YUDANSA PA FAMIA
Siña Kon pa Dominá Bo Rabia
Imaginá ku bo kasá ta hasi òf bisa algu ku ta pone bo rabia. Aunke bo a rabia, bo ta purba di skonde esei. Pero komo ku el a ripará ku algu ta molestiá bo, e ta kuminsá puntra bo kiko a pasa. I esei ta pone bo rabia mas. Kon bo por dominá bo rabia den un situashon asina?
Loke ta bon pa bo sa
Si bo laga rabia dominá bo, esei por hasi bo malu. Investigashon ta mustra ku un hende ku no ta dominá su rabia tin mas riesgo di haña preshon haltu, malesa di kurason, depreshon i problema ku digestion. Ademas, un hende asina tin mas chèns di haña insomnio, ansiedat, malesa di kueru i atake selebral. P’esei Beibel ta bisa: “Stòp di rabia i laga furia para; no kunsumí.”—Salmo 37:8, Beibel Santu.
Sigui kunsumí di paden tambe por hasi bo malu. Sigui kunsumí di paden, ta meskos ku tin un malesa ku ta hasi bo daño di paden. Por ehèmpel, bo por bira sarkástiko òf hopi krítiko. Un aktitut asina por laga bo bira un persona ku ta difísil pa biba kuné i por hasi hopi daño na bo matrimonio.
Loke bo por hasi
Enfoká riba e bon kualidatnan di bo kasá. Skirbi tres kos di bo kasá ku bo ta atmirá. E siguiente biaha ku e hasi algu ku ta pone bo rabia, pensa riba e kosnan ei. Esei por yuda bo dominá bo rabia.
Prinsipio di Beibel: “Mustra ku boso ta gradisidu.”—Kolosensenan 3:15.
Siña kon pa pordoná. Pa kuminsá, purba di mira e asuntu for di e punto di bista di bo kasá. Esei lo yuda bo kultivá empatia, òf loke Beibel ta yama, “sintimentu pa otro.” (1 Pedro 3:8) Despues, puntra bo mes: ‘Di bèrdat loke el a hasi ta asina malu ku mi no por pordon’é?’
Prinsipio di Beibel: “Prudensia di un hende ta hasi ku e no ta rabia lihé, i pa laga un ofensa pasa ta su gloria.”—Proverbionan 19:11, Beibel Santu.
Ekspresá bo sintimentunan na un manera amabel i ku takto. Ora bo papia ku bo kasá, purba di usa e palabra “mi.” Por ehèmpel, no bisa: “Bo no ta tene kuenta ku mi sintimentunan; bo no ta ni yama pa laga mi sa unda bo ta.” En bes di esei, bisa: “Mi ta kuminsá preokupá ora ta bira lat i mi no sa unda bo ta.” Si bo ekspresá bo sintimentunan na un manera amabel, esei por yuda bo dominá bo rabia.
Prinsipio di Beibel: “Laga boso palabranan semper ta ku grasia, sasoná ku salu.”—Kolosensenan 4:6.
Skucha atentamente. Despues ku bo a bisa loke bo ta sinti, duna bo kasá chèns pa papia sin interumpié. Ora bo kasá kaba di papia, purba di ripití ku bo mes palabra loke el a bisa. Asina bo por haña sa si bo a komprondé loke el a bisa. Pues, si bo djis skucha atentamente, esei por yuda bo dominá bo rabia.
Prinsipio di Beibel: “Tur hende mester ta kla pa skucha, slo pa papia.”—Santiago 1:19.