LÈS 20
Kon e Kongregashon Kristian Ta Organisá?
Yehova ta un Dios di òrdu. (1 Korintionan 14:33) Pues, no ta nada straño anto ku Yehova su pueblo tambe ta organisá. Kon e kongregashon kristian ta organisá? Kiko kada un di nos por hasi pa e kongregashon keda bon organisá?
1. Ken ta kabes di e kongregashon?
“Kristu ta kabes di e kongregashon.” (Efesionan 5:23) For di shelu, Hesus ta guia e aktividatnan di e pueblo di Yehova rònt mundu. Hesus a nombra “e esklabo fiel i prudente,” esta, Kuerpo Gobernante, ku ta un grupo chikitu di ansiano eksperensiá. (Lesa Mateo 24:45-47.) Meskos ku e ansianonan i e apòstelnan di promé siglo na Herúsalèm, awe Kuerpo Gobernante ta guia e kongregashonnan rònt mundu. (Echonan 15:2) Pero, e ruman hòmbernan akí no ta lider di nos organisashon. Nan ta buska Yehova su guia den Beibel pa nan haña sa kiko Yehova ke pa nan hasi i di buena gana nan ta sigui e guia di Hesus.
2. Ken e ansianonan ta i kiko ta nan trabou?
E ansianonan ta ruman hòmber den e kongregashon kristian ku ta sirbiendo Yehova fielmente pa hopi aña. Nan ta usa Beibel pa siña e pueblo di Yehova i ta yuda i animá nan. Nan no ta ser pagá pa nan trabou. Mas bien, nan ta sirbi “di buena gana; no pa amor pa ganashi desonesto, sino ku entusiasmo.” (1 Pedro 5:1, 2) Sirbidó ministerial ta ruman hòmber den e kongregashon ku ta yuda e ansianonan. Ku tempu, nan tambe por kualifiká pa bira ansiano.
Kuerpo Gobernante ta nombra algun ansiano komo superintendente di sirkuito. E superintendentenan ei ta bishitá diferente kongregashon pa guia i fortalesé e rumannan. Ademas, nan ta usa e rekisitonan ku tin den Beibel pa determiná si un ruman hòmber por bira un sirbidó ministerial òf ansiano.—1 Timoteo 3:1-10, 12; Tito 1:5-9.
3. Ki responsabilidat kada Testigu di Yehova tin?
Tur hende den e kongregashon ta “alabá Yehova su nòmber.” Nan ta hasi esei ora nan ta partisipá na reunion di kongregashon i ora nan ta prediká segun nan sirkunstansia.—Lesa Salmo 148:12, 13.
KIKO MAS NOS POR SIÑA?
Laga nos wak ki tipo di lider Hesus ta i kon e ansianonan ta imit’é. Ademas, wak kon nos por obedesé Hesus i traha huntu ku e ansianonan.
4. Hesus ta un lider suave i bondadoso
Hesus ta duna nos un bunita invitashon. Lesa Mateo 11:28-30. Despues, analisá e siguiente pregunta:
Ki tipo di lider Hesus ta, i kon hende ta sinti nan mes bou di su guia?
Kon e ansianonan ta sigui ehèmpel di Hesus? Pasa e VIDIO.
Beibel ta mustra bon kla kon e ansianonan mester hasi nan trabou.
Lesa Isaías 32:2 i 1 Pedro 5:1-3. Despues, analisá e siguiente preguntanan:
Kon e ansianonan su esfuerso pa trata nan rumannan ku bondat meskos ku Hesus ta laga bo sinti?
Den ki manera mas e ansianonan ta imitá Hesus?
5. E ansianonan ta siña nan rumannan mediante nan ehèmpel
Kon Hesus ke pa e ansianonan mira nan trabou? Pasa e VIDIO.
Hesus a duna instrukshon na e rumannan ku tin ku dirigí e kongregashon. Lesa Mateo 23:8-12. Despues, analisá e siguiente preguntanan:
Kon Beibel ta bisa ku e ansianonan mester ta? Bo ta kere e lidernan religioso ta kumpli ku loke Beibel ta bisa?
E ansianonan ta mantené un bon amistat ku Yehova, i nan ta yuda nan famianan hasi meskos
E ansianonan ta mustra interes den tur hende den kongregashon
E ansianonan ta partisipá regularmente den e trabou di predikashon
E ansianonan ta siña otro hende. Nan ta yuda ku limpiesa i ku otro tarea tambe
6. Nos por apoyá e ansianonan
Beibel ta bisa dikon ta importante pa nos sigui guia di e ansianonan. Lesa Hebreonan 13:17. Despues, analisá e siguiente preguntanan:
Dikon Beibel ta bisa ku nos mester ta dispuesto pa obedesé i ta sumiso na e rumannan ku ta dirigí nos? Kiko bo ta pensa tokante esei?
Lesa Lukas 16:10. Despues, analisá e siguiente pregunta:
Dikon ta importante pa nos sigui guia di e ansianonan, asta ora nos ta pensa ku ta trata di algu ku no ta dje importante ei?
LOKE HENDE SA BISA: “No ta nesesario pa pertenesé na un organisashon religioso.”
Dikon bo ta pensa ta bon pa adorá Dios komo parti di su organisashon?
RESÚMEN
Hesus ta kabes di e kongregashon. Di buena gana nos ta traha huntu ku e ansianonan ku ta sigui guia di Hesus pasobra nan ta kuida nos i ta siña nos mediante nan ehèmpel.
Repaso
Ken ta kabes di e kongregashon?
Kon e ansianonan ta yuda e kongregashon?
Ki responsabilidat kada sirbidó di Yehova tin?
MAS INFORMASHON INTERESANTE
Wak dikon nos por bisa ku Kuerpo Gobernante i e otro ansianonan ta masha interesá den nan rumannan kristian.
Fortalesiendo Nos Rumannan Ku Tabata Pasa Persekushon (4:22)
Wak ki trabou e superintendentenan di sirkuito ta hasi.
E Bida di un Superintendente di Sirkuito den Teritorio Aislá (4:51)
Wak ki ròl hende muhé tin den kongregashon.
Wak kon e ansianonan ta hasi esfuerso pa animá nan rumannan.