“Pa Tur Cos Tin un Tempu Señalá”

“Pa tur cos tin un tempu señalá, sí, un tempu pa tur asuntu bou di shelu.”—ECLESIASTES 3:1.

1. Kico ta difícil pa hende imperfecto, i na kico esaki a hiba den algun caso?

HOPI bes hende ta bisa: “Mihó mi a hacié mas promé.” Of posiblemente, despues di wak atras: “Mihó m’a warda.” E reaccionnan ei ta demostrá con difícil ta pa hende imperfecto determiná e tempu exacto pa haci cierto cos. E limitacion aki a pone relacionnan kibra. El a hiba na decepcion i frustracion. I pió cu tur, el a debilitá algun hende su fe den Jehova i den su organisacion.

2, 3. (a) Pakico ta sabí pa aceptá loke Jehova determiná como tempu señalá? (b) Ki punto di bista balansá nos mester tin relacioná cu cumplimentu di profecia bíblico?

² Siendo cu Jehova tin e sabiduria i comprendimentu penetrante cu ser humano no tin, si e ta deseá, e por mira di antemano e resultado di tur accion. E por conocé “desde e principio e final.” (Isaías 46:10) P’esei, sin ekibocá su mes, e por selectá e momento mas oportuno pa haci kico cu e ta deseá. En bes di confia den nos mes sentido imperfecto di calculá tempu, nos lo ta sabí si nos aceptá loke Jehova determiná como tempu señalá!

³ Por ehempel, cristiannan maduro ta spera lealmente riba Jehova su tempu señalá pa cierto profecia di Bijbel cumpli. Nan ta keda ocupá den su sirbishi, turesten cu nan ta tene bon cla na mente e principio di Lamentacionnan 3:26: “Ta bon cu un persona spera, sí, silenciosamente, riba e salbacion di Jehova.” (Compará cu Habacuc 3:16.) Na mésun tempu, nan ta convencí cu Jehova su ehecucion dje huicio anunciá, ‘asta si e tarda, lo ser realisá sin falta. Lo e no ta lat.’—Habacuc 2:3.

4. Con Amos 3:7 i Mateo 24:45 mester yuda nos spera cu pacenshi riba Jehova?

⁴ Di otro banda, ora nos no ta comprendé completamente cierto texto di Bijbel of splicacion cu e publicacionnan di Watch Tower ta duna, esei ta motibu pa bira impaciente? E curso di sabiduria ta pa spera riba Jehova su tempu señalá pa clarificá asuntunan. “Pasobra e Señor Soberano Jehova lo no haci ni un solo cos a ménos cu el a revelá su asuntu confidencial na su sirbidónan e profetanan.” (Amos 3:7) Esta un promesa maraviyoso! Pero nos tin cu realisá cu Jehova ta revelá su asuntunan confidencial n’e tempu cu e ta haña cumbiniente. P’e propósito ei Dios a autorisá un “esclabo fiel i discreto” pa duna su pueblo “nan alimento [spiritual] n’e debido tempu.” (Mateo 24:45) P’esei, no tin motibu pa nos bira demasiado preocupá, of asta agitá, cu ainda no tin splicacion completo pa cierto asuntu. Mas bien, nos por confia cu si nos spera cu pacenshi riba Jehova, mediante e esclabo fiel lo e percurá loke ta necesario “n’e debido tempu.”

5. Con un consideracion di Eclesiástes 3:1-8 ta beneficiá nos?

⁵ Rey sabí Sálomon a papia di 28 diferente cos, i cada un tin su “tempu señalá.” (Eclesiástes 3:1-8) Un comprendimentu dje nificacion i implicacionnan di loke Sálomon a bisa lo yuda nos determiná e tempu corecto i e tempu incorecto pa cierto accionnan, manera Dios ta mira nan. (Hebreonan 5:14) Esei, na su turno, lo permití nos armonisá nos bida cu nan.

“Un Tempu pa Yora i un Tempu pa Hari”

6, 7. (a) Kico ta pone hende preocupá awe “yora”? (b) Con mundu ta purba contrarestá e situacion serio den cua e ta actualmente?

⁶ Aunke tin “un tempu pa yora i un tempu pa hari,” ken no ta preferá e último riba e promé? (Eclesiástes 3:4) Lamentablemente, nos ta biba den un mundu cu ta duna nos motibu principalmente pa yora. Noticia tristu ta dominá medionan di comunicacion. Nos ta yena cu teror ora nos tende di hóbennan cu ta tira nan compañeronan mata na scol, di mayornan cu ta maltratá nan yunan, di teroristanan cu ta mata of manca víctimanan inocente i di e asina yamá desasternan natural cu ta causa destruccion di bida humano i propiedad. Television ta mustra nos imágennan di mucha cu hamber, wowonan hundí, i refugiadonan desplasá na careda. Palabranan cu ántes tabata desconocí, manera purificacion étnico, AIDS, guera biológico i El Niño, awor ta causa ansiedad den nos mente i curason—cada un na su mes manera.

⁷ No tin duda, e mundu djawe ta yen di tragedia i dolor di curason. No obstante, como si fuera pa minimisá e seriedad dje situacion, por lo general loke e industria di entretenimentu ta presentá ta di mal gustu, hopi bes inmoral i violento, diseñá pa laga nos ignorá e miseria cu otronan ta pasa aden. Pero nos no mester confundí e spiritu despreocupá di chansa ridículo i harimentu sin sentido cu tal entretenimentu ta fomentá, cu goso genuino. E goso cu ta un fruta dje spiritu di Dios, ta algu cu e mundu di Satanas simplemente no por proveé.—Galationan 5:22, 23; Efesionan 5:3, 4.

8. Awe cristiannan mester duna prioridad na yoramentu of na harimentu? Splica.

⁸ Mirando e condicion deplorabel di mundu, nos por comprendé cu awor aki sigur no ta tempu pa duna muchu importancia na harimentu. No ta tempu pa biba solamente pa recreá i dibertí of pa permití “gosamentu” haña preferencia riba e búskeda di cosnan spiritual. (Compará cu Eclesiástes 7:2-4.) Apostel Pablo a bisa cu “esnan cu ta haci uso di mundu” mester ta “manera esnan cu no ta us’é plenamente.” Pakico? Pasobra “e esena dje mundu aki ta cambiando.” (1 Corintionan 7:31) Cristiannan berdadero ta biba tur dia plenamente conciente dje seriedad dje tempu den cua nos ta biba.—Filipensenan 4:8.

Apesar di Ta Yora, Nan Ta Berdaderamente Felis!

9. Ki situacion lamentabel a existí den e dianan promé cu e Diluvio, i ki nificacion esaki tin pa nos awe?

⁹ E hendenan cu a biba den tempu dje Diluvio mundial tabata falta un punto di bista serio di bida. Nan a sigui cu nan rutina di tur dia i no a yora p’e “maldad di hende [cu] tabata abundante riba tera.” Ora “e tera a yena cu violencia,” nan a keda indiferente. (Génesis 6:5, 11) Jesus a referí n’e condicion lamentabel ei, i el a profetisá cu hende den nos tempu lo tin un actitud similar. El a spierta: “Manera nan tabata den e dianan ei promé cu e diluvio, comiendo i bebiendo, hombernan casando i muhernan siendo duná den matrimonio, te n’e dia cu Noe a drenta den e arca; i nan no a haci caso te cu e diluvio a bini i a bari nan tur, asina e presencia dje Yu di hende lo ta.”—Mateo 24:38, 39.

10. Con e israelitanan cu tabata biba den e tempu di Ageo a mustra cu nan no a comprendé cu Jehova su tempu señalá tabata cerca?

¹⁰ Rond di 1.850 aña despues dje Diluvio, den e dianan di Ageo, hopi israelita a mustra un falta similar di interes sincero den asuntunan spiritual. Ocupá cu nan interesnan personal, nan no a dicerní cu tabata tempu pa duna prioridad na Jehova su interesnan. Nos ta lesa: “Pa loke ta toca e pueblo aki, nan a bisa: ‘E tempu no a yega, e tempu dje cas di Jehova, pa e ser construí.’ I e palabra di Jehova a sigui bini pa medio di Ageo e profeta, bisando: ‘Ta tempu pa boso mes biba den boso cas furá cu palu, miéntras e cas aki ta pará den ruina? I awor, esaki ta loke Jehova di ehércitonan a bisa: “Pone boso curason riba boso camindanan.”’”—Ageo 1:1-5.

11. Ki preguntanan ta bon pa nos haci nos mes?

¹¹ Como Testigonan di Jehova awe, cu responsabilidad i privilegionan dilanti Jehova manera dje israelitanan den e tempu di Ageo, nos tambe mester pensa seriamente riba nos manera di biba. E condicionnan di mundu i e reproche cu esakinan ta trece riba e nomber di Dios ta pone nos “yora”? Ora hende ta nenga cu Dios ta existí i ta ignorá su principionan hustu abiertamente, esei ta duel nos? Nos ta reaccioná manera e individuonan marcá cu Ezekiel a mira den un vision 2.500 aña pasá? Nos ta lesa tocante nan: “Jehova a bisa [e homber cu e pochi di ink di secretario]: ‘Pasa meimei dje stad, meimei di Jerusalem, i bo tin cu pone un marca riba frenta dje hendenan cu ta suspirá i keha debí na tur e cosnan detestabel cu ta ser hací meimei di dje.’”—Ezekiel 9:4.

12. Ki importancia Ezekiel 9:5 i 6 tin pa hende awe?

¹² E importancia dje relato aki pa nos awe ta bira bisto ora nos lesa e instruccionnan duná n’e seis hombernan cu arma pa causa ruina. “Pasa dor dje stad su tras i heridá. No laga bo wowo sinti duele, i no sinti ningun compasion. Hende bieu, yong i bírgen i mucha chikitu i hende muher boso tin cu mata—te na un ruinamentu. Pero no acercá ningun hende riba cua tin e marca, i boso mester cuminsá for di mi santuario.” (Ezekiel 9:5, 6) Si nos reconocé cu awor aki ta principalmente un tempu pa yora, nos lo sobrebibí e tribulacion grandi ei cu ta acercá rápidamente.

13, 14. (a) Ki clase di hende Jesus a pronunciá felis? (b) Splica pakico bo ta pensa cu e descripcion aki ta cuadra bon cu Testigonan di Jehova.

¹³ Claro cu e echo cu Jehova su sirbidónan ta “yora” debí n’e condicion desalentador di asuntunan di mundu no ta stroba nan di ta felis. Al contrario! Eigenlijk nan ta e grupo di hende mas felis riba tera. Jesus a duna e clave pa felicidad ora el a bisa: “Felis ta esnan cu ta conciente di nan necesidad spiritual, . . . esnan cu ta lamentá, . . . esnan di genio suave, . . . esnan cu tin hamber i sed pa husticia, . . . esnan misericordioso, . . . esnan di curason puru, . . . e hacidónan di pas, . . . esnan cu a ser persiguí pa causa di husticia.” (Mateo 5:3-10) Tin evidencia abundante pa mustra cu e descripcion aki ta cuadra mihó cu e Testigonan di Jehova como grupo, cu cualkier otro organisacion religioso.

¹⁴ Foral desde e restoracion di adoracion berdadero na 1919, Jehova su pueblo felis tin motibu pa “hari.” Den sentido spiritual nan tabatin e mésun experencia refrescante cu esnan cu a regresá for di Babilonia den siglo 6 P.E.C.: “Ora Jehova a recogé bek e prezunan di Síon, nos a bira manera esnan cu tabata soña. Den e tempu ei nos boca a yena cu harimentu, i nos lenga cu un gritu gososo. . . . Jehova a haci un cos grandi den loke el a haci cu nos. Nos a bira gososo.” (Salmo 126:1-3) Tog, asta meimei dje harimentu spiritual, Testigonan di Jehova sabiamente ta tene na mente e seriedad dje tempu. Una bes e mundu nobo bira un realidad i habitantenan di tera haña “un gara firme riba e berdadero bida,” e tempu lo a yega e ora ei cu harimentu lo reemplasá yoramentu pa tur eternidad.—1 Timoteo 6:19; Revelacion 21:3, 4.

“Un Tempu pa Brasa i un Tempu pa Keda Leu for di Abraso”

15. Pakico cristiannan ta selectivo den scoge amigu?

¹⁵ Cristiannan ta selectivo den ken nan ta scoge como amigu. Nan ta tene na mente e spiertamentu di Pablo: “No sea gañá. Mal asociacion ta daña custumbernan útil.” (1 Corintionan 15:33) I rey sabí Sálomon a remarcá: “Esun cu ta cana cu hende sabí lo bira sabí, pero esun cu tin trato cu hende estúpido lo bai e malu.”—Proverbionan 13:20.

16, 17. Con Testigonan di Jehova ta mira amistad, trahamentu di afsprak pa sali i matrimonio, i pakico?

¹⁶ Sirbidónan di Jehova ta scoge como amigu individuonan cu tin e mésun amor pa Jehova i pa su husticia cu nan tin. Aunke nan ta apreciá i ta disfrutá dje compañerismo di nan amigunan, sabiamente nan ta evitá e punto di bista permisivo i demasiado liberal cu ta reina den algun pais awe di traha afsprak pa sali cu un persona dje sexo opuesto. En bes di entregá na esei como diberticion inofensivo, nan ta mira trahamentu di afsprak pa sali cu un solo persona como un paso serio den direccion di matrimonio. Paso cu nan ta dal solamente ora nan ta físicamente, mentalmente i spiritualmente cla—i tambe bíblicamente liber—pa drenta den un relacion permanente.—1 Corintionan 7:36.

¹⁷ Algun persona por haña cu e punto di bista ei di traha afsprak pa sali i di matrimonio ta anticuá. Pero Testigonan di Jehova no ta laga preshon di nan pareunan influenciá nan scogementu di amigu ni nan decisionnan relacioná cu trahamentu di afsprak i matrimonio. Nan sa cu “sabiduria ta ser probá hustu dor di su obranan.” (Mateo 11:19) Jehova semper sa mihó, p’esei nan ta tuma na serio su conseho pa casa “solamente den Señor.” (1 Corintionan 7:39; 2 Corintionan 6:14) Nan ta evitá di core drenta matrimonio cu e pensamentu ekibocá cu divorcio of separacion ta opcionnan aceptabel si e relacion mester fracasá. Nan ta tuma nan tempu pa busca un partner apropiado, realisando cu una bes nan haci e voto matrimonial, e siguiente ley di Jehova ta drenta na vigor: “Di manera cu nan no ta dos mas, sino un solo carni. P’esei, loke Dios a uni bou di un yugo, no laga ningun hende separá.”—Mateo 19:6; Marco 10:9.

18. Kico por sirbi como un bon base pa un matrimonio felis?

¹⁸ Matrimonio ta un compromiso di bida largu cu ta merecé planificacion cuidadoso. Ta lógico pa un homber puntra su mes: ‘E ta ègt e persona corecto pa mi?’ Pero igualmente importante, e mester puntra: ‘Ami realmente ta e persona corecto p’e? Mi ta un cristian maduro cu por percurá pa su necesidadnan spiritual?’ Ambos prospectivo partner tin un obligacion dilanti Jehova pa ta spiritualmente fuerte, capas pa forma un union matrimonial sólido cu ta merecé aprobacion divino. Miles di pareha cristian por testificá cu e ministerio di tempu completo ta un bon base pa un matrimonio felis, debí na su énfasis riba duna en bes di ricibí.

19. Pakico algun cristian ta keda soltero?

¹⁹ Algun cristian ta “keda leu for di abraso” dor di scoge pa keda soltero pa causa dje bon nobo. (Eclesiástes 3:5) Otronan ta posponé matrimonio te ora nan sinti cu nan ta spiritualmente cualificá pa atraé un partner apropiado. Pero laga nos corda tambe riba e cristiannan soltero cu ta anhelá e intimidadnan i beneficionan di matrimonio i cu ainda no a haña un partner. Nos por tin sigur cu Jehova ta contentu cu nan ta nenga di comprometé principionan divino den nan buscamentu di un matrimonio. Nos tambe ta haci bon di apreciá nan lealtad i di duna nan e animacion apropiado cu nan merecé.

20. Pakico asta partnernan matrimonial de bes en cuando ta “keda leu for di abraso”?

²⁰ Asta parehanan casá mester “keda leu for di abraso” de bes en cuando? Evidentemente sí, den un sentido, pasobra Pablo a remarcá: “Mi ta bisa esaki, rumannan, e tempu cu a keda ta reducí. Di awor padilanti, laga esnan cu tin esposa haci como si nan no tin.” (1 Corintionan 7:29) Consecuentemente, tin biaha e goso i bendicionnan di matrimonio mester ta secundario na responsabilidadnan teocrático. Un punto di bista balansá dje asuntu aki lo no debilitá un matrimonio sino lo fortalec’é, pasobra e ta yuda recordá tur dos partner cu Jehova semper mester ta e figura central stabilisador den nan relacion.—Eclesiástes 4:12.

21. Pakico nos no mester husga parehanan casá den e asuntu di haña yu?

²¹ Ademas, algun pareha casá a abstené di haña yu pa por ta mas liber pa efectuá nan sirbishi na Dios. Esaki a nificá sacrificio di nan parti, i Jehova lo recompensá nan pa esei. Den tur esei, aunke Bijbel ta animá solteria pa causa dje bon nobo, e no ta duna ningun comentario directo riba keda sin haña yu p’e mésun motibu. (Mateo 19:10-12; 1 Corintionan 7:38; compará cu Mateo 24:19 i Lucas 23:28-30.) Pues, parehanan casá tin cu tuma nan mes decision a base di circunstancianan personal i nan mes sintimentunan conciencial. Sea cual sea nan decision, nos no mag criticá parehanan casá.

22. Kico ta importante pa nos determiná?

²² Sí, “pa tur cos tin un tempu señalá, sí, un tempu pa tur asuntu bou di shelu.” Asta tin “un tempu pa guera i un tempu pa pas.” (Eclesiástes 3:1, 8) E siguiente artículo lo splica pakico ta importante pa nos determiná pa cua di nan dos ta e tempu awor.

Bo Por Splica?

◻ Pakico ta vital pa nos sa cu “pa tur cos tin un tempu señalá”?

◻ Pakico awe principalmente ta “un tempu pa yora”?

◻ Aunke cristiannan ta “yora,” pakico nan ta berdaderamente felis?

◻ Con algun cristian ta mustra cu nan ta mira e tempu actual como “un tempu pa keda leu for di abraso”?

[Plachinan na página 6, 7]

Aunke cristiannan ta “yora” debí n’e condicionnan di mundu . . .

. . . en realidad nan ta e hendenan di mas felis na mundu

[Plachi na página 8]

E ministerio di tempu completo ta un base excelente pa un matrimonio felis