Destrukshon di Herúsalèm

E pueblo di Huda a stòp di adorá Yehova hopi biaha i bai adorá e diosnan falsu. Pa hopi aña, Yehova a purba di yuda nan. Yehova a manda hopi profeta pa spièrta e pueblo, pero nan no a skucha. En bes di esei, e pueblo a hasi chèrchi di e profetanan. Kon Yehova a pone un fin na adorashon di dios falsu?

Nabukodónosor, e rei di Babilonia, tabata konkistá un pais tras di otro. E promé biaha ku el a konkistá Herúsalèm, el a kapturá Rei Yehóakin, e lidernan, e guereronan i e artesanonan, i el a hiba nan tur Babilonia. Ademas, el a bai ku tur e tesoronan ku tabatin den tèmpel di Yehova. Despues Nabukodónosor a hasi Zedekías rei di Huda.

Na prinsipio, Zedekías a obedesé Nabukodónosor. Pero, e nashonnan bisiña i e profetanan falsu a bisa Zedekías pa bringa kontra Babilonia. Yeremías a bisa Zedekías: ‘Si bo rebeldiá, lo tin morto, hamber i malesa na Huda.’

Despues di a goberná pa ocho aña, Zedekías a rebeldiá kontra Babilonia. Zedekías a pidi e ehérsito di Egipto pa yud’é. E ora ei, Nabukodónosor a manda su ehérsito pa ataká Herúsalèm, i nan a kampa rònt di e stat. Yeremías a bisa Zedekías: ‘Yehova a bisa ku si bo entregá bo mes na Babilonia, abo i e stat lo skapa. Pero, si bo no entregá bo mes, e hendenan di Babilonia lo kima Herúsalèm i hiba bo komo prezu.’ Zedekías a bisa: ‘Lo mi no entregá!’

Un aña i mei despues, e ehérsito di Babilonia a basha e murayanan di Herúsalèm abou i sende e stat na kandela. Nan a sende e tèmpel na kandela, mata hopi hende i kohe míles di hende prezu.

Zedekías a hui for di Herúsalèm, pero e hendenan di Babilonia a persiguié. Nan a kaptur’é den bisindario di Yériko i tres’é pa Nabukodónosor. E rei di Babilonia a laga Zedekías mira kon nan ta mata su yu hòmbernan. Despues, Nabukodónosor a hasi Zedekías siegu i hink’é den prizòn. Ei Zedekías a muri. Pero, Yehova a hasi e promesa akí na e pueblo di Huda: ‘Despues di 70 aña, lo mi trese boso Herúsalèm bèk.’

Kiko lo a pasa ku e hóbennan ku a ser hibá komo prezu na Babilonia? Nan lo a sigui sirbi Yehova?