Di Bèrdat Diabel Ta Eksistí?

E kontesta ku Beibel ta duna

Sí, Diabel ta eksistí. E ta “e gobernante di mundu,” un kriatura spiritual ku a bira malbado i a rebeldiá kontra Dios. (Huan 14:30; Efesionan 6:11, 12) Beibel ta revelá ken Diabel ta pa medio di e siguiente nòmber- i deskripshonnan:

Satanas, ku ta nifiká “Resistidó.”—Yòb 1:6.
Diabel, ku ta nifiká “Kalumniadó.”—Revelashon 12:9.
Kolebra, ku den Beibel por nifiká “persona engañoso.”—2 Korintionan 11:3.
Tentadó.—Mateo 4:3.
Gañadó.—Huan 8:44.

E no ta e malu ku tin den hende

Algun hende ta kere ku Satanas e Diabel ta e malu ku tin den nos. Sinembargo, den Beibel tin un kòmbersashon ku tabatin entre Dios ku Satanas. Pero, Dios ta un ser perfekto i tur su kamindanan ta hustu. Pues, kon e por tabata papiando ku un parti malu den dje? (Deuteronomio 32:4; Yòb 2:1-6) Meskos tambe, Satanas a tenta Hesus kende tabata sin piká. (Mateo 4:8-10; 1 Huan 3:5) Pues, Beibel ta mustra ku di bèrdat Diabel ta eksistí i ku e no ta djis e malu ku tin den hende.

Hopi hende no ta kere ku di bèrdat Diabel ta eksistí. Esei mester straña nos? Nò, pasobra Beibel ta bisa ku Satanas ta usa tur sorto di engaño pa logra su meta. (2 Tesalonisensenan 2:9, 10) Un di su mihó trikinan ta ku e ta siega hopi hende di tal manera ku nan no ta kere mes ku e ta eksistí.—2 Korintionan 4:4.

Mas idea robes enkuanto Diabel

Mito: Un otro nòmber pa Diabel ta Lusifèr

Echo: E palabra hebreo ku den algun Beibel ta ser tradusí komo “Lusifèr” ta nifiká “strea briante di mardugá.” (Isaías 14:12, Beibel na papiamentu koriente) Segun e konteksto, e ekspreshon akí ta referí na e dinastia di e reinan di Babilonia ku Dios lo a humiá pa motibu di nan arogansia. (Isaías 14:4, 13-20) Nan a usa e ekspreshon “strea briante di mardugá” pa hasi chèrchi di e dinastia di reinan di Babilonia despues ku el a ser tumbá.

Mito: Satanas ta traha pa Dios.

Echo: Diabel ta enemigu di Dios i no su sirbidó. Satanas e Diabel ta oponé hende ku ta sirbi Dios i ta lanta akusashon falsu kontra nan.—1 Pedro 5:8; Revelashon 12:10.