Bo Ta Corda?

Bo a pensa cuidadosamente riba edicionnan recien di E Toren di Vigilancia? Si ta asina, lo bo hañ’é interesante pa recordá lo siguiente:

◻ Con hopi pareha casá awe a sigui e excelente ehempel cu Akila i Prisila a laga?

Akila i Prisila a sirbi den vários diferente congregacion. Mescos cu nan, hopi cristian di tempu moderno a haci nan mes disponibel pa muda bai caminda e necesidad ta mas grandi. Tambe nan a experenciá e goso i satisfaccion cu ta bini dor di mira interesnan di Reino crece i di por cultivá amistadnan cristian precioso.—15/12, página 24.

◻ Cua ta e punto di bista bíblico di bebida alcohólico?

E punto di bista bíblico di bebida alcohólico ta balansá. Na un banda, Bijbel ta bisa cu biña ta un don for di Dios. (Salmo 104:1, 15) N’e otro banda, e ta condená bebementu di mas. (Lucas 21:34; 1 Timoteo 3:8; Tito 2:3; 1 Pedro 4:3)—15/12, página 27.

◻ Cua ta un rasgo significativo dje buki bíblico di Ageo?

Aunke e buki di Ageo ta consistí di solamente 38 versículo, Dios su nomber ta ser usá 35 biaha. Profecia asina ta falta vigor ora e nomber Jehova ta ser reemplasá dor dje título “Señor.”—1/1, página 6.

◻ Ki les nos por siña for dje picánan di David i Manases?

Apesar cu Jehova a pordoná David i Manases, e dos hombernan aki—i Israel huntu cu nan—tabatin cu biba cu e consecuencianan di nan actonan pecaminoso. (2 Samuel 12:11, 12; Jeremías 15:3-5) Di un manera similar, aunke awe Jehova ta pordoná pecadornan repentí, nan accionnan por tin consecuencianan cu no por ser evitá.—1/1, página 27.

◻ Den ki manera ‘e pianan di esnan cu ta declará e bon nobo’ dje Reino di Dios ta “bunita”? (Isaías 52:7)

Generalmente ta e pianan ta hiba un persona segun cu e ta sali bai predicá na otronan. Pianan asina realmente ta representá e persona. P’esei pa hopi hende cu ta tende e bon nobo dje Reino i ta respondé faborablemente na dje, e pianan dje mensaheronan ei ta en berdad un bunita bista.—15/1, página 13.

◻ Cua ta e trabou di dos aspecto cu ta enbolbí den “declará e bon nobo”? (1 Corintionan 9:16)

Promé, nos mester proclamá e bon nobo dje Reino. E di dos aspecto dje trabou aki ta enbolbé siña esnan cu ta respondé faborablemente n’e proclamacion di Reino.—15/1, página 23.

◻ Ki beneficionan personal tin den canta canticanan di Reino na reunionnan di congregacion?

Cantamentu ta duna nos e oportunidad pa expresá nos sintimentunan pa nos Creador. (Salmo 149:1, 3) Ora nos ta canta di henter nos curason den e congregacion, esei por pone nos den e estado mental i di curason corecto pa e programa cu ta sigui. Esei por incitá nos pa tene un participacion mas grandi den Jehova su adoracion.—1/2, página 28.

◻ Con asina e dia di morto ta mihó cu e dia cu un hende nace? (Eclesiástes 7:1)

E dia di morto por ta mihó cu e dia cu un hende nace si pa e tempu ei un persona a establecé un bon nomber cerca Jehova, kende por resucitá esnan fiel cu ta muri. (Juan 11:25)—15/2, página 12.

◻ Pakico e buki di Eclesiástes lo mester yuda nos personalmente?

E por yuda cada un di nos corigí nos concepto di bida i loke nos ta enfocá ariba. (Eclesiástes 7:2; 2 Timoteo 3:16, 17)—15/2, página 16.

◻ Testigonan di Jehova ta fundamentalista?

No. Aunke nan tin conviccionnan religioso firme, nan no ta fundamentalista den e sentido cu e término a bin ta ser usá. Nan no ta recurí na demostracionnan i violencia contra esnan cu ken nan no ta di acuerdo. Nan ta imitá nan Lider, Jesucristo.—1/3, página 6.

◻ E echo cu cristiannan no sa e tempu exacto di Jesus su binimentu pa ehecutá e vengansa di Dios tin ki efecto riba nan?

Esaki ta pone cu cristiannan ta keda alerto i ta duna nan e oportunidad tur dia pa proba cu nan ta sirbi Jehova cu motibunan inegoista.—1/3, página 13.

◻ Kico nos mester considerá promé cu tuma accion legal contra un ruman cu tal bes a estafá nos?

Nos mester considerá e posibel efectonan riba nos mes personalmente, riba otronan enbolbí, riba e congregacion i riba hende djafó. (1 Corintionan 6:7)—15/3, página 22.

◻ Con nos por obtené berdadero felicidad?

Berdadero felicidad ta un condicion di curason, basá riba fe genuino i un bon relacion cu Jehova. (Mateo 5:3)—15/3, página 23.

◻ Kico un cristian mester haci ora e ser yamá pa sirbi como miembro di hurado den corte?

Cada cristian cu hañ’é confrontá pa sirbi den hurado mester determiná ki curso pa sigui, basá riba su comprendimentu di Bijbel i su propio concenshi. (Galationan 6:5)—1/4, página 29.