E Mata di Sumpiña na Kandela

Moises a keda biba na Mádian 40 aña largu. El a kasa, i e ku su kasá a haña yu. Un dia, Moises tabata kuidando su karnénan banda di seru Sinaí ora ku el a wak algu masha straño. Tabatin un mata di sumpiña na kandela, pero e mata no tabata kima. Moises a bai mas serka pa wak ta dikon e mata no tabata kima, pero un stèm for di meimei di e mata a bis’é: ‘Moises! No bini mas serka. Kita bo sandalianan, pasobra kaminda bo ta pará ta suela santu.’ Yehova a usa un angel pa papia ku Moises.

Moises a haña miedu, i p’esei el a tapa su kara. E stèm a bis’é: ‘Mi ta mira kuantu e israelitanan ta sufri. Mi ta bai libra nan; mi ta bai saka nan for di Egipto i hiba nan na un bon pais. Abo ta esun ku lo saka mi pueblo for di Egipto.’ Kasi sigur, Moises lo no por a kere loke el a kaba di tende.

Moises a puntra: ‘Kiko mi tin ku bisa e pueblo ora nan puntra mi ta ken a manda mi?’ Dios a bis’é: ‘Bisa nan ku ta, Yehova, Dios di Ábraham, Dios di Ísak i Dios di Yákòb a manda bo.’ Moises a bisa: ‘Pero kiko si e pueblo no skucha mi?’ E ora ei, Yehova a mustra Moises ku lo E ta kuné. Yehova a bisa Moises pa benta su bara abou, i e bara a bira un kolebra. Ora Moises a kohe e kolebra na su rabu, e kolebra a bira un bara bèk. Yehova a bisa Moises: ‘Ora bo hasi e milager akí, esei lo mustra ku ta ami a manda bo.’

Despues, Moises a bisa: ‘Pero mi no por papia bon.’ Pues, Yehova a primintié: ‘Lo mi bisa bo loke bo tin ku bisa. I lo mi manda bo ruman Áròn pa yuda bo.’ Ora Moises tabata sigur ku Yehova lo a yud’é, Moises a bai Egipto huntu ku su kasá i su yu hòmbernan.