Kiko Mi Mester Sa Tokante Agreshon Seksual?​—Parti 2: Kon Bo Por Rekuperá?

Dil ku sintimentu di kulpa

Hopi víktima di abusu seksual ta sinti masha bèrgwensa pa loke a sosodé. Tin ta asta sinti nan mes kulpabel. Wak por ehèmpel Karen di 19 aña di edat. El a bira víktima di abusu seksual for di ora e tabatin 6 aña te ora e tabatin 13 aña. E ta bisa: “E pió kos pa trata kuné ta e sintimentu di kulpa. Hopi bes mi ta puntra mi mes: ‘Kon mi por a permití hende abusá di mi pa tantu tempu asina?’”

Si abo tambe ta sinti asina, pensa riba lo siguiente:

• Mucha no ta kla pa tene relashon seksual, ni físikamente ni emoshonalmente. Nan no sa kiko e ta enserá i p’esei nan no ta den un posishon pa bai di akuerdo ku e akto akí tampoko. Pues, no ta e mucha su falta si nan abusá di dje.

• Mucha tin e tendensia di konfia hende grandi i no ta pensa ku tin hende ku mal pensamentu ku kier hasi nan daño. Esaki por hasi nan vulnerabel. E buki The Right to Innocence ta bisa: “Hende ku ke abusá seksualmente di mucha sa bon kon pa gaña i manipulá, i esaki ta pone ku ta fásil pa e mucha kai p’e.”

• Ta posibel ku un mucha por eksitá seksualmente ora ku nan ta abusá di dje. Si esei a sosodé ku bo, ta bon pa bo sa ku esaki ta un reakshon outomátiko na momento ku un hende mishi ku bo kurpa na un sierto manera. Esaki no ta nifiká ku bo ta den un posishon pa bai di akuerdo ku e abusu òf ku ta bo falta.

Sugerensia: Pensa riba un mucha ku aworakí tin e edat ku abo tabatin dia nan a abusá di bo. Puntra bo mes: ‘Si un hende abusá di dje, ta hustu pa kulp’é pa loke a sosodé?’

Karen a pensa riba esei ora e tabata babysit tres mucha. Un di nan tabatin kasi seis aña di edat, esta, e mesun edat ku Karen tabatin ora nan a kuminsá abusá di dje. Karen ta bisa: “Mi a realisá kon vulnerabel un mucha di e edat ei ta; kon vulnerabel ami tabata ora mi tabatin e edat ei”.

Echo: E úniko persona ku ta kulpabel ta esun ku a abusá di bo. Beibel ta bisa: “Maldat di e malbado lo ta riba é [persona] mes.”—Ezekiel 18:20, Beibel Santu.

E importansia di deshogá bo mes

Ora bo papia ku un adulto ku bo ta konfia, bo por sinti bo mihó. Beibel ta bisa: “Un amigu ta stima tur ora bai, i un ruman ta nasí pa tempu di atversidat.”—Proverbionan 17:17, Beibel Santu.

Kisas bo ta pensa ku ta mihó pa no papia riba loke a sosodé. Esei ta komprendibel. Kisas silensio a bira manera un muraya ku bo ta lanta pa protehá bo mes i evitá ku lo bo bolbe sufri daño. Pero tene na kuenta ku e mesun muraya ei ku por protehá bo di sufri daño por stroba bo tambe di haña yudansa.

Un hóben ku yama Janet a sinti un alivio enorme ora ku el a papia riba loke a sosodé. E ta bisa: “Tempu mi tabata mas chikitu, un persona ku mi tabata konosé i konfia a abusá di mi i mi a keda ketu pa hopi aña. Ora ku por fin mi a papia ku mi mama riba loke a sosodé, un peso grandi a kita for di riba mi.”

Janet por komprondé dikon otronan ta preferá di no papia tokante loke a sosodé. E ta bisa: “Papia di abusu ta algu masha doloroso i inkómodo. Pero den mi kaso, e doló ku mi a sinti dor di keda kana rònt kuné den silensio tabata pió. Tabata mihó pa mi enfrentá e problema mas lihé posibel.”

“Un tempu pa kura”

Si bo ta víktima di abusu, kisas bo a keda ku ideanan robes tokante bo mes ku por hasi bo daño. Por ehèmpel, kisas bo ta pensa ku bo ta inútil i no ta bal nada òf ku bo ta eksistí djis pa satisfasé deseo seksual di otronan. Pero awor bo tin chèns pa laga e mentiranan akí atras. Beibel ta bisa ku tin “un tempu pa kura.” (Eklesiástes 3:3, Beibel Santu) Kiko por yuda bo ‘kura’?

Studia Beibel. Den Beibel tin Dios su pensamentunan ku tin e poder “pa tumba loke ta fuertemente ankrá”​—entre otro e ideanan robes akí. (2 Korintionan 10:4, 5) Por ehèmpel, lesa i pensa riba e siguiente tekstonan: Isaías 41:10; Yeremías 31:3; Malakías 3:16, 17; Lukas 12:6, 7; 1 Huan 3:19, 20.

Orashon. Ora sintimentu di kulpa òf di ku bo no ta bal nada bira hopi fuerte, ‘tira bo karga riba Yehova’ den orashon. (Salmo 55:22, Beibel Santu) Kòrda ku nunka bo no ta bo so!

Ansianonan di kongregashon. E hòmbernan kristian akí ta prepará pa “ta manera un refugio kontra bientu, i un protekshon kontra tempestat.” (Isaías 32:2, Beibel Santu) Nan por yuda bo haña un bista balansá di bo mes i sigui ku bo bida.

Bon asosiashon. Opservá kon otro hende, hòmber i muhé, ta pone na praktiká loke nan ta siña den Beibel. Wak kon nan ta trata otro. Ku tempu, lo bo realisá ku no ta tur hende ta probechá di nan posishon òf influensia pa abusá di esnan ku nan ta pretendé di stima.

Un hóben ku yama Tanya a siña e lès importante ei. Tempu e tabata chikitu, vários hòmber a trat’é manera un opheto seksual. Tanya a bisa: “Tur hende hòmber ku mi a yega di konfia a hasi mi daño.” Pero, ku tempu, Tanya a bin realisá ku tin hòmber ku sí ta mustra amor berdadero. Kon el a bin mira esei?

Ora ku el kuminsá asosiá ku un pareha kasá ku ta pone na práktika loke nan ta siña den Beibel, su punto di bista a kambia. E ta bisa: “Mi por a mira na e esposo su komportashon ku no ta tur hòmber ta buska mucha pa abusá di dje. E ta un hòmber ku ta protehá su esposa. Ta asina Dios ke pa hende hòmber ta.”a—Efesionan 5:28, 29.