Hesus A Papia di Divorsio i Tokante Amor pa Mucha

Despues ku Hesus i su disipelnan a sali for di Galilea, nan a krusa Riu Yordan i kue rumbo zùit pa pasa via Perea. Último biaha ku Hesus tabata na Perea, el a splika e fariseonan Dios su punto di bista tokante divorsio. (Lukas 16:18) Awor, nan a bolbe lanta e tópiko pa pone Hesus na prueba.

Moises a skirbi ku un hòmber por a divorsiá si su esposa tabata kulpabel di “algu indesente.” (Deuteronomio 24:1) Tabatin diferente opinion tokante kiko tabata base pa divorsio. Algun hende tabata kere ku un pareha por a divorsiá pa asuntunan chikitu. P’esei, e fariseonan a puntra Hesus: “Un hòmber tin mag di divorsiá di su esposa pa kualke motibu?”—Mateo 19:3.

Hesus no a duna un kontesta basá riba opinion di hende. Nò, na un manera sabí, el a hala atenshon na Dios su areglo di matrimonio. El a bisa: “Boso no a lesa ku Esun ku a krea hende na prinsipio a traha nan hòmber i muhé i a bisa: ‘P’esei un hòmber lo bandoná su tata i su mama i lo pega na su esposa, i nan dos lo ta ún karni’? Di manera ku nan no ta dos mas, sino ún karni. Pues, no laga ningun hende separá loke Dios a uni bou di un yugo.” (Mateo 19:4-6) Ora Dios a instituí matrimonio, uniendo Adam ku Eva, e no a pone un areglo pa terminá un matrimonio.

E fariseonan no tabata di akuerdo ku Hesus, p’esei nan a puntr’é: “Pakiko anto Moises a ordená pa e hòmber duna e muhé un karta di divorsio i mand’é bai?” (Mateo 19:7) Hesus a bisa nan: “Moises a permití boso divorsiá di boso esposa pasobra boso ta tèrko, ma esaki no tabata e kaso na kuminsamentu.” (Mateo 19:8) Ora Hesus a papia di “kuminsamentu,” e no tabata referí na e tempu di Moises, ma na e tempu ku Dios a originá matrimonio den Hòfi di Edén.

Anto Hesus a bisa un bèrdat importante: “Mi ta bisa boso ku ken ku divorsiá di su esposa i kasa ku un otro muhé—si no ta pa motibu ku e esposa a kometé fornikashon [na griego, pornéia]—ta kometé adulterio.” (Mateo 19:9) Pues, inmoralidat seksual ta e úniko base bíbliko pa divorsio.

E disipelnan a bis’é: “Si esei ta e kaso entre un hòmber i su esposa, no ta konsehabel pa kasa anto.” (Mateo 19:10) Pues, si un hende ta pensa di kasa, e mester mira matrimonio komo un union permanente!

Anto Hesus a kuminsá papia tokante ser soltero i a splika ku algun hende ta nase ku sierto problema ku ta pone ku nan no por tene relashon seksual. Otronan a ser mutilá, p’esei nan tampoko no por tene relashon seksual. Pero tin hende ku ta skohe pa dominá e deseo di disfrutá di relashon seksual i ta keda sin kasa. Nan ta hasi esei pa nan por enfoká kompletamente riba e Reino. I Hesus a urgi su oyentenan: “Laga esun ku por keda sin kasa, keda sin kasa.”—Mateo 19:12.

Den esei, e hendenan a kuminsá trese nan yunan chikitu serka Hesus. Pero e disipelnan a skual e hendenan; podisé nan no tabata ke pa nan molestiá Hesus. Ora Hesus a mira loke e disipelnan tabata hasi, e no a keda kontentu. El a bisa nan: “Laga e muchanan bini serka mi; no purba di stòp nan, pasobra e Reino di Dios ta pertenesé na hende manera e muchanan akí. Di bèrdat mi ta bisa boso: Ken ku no aseptá e Reino di Dios manera un mucha lo no drenta e Reino di Dios.”—Marko 10:14, 15; Lukas 18:15.

Esaki sigur ta un bon lès pa nos tambe! Pa nos por risibí e Reino di Dios, nos mester ta humilde i kla pa siña, meskos ku mucha chikitu. Anto Hesus a mustra kuantu el a stima mucha; el a tuma nan den su brasa i a bendishoná nan. Hesus tin e mesun amor akí pa tur hende ku “aseptá e Reino di Dios manera un mucha.”—Lukas 18:17.