Enfrentando e Desafio di Lealtad
“Bisti e personalidad nobo cu a ser creá conforme cu e boluntad di Dios den berdadero husticia i lealtad.”—EFESIONAN 4:24.
1. Pakico nos debe Jehova Dios nos lealtad?
ENFRENTANDO e desafio di lealtad tin hopi faceta. Di mayor importancia ta pa enfrentá e desafio di lealtad na Jehova Dios. Berdaderamente, en bista di ken Jehova ta i loke el a haci pa nos, i pa motibu di nos dedicacion na dje, nos debe nos lealtad na dje. Con nos ta manifestá lealtad na Jehova Dios? Un manera principal ta dor di ser leal n’e principionan hustu di Jehova.
2, 3. Ki relacion tin entre lealtad i husticia?
2 Pa enfrentá e desafio ei, nos mester haci caso dje palabranan hañá na 1 Pedro 1:15, 16: “Di acuerdo cu e Santu cu a yama boso, boso mes tambe bira santu den tur boso conducta, pasobra ta pará skirbí: ‘Boso mester ta santu, pasobra ami ta santu.’” Lealtad na Jehova Dios lo haci nos obedec’é na tur tempu, treciendo nos pensamentunan, palabranan i accionnan na armonia cu su boluntad santu. E ta nificá preservá un bon concenshi, manera 1 Timoteo 1:3-5 ta manda nos: “Realmente e doel dje mandato aki [pa no siña diferente doctrina of pa no presta atencion na relatonan falsu] ta amor for di un curason limpi i di un bon concenshi i di fe sin hipocresia.” Ta cierto cu ningun di nos ta perfecto, pero nos mester ta haciendo nos mihó esfuerso, no ta berdad?
3 Lealtad na Jehova lo prevení nos di comprometé egoistamente principionan hustu. En berdad, lealtad lo prevení nos di ser un cos di paden i otro cos di pafó. Lealtad ta loke e salmista tabatin na mente ora el a canta: “Instruí mi, O Jehova, tocante bo caminda. Lo mi cana den bo berdad. Unificá mi curason pa teme bo nomber.” (Salmo 86:11) Lealtad ta rekerí loke a ser describí apropiadamente como “obedencia na loke no por ser imponé.”
4, 5. Lealtad lo prevení nos di tuma ki accion incorecto?
4 Lealtad na Jehova Dios tambe lo prevení nos di haci cualkier cos cu lo trece reproche riba su nomber i Reino. Por ehempel, un biaha dos cristian a haña nan den problema cu otro te cu nan a recurí inapropiadamente na un corte mundano. E hues a puntra, ‘Boso tur dos ta Testigo di Jehova?’ Evidentemente e no por a comprendé kico nan tabata haciendo den corte. Ki un reproche esei tabata! Lealtad na Jehova Dios lo a pone e rumannan ei haci caso dje conseho di apostel Pablo: “Realmente, anto, esei ta nificá henteramente un derota pa boso, cu boso tin casonan legal cu otro. Pakico mas bien boso no ta laga pa inhusticia ser hací cu boso? Pakico mas bien boso no ta laga boso ser defraudá?” (1 Corintionan 6:7) Siguramente, e curso di lealtad na Jehova Dios ta pa sufri pérdida personal mas bien cu trece reproche riba Jehova i su organisacion.
5 Lealtad na Jehova Dios tambe ta enbolbé no entregá na temor di hende. “Temblamentu dilanti hende ta loke ta span un trampa, pero esun cu ta confia den Jehova lo ser protehá.” (Proverbionan 29:25) Pues, nos no ta haci compromiso ora nos haña nos enfrentá cu persecucion, pero nos ta sigui e ehempel cu Testigonan di Jehova a pone na ex-Union Soviético, na Malawi, na Etiopia i den asina tantu otro pais.
6. Lealtad lo prevení nos di asociá cu ken?
6 Si nos ta leal na Jehova Dios, nos lo evitá di bira amigu di tur esnan cu ta su enemigunan. P’e motibu ei disipel Santiago a skirbi: “Adúlteronan, boso no sa cu amistad cu e mundu ta enemistad cu Dios? P’esei, ken cu kier ta amigu dje mundu ta haci su mes enemigu di Dios.” (Santiago 4:4) Nos kier tin e lealtad cu Rey David a demostrá ora el a bisa: “Mi no ta odia esnan cu ta odiá bo intensamente, O Jehova, i mi no ta sinti asco pa esnan cu ta lanta contra bo? Cu un odio completo mi ta odia nan. Nan a bira berdadero enemigu pa mi.” (Salmo 139:21, 22) Nos no kier socialisá cu ningun pecador boluntario, pasobra nos no tin nada en comun cu nan. Lealtad na Dios lo no prevení nos di socialisá cu cualkier enemigu asina di Jehova, sea en persona of pa medio di television?
Saliendo na Defensa di Jehova
7. Lealtad lo yuda nos haci kico relacioná cu Jehova, i con Elihú a haci esaki?
7 Lealtad lo move nos pa sali na defensa di Jehova Dios. Ki un ehempel excelente di esei nos tin den Elihú! Job 32:2, 3 ta bisa nos: “E rabia di Elihú . . . a bira ardiente. Contra Job su rabia a cende dor cu el a declará su mes alma hustu mas bien cu Dios. Tambe, contra su tres compañeronan su rabia a cende p’e echo cu nan no a haña un contesta pero nan a procedé na yama Dios malbado.” Den Job capítulo 32 pa 37, Elihú ta sali na defensa di Jehova. Por ehempel, el a bisa: “Tene pacenshi cu mi un raticu, i lo mi declará na bo cu ainda tin palabra pa bisa na fabor di Dios. . . . Na mi Modelador lo mi atribuí husticia. . . . Lo e no apartá su wowonan di ningun hustu.”—Job 36:2-7.
8. Pakico nos tin cu sali na defensa di Jehova?
8 Pakico tin un necesidad pa sali na defensa di Jehova? Awe, nos Dios Jehova ta ser blasfemá den masha hopi manera. Hende ta bisa cu e no ta existí, cu e ta parti di un Trinidad, cu e ta tormentá hende eternamente den un fiernu na candela, cu e ta haciendo un intento débil pa combertí e mundu, cu e no ta interesá den humanidad, etcétera. Nos ta demostrá nos lealtad na dje saliendo na su defensa i probando cu Jehova ta existí; cu e ta un Dios sabí, hustu, todopoderoso i amoroso; cu e tin un tempu pa tur cos; i cu na su debido tempu lo e trece un fin na tur maldad i haci henter e tera un paradijs. (Eclesiástes 3:1) Esaki ta rekerí pa nos haci uso di tur oportunidad pa duna testimonio di Jehova su nomber i Reino.
Lealtad n’e Organisacion di Jehova
9. Riba ki asuntunan algun a revelá nan falta di lealtad?
9 Awor nos ta yega n’e punto di lealtad n’e organisacion visibel di Jehova. Siguramente, nos debe nos lealtad na dje, incluyendo “e esclabo fiel i discreto,” mediante cua e congregacion cristian ta ser alimentá spiritualmente. (Mateo 24:45-47) Suponé cu algu ta aparecé den e publicacionnan di Watch Tower cu nos no ta comprendé of no ta di acuerdo cuné n’e momento ei. Kico nos lo haci? Sinti nos ofendí i bandoná e organisacion? Esei ta loke algun a haci ora E Toren di Vigilancia, hopi aña pasá, a aplicá e pacto nobo n’e Milenio. Otronan a sinti nan ofendí pa loke E Toren di Vigilancia a bisa un biaha riba e cuestion di neutralidad. Si esnan cu a trompecá riba e asuntunan aki tabata leal n’e organisacion i nan rumannan, nan lo a spera pa Jehova clarificá e asuntunan aki, locual el a haci na su debido tempu. Pues, lealtad ta incluí spera cu pacenshi te ora e esclabo fiel i discreto publicá mas comprendimentu.
10. Lealtad lo prevení nos di bira curioso tocante kico?
10 Lealtad n’e organisacion visibel di Jehova ta nificá tambe rechasá e apóstatanan. Cristiannan leal lo no ta curioso tocante loke hende asina tin di bisa. Ta cierto cu esnan cu Jehova Dios ta usa pa dirigí su trabou riba tera no ta perfecto. Pero kico e Palabra di Dios ta bisa nos haci? Bandoná e organisacion di Dios? No. Cariño fraternal mester mantené nos leal na dje, i nos mester sigui “stima otro intensamente di curason.”—1 Pedro 1:22.
Lealtad na Ancianonan Leal
11. Lealtad lo yuda nos vigilá contra ki pensamentu negativo?
11 Ora algu ta ser bisá of hací den e congregacion cu nos tin problema pa comprendé, lealtad lo prevení nos di husga e motibunan i lo yuda nos tuma e posicion cu tal bes esei ta un asuntu di usa dicernimentu. No ta muchu mas mihó pa enfocá riba e bon cualidadnan dje ancianonan nombrá i otro compañeronan creyente en bes di riba nan limitacionnan? Sí, nos kier vigilá contra tur pensamentu negativo asina, pasobra e ta relacioná cu deslealtad! Lealtad tambe lo yuda nos obedecé Pablo su instruccion “pa no zundra ningun hende.”—Tito 3:1, 2.
12, 13. Ki desafionan particular ancianonan tin cu enfrentá?
12 Lealtad ta presentá desafionan particular pa ancianonan. Un dje desafionan aki ta e asuntu di confidencialidad. Miembro di un congregacion por confia un anciano algu. Lealtad n’e persona ei lo prevení e anciano di violá e principio di confidencialidad. Lo e haci caso dje conseho na Proverbionan 25:9: “No revelá papiamentu confidencial di un otro.” Esei ta nificá ni sikiera na su propio esposa!
13 Ancianonan tin tambe otro pruebanan di lealtad pa enfrentá. Nan ta djis complacé hende, of nan lo yuda cu curashi i cu suavedad esnan cu mester di coreccion, asta si nan ta pariente of bon amigu? Lealtad n’e organisacion di Jehova lo haci esnan di nos cu ta anciano purba yuda cualkier persona cu mester di asistencia spiritual. (Galationan 6:1, 2) Aunke nos lo ta bondadoso, lealtad lo haci nos franco cu nos co-anciano, net manera Pablo a papia francamente cu apostel Pedro. (Galationan 2:11-14) Di otro banda, superintendentenan mester ta cauteloso pa nan no actua imprudentemente of mustra parcialidad of den algun otro manera abusá di nan autoridad, i hacié difícil pa esnan cu ta bou di nan cuido ser leal n’e organisacion di Dios.—Filipensenan 4:5.
14, 15. Ki factornan lo por pone e lealtad di miembronan dje congregacion na prueba?
14 Tin mas aspectonan den e asuntu di enfrentá e desafio di lealtad n’e congregacion i su ancianonan. Si tin condicionnan un tiki perturbador den e congregacion, esaki ta duna nos oportunidad pa manifestá lealtad na Jehova i na esnan cu ta represent’é. (Mira La Atalaya, di 15 di juni, 1987, página 15-17.) Ora tin un caso di scomulgacion, lealtad ta rekerí pa nos apoyá e ancianonan, sin purba cuestioná si tabatin suficiente motibu p’e accion cu a ser tumá.
15 Lealtad n’e congregacion tambe ta exigí pa nos apoyá tur e cincu reunionnan semanal te caminda nos circunstancianan i abilidad ta permití. Lealtad ta rekerí pa nos no solamente asistí regularmente na nan sino tambe pa nos prepará pa nan i duna comentario edificante segun oportunidad ta presentá.—Hebreonan 10:24, 25.
Lealtad Matrimonial
16, 17. Ki desafionan di lealtad cristiannan casá tin cu enfrentá?
16 Na ken mas nos mester ta leal? Si nos ta casá, en bista di nos voto matrimonial, nos tin cu enfrentá e desafio di ser leal na nos partner matrimonial. Lealtad na nos casá lo prevení nos di haci e ekibocacion di ser mas amabel cu otro hende muher of homber cu nos ta cu nos mes esposa of esposo. Lealtad na nos casá tambe ta rekerí pa nos no revelá na otronan e debilidadnan of limitacionnan di nos casá. Ta mas fácil pa keha cerca otronan cu pa traha duru pa mantené e canal di comunicacion cu nos casá habrí, locual nos mester haci na armonia cu e Regla di Oro. (Mateo 7:12) Realmente, ser casá ta presentá un berdadero desafio pa nos lealtad cristian.
17 Pa enfrentá e desafio di lealtad aki, nos no solamente mester evitá di ser culpabel di mal conducta grosero sino tambe nos mester protehá net nos pensamentu i sintimentunan. (Salmo 19:14) Por ehempel, si nos curason engañoso ta golos pa placer i excitacion, ta masha fácil pa nos avansá egoistamente di admirá algu te n’e punto di dese’é. Urgiendo fieldad matrimonial, Rey Sálomon ta consehá esposonan di un manera figurativo pa ‘bebe awa for di nan mes renbak.’ (Proverbionan 5:15) I Jesus a bisa: “Tur cu ta sigui mira un muher afin di tene un pasion p’e ya a cometé adulterio cuné caba den su curason.” (Mateo 5:28) Esposonan cu ta entregá nan mes na material pornográfico ta core e rísico di ser tentá pa cometé adulterio, engañando nan esposa asina i ser desleal na nan. P’e mésun motibu, un esposa completamente absorbá den wakmentu di novela cu tin episodionan adúltero por ser tentá pa bira desleal na su esposo. Sin embargo, dor di ser berdaderamente leal na nos casá, nos ta fortalecé nos laso matrimonial, i nos ta yuda otro den nos esfuersonan pa agradá Jehova Dios.
Yudansanan pa Keda Leal
18. Comprendimentu di kico lo yuda nos ser leal?
18 Kico lo yuda nos enfrentá e desafio di lealtad den e cuater áreanan aki: lealtad na Jehova, na su organisacion, n’e congregacion i na nos partner matrimonial? Un yudansa ta di comprendé cu enfrentando e desafio di lealtad ta estrechamente ligá cu e vindicacion di Jehova su soberania. Sí, dor di permanecé leal nos ta mustra cu nos ta mira Jehova como Soberano Universal. Asina tambe nos por tin respet propio i e speransa di bida eterno den Jehova su mundu nobo. Nos por yuda nos mes keda leal dor di considerá ehempelnan excelente di lealtad, cuminsando for di Jehova bini abou te na esnan mencioná den Bijbel i den nos publicacionnan di Watch Tower, incluyendo relatonan di e Anuario.
19. Ki papel fe ta hunga den ser leal?
19 Fe fuerte den Jehova Dios i temor di desagrad’é lo yuda nos enfrentá e desafio di lealtad. Nos ta fortalecé nos fe den Jehova i nos temor p’e dor di studia e Palabra di Dios diligentemente i dor di participá den e ministerio cristian. Esaki lo yuda nos pa actua na armonia cu e conseho di Pablo registrá na Efesionan 4:23, 24: “Boso mester ser hací nobo den e forsa cu ta impulsá boso mente, i boso mester bisti e personalidad nobo cu a ser creá conforme cu e boluntad di Dios den berdadero husticia i lealtad.”
20. Riba tur cos, ki cualidad lo yuda nos ser leal na Jehova i na tur otro persona na ken nos ta debe nos lealtad?
20 Aprecio pa Jehova su cualidadnan ta yuda nos ser leal. Riba tur cos, amor inegoista pa nos Tata celestial i gratitud pa tur loke el a haci pa nos, stimand’e cu henter nos curason i alma i mente i forsa, lo yuda nos ser leal na dje. Ademas, teniendo e amor cu Jesus a bisa lo identificá su siguidornan lo yuda nos ser leal na tur cristian den e congregacion i den nos famia. Cu otro palabra, e ta en realidad un asuntu di ser sea egoista of inegoista. Deslealtad ta nificá ser egoista. Lealtad ta nificá ser inegoista.—Marco 12:30, 31; Juan 13:34, 35.
21. Con nos por resumí e asuntu di enfrentá e desafio di lealtad?
21 Como resúmen: Lealtad ta e excelente cualidad cu Jehova Dios, Jesucristo i tur Jehova su sirbidornan berdadero ta manifestá. Pa tin un bon relacion cu Jehova Dios, nos tin cu enfrentá e desafio di lealtad na dje bibando conforme cu su rekisitonan hustu, no teniendo nada di haci cu su enemigunan, i saliendo na Jehova su defensa dunando testimonio formalmente i informalmente. Tambe nos tin cu enfrentá e desafio di ser leal n’e organisacion visibel di Jehova. Nos tin cu ser leal na nos congregacion i leal na nos partner matrimonial. Enfrentando e desafio di lealtad cu éxito, nos lo ta participando den e vindicacion dje soberania di Jehova, i nos lo ta tumando su banda dje cuestion. Asina, nos lo gana su fabor i lo ricibí e premio di bida eterno. Loke apostel Pablo a bisa tocante debocion piadoso por ser aplicá tambe na enfrentá e desafio di lealtad. E ta probechoso tantu pa e bida awor como pa esun cu lo bini.—Salmo 18:25; 1 Timoteo 4:8.
Con Lo Bo Contestá?
◻ Den ki maneranan nos por enfrentá e desafio di lealtad na Dios?
◻ Kico lealtad n’e organisacion di Jehova ta rekerí di nos?
◻ Con ancianonan por enfrentá e desafio di lealtad?
◻ Ki desafio cu ta enbolbé lealtad cristiannan casá mester enfrentá?
◻ Ki cualidadnan lo yuda nos enfrentá e desafionan di lealtad?
[Plachi na página 17]
Lealtad na miembronan dje congregacion lo prevení ancianonan di revelá asuntunan confidencial
[Plachi na página 18]
Lealtad na bo casá ta fortalecé e laso matrimonial