“E Ta Duna Forsa na Esun Kansá”
1 Nos tur sa kansa de bes en kuando. Esaki por ta debí na trabou òf otro aktividat físiko, pero tambe e por ta debí na problemanan ku nos ta konfrontá den e “tempunan trabahoso” aki. (2 Tim. 3:1) Komo sirbidónan di Yehova, kon nos por haña e fortalesa spiritual nesesario pa evitá di baha man den nos ministerio? Nos por haña esaki ora nos ta dependé riba esun ku ta ‘grandi den forsa i poder,’ Yehova. (Isa. 40:26) E ta konsiente di nos nesesidatnan i e ta realmente interesá pa yuda nos.—1 Ped. 5:7.
2 Loke Yehova Ta Perkurá: Yehova ta fortalesé nos mediante su spiritu santu, e mesun forsa iresistibel ku el a usa pa krea universo. Pues si nos kansa, Dios su spiritu ta yuda nos ‘renobá nos forsa.’ (Isa. 40:31) Puntra bo mes: ‘Ki dia tabata e último biaha ku mi a resa pidi Dios spesífikamente p’e fortalesé mi ku su spiritu santu pa mi por kumpli ku mi obligashonnan kristian?’—Luk. 11:11-13.
3 Ora nos ta lesa i meditá riba Dios su Palabra inspirá diariamente i ta alimentá nos mes spiritualmente mediante estudio regular di nos publikashonnan kristian, nos lo ta manera un “palu” yen di bida, “plantá kantu di koridanan di awa, ku ta duna su fruta na su tempu, i [di kua su blachinan] no ta marchitá.”—Sal. 1:2, 3.
4 Yehova ta usa nos kompañeronan di fe tambe ku por ta un fuente di “enkurashamentu” pa nos. (Kol. 4:10, 11) Nan ta fortifiká nos na reunionnan di kongregashon ku nan kòmbersashon-, komentario- i diskursonan edifikante. (Echo. 15:32) Spesialmente ansianonan kristian ta duna yudansa spiritual i animashon refreskante.—Isa. 32:1, 2.
5 E Ministerio: Si bo ta sinti ku bo a kuminsá kansa, no stòp di prediká! Distinto di hopi otro aktividat, partisipashon regular den e ministerio realmente ta refreská nos. (Mat. 11:28-30) Ora nos ta prediká e bon nobo, e ta yuda nos enfoká riba e Reino di Dios i keda ku nos bista fihá riba eternidat i nos speransanan maravioso.
6 Tin hopi trabou pa hasi promé ku e mal sistema di kosnan aki ser destruí. Nos tin tur motibu pa para firme den nos sirbishi i dependé riba “e forsa ku Dios ta duna.” (1 Ped. 4:11) Ku yudansa di Yehova nos lo finalisá nos trabou pasobra “e ta duna forsa na esun kansá.”—Isa. 40:29.