BIBLIOTEKA ONLINE Watchtower
Watchtower
BIBLIOTEKA ONLINE
Papiamentu (Kòrsou)
  • BEIBEL
  • PUBLIKASHON
  • REUNION
  • w99 15/11 pág. 18-23
  • Bo Ta Cumpliendo cu Henter Bo Obligacion na Dios?

No tin vidio disponibel pa esaki.

Despensa, tin un problema pa habri e vidio.

  • Bo Ta Cumpliendo cu Henter Bo Obligacion na Dios?
  • E Toren di Vigilansia Anunsiando e Reino di Yehova Dios—1999
  • Suptema
  • Informashon Similar
  • Tur Cos Ta Banidad?
  • Dedicacion i Nos Obligacion na Dios
  • Evaluá Bo Decisionnan Cuidadosamente!
  • Yudansa pa Corda Riba Nos Magnífico Creador
  • Henter Nos Obligacion na Dios
  • Cumpli cu Henter Bo Obligacion
  • “Henter e Obligacion di Hende”
    E Toren di Vigilansia Anunsiando e Reino di Yehova Dios—1997
  • Kumpli ku Bo Deber ku Dios
    E Toren di Vigilansia Anunsiando e Reino di Yehova Dios—2011
  • Puntonan Sobresaliente di e Buki di Eklesiastés
    E Toren di Vigilansia Anunsiando e Reino di Yehova Dios—2006
  • Corda Riba Bo Magnífico Creador!
    E Toren di Vigilansia Anunsiando e Reino di Yehova Dios—1999
Mas Artíkulo
E Toren di Vigilansia Anunsiando e Reino di Yehova Dios—1999
w99 15/11 pág. 18-23

Bo Ta Cumpliendo cu Henter Bo Obligacion na Dios?

“E Dios berdadero mes lo trece na huicio tur clase di obra relacioná cu tur cos scondí, en cuanto si e ta bon of malu.”—Eclesiastes 12:14.

1. Ki percuracion Jehova a haci pa su pueblo?

JEHOVA ta sostené esnan cu ta sigui corda riba dje como nan Magnífico Creador. Su Palabra inspirá ta duna nan e conocimentu necesario pa agrad’é plenamente. Dios su spiritu santu ta guia nan pa haci e boluntad divino i pa “producí fruta den tur bon obra.” (Colosensenan 1:9, 10) Ademas, Jehova ta percurá alimento spiritual i guia teocrático mediante “e esclabo fiel i discreto.” (Mateo 24:45-47) Den hopi manera anto, e pueblo di Dios tin bendicion di shelu miéntras cu nan ta sirbi Jehova i ta efectuá e trabou vital di predicá e bon nobo di Reino.—Marco 13:10.

2. En coneccion cu sirbishi na Jehova, ki pregunta por surgi?

2 Cristiannan berdadero ta contentu di ta ocupá den sirbishi sagrado na Jehova. Pero, algun por desanimá i pensa cu nan esfuersonan no ta bal nada. Por ehempel, tin bes cristiannan dedicá por puntra nan mes si nan esfuersonan conciencial ta realmente bale la pena. Ora un cabes di famia ta meditá riba studio di famia i otro actividadnan, preguntanan manera lo siguiente por lanta den su mente: ‘Jehova ta realmente contentu cu loke nos ta haciendo? Nos ta cumpliendo cu henter nos obligacion na Dios?’ E palabranan sabí dje congregadó por yuda contestá e preguntanan ei.

Tur Cos Ta Banidad?

3. Na armonia cu Eclesiástes 12:8, kico ta colmo di banidad?

3 Algun hende por pensa cu e palabranan dje homber sabí no ta muchu animador pa ningun hende, ni hóben ni bieu. “‘E mayor banidad!’ e congregadó a bisa, ‘tur cos ta banidad.’” (Eclesiástes 12:8) Ignorá e Magnífico Creador den hubentud, bira grandi sin sirbié i alcansá behes como único logro, en berdad ta colmo di banidad. Pa un persona asina, tur cos tabata banidad, un inutilidad, asta si e muri cu rikesa i fama den e mundu aki cu ta drumí den poder dje malbado, Satanas e Diabel.—1 Juan 5:19.

4. Pakico nos por bisa cu no ta tur cos ta banidad?

4 Pa esnan cu ta montoná tesoro den shelu como fiel sirbidó di Jehova, no ta tur cos ta banidad. (Mateo 6:19, 20) Nan tin hopi di haci den e obra recompensador di Señor, i e labornan ei sigur no ta en bano. (1 Corintionan 15:58) Pero si nos ta cristiannan dedicá, nos ta mantené nos mes activo den e trabou cu Dios a asigná nos den e último dianan aki? (2 Timoteo 3:1) Of nos a adoptá un estilo di bida cu no ta muchu diferente for di nos próhimo en general? Kisas nan ta asociá cu vários religion i por ta masha deboto dor di bai nan cas di adoracion regularmente i purba cumpli cu loke nan forma di adoracion ta rekerí di nan. Claro cu nan no ta proclamadó dje mensahe di Reino. Nan no tin conocimentu exacto cu esaki ta “e tempu di fin” i nan no ta sinti un urgencia pa cu e dianan den cua nos ta biba.—Daniel 12:4.

5. Si e actividadnan normal di bida a bira nos preocupacion principal, kico nos mester haci?

5 Jesucristo a bisa di nos tempu crítico: “Mescos cu e dianan di Noe tabata, asina e presencia dje Yu di hende lo ta. Pasobra manera nan tabata den e dianan ei promé cu e diluvio, comiendo i bebiendo, hombernan casando i muhernan siendo duná den matrimonio, te n’e dia cu Noe a drenta den e arca; i nan no a haci caso te cu e diluvio a bini i a bari nan tur, asina e presencia dje Yu di hende lo ta.” (Mateo 24:37-39) No tin nada malu ora hende ta come i bebe na un manera moderá, i matrimonio ta un areglo cu Dios mes a originá. (Génesis 2:20-24) Pero, si nos realisá cu e actividadnan normal di bida a bira nos preocupacion principal, pakico no haci esaki un asuntu di oracion? Jehova por yuda nos tene interesnan di Reino na promé lugá, haci loke ta bon i cumpli cu nos obligacion na dje.—Mateo 6:33; Romanonan 12:12; 2 Corintionan 13:7.

Dedicacion i Nos Obligacion na Dios

6. Den ki manera importante algun individuo bautisá no ta cumpli cu nan obligacion na Dios?

6 Algun cristian bautisá tin cu haci oracion sincero na Dios pasobra nan no ta cumpliendo cu e obligacionnan di sirbishi cu nan a asumí ora nan a dedicá nan mes na dje. Pa un cantidad di aña caba, hopi mas cu 300.000 persona ta bautisá pa aña, pero e cantidad total di Testigo di Jehova activo no a crece n’e mésun ritmo. Algun cu a bira publicadó di Reino a stop di proclamá e bon nobo. Pero hende mester tin un participacion significativo den e ministerio cristian promé cu nan bautisá. Dje manera ei nan ta conciente dje comision cu Jesus a duna tur su siguidónan: “Bai . . . i haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan pa warda tur loke mi a manda boso.” (Mateo 28:19, 20) A ménos cu individuonan bautisá tin limitacionnan sumamente extraordinario debí na salú of otro factor fuera di nan control, esnan cu no ta sirbiendo mas como Testigo activo di Dios i di Cristo no ta cumpliendo cu henter nan obligacion dilanti nos Magnífico Creador.—Isaías 43:10-12.

7. Pakico nos tin cu reuní huntu regularmente pa adoracion?

7 Israel di antigwedad tabata un nacion dedicá na Dios, i bou dje pacto di Ley, su pueblo tabatin obligacionnan dilanti Jehova. Por ehempel, tur hende homber mester a reuní pa tres fiesta anual, i un homber cu expres no a warda e Pascu hudiu mester a ser “cortá,” esta matá. (Númeronan 9:13; Levítico 23:1-43; Deuteronomio 16:16) Pa cumpli cu nan obligacion na Dios como su pueblo dedicá, e israelitanan tabatin cu bini huntu pa adoracion. (Deuteronomio 31:10-13) No tabatin nada den e Ley cu a bisa: ‘Haci esaki si e ta cumbiní bo.’ Pa esnan cu awor ta dedicá na Jehova, esaki sigur ta duna mas peso na Pablo su palabranan: “Laga nos considerá otro pa incitá otro na amor i na obranan excelente, sin bandoná nos reunimentu huntu, manera algun tin pa custumber, sino animando otro, i tantu mas segun cu boso ta contemplá e dia yegando cerca.” (Hebreonan 10:24, 25) Sí, reuní regularmente cu compañeronan creyente ta parti di un cristian dedicá su obligacion na Dios.

Evaluá Bo Decisionnan Cuidadosamente!

8. Pakico un persona yong dedicá mester analisá su sirbishi sagrado huntu cu oracion?

8 Tal bes bo ta un persona hóben dedicá na Jehova. Si bo pone interesnan di Reino na promé lugá den bo bida, lo bo haña bendicionnan ricu. (Proverbionan 10:22) Cu oracion i planificacion cuidadoso, kisas lo bo por dedicá por lo ménos bo añanan di hubentud den algun forma di sirbishi di tempu completo, un manera excelente pa mustra cu bo ta corda riba bo Magnífico Creador. Di otro manera, interesnan material lo por cuminsá ocupá mayoria di bo tempu i atencion. Mescos cu hende en general, bo por casa trempan den bida i hinca bo curpa den debe pa haña cos material. Un carera lucrativo lo por absorbá hopi di bo tempu i energia. Si bo tin yu, lo bo tin cu carga responsabilidad di famia pa décadanan. (1 Timoteo 5:8) Kisas bo no a lubidá bo Magnífico Creador, pero ta sabí pa realisá cu bo planificacion delantá, of falta di dje, lo por fiha e curso di bo bida como adulto. Den añanan mas despues, kisas lo bo wak bek i deseá cu bo a dedicá por lo ménos bo promé añanan como adulto mas plenamente den sirbishi sagrado na nos Magnífico Creador. Pakico no analisá awor aki mes huntu cu oracion bo posibilidadnan, pa asina bo haña satisfaccion den bo sirbishi sagrado na Jehova den bo añanan di hubentud?

9. Kico lo por ta posibel pa un persona cu a bira grandi i cu un tempu tabata carga responsabilidad pisá den e congregacion?

9 Considerá un otro circunstancia: esun di un homber cu un tempu a sirbi como wardadó di “e tou di Dios.” (1 Pedro 5:2, 3) Pa un of otro motibu, e mes a entregá e privilegionan ei. Ta cierto cu el a bira mas grandi awor, i p’e kisas ta mas difícil pa sigui den sirbishi di Dios. Pero, por ta cu e mester haci esfuerso pa alcansá privilegionan teocrático atrobe? Esta un bendicion un homber asina lo por ta pa otronan si e por carga mas responsabilidad den e congregacion! I siendo cu ningun hende no ta biba pa su mes so, amigu i sernan kerí lo alegrá si e por aumentá su sirbishi, p’e gloria di Dios. (Romanonan 14:7, 8) Mas cu tur cos, Jehova lo no lubidá loke un persona ta haci den su sirbishi. (Hebreonan 6:10-12) Pues, kico por yuda nos corda riba nos Magnífico Creador?

Yudansa pa Corda Riba Nos Magnífico Creador

10. Pakico e congregadó tabata den un posicion excelente pa suministrá guia riba e asuntu di corda riba nos Magnífico Creador?

10 E congregadó tabata den un posicion excelente pa suministrá guia pa nos corda riba nos Magnífico Creador. Jehova a contestá su oracionnan sincero dor di dun’é sabiduria extraordinario. (1 Reynan 3:6-12) Sálomon a haci un investigacion cabal di henter e cuadro di asuntunan humano. Ademas, Dios a inspir’é pa skirbi su conclusionnan p’e beneficio di otro hende. El a skirbi: “I ademas dje echo cu e congregadó a bira sabí, tambe el a siña e pueblo conocimentu continuamente, i el a meditá i a haci un investigacion cabal, p’e por a areglá hopi proverbio ordenadamente. E congregadó a busca pa haña e palabranan deleitabel i e skirbimentu di palabranan corecto dje berdad.”—Eclesiástes 12:9, 10.

11. Pakico nos mester aceptá e conseho sabí di Sálomon?

11 E Septuaginta griego su traduccion dje palabranan aki ta bisa: “I ademas, pasobra e predicadó tabata sabí, pasobra el a siña humanidad sabiduria; pa orea por haña tende loke ta bunita for di comparacionnan, e predicadó a busca diligentemente p’e haña palabranan agradabel i un skirbimentu di rectitud—palabranan dje berdad.” (The Septuagint Bible, traducí dor di Charles Thomson) Sálomon a haci esfuerso pa alcansá curason di su lectornan cu palabranan deleitabel i ègt interesante i tópiconan cu a bale la pena. Siendo cu su palabranan den e Scritura ta producto di inspiracion di spiritu santu, nos por aceptá su conclusionnan i conseho sabí mesora.—2 Timoteo 3:16, 17.

12. Den bo mes palabra, con lo bo expresá loke Sálomon a bisa manera e ta pará na Eclesiástes 12:11 i 12?

12 Den tempu di Sálomon ainda no tabatin método moderno di imprenta. Tog, tabatin un cantidad di buki disponibel. Con mester a mira literatura asina? El a bisa: “E palabranan di esnan sabí ta manera pui, i net manera clabu mandá aden ta esnan cu ta entregá nan mes na coleccion di frase; ta un solo wardador a duna nan. En cuanto cualkier cos fuera di esakinan, mi yu, aceptá un advertencia: Na trahamentu di hopi buki no tin fin, i dedicá bo mes muchu na nan ta cansancio p’e carni.”—Eclesiástes 12:11, 12.

13. Con e palabranan di esnan cu ta poseé sabiduria divino por resultá di ta manera pui, i ken ta manera “clabu mandá aden”?

13 E palabranan di esnan cu ta poseé sabiduria di Dios ta resultá di ta manera pui. Con asina? Nan ta hinca e lector of oyente p’e progresá na armonia cu e palabranan sabí cu e ta lesa of tende. Ademas, esnan cu ta ocupá nan mes cu “coleccion di frase,” of dichonan berdaderamente sabí i bale la pena, ta manera “clabu mandá aden,” esta, bon pegá. Esaki por ta asina pasobra e palabranan excelente dje individuonan ei ta reflehá Jehova su sabiduria i p’esei por sirbi pa stabilisá i sostené e lector of oyente. Si bo ta un mayor temeroso di Dios, lo bo no mester haci tur esfuerso pa inculcá e sabiduria ei den mente i curason di bo yu?—Deuteronomio 6:4-9.

14. (a) Ki sorto di buki no ta beneficioso pa “dedicá bo mes muchu” na dje? (b) Ki literatura nos tin cu considerá principalmente, i pakico?

14 Pero pakico Sálomon a bisa loke e di tocante buki? Wel, compará cu Jehova su Palabra, e volúmennan interminabel dje mundu aki ta contené puru razonamentu humano. Hopi dje manera di pensa aki ta reflehá e mente di Satanas e Diabel. (2 Corintionan 4:4) P’esei, ‘muchu dedicacion’ n’e material seglar ei ta producí masha poco cos di balor duradero. De facto, un gran parti di dje por ta spiritualmente perhudicial. Mescos cu Sálomon, laga nos meditá riba loke e Palabra di Dios ta bisa tocante bida. Esaki lo fortalecé nos fe i hala nos mas cerca Jehova. Demasiado atencion na otro buki of fuente di instruccion por cansa nos. Specialmente ora e literatura ei ta producto di razonamentu mundano cu ta na conflicto cu sabiduria divino, nan ta insaludabel i destructivo pa fe den Dios i den su propósitonan. Pues anto, laga nos corda cu e skirbimentu di mas beneficioso di Sálomon su dia i di nos tempu ta esnan cu ta reflehá e sabiduria di e “solo wardador,” Jehova Dios. El a percurá e 66 bukinan dje Scritura Santu, i ta na esakinan nos tin cu presta sumo atencion. Bijbel i publicacionnan probechoso dje “esclabo fiel” ta permití nos gana “e conocimentu mes di Dios.”—Proverbionan 2:1-6.

Henter Nos Obligacion na Dios

15. (a) Con lo bo expresá Sálomon su palabranan tocante “henter e obligacion di hende”? (b) Kico nos tin cu haci si nos kier cumpli cu nos obligacion na Dios?

15 Resumiendo henter su investigacion, e congregadó, Sálomon, ta bisa: “E conclusion dje asuntu, despues di a tende tur cos, ta: Teme e Dios berdadero i warda su mandamentunan. Pasobra esaki ta henter e obligacion di hende. Pasobra e Dios berdadero mes lo trece na huicio tur clase di obra relacioná cu tur cos scondí, en cuanto si e ta bon of malu.” (Eclesiástes 12:13, 14) Un temor saludabel, of respet reverencial, pa nos Magnífico Creador lo protehá nos, i nos ta spera nos famia tambe, di sigui un curso di bida prufiá cu lo por trece masha hopi problema i tristesa riba nos i nos sernan kerí. Temor saludabel pa Dios ta puru i ta e principio mes di sabiduria i conocimentu. (Salmo 19:9; Proverbionan 1:7) Si nos ta poseé comprendimentu penetrante basá riba e Palabra inspirá di Dios i ta aplicá su conseho den tur cos, nos lo ta cumpliendo cu ‘henter nos obligacion’ na Dios. No, no ta un asuntu di traha un lista di obligacionnan. Mas bien, loke ta necesario ta pa nos acudí n’e Scritura ora di resolvé problema di bida i semper haci cosnan n’e manera di Dios.

16. Kico Jehova lo haci en relacion cu huicio?

16 Nos mester realisá cu nada no ta scapa e atencion di nos Magnífico Creador. (Proverbionan 15:3) Lo e “trece na huicio tur clase di obra.” Sí, e Haltísimo lo husga tur cos, incluso esnan scondí for di bista di hende. E echo cu nos ta conciente dje factornan ei por sirbi como un incentivo pa warda Dios su mandamentunan. Pero e mayor incentivo mester ta amor pa nos Tata celestial, pasobra apostel Juan a skirbi: “Esaki ta loke e amor di Dios ta nificá, cu nos ta warda su mandamentunan; i tog su mandamentunan no ta un carga pisá.” (1 Juan 5:3) I siendo cu e mandamentunan di Dios ta diseñá pa promové nos bienestar duradero, sigur no ta solamente corecto sino tambe ègt sabí pa warda nan. Esaki no ta un carga pisá pa esnan cu ta stima e Magnífico Creador. Nan kier cumpli cu nan obligacion na dje.

Cumpli cu Henter Bo Obligacion

17. Kico nos lo haci si nos realmente kier cumpli cu henter nos obligacion na Dios?

17 Si nos ta sabí i di berdad ta deseá di cumpli cu henter nos obligacion na Dios, ademas di warda su mandamentunan, nos lo tin un temor reverencial di desagrad’é. Sí, “e temor di Jehova ta e principio di sabiduria,” i esnan cu ta warda su mandamentunan tin “bon perspicacia.” (Salmo 111:10; Proverbionan 1:7) P’esei laga nos actua di un manera sabí i obedecé Jehova den tur cos. Esei ta specialmente vital awor pasobra e Rey Jesucristo ta presente, i e dia di huicio di su parti como Dios su Hues nombrá ta cerca.—Mateo 24:3; 25:31, 32.

18. Kico lo ta e resultado pa nos si nos cumpli cu henter nos obligacion na Jehova Dios?

18 Dios ta scudriñando cada un di nos awor aki. Nos tin inclinacion spiritual, of nos a laga influencia mundano debilitá nos relacion cu Dios? (1 Corintionan 2:10-16; 1 Juan 2:15-17) Sea nos ta hóben of bieu, laga nos haci tur loke nos por pa agradá nos Magnífico Creador. Si nos obedecé Jehova i warda su mandamentunan, nos lo rechasá e cosnan bano dje mundu bieu pasahero aki. E ora ei nos por carga e speransa di bida eterno den Dios su sistema di cosnan nobo cu el a primintí. (2 Pedro 3:13) Ki prospectonan grandioso esakinan ta pa tur esnan cu ta cumpli cu henter nan obligacion na Dios!

Con Lo Bo Contestá?

◻ Pakico lo bo bisa cu no ta tur cos ta banidad?

◻ Pakico un cristian yong mester analisá su sirbishi sagrado huntu cu oracion?

◻ Ki sorto di buki lo no ta beneficioso pa “dedicá bo mes muchu” na dje?

◻ Kico ta “henter e obligacion di hende”?

[Plachi na página 20]

Pa esnan cu ta sirbi Jehova, no ta tur cos ta banidad

[Plachi na página 23]

Distinto di hopi buki dje mundu aki, e Palabra di Dios ta refrescante i beneficioso

    Publikashonnan na Papiamentu (Curaçao) (1986-2025)
    Log Out
    Log In
    • Papiamentu (Kòrsou)
    • Kompartí
    • Preferensia
    • Copyright © 2025 Watch Tower Bible and Tract Society of Pennsylvania
    • Kondishonnan di Uso
    • Maneho di Privasidat
    • Konfigurashon di Privasidat
    • JW.ORG
    • Log In
    Kompartí