E Famia: Un Percuracion Amoroso di Jehova Dios

“Pa causa di esei mi ta dobla mi rudía pe Tata, na ken tur famía den cielo i riba tera ta debe nan nomber.”—EFESIO 3:14, 15.

1, 2. (a) Pakico Jehova Dios a crea e famía humano? (b) E famía mester hunga cua papel awe den e propósito di Jehova?

JEHOVA DIOS ta Creador dje famía. Asina, el a haci mas cu satisface e necesidad humano di compañerismo, apoyo, of bida íntimo. (Génesis 2:18) Mediante e famía, e propósito glorioso di Dios tabatin cu ser cumplí. El a bisa e promé pareha: “Sea fructífero i bira hopi i yena e tera i dominé.” (Génesis 1:28) E ambiente amoroso i saludable dje famía por a beneficiá e cantidad di yiu cu lo nace di Adam i Eva i nan desendiente.

² Sin embargo, e promé pareha a scoge e camina di desobedencia—cu resultado desastroso pa nan mes i nan yiunan. (Romano 5:12) P’sei, bida di famía djawe ta un mal ehempel di loke Dios a deseá. No obstante, e famía ta sigi hunga un papel importante den e propósito di Jehova Dios, sirbiendo como e unidad fundamental dje arreglo social cristian. Cu esei nos no ta menospreciá e trabao excelente cu hopi cristian soltero i soltera ta haci hunto cu nos. Mas bien, nos ta reconoce e contribucion grandi cu famía també ta duna ne salud spiritual dje organizacion cristian en conhunto. Famía fuerte ta contribui na congregacion fuerte. Pero, con bo famía por tene éxito bao di presion djawe? Pa contestá e pregunta, láganos examina loke e Bijbel ta bisa tocante famía.

Famía den Tempo Bíblico

3. Esposo i esposa a hunga cua papel den e famía di patriarca?

³ Tanto Adam como Eva a desprecia e ley di hefatura cu Dios a establece. Pero homber di fe, tal como Noé, Abraham, Isaac, Jacob, i Job, a cumpli debidamente cu nan responsabilidad como cabez di famía. (Hebreo 7:4) Famía di patriarca tabata manera un gobierno na escala chikito, cu e tata como guía religioso, instructor, i huez. (Génesis 8:20; 18:19) Esposa també a hunga un papel importante, sirbiendo no como esclaba sino como director asistente dje famía.

4. Di ki manera bida di famía a cambia bao di Ley di Moisés, pero mayornan a sigi hunga cua papel?

⁴ Ora Israel a bira un nacion na aña 1513 PEC, ley di famía a bira sumiso ne Ley nacional duná mediante Moisés. (Éxodo 24:3-8) Awor autoridad di decidi, incluyendo asunto di bida i morto, tabata duná na huez nombrá. (Éxodo 18:13-26) E sacerdocio levítico a responsabilizé cu aspecto sacrificial dje adoracion. (Levítico 1:2-5) No obstante, tata a sigi hunga un papel importante. Moisés a conseha tatanan: “E palabra aki cu mi ta manda awe mester resulta di ser den bo curazón; i bo mester inculcánan den bo yiu homber i papia di nan ora bo ta sinta den bo cas i ora bo ta camna den camina i ora bo ta bai drumi i ora bo ta lanta.” (Deuteronomio 6:6, 7) Mama tabatin basta influencia. Proverbio 1:8 a manda hovenan: “Scucha, mi yiu, ne disiplina di bo tata, i no bandona e ley di bo mama.” Sí, bao di paraplú di autoridad di su esposo, esposa hebreo por a traha—i pone na vigor—ley di famía. Su yiunan tabatin cu onré asta despues cu el a bira bieu.—Proverbio 23:22.

5. E Ley di Moisés a duna cua nificacion ne lugar di yiu den e famía?

⁵ E Ley di Dios també a indica claramente e lugar di yiunan. Deuteronomio 5:16 ta bisa: “Onra bo tata i bo mama, net manera Jehova bo Dios a mandábo; pa bo dianan resulta di ser largu i pa bo pasa bon riba e tera cu Jehova bo Dios ta dunábo.” Falta di respet pa mayornan tabata un ofensa sumamente serio bao di Ley di Moisés. (Éxodo 21:15, 17) Segun e Ley: “En caso cu tin un hende cu ta inboca malu contra su tata i su mama, e mester ta duná e castigo di morto sin falta.” (Levítico 20:9) Rebelion contra mayornan tabata mescos cu rebelion contra Dios mes.

E Papel di Esposo Cristian

6, 7. Pakico e palabra di Pablo den Efesio 5:23-29 a parce revolucionario pa lector dje promé siglo?

⁶ Cristianismo a ilumina mas tanto e ley di famía, specialmente e papel di esposo. Tabata e costumber den e promé siglo pa homber no cristian trata nan esposa na moda severo i opresivo. Hende muher no tabata duná derecho básico ni dignidad. The Expositor’s Bible ta bisa: “Homber griego di cultura a tuma esposa pa produci yiu. Derecho di esposa no a limita deseo sexual dje esposo. Amor no tabata den e compromiso matrimonial. . . . Esclaba no tabatin derecho. Su curpa tabata na disposicion di su doño.”

⁷ Den un ambiente asina, Pablo a skirbi e sigiente palabra di Efesio 5:23-29: “Esposo ta cabez di nan esposa mescos cu Cristo també ta cabez dje congregacion, e siendo salbador dje curpa. . . . Esposo, sigi stima boso esposa, mescos cu Cristo també a stima e congregacion i a entrega su mes pe . . . Esposo mester stima nan esposa mescos cu nan mes curpa. Ken cu ta stima su esposa ta stima su mes, pasobra ningun hende nunca a odia su mes carni; sino ta alimenté i ta caricié.” Pa lector dje promé siglo, e palabra ei tabata mashá revolucionario. Segun The Expositor’s Bible: “E punto di bista cristian di matrimonio a parce di ser e cos mas nobo i mas estricto di cristianismo, na comparacion cu e inmoralidad se­xual dje tempo ei. . . . Esei tabata e principio di un era nobo pa humanidad.”

8, 9. Hopi homber tin cua actitud perhudicial en cuanto hende muher, i pakico ta importante pa homber cristian rechaza tal punto di bista?

⁸ Conseho bíblico pa esposo no ta menos revolucionario awendia. Apesar di tanto papiamento tocante emancipacion di hende muher, hopi homber ainda ta considera hende muher como simplemente obheto pa satisface nan mes deseo sexual. Hopi homber ta abusa nan esposa na moda física i emocional pasobra nan ta kere e cuenta bieu di cu hende muher realmente ta gusta pa homber dominánan, controlánan, i trátanan cu tiranía. Lo ta ki bergonzoso pa homber cristian laga pensamento di mundo influenciánan i maltrata nan esposa! Segun un hende muher cristian: “Mi casá tabata un sirbidor ministerial i a duna discurso público.” Pero, el a bisa cu “el a golpeámi.” Claramente, tal accion no ta na armonía cu e ley di Dios. E homber tabata un caso raro; e tabatin cu busca yudanza pa domina su rabia afin di haya e fabor di Dios.—Galatio 5:19-21.

⁹ Dios ta manda homber stima nan esposa mescos cu nan mes curpa. Pa nan no hacié ta rebelion contra e ley di Dios mes i por destrui nan relacion cu Dios. E palabra di apóstol Pedro ta claro: “Boso, esposonan, sigi biba di igual manera cu [boso esposa] segun conocimento, asignando nan onor manera na un wea mas swak, . . . pa boso oracion no ser strobá.” (1 Pedro 3:7) Tratamento severo di bo esposa també por tene un efecto desastroso riba e spiritualidad di dje i di bo yiunan.

10. Menciona algun manera pa esposo eherce hefatura na moda cristian.

¹⁰ Esposo, bo famía lo prospera si bo ta eherce bo hefatura mescos cu Cristo. E nunca tabata severo ni abusivo. Al contrario, e por a bisa: “Siña foi mi, pasobra mi genio ta suave i mi curazón humilde, i boso lo haya refrescamento pa boso alma.” (Mateo 11:29) Bo famía por bisa esei di bo? Cristo a trata disípel di dje manera amigo i a pone confianza den nan. (Juan 15:15) Bo ta demonstra e mesun dignidad pa bo esposa? E Bijbel ta bisa di “esposa capaz”: “E curazón di su doño ta pone confianza den dje.” (Proverbio 31:10, 11) Esei kier men cu esposo ta duna nan esposa un cierto midí di libertad, sin limité cu restriccion irrazonabel. Además, Jesús a anima su disípelnan pa expresa nan sintimento i opinion. (Mateo 9:28; 16:13-15) Bo ta haci mescos cu bo esposa? Of ora e no ta di acuerdo cu bo, bo ta considera esei como rebelion contra bo autoridad? Ora bo ta tuma na cuenta e sintimento di bo esposa en bez di ignoré, bo ta hacié respeta bo hefatura asta mas.

11. (a) Con tata por atende na necesidad spiritual di nan yiunan? (b) Pakico anciano i sirbidor ministerial mester pone bon ehempel atendiendo na nan famía?

¹¹ Si bo ta tata, bo tin cu hiba delantera també atendiendo na necesidad spiritual, emocional i fisical di bo yiunan. Esei ta inclui tene un bon rutina spiritual pa bo famía: traha cu nan den e sirbishi di feld, conduci un estudio bíblico di cas, considera e texto diario. Ta interesante cu e Bijbel ta mustra cu anciano i sirbidor ministerial mester ta “homber cu ta presidi di manera excelente riba su mes famía.” Homber cu ta sirbi den tal puesto mester ta cabez ehemplar di famía. Aunque nan por tin un carga pisá di responsabilidad di congregacion, nan mester duna prioridad na nan mes famía. Pablo a mustra pakico: “Si en berdad algun homber no sa con pa presidi riba su mes famía, con e por cuida e congregacion di Dios?”—1 Timoteo 3:4, 5, 12.

Esposa Cristian ta Duna Apoyo

12. Esposa ta hunga cua papel den e famía cristian?

¹² Bo ta un esposa cristian? Anto abo també tin cu hunga un papel vital den e famía. E Bijbel ta conseha esposa cristian “pa stima nan esposo, pa stima nan yiunan, pa ser di sano huicio, decente, trahador na cas, bon, sumiso na nan mes esposo.” (Tito 2:4, 5) Asina bo mester haci esfuerzo pa ser un esposa ehemplar, mantene un cas limpi i agradabel pa bo famía. Tin bez cu trabao di cas por ta fastioso, pero e no ta degradante ni insignificante. Como esposa, bo ta ‘maneha e cas,’ i por disfruta di hopi libertad haciendo esei. (1 Timoteo 5:14) Por ehempel, “esposa capaz” a cumpra provision pe cas, a haci trámite tocante terreno, i asta a gana cen manehando un negoshi chikito. No ta straño cu el a gana elogio di su casá! (Proverbio, capítulo 31) Naturalmente el a tuma iniciativa asina sigiendo guía di su esposo como cabez.

13. (a) Pakico sumision por ta dificultoso pa algun hende muher? (b) Pakico ta bentahoso pa hende muher cristian keda sumiso na nan esposo?

¹³ Sin embargo, tal bez no ta fácil pa sometébo na bo esposo cada bez. Tur homber no ta merece respet. I bo por ta basta capaz pa atende na financia, haci planeamento, of organiza. Tal bez bo tin empleo seglar i ta trece cas basta placa. Of kizás bo a sufri di algun manera di dominacion di homber den pasado i ta haya cu ta difícil pa sometébo na un homber. No obstante, mustrando “respet profundo,” of “temor,” pa bo casá ta demonstra bo respet pe hefatura di Dios. (Efesio 5:33, Kingdom Interlinear; 1 Corintio 11:3) Sumision també ta importante pe famía tene éxito; esei ta yudábo evita di somete bo matrimonio na tension i presion innecesario.

14. Kico esposa por haci ora e no ta di acuerdo cu decision di su esposo?

¹⁴ Pero, esei kier men cu bo mester keda ketu ora ta parcébo cu bo esposo ta tuma decision cu por perhudica e famía? No necesariamente. Sara, esposa di Abraham, no a keda ketu ora el a mira cu e bienestar di su yiu Isaac tabata den peliger. (Génesis 21:8-10) Di igual manera, tin bez cu bo por sintíbo obligá di expresa bo punto di bista. Si bo ta haci esei cu respet i “ne tempo apropiado,” bo esposo temoroso di Dios lo scuchábo. (Proverbio 25:11) Pero, si e no ta acepta bo sugerencia i si no tin violacion serio di principio bíblico, no ta contraproductivo pa bo opone bo casá? No lubida, “esposa berdaderamente sabí ta edifica su cas, pero esun bobo ta kibré cu su mes man.” (Proverbio 14:1) Un manera pa bo edifica bo cas ta di duna apoyo na hefatura di bo esposo, elogié pa su logramento i soporta su foutnan.

15. Di ki manera esposa por participa den e disiplina i siñamento dje yiunan?

¹⁵ Un otro manera pa edifica bo cas ta di participa den e dunamento di disiplina i entrenamento di boso yiunan. Por ehempel, bo por yuda pe estudio bíblico di famía ser na ora i edificante. “No laga bo man sosega” compartiendo e berdad di Dios cu bo yiunan na tur oportunidad—ora boso ta keiru of simplemente ta haci compras. (Eclesiastés 11:6) Yúdanan prepara comentario den reunion i nan parti den e Scol di Ministerio Teocrático. Vigila nan asociacion. (1 Corintio 15:33) Den e asunto di norma divino i disiplina, laga boso yiunan sa cu abo i bo esposo ta uní. No laga e yiunan birábo contra bo casá.

16. (a) Cua ehempel bíblico ta duna animacion na mayornan soltero i na esnan cu tin casá no creyente? (b) Con otronan den e congregacion por yuda rumanan asina?

¹⁶ Si bo ta soltero of soltera cu yiu of tin un casá no creyente, bo por wel tin cu hiba e delantera den asunto spiritual. Esei por ta difícil i aveces asta desanimador. Pero, no entrega. Eunice, mama di Timoteo, a logra siñé e santa Scritura “desde infancia,” aunque su esposo no tabata un creyente. (2 Timoteo 1:5; 3:15) I hopi mama cristian djawe també ta goza bon éxito. Si bo tin mester di yudanza pa haci esei, bo por papia cu anciano. Por ta cu nan por haci arreglo pa un ruman yudábo bai reunion i sali den e sirbishi di feld. Nan por conseha otronan pa inclui boso famía den nan buitendag of recreo. Of nan por haci arreglo pa un publicador cu experencia yudábo cuminza un estudio di famía.

Yiu Agradicido

17. (a) Con hovenan por contribui ne bienestar dje famía? (b) Cua ehempel Jesús a pone en cuanto esei?

¹⁷ Hovenan cristian por contribui ne bienestar di famía sigiendo e conseho di Efesio 6:1-3: “Yiunan, sea obediente na boso mayornan den union cu Señor, pasobra esei ta husto: ‘Onra bo tata i bo mama’; cu ta e promé mandamento cu un promesa: ‘Pa bo pasa bon i pa bo dura un tempo largu riba tera.’” Cu boso cooperacion cu boso mayornan, boso ta demonstra boso respet pa Jehova Dios. Jesucristo tabata perfecto i fácilmente por a razona cu ta rebaha su dignidad pe sometele na mayornan imperfecto. Sin embargo, el “a sigi keda sumiso na nan. . . . I Jesús a sigi progresa den sabiduría i crecimento físico i den e fabor di Dios i di hende.”—Lucas 2:51, 52.

18, 19. (a) Kico kier men onra bo mayornan? (b) Di ki manera bo cas por bira un lugar di refrescamento?

¹⁸ Bo no mester onra bo mayornan mescos? “Onra” ei kier men reconoce autoridad debidamente duná. (Compara cu 1 Pedro 2:17.) Den casi tur situacion tal onor ta debí na mayornan aunque nan no ta creyente ni no ta pone bon ehempel. Bo mester onra bo mayornan asta mas tanto si nan ta hende cristian ehemplar. Corda, també, cu disiplina i guía cu mayornan ta duna no tin e propósito di frenábo indebidamente. Mas bien, esei ta pa protehábo pa bo por “sigi biba.”—Proverbio 7:1, 2.

¹⁹ Pues, ki un percuracion amoroso e famía tá! Ora esposo, esposa, i yiunan ta obedece ley di Dios pa bida di famía, nan cas ta bira un refugio, un lugar di refrescamento. No obstante, problema por presenta cu tin cu ber cu comunicacion i entrenamento di yiu. E sigiente artículo ta considera con pa resolve algun problema asina.

Bo ta Corda?

◻ Esposo, esposa i yiu temeroso di Dios di tempo bíblico a establece cua modelo?

◻ Di ki manera cristianismo a ilumina e papel di esposo?

◻ Esposa mester hunga cua papel den famía cristian?

◻ Con hovenan cristian por contribui ne bienestar dje famía?

[Plachi na página 9]

“E punto di bista cristian di matrimonio a parce di ser e cos mas nobo i mas estricto di cristianismo, na comparacion cu e inmoralidad sexual dje tempo ei. . . . Esei tabata e principio di un era nobo pa humanidad.”

[Plachi na página 10]

Esposo cristian ta anima nan esposa pa expresa nan sintimento, i ta tuma esei na cuenta