Conocé Jehova—E Dios Como Persona

COMPARANDO e concepto hindú di Dios cu esun di otro sistemanan di religion, Dr. Radhakrishnan di India ta comentá: “E Dios dje hebreonan ta di un tipo diferente. E ta un persona i ta activo den historia i interesá den e cambio i posibilidadnan dje mundu den desaroyo aki. E ta un Ser cu ta comunicá cu nos.”

E nomber hebreo pa e Dios di Bijbel ta יהוה, traducí comunmente como “Jehova.” E ta surpasá tur otro dios. Kico nos sa tocante dje? Con el a trata cu hende den tempu bíblico?

Jehova i Moises “Cara Cara”

Aunke Moises no por a mira Dios literalmente, a existí un intimidad “cara cara” entre Jehova i su sirbidó Moises. (Deuteronomio 34:10; Exodo 33:20) Den su hubentud, Moises su curason tabata cu e israelitanan, kendenan e tempu ei tabata sclabisá den Egipto. El a bandoná su bida como miembro dje famia di cas di Fárao, “scogiendo pa ser maltratá cu e pueblo di Dios.” (Hebreonan 11:25) Como resultado, Jehova a duna Moises hopi privilegio special.

Como miembro dje famia di cas di Fárao, “Moises a ser instruí den tur e sabiduria dje egipcionan.” (Echonan 7:22) Pero pa guia e nacion di Israel, e tabatin cu cultivá tambe e cualidadnan di humildad, pacenshi i suavedad. El a haci esaki durante su 40 añanan como un wardadó di bestia na Madian. (Exodo 2:15-22; Númeronan 12:3) Aunke Jehova a keda invisibel, el a revelá su mes i su propósito na Moises, i pa medio di angelnan Dios a confia e Dies Mandamentunan na dje. (Exodo 3:1-10; 19:3–20:20; Echonan 7:53; Hebreonan 11:27) Bijbel ta bisa nos cu “Jehova tabata papia cara cara cu Moises, mescos cu un homber lo a papia cu su compañero.” (Exodo 33:11) Sí, Jehova mes a bisa: “Boca pa boca mi ta papia cuné.” Ki un relacion íntimo precioso Moises tabatin cu su Dios invisibel pero tog un persona!—Númeronan 12:8.

Ademas dje historia antiguo dje nacion di Israel, Moises a registrá e código di Ley cu tur su specificacionnan. Tambe el a ser confiá cu un otro privilegio preciosísimo—esun di skirbi e buki di Génesis. E último parti dje buki ei tabata historia cu su propio famia tabata conocé cu exactitud i p’esei e tabata relativamente fácil pa registrá. Pero di unda Moises a haña e detayenan di hende su historia mas antiguo? Ta posibel cu Moises tabata poseé documentonan antiguo skirbí, conserbá dor di su antepasadonan, pa usa como fuente. Di otro banda, e por a ricibí detayenan mediante transmision oral of directamente dor di revelacion divino for di Jehova. En coneccion cu esaki pa hopi tempu hombernan reverente di tur época a reconocé e relacion personal cu Moises tabatin cu su Dios.

Jehova—E Dios cu Elías A Conocé Como Persona

Profeta Elías tambe a conocé Jehova como persona. Elías tabata celoso pa adoracion puru i a sirbi Jehova apesar cu el a bira e blanco di gran odio i oposicion di parti dje adoradónan di Baal, e dios principal dje diosnan cananeo.—1 Reynan 18:17-40.

Acab, Rey di Israel, i su esposa, Jezabel, a purba mata Elías. Cu miedu di perde su bida, Elías a hui pa Beer-seba, west di Laman Morto. Ei el a dual den e desierto i a resa pidi p’e muri. (1 Reynan 19:1-4) Jehova a bandoná Elías? E no tabata interesá mas den su fiel sirbidó? Kisas Elías a pensa asina, pero ki ekibocá e tabata! Mas despues, Jehova a papia suavemente cuné, puntrando: “Ki mishí bo aki, Elías?” Despues di un demostracion dramático di poder sobrenatural, “tabatin un bos p’e i el a procedé na bis’é [atrobe]: ‘Ki mishí bo aki, Elías?’” Jehova a manifestá e interes personal aki den Elías pa por animá su sirbidó digno di confiansa. Dios tabatin mas trabou p’e haci, i Elías a respondé ansiosamente n’e yamada ei! Elías a cumpli fielmente cu su asignacionnan, santificando e nomber di Jehova, su Dios como persona.—1 Reynan 19:9-18.

Despues cu Jehova a rechasá e nacion di Israel, e no a papia personalmente mas cu su sirbidónan riba tera. Esaki no a nificá cu su interes personal den nan a mengua. Pa medio di su spiritu santu, ainda e tabata dirigí i fortalecé nan den su sirbishi. Tuma, por ehempel, apostel Pablo, conocí anteriormente como Saul.

Spiritu Santu Ta Dirigí Pablo

Saul a bini for di Tarso, un stad prominente di Cilicia. Su mayornan tabata hebreo, pero el a nace como ciudadano romano. Sin embargo, Saul su criansa tabata segun e creencianan estricto dje fariseonan. Mas despues, den Jerusalem, el a haña e oportunidad pa ser educá “na pia di Gamaliel,” un maestro prominente dje Ley.—Echonan 22:3, 26-28.

Debí na Saul su celo ekibocá pa tradicion hudiu, el a participá den un campaña feros contra e siguidónan di Jesucristo. El a asta aprobá e morto di Esteban, e promé mártir cristian. (Echonan 7:58-60; 8:1, 3) Despues el a admití cu aunke ántes e tabata un blasfemadó i un persiguidó i un homber insolente, “[el] a ser mustrá misericordia, pasobra [e] tabata ignorante i a obra cu falta di fe.”—1 Timoteo 1:13.

Saul a ser motivá pa un deseo genuino pa sirbi Dios. Despues cu Saul a combertí riba e caminda pa Damasco, Jehova a us’é di un manera extraordinario. E Cristo resucitá a dirigí Ananías, un disipel cristian di promé, pa yuda Pablo. Despues di esei Jehova su spiritu santu a guia Pablo (e nomber romano cu cua Saul a bira conocí como cristian) pa cumpli cu un ministerio largu i fructífero atrabes di partinan di Europa i Asia Menor.—Echonan 13:2-5; 16:9, 10.

E mésun direccion di spiritu santu por ser identificá awe? Sí.

Ateismo No Ta Stroba Jehova di Mustra Interes Personal

Joseph F. Rutherford tabata e di dos presidente di Sociedad Watch Tower. El a ser bautisá na 1906 como un Studiante di Bijbel—manera Testigonan di Jehova tabata ser yamá e tempu ei—a ser nombrá como e asesor hurídico dje Sociedad e siguiente aña, i el a bira e presidente na januari 1917. Sin embargo, un tempu e abogado hóben aki tabata un ateo. Di ki manera el a bira un sirbidó cristian di Jehova asina motivá?

Na juli 1913, Rutherford a sirbi como presidente di un congreso dje Asociacion Internacional di Studiantenan di Bijbel na Springfield, Massachusetts, Merca. Un reportero dje korant local, The Homestead, a entrevistá Rutherford, i e relato a ser reimprimí den e informe di recuerdo dje congreso ei.

Rutherford a splica cu tempu e tabatin plan pa casa, su punto di bista religioso tabata esun dje denominacion bautista, pero esun di su futuro casá tabata presbiteriano. Ora e pastor di Rutherford a bis’é cu “su futuro casá lo bai den fiernu di candela dor cu e no a bautisá i cu Rutherford lo bai shelu mesora dor cu e sí a bautisá, su mente lógico a haña asco di esei i el a bira un ateo.”

A tuma Rutherford vários aña di investigacion cuidadoso pa reedificá su fe den un Dios como persona. El a razoná, manera el a bisa, for dje suposicion cu “loke no por satisfacé e mente no tin derecho di satisfacé e curason.” Cristiannan “mester ta sigur cu e Scritura den cua nan ta kere ta berdad,” Rutherford a splica, agregando: “Nan mester conocé e fundeshi riba cua nan ta para.”—Mira 2 Timoteo 3:16, 17.

Sí, asta awe ta posibel pa un ateo of un agnóstico investigá e Scritura, edificá fe i desaroyá un relacion personal fuerte cu Jehova Dios. Despues di un studio cuidadoso di Bijbel cu yudansa dje publicacion di Watch Tower, Conocimentu cu Ta Hiba na Bida Eterno, un yoncuman a confesá: “Mi no tabata kere den Dios ora mi a cuminsá e studio aki, pero awor mi ta haña cu e conocimentu di Bijbel a cambia mi manera di pensa completamente. Mi a cuminsá conocé Jehova i confia den dje.”

“Esun Bobo” i Dios

Dr. James Hastings ta bisa den A Dictionary of the Bible: “Nunca un escritor di TB [Scritura Hebreo] a hinca den su cabes pa proba of debatí e existencia di Dios. . . . No ta cuadra cu e spiritu dje mundu antiguo en general pa nenga e existencia di Dios, of pa usa argumentonan pa prob’é. E creencia tabata unu natural p’e mente humano i comun pa tur hende.” Naturalmente, esaki no ta nificá cu tur hende n’e tempu ei tabata temeroso di Dios. Leu di esei. Tantu Salmo 14:1 como 53:1 ta mencioná “esun insensato,” of manera King James Version ta bisa, “esun bobo,” cu a bisa den su curason: “No tin Jehova.”

Ki clase di persona e homber bobo aki, cu ta nenga e existencia di Dios, ta? E no ta ignorante den sentido intelectual. Mas bien e palabra hebreo na·valʹ ta señalá na deficiencia moral. Profesor S. R. Driver, den su comentarionan skirbí den The Parallel Psalter, ta bisa cu e fayo “no ta debilidad mental, sino insensibilidad moral i religioso, un falta abierto di sentido of percepcion.”

E salmista ta pasa na describí e desintegracion moral cu ta un resultado di un actitud asina: “Nan a actua ruinosamente, nan a actua repugnantemente den nan tratamentu. No tin hende cu ta haci bon.” (Salmo 14:1) Dr. Hastings ta resumí: “Miéntras cu hende ta stèns riba e ausencia aki di Dios for di mundu i cu nan lo keda liber di castigu, nan ta bira corupto i ta haci cosnan abominabel.” Abiertamente nan ta aceptá principionan malbado i ta ignorá un Dios como persona na ken nan no ta deseá di duna cuenta. Pero un pensamentu asina ta mes bobo i insensato awe cu tempu e salmista a skirbi su palabranan mas cu 3.000 aña pasá.

Spiertamentu for di Nos Dios Como Persona

Laga nos bolbe awor p’e preguntanan hací den nos artículo anterior. Pakico asina tantu hende ta incapas pa armonisá un Dios como persona cu e sufrimentu cu ta prevalente den mundu awe?

Bijbel ta contené informacion skirbí for di hende cu a “papia di parti di Dios segun cu nan a ser hibá pa spiritu santu.” (2 Pedro 1:21) E so ta revelá e Dios, Jehova, como persona na nos. Tambe e ta spierta nos tocante un personalidad malbado, invisibel pa hende, cu ta poderoso den dirigí i controlá pensamentu humano—Satanas e Diabel. Lógicamente, si nos no ta kere den un Dios como persona, con nos por kere cu tin tambe un Diabel, of Satanas, como persona?

Bou di inspiracion apostel Juan a skirbi: “Esun yamá Diabel i Satanas . . . ta gañando henter e tera habitá.” (Revelacion 12:9) Mas despues Juan a bisa: “Nos sa cu nos a originá cu Dios, pero henter e mundu ta drumí den poder dje malbado.” (1 Juan 5:19) E declaracionnan aki ta reflehá e palabranan di Jesus, palabranan cu Juan mes a registrá den su Evangelio: “E gobernante di mundu ta bini. I e no tin dominio riba mi.”—Juan 14:30.

Ki diferente e siñansa bíblico aki ta for di loke hende ta kere awor! Catholic Herald ta bisa: “Awe ta masha anticuá pa papia tocante Diabel. Nos era sképtico i científico a manda Satanas cu penshon.” Tog, di un forma enérgico Jesus a bisa e hendenan cu tabatin intencion di mat’é: “Boso ta di boso tata e Diabel, i boso kier cumpli cu e deseonan di boso tata.”—Juan 8:44.

Bijbel su splicacion dje poder di Satanas ta razonabel i comprendibel. E ta mustra claramente pakico, apesar dje deseo di mayoria hende pa biba den pas i armonia, e mundu ta plagá cu odio, guera i violencia sin sentido, manera a ser demostrá na Dunblane (mencioná na página 3 i 4). Ademas, Satanas no ta e único enemigu contra cua nos tin cu lucha. Bijbel ta duna spiertamentu tambe relacioná cu demoñonan—criaturanan spiritual malbado cu hopi tempu pasá a uni forsa cu Satanas pa engañá i abusá di humanidad. (Hudas 6) Hopi biaha Jesucristo a enfrentá e poder dje spiritunan aki, i e tabata capas pa dominá nan.—Mateo 12:22-24; Lucas 9:37-43.

Jehova, e Dios berdadero a proponé pa limpia e tera aki di maldad i finalmente eliminá e actividadnan di tantu Satanas como su demoñonan. Basá riba nos conocimentu di Jehova, nos por tin fe firme i confiansa den su promesanan. E ta bisa: “Promé cu mi ningun Dios a ser formá, i despues di mi a sigui sin cu tabatin ningun. Ami, ami ta Jehova, i fuera di mi no tin Salbador.” Jehova berdaderamente ta un Dios como persona pa tur esnan cu conoc’é, ta ador’é i ta sirbié. Nos por acudí na dje, i na dje so, pa nos salbacion.—Isaías 43:10, 11.

[Plachi na página 7]

Un cuadro grabá di siglo 18 cu ta mustra Moises skirbiendo Génesis 1:1 bou di inspiracion

[Rekonosementu]

For di The Holy Bible di J. Baskett, Oxford

[Plachi na página 8]

Hopi biaha Jesucristo a dominá e demoñonan