“Cana pa Fe, No pa Bista”

“Nos ta cana pa fe, no pa bista.”—2 CORINTIONAN 5:7.

1. Kico kier men “cana pa fe”?

CADA biaha cu nos haci oracion na armonia cu e instruccionnan describí den e Palabra di Dios, nos ta indicá cu nos tin por lo ménos un midí di fe. Nos ta demostrá fe tambe ora nos cuminsá duna testimonio na otronan tocante e Reino di Dios. I ora nos dedicá nos bida na Jehova, nos ta duna evidencia cu ta nos deseo pa “cana pa fe,” esta, pa sigui un curso di bida dirigí dor di fe.—2 Corintionan 5:7; Colosensenan 1:9, 10.

2. Pakico participacion den actividadnan di congregacion no necesariamente ta prueba cu un hende tin fe?

² Si nos berdaderamente ta bai hiba un bida asina, nos tin mester di fe cu ta bon fundá. (Hebreonan 11:1, 6) Hopi hende ta ser atraí na Testigonan di Jehova debí n’e normanan moral haltu i e amor cu nan ta mira entre e Testigonan. Esei ta un comienso excelente, pero e no ta nificá cu hende asina tin fe. Otronan por tin un casá of un mayor cu ta fuerte den fe, i tal bes nan ta participá den algun actividad spiritual debí n’e ehempel dje ser kerí ei. Ora bo tin un influencia asina den bo cas, di berdad ta un bendicion, pero esaki tampoco no ta tuma e lugá di un amor personal pa Dios i fe den dje.—Lucas 10:27, 28.

3. (a) Pa nos tin fe bon fundá, ki conviccion personal nos mester tin relacioná cu Bijbel? (b) Pakico algun hende ta keda mas lihé convencí cu otronan cu Bijbel ta un buki inspirá?

³ Esnan cu berdaderamente ta cana pa fe ta plenamente convencí cu Bijbel ta e Palabra di Dios. Tin evidencia abundante cu e Scritura Santu en berdad ta “inspirá di Dios.”a (2 Timoteo 3:16) Cuantu dje evidencia aki un persona mester examiná promé cu e keda convencí? Esei lo por dependé di su antecedente. Loke ta convencé un persona totalmente tal bes no ta persuadí un otro persona. Den algun caso, maske mustra un persona un abundancia di evidencia irefutabel, ainda lo e por resistí e conclusion lógico. Di con? Debí na motibunan profundamente scondí den su curason. (Jeremías 17:9) Pues, aunke un persona lo por afirmá di tin interes den Dios su propósito, tal bes su curason ta anhelá intensamente e aprobacion di mundu. Tal bes e no kier bandoná un estilo di bida cu ta na conflicto cu normanan di Bijbel. Sin embargo, si un persona berdaderamente tin hamber p’e berdad, si e ta onrado cu su mes i si e ta humilde, cu tempu lo e realisá cu Bijbel ta e Palabra di Dios.

4. Kico un individuo mester haci pa por adkerí fe?

⁴ Hopi bes den solamente un par di luna, hende cu ta haña yudansa pa studia Bijbel ta apreciá cu ya caba nan a haña mas cu suficiente prueba cu e ta e Palabra di Dios. Si esaki impulsá nan pa habri nan curason pa Jehova instruí nan, e ora ei nan pensamentunan di mas íntimo, nan deseo i motivacionnan lo ser formá gradualmente dor di loke nan ta siña. (Salmo 143:10) Romanonan 10:10 ta bisa cu ta “cu curason” un persona ta ehercé fe. Un fe asina ta expresá con e individuo ta sinti realmente, i lo e ser manifestá den su curso di bida.

Noe A Actua Riba un Fe Bon Fundá

5, 6. Riba kico Noe su fe tabata basá?

⁵ Noe tabata un persona cu tabatin un fe bon fundá. (Hebreonan 11:7) Ki base e tabatin pa e fe ei? Noe tabatin Dios su palabra, no den forma skirbí, pero papiá na dje. Génesis 6:13 ta bisa: “Dios a bisa Noe: ‘E fin di tur carni a yega dilanti mi, pasobra e tera ta yen di violencia como resultado di nan.’” Jehova a manda Noe construí un arca, i el a percurá e detayenan relacioná cu su construccion. Anto Dios a agregá: “Di mi parti, ata mi ta manda e diluvio di awa riba tera pa caba cu tur carni bou di shelu, den cua e forsa di bida ta activo. Tur cos cu ta riba tera lo hala su último rosea.”—Génesis 6:14-17.

⁶ Awaceru a cai promé cu esaki? Bijbel no ta bisa. Génesis 2:5 ta bisa: “Jehova Dios no a laga awaceru cai.” Pero ta asina aki Moises, kende a biba siglonan despues, a describí asuntunan ora el a papia, no dje tempu di Noe, sino di un tempu hopi promé cu esei. Manera Génesis 7:4 ta mustra, Jehova a referí na awaceru ora el a papia cu Noe, i evidentemente Noe a comprendé loke e tabata kier men. Tog, Noe su fe no tabata basá riba loke e por a mira. Apostel Pablo a skirbi cu Noe a ser “duná spiertamentu divino di cosnan cu no a ser contemplá ainda.” Dios a bisa Noe cu E tabata bai trece riba tera “e diluvio di awa,” of “e océano celestial,” manera e nota den e Traducción del Nuevo Mundo ta expres’é na Génesis 6:17. Te cu e tempu ei, un cos asina nunca a sosodé. Pero tur creacion visibel pa Noe a para como un demostracion evidente cu Dios en berdad lo por trece un diluvio destructivo asina. Impulsá pa fe, Noe a construí e arca.

7. (a) Kico Noe no tabatin mester pa haci loke Dios a mand’é haci? (b) Ki beneficio nos ta saca for dje consideracion dje fe di Noe, i con nos fe por ta un bendicion pa otronan?

⁷ Dios no a duna Noe un fecha cu e Diluvio lo a cuminsá. Pero Noe no a usa esei como un excuus pa adoptá un actitud di ‘laga nos warda wak,’ poniendo construccion di arca i predicacion na segundo lugá den su bida. Suficiente tempu di antemano, Dios a bisa Noe ki ora pa drenta den e arca. Miéntras tantu, “Noe a procedé na haci conforme cu tur loke Dios a mand’é. El a haci precisamente asina.” (Génesis 6:22) Noe a cana pa fe, no pa bista. Ki gradicidu nos ta cu el a hacié! Debí na su fe, nos ta na bida awe. Den nos caso tambe, e fe cu nos ta mustra por tin un efecto profundo riba loke e futuro ta encerá no solamente pa nos, sino tambe pa nos yunan i pa otro hende rond di nos.

E Fe di Abraham

8, 9. (a) Riba kico Abraham a basa su fe? (b) Den ki manera Jehova a “aparecé” na Abraham?

⁸ Considerá un otro ehempel—esun di Abraham. (Hebreonan 11:8-10) Riba kico Abraham a basa su fe? E ambiente den cua el a crece na Ur dje caldeonan tabata yen di idolatria i materialismo. Pero otro influencianan a forma Abraham su punto di bista. Sin duda Abraham por a asociá cu Noe su yu homber Sem, kende tabata su contemporáneo pa 150 aña. Abraham a bira convencí cu Jehova ta “e Dios Haltísimo, Productor di shelu i tera.”—Génesis 14:22.

⁹ Algu mas tabatin un influencia profundo riba Abraham. Jehova “a aparecé na . . . Abraham miéntras e tabata na Mesopotamia, promé cu el a bai biba na Haran, i el a bis’é: ‘Sali for di bo tera i for di bo famia i bini na e tera cu lo mi mustrá bo.’” (Echonan 7:2, 3) Den ki manera Jehova a “aparecé” na Abraham? Abraham no a mira Dios directamente. (Exodo 33:20) Sin embargo, posiblemente Jehova a aparecé na Abraham den un soño, den un manifestacion sobrenatural di gloria, of pa medio di un mensahero angelical, of representante. (Compará cu Génesis 18:1-3; 28:10-15; Levítico 9:4, 6, 23, 24.) Sea cual sea e medio cu Jehova a usa pa aparecé na Abraham, e homber fiel ei tabatin confiansa cu Dios tabata poniendo un privilegio precioso dilanti dje. Abraham a respondé cu fe.

10. Con Jehova a fortificá Abraham su fe?

¹⁰ Abraham su fe no a dependé di cu e tabatin detayenan dje tera na cua Dios tabata mandand’e. Su fe no a dependé di sa na ki tempu e tera ei lo a ser duná na dje. E tabatin fe pasobra e tabata conocé Jehova como Dios Todopoderoso. (Exodo 6:3) Jehova a bisa Abraham cu lo e tin desendencia, pero tabatin biaha cu Abraham a puntra su mes con esei lo por ta. E tabata birando bieu. (Génesis 15:3, 4) Jehova a fortificá Abraham su fe dor di bis’é pa wak ariba n’e streanan i conta nan si e tabata por. Dios a bis’é: “Asina bo simia lo bira.” Abraham a ser conmoví profundamente. Tabata bisto cu e Creador dje cuerponan celestial inspirador di temor ei lo por a cumpli cu loke el a primintí. Abraham a “pone fe den Jehova.” (Génesis 15:5, 6) Abraham no a kere simplemente pasobra el a gusta loke e tabata tendiendo; e tabatin fe bon fundá.

11. (a) Segun cu Abraham tabata yegando 100 aña di edad, con el a reaccioná n’e promesa di Dios di cu Sara di edad avansá lo a duna lus na un yu homber? (b) Cu ki clase di fe Abraham a enfrentá e prueba cu a encerá hiba su yu na Ceru di Moria pa ofrec’é como sacrificio?

¹¹ Ora Abraham tabata yegando 100 aña di edad i su esposa, Sara, cerca di 90 aña, Jehova a bolbe declará su promesa di cu Abraham lo haña un yu homber i cu Sara lo ta e mama. Abraham a pensa realísticamente riba nan situacion. “Pero, debí n’e promesa di Dios, e no a vacilá den un falta di fe, sino a bira poderoso mediante su fe, dunando gloria na Dios i kedando plenamente convencí cu loke el a primintí e por haci tambe.” (Romanonan 4:19-21) Abraham tabata sa cu e promesa di Dios no por a faya. Debí na su fe, mas despues Abraham a obedecé ora Dios a bis’é pa hiba su yu Isaac n’e tera di Moria i ofrec’é como un sacrificio. (Génesis 22:1-12) Abraham tabatin pleno confiansa cu e Dios cu milagrosamente por a pone e yu ei nace, tambe lo por a trec’é bek na bida afin di cumpli cu e sobrá promesanan cu El a haci en coneccion cuné.—Hebreonan 11:17-19.

12. Pa cuantu tempu Abraham a sigui cana pa fe, i ki recompensa ta spera e i su miembronan di famia cu a demostrá fe fuerte?

¹² Abraham a demostrá cu, no simplemente na cierto ocasion, sino atrabes di henter su bida, el a ser dirigí pa fe. Durante su bida Abraham no a ricibí for di Dios ningun parti dje Tera Primintí como herencia. (Echonan 7:5) Sin embargo, Abraham no a fada i regresá na Ur dje caldeonan. Pa 100 aña, te na su morto mes, el a biba den tent den e tera na cua Dios a dirigié. (Génesis 25:7) En cuanto e i su esposa Sara, nan yu homber Isaac, i nan nietu Jacob, Hebreonan 11:16 ta bisa: “Dios no ta tene bergwensa di nan, pa ser inbocá como nan Dios, pasobra e tin un stad cla pa nan.” Sí, Dios tin un lugá pa nan den e dominio terenal di su Reino Mesiánico.

13. Ken entre Jehova su sirbidónan djawe ta duna evidencia di tin fe manera esun di Abraham?

¹³ Tin hende entre e sirbidónan di Jehova awe cu ta manera Abraham. Pa hopi aña nan a cana pa fe. Mediante e fortalesa cu Dios ta duna, nan a vence obstáculonan inmenso. (Mateo 17:20) Nan no ta vacilá den fe pa motibu cu nan no sa na ki tempu precis Dios ta bai duna nan e herencia cu el a primintí. Nan sa cu e palabra di Jehova no por faya, i nan ta consider’é como un privilegio preciosísimo pa ser contá entre su Testigonan. Asina abo ta sinti?

E Fe cu A Impulsá Moises

14. Con a pone e fundeshi pa Moises su fe?

¹⁴ Un otro ehempel di fe ta Moises. Kico tabata e fundeshi pa su fe? Esei a ser poné den su infancia. Aunke e yu muher di fárao a haña Moises den un macutu di papiro den Riu Nilo i a tum’é como su yu homber, Moises su mama hebreo mes, Jokebed, a cria e mucha na pechu i tabatiné den su cuido durante su promé añanan di bida. Evidentemente Jokebed a siñ’é bon, inculcando den dje amor pa Jehova i aprecio pa Jehova su promesanan cu el a haci na Abraham. Mas despues, como miembro dje famia di cas di fárao, Moises a ser “instruí den tur e sabiduria dje egipcionan.” (Echonan 7:20-22; Exodo 2:1-10; 6:20; Hebreonan 11:23) Sin embargo, apesar di Moises su posicion faborecí, su curason tabata cu Dios su pueblo sclabisá.

15. Kico e echo cu Moises a identificá su mes cu e pueblo di Jehova a nificá pa Moises?

¹⁵ Ora Moises tabatin 40 aña, el a dal un egipcio mata pa libra un israelita cu tabata ser tratá inhustamente. E incidente aki a demostrá con Moises a mira e pueblo di Dios. Sí, “pa medio di fe, Moises, ora e tabata grandi, a nenga di ser yamá yu homber dje yu muher di fárao.” En bes di tene duru n’e ‘placer temporal di picá’ como miembro dje palacio real egipcio, fe a impuls’é pa identificá su mes cu e pueblo maltratá di Dios.—Hebreonan 11:24, 25; Echonan 7:23-25.

16. (a) Ki comision Jehova a duna Moises, i con Dios a yud’é? (b) Cumpliendo cu su comision, con Moises a demostrá fe?

¹⁶ Moises tabata ansioso pa tuma accion pa trece alivio pa su pueblo, pero Dios su tempu pa libra nan no a yega ainda. Moises tabatin cu hui for di Egipto. Tabata te cu 40 aña despues cu Jehova, mediante un angel, a comisioná Moises pa regresá Egipto pa saca e israelitanan for dje pais ei. (Exodo 3:2-10) Con Moises a reaccioná? E no a expresá duda den Jehova su abilidad di libra Israel, pero sí el a sinti su mes incapas p’e papel cu Dios a pone su dilanti. Amorosamente, Jehova a percurá e animacion cu Moises tabatin mester. (Exodo 3:11–4:17) E fe di Moises a bira fuerte. El a regresá Egipto i bes tras bes a spierta fárao cara-cara di plaganan cu lo a bini riba Egipto pa motibu cu e gobernante ei no kier a laga Israel bai pa adorá Jehova. Moises no tabatin poder personal pa ocasioná e plaganan ei. El a cana pa fe, no pa bista. Su fe tabata den Jehova i den su palabra. Fárao a menasá Moises. Pero Moises a perseverá. “Pa medio di fe el a bandoná Egipto, pero sin tene miedu dje rabia dje rey, pasobra el a sigui firme como si el a mira Esun cu ta invisibel.” (Hebreonan 11:27) Moises no tabata perfecto. El a cometé erornan. (Númeronan 20:7-12) Pero despues cu Dios a comision’é, su curso general di bida a ser dirigí pa fe.

17. Cana pa fe a resultá den kico pa Noe, Abraham i Moises, maske nan no a biba pa mira e mundu nobo di Dios?

¹⁷ Ohalá bo fe resultá di ta manera esun di Noe, Abraham i Moises. Ta cierto cu nan no a mira e mundu nobo di Dios den nan tempu. (Hebreonan 11:39) No tabata Dios su tempu señalá ainda; tabatin otro aspectonan di su propósito cu ainda mester a ser efectuá. Pero tog, nan fe den e palabra di Dios no a vacilá, i nan nomber ta den Dios su buki di bida.

18. Pakico tabata necesario pa esnan yamá pa bida celestial cana pa fe?

¹⁸ Apostel Pablo a skirbi: “Dios a mira di antemano algu mihó pa nos.” Esta, Dios a mira di antemano algu mihó pa esnan cu, mescos cu Pablo, a ser yamá pa bida celestial cu Cristo. (Hebreonan 11:40) Esakinan ta esnan cu Pablo tabatin particularmente na mente ora el a skirbi e palabranan registrá na 2 Corintionan 5:7: “Nos ta cana pa fe, no pa bista.” Tempu esei a ser skirbí, ainda ningun di nan a haña nan recompensa celestial. Nan no por a mir’é cu nan wowo físico, pero nan fe den dje tabata bon fundá. Cristo a ser lantá for di morto, e promé fruta di esnan pa ser bendicioná cu bida celestial. I mas cu 500 testigo a mir’é promé cu el a subi na shelu. (1 Corintionan 15:3-8) Nan tabatin bastante motibu pa dirigí henter nan curso di bida mediante e fe ei. Nos tambe tin motibu sólido pa cana pa fe.

19. Manera Hebreonan 1:1, 2 ta mustra, mediante ken Dios a papia cu nos?

¹⁹ Awe, Jehova no ta papia cu su pueblo mediante un angel, manera el a papia cu Moises n’e mata na candela. Dios a papia mediante su Yu. (Hebreonan 1:1, 2) Loke Dios a bisa mediante Jesus, El a lagu’e ser registrá den Bijbel, cu a ser traducí na idiomanan di hende rond mundu.

20. Con nos situacion ta muchu mas faborabel cu esun di Noe, Abraham i Moises?

²⁰ Nos tin hopi mas cu Noe, Abraham of Moises tabatin. Nos tin e Palabra di Dios completo—i gran parti di dje a cumpli caba. En bista di tur loke Bijbel ta bisa tocante hende homber i muher cu a duna prueba di ta testigonan fiel di Jehova ora nan a confrontá tur clase di prueba, Hebreonan 12:1 ta insta: “Laga nos tambe kita tur carga i e picá cu fácilmente ta coge nos den trampa, i laga nos core cu awante e careda cu ta poní dilanti nos.” Nos fe no ta algu cu nos por neglishá. “E picá cu fácilmente ta coge nos den trampa” ta falta di fe. Nos tin cu lucha duru si nos kier sigui “cana pa fe.”

[Nota]

Kico Ta Bo Comentario?

◻ Kico “cana pa fe” ta encerá?

◻ Con nos por beneficiá dje manera cu Noe a demostrá fe?

◻ Con e manera cu Abraham a ehercé fe ta yuda nos?

◻ Pakico Bijbel ta señalá na Moises como un ehempel di fe?

[Plachi na página 10]

Abraham a cana pa fe

[Plachi na página 10]

Moises i Aron a desplegá fe ora nan tabata dilanti fárao