensa muchu lihé ku e restrikshonnan ei no ta nesesario.

Isaías 33:24: “Ningun habitante lo no bisa: ‘Mi ta malu.’”

Nifikashon: Dios ta primintí ku lo e kaba ku tur problema di salú.