Dios Su Amor Ta Bisto den Amor di Mama

“Un muhé por lubidá su yu ku e ta kria na pechu, i no tene kompashon ku e yu di su mondongo? Esakinan por lubidá, ma ami sí lo no lubidá bo.”​—ISAIAS 49:15.

UN BEIBI resien nasí ta drumi kómodamente den brasa di su mama segun ku e mama ta aliment’é. Esei ta un esena ku ta reflehá ternura i amor. Un mama ku yama Pam a bisa: “Ora mi a tene mi beibi den mi brasa pa promé bes, mi a sinti un gran sensashon di amor i un sentido di responsabilidat pa ku e bida nobo aki.”

Fuera ku esaki ta parse algu opvio, investigashon a konfirmá ku amor di un mama tin influensia profundo riba desaroyo di su yu. Un dokumento, ku e Programa Riba Salú Mental di e Organisashon Mundial di Salú a publiká, ta bisa: “Estudionan a mustra ku yunan chikitu ku ta ser bandoná i separá for di nan mama ta bira infelis i deprimí, i tin biaha nan ta asta bira muchanan ku konstantemente tin miedu.” E mesun dokumento ta menshoná un estudio ku ta indiká ku muchanan ku risibí amor i atenshon for di nan infansia probablemente tin un grado di inteligensia muchu mas haltu ku muchanan ku ta ser neglishá.

Relashoná ku e importansia di amor di mama, Alan Schore, un profèser di sikiatria na e Fakultat di Medisina di e Universidat di California na Los Angeles, Merka, a bisa: “E mucha su promé relashon, esun ku su mama, ta sirbi komo un patronchi pasobra e ta determiná pa semper e persona su kapasidat di forma tur tipo di relashon emoshonal despues.”

Lamentablemente, depreshon, malesa i otro preshonnan por pone un mama neglishá su yu òf asta “lubidá su yu ku e ta kria na pechu.” (Isaias 49:15) Pero esei ta kasonan eksepshonal i no algu ku ta sosodé normalmente. De echo, ta parse ku mamanan ta programá pa stima nan yunan. Investigadónan a deskubrí ku durante parto, un mama tin un nivel haltu di un hormon ku yama oksitosina. Esaki ta stimulá kontrakshon di su matris i despues ta yuda e kurpa produsí lechi pa e beibi. Ademas, nan ta kere ku e mesun hormon ei—ku tantu hende hòmber komo hende muhé ta produsí—ta stimulá e mama pa aktua na un manera amoroso i inegoista pa ku su yu.

Kon Amor A Originá?

Hende ku ta promové e teoria di evolushon ta siña otronan ku amor inegoista—manera esun ku ta eksistí entre un mama i su yu—a surgi pa kasualidat i ku naturalesa a konserbá e abilidat di stima aki pasobra e ta benefisiá esnan ku praktik’é. Por ehèmpel, e revista on-line Mothering Magazine ta bisa: “E promé porshon di nos selebro ku a desaroyá riba esun ku nos a heredá for di rèptil ta e sistema límbiko, e sistema ku ta produsí emoshon. Debí n’e parti aki di nos selebro, mamanan i nan beibinan por tin un relashon estrecho ku otro.”

Ta sierto ku investigashon a revelá ku e sistema límbiko ta kontribuí na nos emoshonnan. Sin embargo, ta rasonabel pa pensa ku amor di un mama pa su yu ta e resultado di e kresementu pa kasualidat di selebro di rèptil?

Konsiderá e otro posibel splikashon. Beibel ta bisa ku hende a ser kreá den e imágen di Dios, esta, ku e abilidat di reflehá Dios su kualidatnan. (Génesis 1:27) Dios su kualidat prinsipal ta amor. Apòstel Juan a skirbi: “Esun ku no ta stima no konosé Dios.” Dikon? “Pasobra Dios ta amor.” (1 Juan 4:8) Por fabor, tuma nota ku Beibel no ta bisa ku Dios tin amor. Mas bien, e ta bisa ku Dios ta amor. E ta e Fuente di amor.

Beibel ta duna e deskripshon aki di amor: “Amor tin pasenshi, amor ta kariñoso i no ta yalurs; amor no ta gaba, i no ta arogante, e no ta komportá su mes indesente; e no ta buska su propio interes, e no ta wòrdu provoká, e no ta warda renkor, e no ta regosihá den inhustisia, ma ta regosihá den e bèrdat; tur kos e ta tapa, tur kos e ta kere, tur kos e ta spera, tur kos e ta soportá. Amor nunka no ta faya.” (1 Korintionan 13:​4-8) Ta rasonabel pa kere ku e kualidat di mas noble aki a originá pa puru kasualidat?

Ki Efekto Esaki Tin Riba Bo?

Ora bo a lesa e deskripshon di amor den e paragraf anterior, bo kurason no a anhelá di tin un persona ku ta mustra e klase di amor ei na bo? E deseo ei ta algu masha normal. Dikon? Pasobra nos ta “desendensia di Dios.” (Echonan 17:29) Nos a ser kreá pa risibí i ekspresá e klase di amor ei. I nos por ta sigur ku Dios tin un amor profundo pa nos. (Juan 3:16; 1 Pedro 5:6, 7) E teksto di Beibel sitá na prinsipio di e artíkulo aki ta indiká ku Dios su amor pa nos ta asta mas fuerte i mas duradero ku e amor di un mama pa su yu.

Pero, kisas bo ta puntra bo mes: ‘Si Dios ta un persona sabí, poderoso i amoroso, dikon e no ta kaba ku sufrimentu? Dikon e ta permití mucha muri, opreshon kontinuá i mal maneho i golosidat daña e tera?’ Esakinan ta bon pregunta ku meresé kontestanan rasonabel.

Maske kiko agnóstikonan bisa, hende por haña kontestanan satisfaktorio pa e preguntanan ei. Miónes di hende den sentenáres di pais a haña kontestanan asina dor di studia Beibel ku Testigunan di Yehova. E editornan di e revista aki ta animá bo pa hasi meskos. Segun ku bo konosementu di Dios ta oumentá mediante un estudio di su Palabra i su kreashon, lo bo ripará ku e no ta leu for di nos ni un persona ku nos no por siña konosé. Mas bien, probablemente lo bo keda konvensí ku Dios “no ta leu di kada un di nos.”​—Echonan 17:27.

[Komentario na página 8]

Dios su amor pa nos ta mas duradero ku e amor di un mama pa su yu