LÈS 58

Keda Leal na Yehova

Edishon Imprimí

Kristian berdadero ta determiná pa no laga nada ni ningun hende stroba nan di adorá Yehova. Nos tin sigur ku bo tambe ta determiná pa hasi meskos. Yehova sigur ta kontentu ku bo ta leal na dje. (Lesa 1 Krónikanan 28:9.) Den ki situashon por ta difísil pa nos keda leal na Yehova? Kiko por yuda bo trata ku e situashonnan ei?

1. Kon otro hende por purba di stroba nos di keda leal na Yehova?

Tin hende ta hasi kos pa purba di stòp nos di sirbi Yehova. Ken asina lo purba di hasi esei? Por ehèmpel, hende ku a stòp di sirbi Yehova i ku awor ta plama mentira tokante e organisashon di Yehova pa suak nos fe. E hendenan akí ta ser yamá apóstata. Ademas, algun lider religioso ta plama mentira tokante nos pasobra nan ke pone e rumannan ku no ta realisá ku nan ta ser engañá bai tras di e mentiranan akí i stòp di sirbi Yehova. Ta peligroso pa nos papia ku nos opositornan, pa lesa nan bukinan i loke nan ta skirbi riba nan websitenan òf pa wak nan vidionan. Hesus a bisa lo siguiente tokante hende ku ke stroba otro hende di sirbi Yehova lealmente: “Laga nan. Ta guia siegu nan ta. I si un siegu guia un siegu, tur dos ta kai den buraku.”—Mateo 15:14.

2. Kon nos desishonnan ta mustra ku nos ta leal na Yehova?

Amor pa Yehova ta pone ku nos no ke tin nada di haber ku religion falsu. Nos trabou ni ningun organisashon ku nos ta pertenesé na dje ni nada ku nos ta hasi no mester tin konekshon ku religion falsu. Yehova ta spièrta nos: “Sali for di [Babilonia e Grandi], mi pueblo.”—Revelashon 18:2, 4.

KIKO MAS NOS POR SIÑA?

Wak kiko bo por hasi pa bo no laga ningun hende stroba bo di keda leal na Yehova. Ademas, wak kon bo por mustra ku bo ta leal na Yehova ora bo sali for di Babilonia e Grandi.

3. Tene kuidou ku maestro falsu

Kiko nos tin ku hasi ora nos tende kos negativo tokante Yehova su organisashon? Lesa Proverbionan 14:15. Despues, analisá e siguiente pregunta:

Dikon nos no mester bai tras di tur loke hende ta bisa?

Lesa 2 Huan 9-11. Despues, analisá e siguiente preguntanan:

Kon nos mester trata un apóstata?
Aunke nos no ta papia direktamente ku apóstata, kon nan ideanan por influensiá nos tòg?
Kon bo ta kere Yehova lo sintié si nos ta skucha kos negativo ku hende ta papia di dje òf di su organisashon?

4. Keda leal na Yehova ora un ruman peka

Si nos haña sa ku un hende den e kongregashon a kometé un piká serio, kiko nos mester hasi? Wak un prinsipio ku nos por saka for di e lei ku Yehova a duna e israelitanan den pasado. Lesa Levítiko 5:1.

Manera e teksto ta mustra, si nos haña sa ku un persona den kongregashon a kometé un piká serio, nos mester bisa e ansianonan loke nos sa. Pero, promé ku nos hasi esei, lo ta bon pa nos animá e persona pa e mes papia ku e ansianonan i konfesá su piká. Si e no hasi esei, nos lealtat na Yehova lo motivá nos pa bisa e ansianonan loke nos sa. Si nos tuma e pasonan ku a ser menshoná, kon esei ta demostrá ku nos tin amor leal pa . . .

Yehova Dios?
e persona ku a peka?
otro hende den kongregashon?

Kolekshon di plachi: Un ruman hòmber ta yuda un otro ruman hòmber ku a hasi algu robes. 1. E ruman hòmber ta mira algu riba su telefòn ku ta preokup’é. 2. E ruman hòmber ta mustra e otro ruman hòmber loke tin riba su telefòn, pero e otro ruman hòmber no a gusta ku e ruman hòmber a hala su atenshon. 3. E ruman hòmber ta mustra dos ansiano kiko tin riba su telefòn i ta papia ku nan. — Si un ruman ta den problema, yud’é!

5. Keda leu for di Babilonia e Grandi

Pasa e VIDIO.

VIDIO: Sali for di Babilonia e Grandi! (5:06)

Esena di e vidio ‘Sali for di Babilonia e Grandi!’ Un studiante di Beibel ta kana bai laga un pastor despues ku e studiante a kita for di su trabou na misa.

Lesa Lukas 4:8 i Revelashon 18:4, 5. Despues, kontestá e siguiente preguntanan:

Ainda mi ta inskribí komo miembro di un religion falsu?
Mi ta forma parti di un organisashon ku ta konektá ku un otro religion?
E trabou ku mi ta hasi ta duna sosten na religion falsu na un òf otro manera?
Ainda mi tin konekshon ku religion falsu den otro área di mi bida?
Si mi kontesta tabata sí riba kualke di e preguntanan ei, ki kambio mi mester hasi?

Sea loke sea e kaso, tuma un desishon ku ta laga bo ku un konsenshi limpi i ku ta demostrá ku bo ta leal na Yehova.

Un ruman muhé ku su yu hòmber ta sali for di un supermerkado. Nan ta kana pasa banda di un señora ku ta pidi donashon pa un obra di karidat ku ta ser apoyá pa un organisashon religioso. — Kiko lo bo hasi si un hende pidi bo hasi donashon pa un obra di karidat ku ta ser apoyá pa un organisashon religioso?

LOKE HENDE SA BISA: “Mi mester sa loke e apóstatanan ta bisa tokante Testigunan di Yehova pa asina mi por defendé e bèrdat.”

Esei lo ta algu sabí pa hasi? Dikon sí, òf dikon nò?

RESÚMEN

Pa nos por keda leal na Yehova, nos no mester anda ku hende ku ta purba di engañá nos.

Repaso

Dikon nos no mester wak, lesa òf skucha loke e apóstatanan ta bisa?
Si nos haña sa ku un ruman a kometé un piká serio, kiko nos mester hasi?
Kon nos por obedesé e spièrtamentu pa sali for di religion falsu?

A kompletá e lès akí dia:

Meta

Si ainda bo tin konekshon ku religion falsu, dal e pasonan nesesario pa separá bo mes for di religion falsu.

Otro meta:

Your other goal

MAS INFORMASHON INTERESANTE

Lesa kiko bo por hasi ora otro hende ta papia mentira tokante Testigunan di Yehova.

“Bo Ta na Altura di e Echonan?” (E Toren di Vigilansia di ougùstùs 2018)

Kon bo por haña sa si un organisashon òf un aktividat ta duna sosten na Babilonia e Grandi?

“Keda Okupá Durante e Parti Final di ‘e Último Dianan’” (E Toren di Vigilansia di òktober 2019, paragraf 16-18)

Kiko algun opositor a hasi pa purba di suak nos fe?

Tene Kuidou ku Engaño (9:26)

Den e relato “Mi Tabata Buska Dios for di Tempu Mi Tabata Mucha,” wak kon un saserdote shinto a kibra tur laso ku e tabatin ku religion falsu.

“Beibel Ta Kambia Bida di Hende” (E Toren di Vigilansia di 1 di yüli 2011, na spañó)