E Israelitanan A Traha un Tabernakel pa Nan Por A Adorá Dios

Ora Moises tabata riba seru Sinaí, Yehova a bis’é pa traha un tabernakel. E tabernakel tabata un tènt spesial, kaminda e israelitanan por a adorá Yehova. Kada biaha ku e israelitanan tabata bai un otro lugá, nan mester a bai ku e tabernakel.

Yehova a bisa Moises: ‘Bisa e hendenan pa nan trese loke nan por pa traha e tabernakel.’ E israelitanan a trese oro, plata, koper, piedra presioso i nan hoyanan. Nan a trese tambe lana, lenen, kueru di bestia i hopi kos mas. Nan a trese asina tantu kos ku Moises mester a bisa nan: ‘Nos tin sufisiente kos. No trese mas kos.’

Hopi hende hòmber i hende muhé ku tabata eksperto den nan trabou a yuda traha e tabernakel. Yehova a duna nan sabiduria pa nan hasi e trabou bon. Algun hende a traha hilu; algun hende a traha tela i algun hende a bòrda diseño riba e telanan. Tabatin hende tambe ku tabata pone piedra presioso riba e pañanan, traha ku oro òf traha kos di palu.

E hendenan a traha e tabernakel presis manera Yehova a manda nan trah’é. Nan a traha un kortina masha bunita ku a dividí e tabernakel den dos sekshon: Un sekshon tabata yama e lugá Santu, i un sekshon tabata yama e lugá Santísimo. Den e lugá Santu, tabatin un kándelar di oro, un mesa i un altar pa kima sensia. Den e lugá Santísimo, tabatin e arka di pakto. E arka akí tabata trahá di palu di akasia i di oro. Bo sa kiko ta un pakto? Esei ta un promesa spesial. E arka di pakto a kòrda e israelitanan riba e promesa ku nan a hasi: Nan a primintí ku nan lo a obedesé Yehova. Anto pafó di e tabernakel, riba e plenchi, tabatin un baki di koper i un altar grandi.

Yehova a skohe Áròn i su yu hòmbernan pa nan bira saserdote. Nan mester a traha na e tabernakel. Nan mester a kuida e tabernakel i ofresé ofrenda na Yehova einan. Ta Áròn so  por a drenta den e lugá Santísimo pasobra Áròn tabata sumo saserdote. Un biaha pa aña so Áròn tabata drenta den e lugá Santísimo pa ofresé sakrifisio na Dios pa su mes pikánan, pa e pikánan di su famia i pa e pikánan di henter e nashon di Israel.

Un aña despues ku e israelitanan a sali for di Egipto, nan a kaba di traha e tabernakel. Sí, nan tabatin un lugá pa adorá Yehova.

E tabernakel a yena ku Yehova su presensia briante, i un nubia a bini riba e tabernakel. Ora e nubia tabata riba e tabernakel, e israelitanan tabata keda kaminda nan tabata. Pero ora e nubia a lanta for di e tabernakel, nan tabata sa ku ta tempu pa bai otro kaminda. Nan tabata desharmá e tabernakel i sigui e nubia.