Cuantu Bo Stima e Palabra di Dios?
“Cuantu mi stima bo ley! Henter dia e ta mi interes intenso.”—SALMO 119:97.
1. Con ta un manera cu individuonan temeroso di Dios ta demostrá nan amor p’e Palabra di Dios?
CIENTOS di miles di homber i muher tin nan mes ehemplar di Bijbel. Pero tin un diferencia entre tin un Bijbel i stima e Palabra di Dios. Un persona por pretendé cu su rason cu e stima e Palabra di Dios si rara bes e ta les’é? Claro cu no! Na contraste, algun hende cu un tempu tabatin masha poco respet pa Bijbel awor ta les’é tur dia. Nan a siña stima e Palabra di Dios, i mescos cu e salmista, awor nan ta haci e Palabra di Dios nan interes intenso “henter dia.”—Salmo 119:97.
2. Con e fe di un Testigo di Jehova a ser sostené bou di condicionnan difícil?
2 Un persona cu a siña stima e Palabra di Dios ta Nasho Dori. Huntu cu compañeronan creyente, el a wanta pa hopi década sirbiendo Jehova den su pais natal, Albania. Durante gran parti dje tempu ei, e religion di Testigo di Jehova tabata prohibí, i e cristiannan fiel aki a ricibí masha poco literatura di Bijbel. Tog, ruman Dori su fe a keda fuerte. Con asina? El a bisa: “Mi meta tabata pa lesa Bijbel pa por lo ménos un ora pa dia, loke mi a haci tambe pa rond di 60 aña promé cu mi bista a bai atras.” Te cu recien, Bijbel completo no tabata disponibel na albanes, pero na mucha ruman Dori a siña griego, di manera cu el a lesa Bijbel den e idioma ei. Lesamentu regular di Bijbel a sostené ruman Dori atrabes di vários prueba, i esei por sostené nos tambe.
“Desaroyá un Anhelo” p’e Palabra di Dios
3. Ki actitud cristiannan mester cultivá pa cu e Palabra di Dios?
3 Apostel Pedro a skirbi: “Manera criaturanan recien nací, desaroyá un anhelo p’e lechi no-adulterá cu ta pertenecé n’e palabra.” (1 Pedro 2:2) Mescos cu un baby tin un deseo fuerte p’e lechi di su mama, cristiannan cu ta conciente di nan necesidad spiritual ta haña deleite exkisito den lesa e Palabra di Dios. Ta asina abo ta sinti? Si no, no desesperá. Bo tambe por cultivá un anhelo p’e Palabra di Dios.
4. Kico ta necesario pa haci lesamentu di Bijbel un custumber diario?
4 Pa bo por haci esei, na promé lugá disipliná bo mes pa haci lesamentu di Bijbel un custumber regular, unu diario si ta posibel. (Echonan 17:11) Kisas bo no por dedicá un ora pa dia na lesa Bijbel manera Nasho Dori a haci, pero muy probablemente bo por apartá un tiki tempu tur dia pa considerá e Palabra di Dios. Hopi cristian ta lanta algun minuut mas trempan pa por meditá riba un pasashi bíblico. Tin un mihó manera pa cuminsá e dia? Otronan ta preferá di caba e dia dor di lesa Bijbel djis promé cu nan bai drumi. I tin ta lesa Bijbel na un otro ora cumbiniente. E cos importante ta pa lesa Bijbel regularmente. Anto, tuma un ratu pa meditá riba loke bo a lesa. Laga nos considerá algun ehempel di individuonan cu a saca beneficio dor di lesa i meditá riba e Palabra di Dios.
Un Salmista Cu A Stima e Ley di Dios
5, 6. Aunke kisas nos no sa su nomber, kico nos por saca afó tocante e escritor di Salmo 119 dor di lesa i meditá riba loke el a skirbi?
5 E escritor di Salmo 119 sigur tabatin aprecio profundo p’e Palabra di Dios. Ken a skirbi e salmo ei? Bijbel no ta bisa ta ken. Sin embargo, for dje contexto nos ta siña algun detaye tocante dje, i nos sa cu su bida no tabata liber di problema. Algun di su conocínan cu supuestamente mester tabata adoradó di Jehova no tabatin e amor cu e tabatin pa principionan bíblico. No obstante, e salmista no a laga nan actitud strob’é di haci loke tabata corecto. (Salmo 119:23) Si bo ta biba of traha cu un hende cu no ta respetá normanan di Bijbel, kisas bo ta mira algun similaridad entre e situacion dje salmista cu esun di bo.
6 Aunke e salmista tabata un homber deboto, e sigur no tabata hustu den su mes bista. El a admití francamente su mes imperfeccionnan. (Salmo 119:5, 6, 67) Sin embargo, e no a laga picá domin’é. “Con un hóben lo limpia su caminda?” el a puntra. Su contesta tabata: “Dor di mantené su mes alerto conforme cu bo palabra.” (Salmo 119:9) Anto, enfatisando ki poderoso efecto pa haci bon e Palabra di Dios por tin riba hende, e salmista a agregá: “Den mi curason mi a warda bo dicho manera un tesoro, pa mi no peca contra bo.” (Salmo 119:11) Un bon efecto cu por yuda nos evitá di peca contra Dios en berdad ta poderoso!
7. Pakico foral hóbennan mester ta conciente cu ta necesario pa lesa Bijbel tur dia?
7 Hóbennan cristian ta haci bon di tuma na pechu e palabranan dje salmista. Cristiannan yong ta bou di atake awe. Diabel lo tin masha gana di corumpí e generacion hóben di Jehova su adoradónan. Satanas su meta ta pa tenta cristiannan yong pa nan entregá na deseonan carnal i kibra e leynan di Dios. Hopi bes película i programanan di television ta reflehá Diabel su manera di pensa. E protagonistanan dje programanan ei ta parce atractivo i simpático; e relacionnan inmoral entre nan ta parce normal. Ki mensahe nan ta comunicá? ‘No tin nada malu pa hende no-casá tene relacion sexual tanten cu nan di berdad stima otro.’ Lamentablemente, tur aña, un cantidad di cristian hóben ta bira víctima di tal razonamentu. Algun su fe ta naufragá. Sí, e preshon t’ei! Pero e preshon ta asina intenso cu ta imposibel pa boso como hóben lucha contra dje? Sigur cu no! Jehova a percurá un manera pa hóbennan cristian vence deseonan insaludabel. Nan por resistí cualkier arma cu Diabel por inventá ‘dor di mantené nan mes alerto conforme cu e Palabra di Dios, wardando Dios su dichonan manera tesoro den nan curason.’ Cuantu tempu abo personalmente ta dedicá na lesa Bijbel regularmente i meditá riba dje?
8. Con e ehempelnan describí den e paragraf aki por yuda bo crece den aprecio p’e Ley di Moises?
8 E escritor di Salmo 119 a sclama: “Cuantu mi stima bo ley!” (Salmo 119:97) Na cua ley e tabata referí? Na Jehova su palabra revelá, incluso e código dje Ley di Moises. Na promé bista algun hende lo por descartá e código dje Ley como anticuá i puntra nan mes con un hende por stim’é. Pero, segun cu nos ta meditá riba e vários rasgonan dje Ley di Moises, manera e salmista a haci, nos por bin apreciá e sabiduria tras dje Ley ei. Banda dje hopi aspectonan profético dje Ley, tin su stipulacionnan di sanidad i dieta, cu a promové limpiesa i bon salú. (Levítico 7:23, 24, 26; 11:2-8) E Ley a animá onrades den prácticanan di negoshi i a insta e israelitanan pa mustra empatia na otro adoradó cu tabata den necesidad. (Exodo 22:26, 27; 23:6; Levítico 19:35, 36; Deuteronomio 24:17-21) Mester a tuma decisionnan hudicial sin haci distincion di persona. (Deuteronomio 16:19; 19:15) Segun cu e escritor di Salmo 119 a gana experencia den bida, el a mira sin duda ki bon resultado tabatin pa esnan cu a aplicá e Ley di Dios, i su amor p’e a bira mas fuerte. Mescos awe, segun cu cristiannan tin éxito den aplicá principionan di Bijbel, nan amor i aprecio p’e Palabra di Dios ta bira mas intenso.
Un Prins Cu A Tribi pa Ta Diferente
9. Ki actitud rey Ezekías a cultivá pa cu e Palabra di Dios?
9 E contenido di Salmo 119 ta armonisá bon cu loke nos sa di Ezekías tempu e tabata un prins yong ainda. Algun erudito di Bijbel ta indicá cu ta Ezekías tabata e escritor dje salmo. Aunke nos no ta sigur di esaki, loke sí nos sa ta cu Ezekías tabatin gran respet p’e Palabra di Dios. Cu su curso di bida, el a demostrá cu e tabata sinceramente di acuerdo cu e palabranan na Salmo 119:97. Bijbel ta bisa di Ezekías: “El a sigui pega na Jehova. E no a desviá di siguié, ma el a sigui warda su mandamentunan cu Jehova a manda Moises.”—2 Reynan 18:6.
10. Ki animacion Ezekías su ehempel ta pa cristiannan cu no a lanta cu mayornan deboto na Jehova?
10 Tur informe ta mustra cu Ezekías no a lanta den un famia deboto na Jehova. Su tata, rey Acas, tabata un idólatra infiel cu a laga kima por lo ménos un di su yunan—Ezekías su mes ruman homber—bibu como sacrificio na un dios falsu! (2 Reynan 16:3) Apesar dje mal ehempel aki, Ezekías a logra “limpia su caminda” di influencia pagano dor di siña conocé e Palabra di Dios.—2 Crónicanan 29:2.
11. Segun cu Ezekías tabata observá cu atencion, con cosnan a resultá pa su tata infiel?
11 Segun cu Ezekías tabata crece, el a mira personalmente con su tata idólatra tabata atendé asuntunan di Estado. Huda tabata rondoná pa enemigu. Tabatin Rezin, rey di Siria, cu a djoin rey Peka di Israel ora di sitia Jerusalem. (2 Reynan 16:5, 6) Tabatin e edomitanan i e filisteonan, cu a logra invadí Huda i a asta capturá algun stad einan. (2 Crónicanan 28:16-19) Con Acas a trata cu e crísisnan aki? En bes di apelá na Jehova pa yudansa contra Siria, Acas a acudí n’e rey di Asiria, sobornand’e cu oro i plata, incluso esnan for dje tesoro dje tempel. Pero esaki no a trece pas duradero pa Huda.—2 Reynan 16:6, 8.
12. Dor di haci kico Ezekías por a evitá di ripití e erornan di su tata?
12 Cu tempu, Acas a muri i Ezekías a bira rey cu 25 aña di edad. (2 Crónicanan 29:1) E tabata relativamente yong, pero esei no a strob’é di bira un rey exitoso. En bes di imitá e conducta di su tata infiel, el a pega n’e Ley di Jehova. Esaki a incluí un mandamentu special pa reynan: “Ora e [rey] tuma su asiento riba e trono di su reino, e tin cu skirbi den un buki pa su mes un copia dje ley aki for di esun cu ta den man dje sacerdotenan, e levitanan. I esaki tin cu continuá cuné, i e mester lesa den dje tur e dianan di su bida, p’e por siña teme Jehova su Dios afin di warda tur e palabranan dje ley aki.” (Deuteronomio 17:18, 19) Dor di lesa e Palabra di Dios tur dia, Ezekías lo a siña teme Jehova i evitá di ripití e erornan di su tata malbado.
13. Con un cristian por ta sigur cu den un sentido spiritual, tur loke e haci lo tin éxito?
13 No ta e reynan di Israel so a ser animá pa considerá e Palabra di Dios constantemente, sino tur israelita temeroso di Dios mester a haci esei. E promé salmo ta pinta un homber berdaderamente felis como un hende kende su “deleite ta den e ley di Jehova, i den su ley e ta lesa na bos abou di dia i anochi.” (Salmo 1:1, 2) E salmista ta bisa di un hende asina: “Tur loke e haci lo tin éxito.” (Salmo 1:3) Na contraste, Bijbel ta bisa di esun cu ta falta fe den Jehova Dios: “E ta un hende indeciso, inconstante den tur su camindanan.” (Santiago 1:8) Nos tur kier ta felis i exitoso. Lesa Bijbel regularmente i di un manera significativo por contribuí na nos felicidad.
E Palabra di Dios A Sostené Jesus
14. Con Jesus a mustra amor p’e Palabra di Dios?
14 Na un ocasion, Jesus su mayornan a hañ’é sintá meimei dje maestronan n’e tempel den Jerusalem. E expertonan aki den e Ley di Dios “a keda asombrá di su comprendimentu i di su contestanan”! (Lucas 2:46, 47) Esei tabata tempu cu Jesus tabatin 12 aña di edad. Sí, asta na un edad yong, tabata bisto cu e tabatin amor p’e Palabra di Dios. Mas despues, Jesus a usa e Scritura pa reprendé Diabel, bisando: “Hende mester biba, no di pan so, sino di tur expresion cu ta sali for dje boca di Jehova.” (Mateo 4:3-10) Djis despues di esei, Jesus a predicá n’e habitantenan di Názaret, e pueblo caminda el a biba, usando e Scritura.—Lucas 4:16-21.
15. Ki ehempel Jesus a pone ora el a predicá na otro hende?
15 Bes tras bes Jesus a cita for dje Palabra di Dios pa apoyá su siñansanan. Su oyentenan “a keda pasmá di su manera di siña.” (Mateo 7:28) Esei no tabata nada straño, pasobra Jesus su siñansanan a bini for di Jehova Dios mes! Jesus a bisa: “Loke mi ta siña no ta di mi, sino ta pertenecé na esun cu a manda mi. Esun cu papia di parti di su mes ta busca su mes gloria; pero esun cu busca e gloria di esun cu a mand’é, esun aki ta berdadero, i no tin ningun inhusticia den dje.”—Juan 7:16, 18.
16. Te na ki grado Jesus a demostrá su amor p’e Palabra di Dios?
16 Distinto dje escritor di Salmo 119, no tabatin “inhusticia” den Jesus. E tabata sin picá, Yu di Dios, cu “a humiyá su mes i a bira obediente te na morto.” (Filipensenan 2:8; Hebreonan 7:26) Tog, pa perfecto cu e tabata, Jesus a studia i a obedecé e Ley di Dios. Esaki tabata un factor clave den su abilidad pa mantené su integridad. Ora Pedro a usa un spada pa purba prevení cu ta arestá su Doño, Jesus a reprendé e apostel i a puntr’é: “Bo no ta kere cu mi por apelá na mi Tata p’e duna mi na e momento aki mas cu diesdos legion di angel? Den tal caso, con e Scritura cu mester sosodé asina aki lo por cumpli?” (Mateo 26:53, 54) Sí, pa Jesus, cumplimentu dje Scritura a nificá mas cu scapa di un morto cruel i humiyante. Ki un amor sobresaliente p’e Palabra di Dios!
Otro Imitadónan di Cristo
17. Ki importante e Palabra di Dios tabata pa apostel Pablo?
17 Apostel Pablo a skirbi compañeronan cristian: “Bira imitadónan di mi, mescos cu ami ta di Cristo.” (1 Corintionan 11:1) Mescos cu su Doño, Pablo a desaroyá un amor p’e Scritura. El a confesá: “Den mi paden mi ta gusta Lei di Dios.” (Romanonan 7:22, Beibel na papiamentu koriente) Pablo a cita e Palabra di Dios bes tras bes. (Echonan 13:32-41; 17:2, 3; 28:23) Ora el a duna su instruccionnan final na Timoteo, un compañero stimá, Pablo a enfatisá e parti importante cu e Palabra di Dios mester hunga den e bida diario di tur “hende di Dios.”—2 Timoteo 3:15-17.
18. Mencioná ehempel di un persona cu den tempu moderno, a mustra respet p’e Palabra di Dios.
18 Den tempu moderno tambe, hopi fiel sirbidó di Jehova a imitá Jesus su amor p’e Palabra di Dios. Na cuminsamentu dje siglo aki, un yoncuman a ricibí un Bijbel for di un amiga. El a describí e efecto cu e regalo precioso aki tabatin riba dje: “Mi a dicidí cu den mi bida mi mester lesa un parti di Bijbel tur santu dia.” E yoncuman ei tabata Frederick Franz, i su amor pa Bijbel a hib’é na disfrutá di un bida largu i exitoso den Jehova su sirbishi. Nos tin grato recuerdo di su abilidad pa cita capítulonan completo di Bijbel fo’i cabes.
19. Con algun ruman ta programá e lesamentu di Bijbel semanal p’e Scol di Ministerio Teocrático?
19 Testigonan di Jehova ta pone hopi énfasis riba lesamentu regular di Bijbel. Tur siman, como preparacion pa un di nan reunionnan cristian, e Scol di Ministerio Teocrático, nan ta lesa vários capítulo di Bijbel. Durante e reunion ta trata e puntonan sobresaliente dje capítulonan asigná. Algun Testigo ta haña ta cumbiniente pa parti e lesamentu di Bijbel dje siman den shete seccion mas chikitu i lesa un seccion tur dia. Segun cu nan ta lesa, nan ta meditá riba e material. Ora ta posibel, nan ta haci investigacion adicional cu yudansa di publicacionnan basá riba Bijbel.
20. Kico ta necesario pa por saca tempu pa lesa Bijbel regularmente?
20 Kisas bo tin cu ‘cumpra tempu’ for di otro actividad pa por lesa Bijbel regularmente. (Efesionan 5:16) Pero e beneficionan lo bal muchu mas cu cualkier sacrificio. Segun cu bo ta desaroyá e custumber di lesa Bijbel tur dia, bo amor p’e Palabra di Dios lo crece. Pronto, lo bo ser impulsá pa bisa huntu cu e salmista: “Cuantu mi stima bo ley! Henter dia e ta mi interes intenso.” (Salmo 119:97) Un actitud asina lo trece gran beneficio awor i den futuro, manera e siguiente artículo lo mustra.
Bo Ta Corda?
◻ Con e escritor di Salmo 119 a manifestá amor profundo p’e Palabra di Dios?
◻ Ki les nos por saca for dje ehempelnan di Jesus i di Pablo?
◻ Con nos personalmente por crece den nos amor p’e Palabra di Dios?
[Plachinan na página 10]
Reynan fiel mester a lesa e Palabra di Dios regularmente. Abo ta hacié?
[Plachi na página 12]
Asta na mucha, Jesus a stima e Palabra di Dios