Kiko Lo Disparsé ora e Reino di Dios Bini?

1, 2. (a) Den ki sentido e mundu malbado akí ta meskos ku un kriminal kondená na morto? (Wak e promé plachi.) (b) Kon kriaturanan inteligente den shelu i riba tera lo reakshoná despues ku Yehova destruí e sistema akí?

IMAGINÁ bo e esena akí. Un kriminal kruel a ser sentensiá na morto. Awor e wardadónan di prizòn ta hib’é pa e ser ehekutá. Aunke ku e kriminal ta na bida i ta mustra bon di salú, e ta serka di muri.

² Den mesun sentido, e mundu malbado akí ta meskos ku e kriminal kondená na morto. For di hopi tempu pasá, Yehova a kondená e mundu malbado akí, i lo no dura muchu pa e ehekut’é. Beibel ta bisa: “Mundu ta pasa bai.” (1 Huan 2:17) Nos por tin sigur ku e sistema akí lo yega na un fin. Pero tin un diferensia fundamental entre e ehekushon di e mundu malbado akí i e ehekushon di e prezu. Na e ehekushon di e prezu, algun hende por protestá kontra e sentensia i kuestioná si e ta hustu òf asta purba di posponé e ehekushon. Pero den e kaso di e mundu akí, ta e Soberano di e universo, un Dios hustu i perfekto, a dikta e sentensia. (Deu. 32:4) Ningun persona no por para e ehekushon ni duda si e sentensia ei ta hustu. Despues ku Yehova destruí e mundu malbado akí, tur kriatura inteligente den shelu i riba tera lo ta kompletamente di akuerdo ku Yehova su huisio ta hustu. Nos lo sinti un gran alivio.

3. Menshoná kuater kos ku lo disparsé ora e Reino di Dios bini.

³ Kiko e “mundu” ku “ta pasa bai” ta enserá? E ta enserá tur kos malu ku awendia hende sa konsiderá parti di e bida di tur dia. Pronto, e kosnan ei lo no t’ei mas. De echo, esaki ta un parti importante di e ‘bon notisia di e Reino.’ (Mat. 24:14) Pues ban wak kiko lo disparsé ora e Reino di Dios bini. Nos lo analisá kuater kategoria: hende malbado, organisashonnan korupto, maldat i mal kondishonnan. Pa kada kategoria nos lo analisá: (1) kon nan ta afektá nos awe, (2) kiko Yehova lo hasi ku nan i (3) ku ki kosnan bon lo e remplasá nan.

HENDE MALBADO

4. Den ki maneranan hende malbado ta afektá nos awe?

⁴ Kon hende malbado ta afektá nos awe? Despues ku apòstel Pablo a bisa ku nos tempu lo ta “krítiko, difísil pa trata kuné,” el a skirbi bou di inspirashon: “Hende malbado i gañadónan lo bai di malu pa pió.” (2 Tim. 3:1-5, 13) Bo no ta mira kon e profesia akí ta kumpliendo? Hopi di nos a bira víktima di abusadó violento, hende ku ta odia i diskriminá otro i kriminal sin heful. Tin di nan ta hasi malu abiertamente, miéntras ku otronan ta hasi parse ku nan ta masha hustu. Asta si nos mes no a bira nan víktima, tòg di un òf otro manera nan ta afektá nos. Nos ta haña asko ora nos tende di e kosnan horibel ku nan ta kometé. E manera ku nan ta abusá di mucha, di hende di edat i di otro hende indefenso ta yena nos ku repudio. Nan ta desplegá un spiritu ku ta parse inhumano, karnal i asta demoniako. (Sant. 3:15) Afortunadamente, e Palabra di Yehova ta duna nos speransa.

5. (a) Ki oportunidat hende malbado tin ainda? (b) Kiko lo pasa ku hende ku nenga di kambia?

⁵ Kiko Yehova lo hasi? Na e momentonan akí, Yehova ta dunando hende malbado e oportunidat pa kambia. (Isa. 55:7) Aunke Yehova a dikta sentensia kaba riba e mundu malbado akí, ainda e no a husga kada persona individual. Pero kiko di hende ku ta nenga di kambia i ku ta sigui apoyá e sistema akí te na e tribulashon? Yehova a primintí di destruí hende malbado pa semper. (Lesa Salmo 37:10.) Kisas nan ta kere ku nan lo skapa di tal huisio. Hopi hende a siña skonde loke nan ta hasi, i den e mundu akí, ta parse ku kasi semper nan ta skapa di hustisia i e konsekuensianan di nan akshonnan. (Yòb 21:7, 9) Ma Beibel ta rekordá nos: “Su wowonan ta riba e kamindanan di hende, i e ta mira tur su pasonan. No tin skuridat ni sombra di morto, unda e hasidónan di inikidat por skonde.” (Yòb 34:21, 22) Niun hende no por skonde pa Yehova. Ningun gañadó no por nèk e; no tin niun lugá muchu skur òf skondí kaminda Dios su bista ilimitá no por yega. Despues di Armagedon, nos por buska kaminda e malbadonan sa ta, pero nos lo no haña nan. Nan lo disparsé pa semper!—Sal. 37:12-15.

6. Ken lo keda na lugá di hende malbado, i dikon esei ta un bon notisia?

⁶ Ken lo keda na lugá di hende malbado? Yehova ta duna nos e maravioso promesa akí: “E humildenan lo heredá e tera, i lo deleitá nan mes den pas abundante.” Den e mesun salmo nos ta lesa: “E hustunan lo heredá e tera, i lo biba den dje pa semper.” (Sal. 37:11, 29) Ken ta “e humildenan” i “e hustunan”? E humildenan ta hende mansu ku ta aseptá siñansa i guia di Yehova. E hustunan ta esnan ku ta gusta hasi loke ta korekto den bista di Yehova Dios. Den e mundu djawe, tin hopi mas tantu hende malbado ku hende hustu. Pero den e mundu nobo, e humildenan i e hustunan lo no ta un minoria ni un mayoria, nan lo ta e úniko hendenan na bida. Sin duda, e tera lo ta un paradeis ora tur habitante ta asina.

ORGANISASHONNAN KORUPTO

7. Kon organisashonnan korupto ta afektá nos awe?

⁷ Kon organisashonnan korupto ta afektá nos awe? Hopi di e maldat ku ta sosodé den e mundu djawe no ta obra di hende individual, sino di organisashonnan establesí. Pensa por ehèmpel riba organisashonnan religioso ku ta gaña miónes di hende. Pa nan falta, awe hopi no sa kon Dios ta, ki futuro ta spera planeta tera i humanidat i no ta konfia den Beibel. Anto kiko di gobièrnunan ku ta promové guera i violensia entre gruponan étniko, ku ta oprimí hende pober i indefenso i ku ta keda na poder pa medio di aktonan di soborno i mustramentu di faboritismo? I kiko di empresanan golos ku ta kontaminá e medio ambiente, ku ta kaba ku rekursonan natural i ku ta probechá di hende inosente pa asina un grupito por gana hopi plaka miéntras ku miónes di hende ta biba den pobresa? Sin duda, organisashonnan korupto ta responsabel pa hopi di e miseria ku awe tin den e mundu djawe.

8. Segun Beibel, kiko lo sosodé ku organisashonnan ku awe ta parse stabil pa hopi hende?

⁸ Kiko Yehova lo hasi? E tribulashon grandi lo kuminsá ora e sistema polítiko bai kontra tur religion falsu, ku Beibel ta deskribí komo un prostituta ku yama Babilonia e Grandi. (Rev. 17:1, 2, 16; 18:1-4) Religion falsu lo ser destruí kompletamente. Pero kiko di tur e otro organisashonnan korupto? Beibel ta kompará e organisashon- i institushonnan ku ta parse asina stabil pa hende ku seru i isla. (Lesa Revelashon 6:14.) E Palabra di Dios ta profetisá ku e fundeshi di tur gobièrnu i tur organisashon ku ta dependé riba nan lo ser sagudí. E tribulashon grandi lo yega su momento kulminante ora Dios destruí tur gobièrnu di mundu i tur esnan ku ta apoyá nan pa bai kontra su Reino. (Yer. 25:31-33) Despues di esei, organisashonnan korupto lo no eksistí mas!

9. Dikon nos por tin sigur ku e tera nobo lo ta bon organisá?

⁹ Kiko lo remplasá organisashonnan korupto? Despues di Armagedon, lo eksistí algun organisashon na mundu? Beibel ta bisa nos: “Segun su promesa nos ta spera shelu nobo i un tera nobo, i den esakinan hustisia lo biba.” (2 Pedro 3:13) E shelu i tera bieu, esta, gobièrnunan korupto i e sosiedat riba tera ku ta bou di nan kontrol, lo no t’ei mas. Kiko lo remplasá nan? E ekspreshon “shelu nobo i un tera nobo” ta nifiká ku lo tin un gobièrnu nobo i un sosiedat humano nobo riba kua e gobièrnu ei lo goberná. E Reino bou di Hesukristu lo ta un refleho perfekto di e personalidat di Yehova Dios, kende ta un Dios di òrdu. (1 Kor. 14:33) Pues e “tera nobo” lo ta un sosiedat organisá. Lo tin bon hende hòmber pa atendé asuntunan. (Sal. 45:16) Nan lo ser dirigí pa Kristu i su 144.000 ko-gobernantenan. Imaginá bo kon e tempu ku tur organisashon korupto lo ser remplasá ku un solo organisashon ku ta uní i inkoruptibel lo ta.

MALDAT

10. Ki kosnan malu ta komun kaminda bo ta biba, i kon nan ta afektá abo i bo famia?

¹⁰ Kon maldat ta afektá nos awe? Nos ta biba den un mundu yen di maldat. E sistema di kosnan akí ta pèstá ku inmoralidat, falta di onestidat i violensia ekstremo. Foral mayornan tin ku lucha pa protehá nan yunan kontra tal mal influensia. E industria di entretenimentu a bira eksperto den presentá tur tipo di kos malu den un forma atraktivo i ta ridikulisá Yehova su normanan di loke ta bon i malu. (Isa. 5:20) Kristiannan berdadero ta lucha kontra e tendensia ei. Nan ta lucha pa protehá nan integridat den un mundu ku ta kita tur rèspèt pa e normanan di Yehova.

11. Kiko nos por siña for di Yehova su huisio riba Sódoma i Gomora?

¹¹ Kiko Yehova lo hasi ku maldat? Kòrda kiko el a hasi ku e maldat ku tabata reina na Sódoma i Gomora. (Lesa 2 Pedro 2:6-8.) Tur e maldat ku tabata rondoná e hòmber hustu Lòt ku su famia a lag’e keda sumamente afligí. Ora Yehova a destruí henter e region ei, el a hasi mas ku djis pone fin na tur e maldat ku tabatin einan. El a “pone un ehèmpel di loke lo pasa ku hende malbado.” Meskos ku Yehova a pone fin na tur inmoralidat e tempu ei, asina tambe lo e pone fin na tal maldat awe ora e trese huisio riba e sistema di kosnan akí.

12. Kiko ta algun kos ku bo ta anhelá pa hasi despues ku Yehova kaba ku e sistema di kosnan akí?

¹² Kiko lo remplasá maldat? Tur loke nos bai hasi den Paradeis lo duna nos felisidat. Pensa riba e trabou emoshonante ku nos lo tin di transformá e planeta akí den un paradeis òf di traha kasnan pa nos mes i pa nos sernan kerí. Anto kòrda riba e speransa ku nos tin di duna un bon biní na miónes di hende ku lo ser resusitá i siña nan tokante Yehova i kon el a trata ku humanidat. (Isa. 65:21, 22; Echo. 24:15) Nos bida lo ta yen di aktividat ku lo duna nos goso i ku lo glorifiká Yehova.

MAL KONDISHONNAN

13. E rebelion di Satanas, Adam i Eva a resultá den ki mal kondishonnan den mundu awe?

¹³ Kon mal kondishonnan ta afektá nos awe? Hende malbado, organisashonnan korupto i maldat ta kontribuí na e kondishonnan malu ku tin na mundu. Kua di nos por bisa ku guera, pobresa òf rasismo no ta afektá nos? I kiko di malesa i morto? E problemanan ei ta afektá nos tur. Nan ta resultado direkto di e rebelion kontra Yehova di tres persona—Satanas, Adam i Eva. Niun di nos no por skapa di e káos ku nan rebelion a kousa.

14. Kiko Yehova lo hasi ku e mal kondishonnan aktual? Duna ehèmpel.

¹⁴ Kiko Yehova lo hasi ku e mal kondishonnan aktual? Tuma guera komo ehèmpel. Yehova ta primintí ku lo e kaba kuné pa semper. (Lesa Salmo 46:8, 9.) Kiko di malesa? Lo e elimin’é. (Isa. 33:24) Anto kiko lo pasa ku morto? Yehova lo pone fin na dje pa semper. (Isa. 25:8) Lo e kaba ku pobresa. (Sal. 72:12-16) Lo e hasi meskos ku tur otro mal kondishon ku ta hasi nos bida difísil awe. Lo e asta kita e mal “spiritu” di e mundu akí, ya ku e influensia di Satanas i su demoñonan lo no t’ei mas.—Efe. 2:2.

15. Kiko ta algun kos ku lo disparsé despues di Armagedon?

¹⁵ Bo por imaginá un mundu sin guera, malesa òf morto? Lo no tin arma, ehérsito, barku òf avion di guera ni homenage pa hende ku a muri den guera. Tampoko lo no tin hospital, dòkter, zùster, seguro médiko, mortuario, santana ni agensia funerario. I komo ku no tin maldat mas, lo no tin negoshi di siguridat, sistema di alarma, polis i podisé ni lòk òf yabi. Lo no tin nada mas ku lo kousa nos ansiedat.

16, 17. (a) Ki alivio sobrebibientenan di Armagedon lo sinti? Ilustrá esei. (b) Kon nos por tin sigur ku nos lo keda na bida ora e mundu bieu akí disparsé?

¹⁶ Kon bida lo ta despues ku mal kondishonnan no ta eksistí mas? Eigenlijk, no ta fásil pa nos imaginá esei. Nos a biba asina tantu tempu den e sistema akí ku kisas nos no ta ripará mes kuantu angustia e kondishonnan di e mundu akí ta duna nos. Ta meskos ku, por ehèmpel, hende ku ta biba banda di un stashon di trein. Kisas nan no ta ripará e zonido mes mas. Òf hende ku ta biba banda di un landfill kisas no ta sinti e holó malu mas. Pero lo ta un gran alivio ora e mal kondishonnan ku tin aworakí no t’ei mas.

¹⁷ Kiko lo bini na lugá di e angustia ku nos ta sinti aworakí? Salmo 37:11 ta bisa ku nos “lo deleitá [nos] mes den pas abundante.” E palabranan ei no ta konmové bo? Esei ta loke Yehova ke pa bo. Pues, hasi tur loke bo por pa keda serka Yehova Dios i su organisashon den e último dianan akí ku ta kousa angustia. Balorá e speransa ku bo tin, meditá riba dje, ten’é bibu den bo mente i kurason i kompartié ku otro hende. (1 Tim. 4:15, 16; 1 Ped. 3:15) Asina bo por tin sigur ku lo bo no disparsé huntu ku e mundu kondená akí. Al kontrario, lo bo keda na bida, i lo bo ta felis pa semper.