No Laga Rabia Pone Bo Trompecá

“HALA un rosea profundo!” “Conta te dies!” “Morde bo lenga!” E frasenan aki ta zona conocí pa bo? Kisas bo sa bisa nan den bo mes pa calma un rabia di paden. Tin hende cu, den un esfuerso pa prevení un explosion di furia, ta bai dal un buelta. Esakinan ta maneranan simpel pa dominá rabia i conserbá bon relacion cu otro hende.

Pero, den añanan recien, algun profesional ta consehá pa controlá of contené rabia, miéntras cu otronan ta animá pa haci net contrali, i esei ta confundí hopi hende. Por ehempel, algun sicólogo a fomentá e teoria cu “si esei ta laga bo sinti mihó,” saca bo rabia. Otronan ta spierta cu atake regular di rabia ta “un indicador mas fuerte di morto prematuro cu otro factornan di rísico manera humamentu, preshon haltu i colesterol haltu.” E Palabra di Dios ta bisa bon cla: “Laga rabia para i bandoná furia; no mustra bo mes excitá solamente pa haci malu.” (Salmo 37:8) Pakico Bijbel ta duna e conseho specífico ei?

Emocionnan descontrolá ta hiba na accionnan descontrolá. Esaki tabata bisto masha trempan den historia di humanidad. Nos ta lesa: “Cain a yena cu hopi rabia, i su cara a cera.” Na kico esaki a hiba? Cain tabata den gara di su rabia i esaki a domin’é asina tantu cu el a haci su curason duru p’e spiertamentu di Jehova pa bira i haci bon. Cain su rabia descontrolá a hiba na picá grave: asesinato di su ruman.—Génesis 4:3-8.

Den e mésun manera, rabia a dominá e promé rey di Israel, Saul, ora el a tende David ricibí gran elogio. “E muhernan cu tabata celebrá a sigui respondé i bisa: ‘Saul a tumba su miles, i David su dies di miles.’ I Saul a yena cu hopi rabia, i for di su punto di bista e dicho aki tabata malu.” Rabia a dominá Saul su manera di pensa asina tantu cu esei a pon’é haci vários intento pa asesiná David. Maske David a trata na drecha e amistad, Saul no tabata dispuesto pa busca pas i reconciliacion. Finalmente, el a perde Jehova su fabor totalmente.—1 Samuel 18:6-11; 19:9, 10; 24:1-21; Proverbionan 6:34, 35.

Ora un persona entregá na rabia descontrolá, e no por evitá cu lo e bisa i haci cosnan cu lo ofendé tur hende enbolbí. (Proverbionan 29:22) Cain i Saul a yena di rabia pasobra nan cada un, na nan manera, tabata yalurs i envidioso. Sin embargo, reaccion di rabia por tuma lugá pa vários motibu. Un crítica inhustificá, un insulto, un malcomprendimentu of un trato inhustu lo por ta e chispa cu ta causa un explosion.

E ehempelnan di Cain i Saul ta mustra cu cada un tabatin un deficiencia serio. Aparentemente Cain su ofrenda tabata falta e motivacion di fe. (Hebreonan 11:4) I dor cu Saul no a obedecé Jehova su mandamentunan bon cla i a purba hustificá su mes despues di esei, el a perde Dios su fabor i spiritu. Claramente, tur dos homber a daña nan relacion cu Jehova.

Mira e contraste entre e caracternan ei i esun di David, kende tabatin motibu pa rabia p’e trato cu el a haña na man di Saul. David a frena su spiritu. Pakico? El a bisa: “Ta impensabel di mi parti, for dje punto di bista di Jehova, pa mi haci e cos aki cu mi señor, e ungí di Jehova.” David tabatin su relacion cu Jehova claramente na mente, i esei a influenciá su trato cu Saul. Humildemente el a laga cosnan den man di Jehova.—1 Samuel 24:6, 15.

Sí, e implicacionnan di rabia descontrolá ta serio. Apostel Pablo a advertí: “Rabia, i tog no peca.” (Efesionan 4:26) Aunke tin biaha nos por indigná cu nos rason, semper tin e peliger cu rabia por bira nos piedra di trompecá. No ta nada straño anto, cu nos ta enfrentá e desafio di dominá nos rabia. Con nos por haci esei?

Un manera principal ta pa desaroyá un relacion fuerte cu Jehova. E ta animá bo pa habri bo curason i mente na dje. Cont’é di bo preocupacion i ansiedadnan, i pidié un curason calmu pa dominá rabia. (Proverbionan 14:30) Bo por ta sigur cu “e bista di Jehova ta riba hende hustu, i su orea ta den direccion di nan súplica.”—1 Pedro 3:12.

Oracion por moldea bo i guia bo. Den ki manera? E por tin un efecto profundo riba bo trato cu otro hende. Corda con Jehova a trata cu bo. Manera e Scritura ta bisa, Jehova “no a haci cu nos ni conforme cu nos picánan.” (Salmo 103:10) Un spiritu pordonador ta vital “pa Satanas no alcansá” bo. (2 Corintionan 2:10, 11) Ademas, oracion ta sirbi pa habri bo curason p’e guia di spiritu santu, loke por yuda bo cambia patronchi di bida cu tin rais profundo. Gustosamente Jehova ta duna un ‘pas cu ta surpasá tur pensamentu,’ cu por aliviá bo for dje gara poderoso di rabia.—Filipensenan 4:7.

Sin embargo, oracion mester ta compañá cu un examinacion regular dje Scritura pa nos por “sigui percibí loke ta e boluntad di Jehova.” (Efesionan 5:17; Santiago 3:17) Si abo personalmente tin problema pa dominá bo rabia, haci esfuerso pa mira e asuntu manera Jehova ta mir’é. Repasá textonan cu tin di haber specíficamente cu dominá rabia.

Apostel Pablo ta ofrecé e recordatorio importante aki: “Laga nos obra loke ta bon pa cu tur, pero specialmente pa cu esnan relacioná cu nos den e fe.” (Galationan 6:10) Enfocá bo pensamentu i accionnan riba haci loke ta bon pa otro hende. Tal actividad sano i positivo asina ta fomentá empatia i confiansa i lo plakia malcomprendimentu cu por resultá fácilmente den rabia.

E salmista a bisa: “Fiha mi propio pasonan sólidamente den bo dicho, i no laga nada perhudicial dominá mi. Pas abundante ta pertenecé na esnan cu ta stima bo ley, i no tin piedra di trompecá pa nan.” (Salmo 119:133, 165) Esei por conta pa bo tambe.

[Kuadro/Plachi na página 9]

PASONAN PA DOMINA RABIA

□ Haci oracion na Jehova.—Salmo 145:18.

□ Examiná e Scritura tur dia.—Salmo 119:133, 165.

□ Keda ocupá den actividadnan cu ta bale la pena.—Galationan 6:9, 10.