Siñansa di Beibel Ku No Ta Bira Ouderwets

IMAGINÁ LO SIGUIENTE: Bo ta bishitando un museo yen di obra di antigwedat. Mayoria ta tur dañá i gastá. Algun di nan falta pidanan grandi. Pero, un di nan ta remarkabel. E ta intakto. Kada detaye di su diseño kompliká i detayá ta klaramente bisto. Bo ta puntra e guia: “Esun akí ta mas nobo ku e otronan?” E ta respondé: “Nò, e ta mas bieu ku kasi tur i nunka el a ser restorá.” Bo ta puntr’é: “Akaso e tabata bon wardá na un lugá?” Bo guia ta bisa: “Nò. Esun akí a pasa dor di bientunan fuerte i áwaseru. Anto hopi vandalista a purba di dañ’é.” Kisas lo bo keda boka habrí i puntra: ‘Ta di kiko e ta trahá anto?’

Pues, den un sentido, Beibel ta manera e obra remarkabel ei. E ta un buki masha antiguo—mas bieu ku mayoria di buki. Klaru ku tin mas buki ku tambe ta hopi bieu, pero meskos ku obranan antiguo, mayoria di nan ta tur daña i gastá. Loke nan ta bisa riba temanan sientífiko, por ehèmpel, a keda refutá pa konosementu nobo i echonan komprobá. Mayoria di biaha, nan konsehonan médiko ta peligroso. I hopi skritura antiguo no ta kompleto mas tampoko. Partinan ta sea dañá òf a bai pèrdí.

Pero Beibel ta sobresalí pasobra e ta diferente. Hende a kuminsá skirbi Beibel mas ku 35 siglo pasá, ma tòg e ta intakto. I  atraves di siglonan, maske hende a ataká Beibel bes tras bes —nan a kim’é, prohibié i menospresi’é—loke Beibel tin di bisa a keda intakto. Leu di ta antikuá na komparashon ku konosementu nobo, gran parti di loke Beibel ta bisa ta mustra ku e tabata hopi adelantá pa su tempu.—Wak e kuadro “Ouderwets òf Avansá pa Su Tempu?”

NORMA- I BALORNAN KU NOS MESTER AWE

Pero kisas bo ta puntra bo mes: ‘Siñansa di Beibel ta realmente práktiko pa nos tempu?’ Pa kontestá e pregunta ei, puntra bo mes: ‘Kiko ta e problemanan di mas grave ku humanidat ta enfrentá awe? Kua di nan ta e problema ku mas ta spanta bo?’ Kisas bo ta pensa riba guera, polushon, krímen òf korupshon. Awor, ban wak algun siñansa básiko di Beibel. Segun ku bo ta lesa nan, puntra bo mes: ‘Si hende biba segun e norma- i balornan akí, mundu lo ta un mihó lugá pa biba?’

AMOR PA PAS

“Felis ta esnan pasífiko, ya ku nan lo ser yamá yu di Dios.” (Mateo 5:9) “Si ta posibel, te asina leu ku ta dependé di boso, keda na pas ku tur hende.”—Romanonan 12:18.

MISERIKÒRDIA I PORDON

“Felis ta esnan miserikòrdioso, ya ku nan lo haña miserikòrdia.” (Mateo 5:7) “Sigui soportá otro i pordoná otro libremente, asta si un di boso tin motibu pa keha un otro. Meskos ku Yehovaa a pordoná boso libremente, boso tambe mester hasi meskos.”—Kolosensenan 3:13.

UNION RASIAL

“For di ún hende [Dios] a traha tur nashon, pa nan biba riba henter e superfisie di tera.” (Echonan 17:26) “Dios no ta hasi distinshon di persona, sino ku e ta aseptá tur hende di tur nashon ku ta tem’é i ku ta hasi loke ta korekto.”—Echonan 10:34, 35.

RÈSPÈT PA NOS PLANETA TERA

“SEÑOR Dios a kohe e hòmber i a pon’é den e hòfi di Edén pa kultiv’é i kuid’é.” (Génesis 2:15) Dios lo “kaba ku esnan ku ta kaba ku e tera.”—Revelashon 11:18.

ODIA GOLOSIDAT I INMORALIDAT

“Warda boso di tur sorto di golosidat, pasobra asta ora un hende tin na abundansia, su bida no ta dependé di loke e tin.” (Lukas 12:15) “No menshoná fornikashon ni ningun sorto di impuresa ni golosidat mes meimei di boso, pasobra esaki no ta apropiá pa hende santu.”—Efesionan 5:3.

SER ONESTO I TRAHA DURU

“Nos ke komportá nos mes na un manera onesto den tur kos.” (Hebreonan 13:18) “Laga esun ku ta hòrta, no hòrta mas; mas bien, lag’é traha duru.”—Efesionan 4:28.

TA IMPORTANTE PA YUDA HENDE DEN NESESIDAT

“Papia palabranan di konsuelo ku esnan ku ta deprimí, apoyá e débilnan, tene pasenshi ku tur.” (1 Tesalonisensenan 5:14) “Kuida huérfano i biuda ku ta pasa den tribulashon.”—Santiago 1:27.

Beibel no ta djis duna un lista di e norma- i balornan ei. E ta siña nos tambe kon pa balorá nan i apliká nan den nos bida diario. Si mas hende apliká e siñansanan ku nos a menshoná, lo tin ménos problema na mundu, no ta bèrdat? Ke men anto, prinsipionan di Beibel ta mas práktiko i al dia ku nunka promé! Pero, kon siñansanan di Beibel por yuda bo aworakí mes?

KON BEIBEL POR YUDA BO AWE?

E hòmber di mas sabí na mundu a yega di bisa: “Sabiduria ta demostrá pa medio di su obranan.” (Mateo 11:19) Bo no ta haña ku e palabranan ei tin sentido? E mihó manera pa bo haña sa si un konseho ta sabí ta ora bo aplik’é. Pues, kisas bo ta bisa: ‘Pero, si Beibel ta un buki realmente práktiko, lo mi no mira resultado den mi bida? Kon e por yuda mi enfrentá mi problemanan aktual?’ Ban wak un ehèmpel.

Delphineb tabata hiba un bida drùk i satisfaktorio. Pero diripiente el a kuminsá hañ’é ku vários prueba. Su yu muhé tiner a muri, su matrimonio a kibra i el a hañ’é ku problema finansiero. E ta kòrda kon e tabata sinti: “Mi no tabata sa mas ken mi ta—sin mi yu, sin mi kasá, sin mi hogar. Mi a sinti un bashí—sin identidat, sin forsa, sin un propósito den bida.”

Nunka promé Delphine a komprondé e bèrdat ku tin tras di e palabranan akí: “E dianan di nos bida ta setenta aña, òf si hende tin hopi forsa, ochenta aña; tòg nan orguyo no ta nada otro ku molèster i pena, pasobra un djis el a pasa, i nos ta bula bai.”—Salmo 90:10.

Delphine a haña yudansa di Beibel durante e temporada difísil akí. E manera ku Beibel a yud’é ta remarkabel. Manera e siguiente tres artíkulonan lo mustra, Beibel a yuda hopi otro hende tambe ora nan a sigui su guia pa enfrentá nan problemanan. Nan a sinti ku Beibel ta manera e obra ku nos a papia di dje na prinsipio di e artíkulo akí. Tur e bukinan ku ta bira bieu i ouderwets no ta nada kompará kuné. Lo no ta pasobra, na moda di papia, Beibel ta trahá di algu diferente? Kisas ta pasobra e realmente ta kontené e pensamentunan di Dios i no di hende?—1 Tesalonisensenan 2:13.

Kisas abo tambe ta haña ku bida ta kòrtiku i yen di problema. Ora problema ta menasá di kaba ku bo, na unda bo ta bai pa haña konsuelo, sosten i konseho konfiabel?

Ban wak tres manera klave den kua Beibel por resultá di ta práktiko den bo bida. E por siña bo kon pa

1. evitá problema si ta posibel.

2. resolvé situashonnan difísil asina ku nan presentá.

3. dil eksitosamente ku situashonnan ku bo no por kambia.

E siguiente artíkulonan lo trata e tres puntonan akí.