Nan A Haci e Boluntad di Jehova

Elías Ta Glorificá e Dios Berdadero

E TABATA e homber mas buscá na Israel. Casi sigur lo el a ser matá si e rey lo por a hañ’é. Ken tabata e homber tan buscá aki? Jehova su proteta Elías.

Rey Acab i su esposa pagano, Jezabel, a pone adoracion di Baal florecé den Israel. Como resultado, Jehova a trece un secura riba e tera, un secura cu awor tabata den su di cuater aña. Jezabel furioso a cuminsá mata e profetanan di Jehova, pero Acab tabata kier a haña foral Elías. Ta Elías a bisa Acab mas cu tres aña promé: “Durante e añanan aki lo no tin ni serena ni awaceru, si no ta riba órden di mi palabra!” (1 Reynan 17:1) I e secura cu a resultá ainda a continuá.

Den e situacion peligroso aki, Jehova a bisa Elías: “Bai, mustra bo mes na Acab, como cu mi ta dicididu pa laga awaceru cai riba e superficie dje tera.” Tumando un rísico grandi pa su mes bida, Elías a obedecé Jehova su mandementu.—1 Reynan 18:1, 2.

Dos Contrincante Ta Topa

“Ta bo mes, esun cu a trece maldicion riba Israel?” Acab a puntra, ora el e mira Elías. Cu curashi Elías a contestá: “Ami no a trece maldicion riba Israel, sino abo i e cas di bo tata, pasobra boso a laga e mandamentunan di Jehova, i bo a bai sigui e Baalnan.” Anto Elías a manda pa henter Israel reuní na Ceru di Carmel, incluso “e cuatershenticincuenta profetanan di Baal i e cuatershen profetanan dje palu sagrado.” Anto Elías e papia cu e multitud: “Pa cuantu tempu mas boso lo sigui cocochá riba dos diferente opinion?a Si Jehova te e Dios berdadero, bai siguié; pero si ta Baal, bai siguié.”—1 Reynan 18:17-21.

E pueblo e keda ketu. Kisas nan a reconocé nan culpa den keda sin rindi debocion exclusivo na Jehova. (Exodo 20:4, 5) Of por ta cu nan concenshi a haña asina tantu cayo cu nan no a mira ningun picá den dividí nan lealtad entre Jehova i Baal. Di tur manera, Elías a instruí e pueblo pa trece dos toro yong—un pa e profetanan di Baal i e otro p’e. Tur dos toro lo ser prepará pa sacrificio, pero sin cende candela. Elías a bisa: “Boso tin cu inbocá e nomber di boso dios, i ami, di mi parti, lo inbocá e nomber di Jehova; i tin cu sosodé cu e Dios berdadero cu contestá pa medio di candela ta e Dios berdadero.”—1 Reynan 18:23, 24.

Jehova Ta Ser Glorificá

E profetanan di Baal a cuminsá “cocochá rond dje altar cu nan a traha.” Henter mainta nan a grita: “O Baal, contestá nos!” Pero Baal no e contestá. (1 Reynan 18:26) Anto Elías ta cuminsa haci cherche di nan: “Grita mas duru, pasobro e ta un dios.” (1 Reynan 18:27) E profetanan di Baal asta a cuminsá corta nan mes cu puñá i lansa—algu cu hopi bes paganonan tabata haci pa nan diosnan haña duele di nan.b—1 Reynan 18:28.

Tabata despues di 12’or di merdia awor, i e adoradónan di Baal a sigui “comportá nan manera proteta”—un frase cu den e contexto aki ta transmití e idea di sapatiá manera hende loco i for di control. Lat den atardi, Elías finalmente a bisa henter e pueblo: “Hala cerca mi.” Tur a wak atentamente segun cu Elías a reconstruí e altar di Jehova, a coba un trinchera rond di dje, a corta e toro yong na pida pida, i pon’é riba e altar cu palu pa kima. Despues, a muha e toro, e altar, i e palunan papa muhá cu awa, i a yena e trinchera cu awa (awa di laman cu indudablemente nan a saca for di Laman Mediteráneo). Anto, Elías a pidi Jehova den oracion: “Laga nan sa awe cu abo ta Dios den Israel i cu ami ta bo sirbidó i cu ta pa medio di bo palabra mi a haci tur e cosnan aki. Contestá mi, O Jehova, contestá mi, pa e pueblo aki por sa cu abo, Jehova, ta e Dios berdadero i abo mes a bira nan curason bek.”—1 Reynan 18:29-37.

Di ripiente, candela a baha lor di shelu “i a cuminsá come e ofrenda kimá i e pidanan di palu i e piedranan i e stof, i e awa cu tabata den e trinchera el a lembe.” E pueblo cu tabata wak loke a pasa, mesora a cai riba nan cara na suela, bisando: “Jehova ta e Dios berdadero! Jehova ta e Dios berdadero!” Riba mandamentu di Elías nan a gara e profetanan di Baal i hiba nan n’e vaye torencial di Kison, caminda a ehecutá nan.—1 Reynan 18:38-40.

Les pa Nos

Elías a desplegá loke por parce curashi sobrehumano. Sin embargo, e escritor bíblico Santiago ta sigurá nos cu “Elías tabata un homber cu sintimentu mescos cu nos.” (Santiago 5:17) E no tabata inmuno pa un grado di temor i ansiedad. Por ehempel, ora Jezabel a hura despues di venga e pérdida dje profetanan di Baal, Elías a hui anto a sclama na Jehova den oracion: “Basta! Awor, O Jehova, kita mi alma.”—1 Reynan 19:4.

Jehova no a kita Elías su alma den morto. En bes di esei, misericordiosamente el a percurá yudansa. (1 Reynan 19:5-8) Sirbidónan di Dios awe por tin sigur cu Jehova lo haci mescos ora nan ta enfrentá periodonan di ansiedad intenso, kisas debí na oposicion. En berdad, si nan pidi Jehova su yudansa den oracion, e por suministrá nan “poder mas ayá di loke ta normal,” di manera cu asta si nan ta ser “oprimí den tur manera,” nan lo no ta ‘pertá di tal manera cu nan no por move.’ Pues, nan lo ser yudá pa wanta, mescos cu Elías—2 Corintionan 4:7, 8.

[Nota]