Bo Ta Apoyá e Palabra di Dios?
1 Den un mundu ku hopi bes ta desakreditá Beibel, kristiannan berdadero ku entusiasmo ta defendé e Palabra di Dios. Konvensí ku “tur Skritura ta inspirá pa Dios,” nos ta uni nos mes ku Hesukristu kende a bisa den orashon na Yehova: “Bo palabra ta bèrdat.” (2 Tim. 3:16; Juan 17:17) Kon nos por apoyá e Palabra di Dios na un manera efikas?
2 Siña Tekstonan di Beibel: No tin duda ku Hesus a studia e Palabra di Dios diligentemente. Esaki a permitié usa e Skritura pa siña hende durante henter su ministerio. (Luk. 4:16-21; 24:44-46) Kon nos por akumulá un reserva di tekstonan di Beibel ku nos ta keda kòrda? Loke por yuda ku esei ta ora nos ta lesa Beibel tur dia i meditá riba un versíkulo ku nos a haña spesialmente animante òf útil pa usa den sirbishi. Ora nos ta prepará pa e reunionnan, nos mester buska i lesa e tekstonan menshoná direktamente for di Beibel i kisas prepará pa komentá riba nan. Ora nos asistí na e reunionnan, nos mester sigui e oradó den nos Beibel segun ku e ta lesa e tekstonan. Ora nos ta siña tekstonan di Beibel, esaki ta prepará nos pa “parti e palabra di bèrdat na un manera korekto.”—2 Tim. 2:15.
3 Laga Beibel Papia: Ora nos ta den sirbishi, nos mester laga Beibel papia. Por ehèmpel si sirkunstansianan permití, nos mester purba kompartí un teksto di Beibel ku e doño di kas. Si e hasi un pregunta òf bin ku un opheshon, ta mihó usa Beibel pa kontest’é. Ora e doño di kas ta okupá, nos por purba tòg di resaltá un pensamentu bíbliko dor di bisa: “Promé ku mi bai, permití mi kompartí e teksto di Beibel aki ku bo.” Ki ora ku ta posibel, lesa direktamente for di Beibel i permití e oyente sigui bo den Beibel segun ku bo ta lesa.
4 Ora un publikadó a mustra un doño di kas tekstonan di Beibel ku ta refutá e doktrina di Trinidat, el a bisa emoshoná: “Henter mi bida mi a bai misa, pero nunka mi tabata sa ku Beibel ta bisa asina!” Ku entusiasmo el a aseptá un estudio di Beibel. Hesus a bisa ku su karnénan lo tende su bos. (Juan 10:16, 27) E mihó manera pa personanan di kurason onrado rekonosé e bèrdat ta ora nan mir’é direktamente den Beibel. P’esei, laga nos apoyá Dios su Palabra ku ta kontené e bèrdat!