Referensia pa Material i Tarea pa Reunion Nos Bida i Sirbishi Kristian
5-11 DI DESEMBER
TESORONAN DI E PALABRA DI DIOS | ISAÍAS 1-5
Buska Hoyanan Spiritual
(Isaías 1:18, NW) “Yehova ta bisa: ‘Awor bini, i laga nos rektifiká asuntu entre nos. Maske boso pikánan ta kòrá manera sanger, nan lo bira blanku manera sneu; maske nan ta manera tela kòrá bibu, nan lo bira blanku manera lana.’ ”
it-2-S 798 §3
Rekonsiliashon
Pasonan pa rekonsiliá ku Dios. Komo ku ta hende ta ofendé Dios i ta violá su leinan bes tras bes, ta hende mester rekonsiliá ku Dios i no Dios ku hende. (Sl 51:1-4) Hende no por ser kompará ku Dios. Ademas, Dios no ta ahustá, modifiká ni kambia su normanan hustu. (Isa 55:6-11; Mal 3:6; kompará ku Snt 1:17.) P’esei, Dios su kondishonnan pa hende rekonsiliá kuné no ta kambia bou di ningun sirkunstansia, i hende no mag di kuestioná nan ni desviá for di nan. (Kompará ku Yòb 40:1, 2, 6-8; Isa 40:13, 14.) Aunke den hopi tradukshon di Beibel Isaías 1:18 ta bisa: “Bin awor, i laga nos rasoná huntu, SEÑOR ta bisa” (Beibel Santu), un tradukshon mas apropiá i lógiko ta: “Yehova ta bisa: ‘Awor bini, i laga nos rektifiká asuntu entre nos.’ ” Sí, e echo ku hende no tin un bon relashon ku Dios ta hende su falta i no di Dios.—Kompará ku Eze 18:25, 29-32.
12-18 DI DESEMBER
TESORONAN DI E PALABRA DI DIOS | ISAÍAS 6-10
Buska Hoyanan Spiritual
it-1-S 1255
Isaías
Durante e tempu ku Isaías a sirbi komo profeta, spesialmente den e dianan di Rei Akas, Huda tabata den un estado moralmente deplorabel. Tantu e prensnan komo e pueblo tabata rebelde, i den bista di Yehova e nashon su kurason i mente tabata malu. E gobernantenan tabata ser yamá diktadornan “di Sódoma” i e habitantenan a ser kompará ku e “pueblo di Gomora.” (Isa 1:2-10) Yehova a bisa Isaías ku nan lo no a skuch’é, ku e situashon ei lo a sigui asina te ora ku e nashon lo a ser destruí i ku “un désimo,” òf “un simia santu,” so lo a keda manera un tronkon di un palu masha grandi. Isaías su trabou komo profeta siguramente a konsolá i fortalesé e grupo chikitu ei ku a keda, aunke e restu di e nashon a nenga di presta atenshon.—Isa 6:1-13.
Aunke Isaías a profetisá mas tantu tokante Huda, el a profetisá tambe tokante Israel i e nashonnan den serkania ku tabatin influensia riba e situashon i historia di Huda. El a sirbi komo profeta pa hopi aña, kuminsando rònt di aña 778 P.K. ora Rei Uzias a muri, òf kisas promé ku esei, te ku poko tempu despues di aña 732 P.K., den e di 14 aña di e reinado di Ezekías.—Isa 36:1, 2; 37:37, 38.
E Famia di Isaías. Isaías tabata kasá. Segun Isaías 8:3, su esposa tabata konosí komo “e profeta muhé,” loke kisas a nifiká ku e tabata mas ku djis e esposa di un profeta. Kasi sigur Yehova lo a us’é pa profetisá, meskos ku den kaso di Débora den tempu di e huesnan i di Hulda durante e reinado di Yosías.—Hue 4:4; 2Re 22:14.
Beibel ta menshoná dos yu hòmber di Isaías ku a sirbi komo “señalnan i maravianan den Israel.” (Isa 8:18) Sear-yasub tabatin sufisiente edat den e dianan di Rei Akas pa e por a kompañá su tata Isaías ora di entregá un mensahe na e rei akí. E nòmber Sear-yasub ta nifiká: “Un Simpel Restu (Esnan Ku A Keda) Lo Bolbe.” E nòmber akí tabata profétiko den sentido ku mes sigur ku un yu hòmber di Isaías a haña e nòmber ei, mes sigur e reino di Huda lo a ser destruí i solamente un restu lo a bolbe despues di keda un tempu den eksilio. (Isa 7:3; 10:20-23) E restu akí a bolbe na aña 537 P.K. ora Rei Siro di Persia a saka un dekreto ku a libra e israelitanan for di Babilonia despues ku nan tabata den eksilio pa 70 aña largu.—2Kr 36:22, 23; Èsd 1:1; 2:1, 2.
Un otro yu hòmber di Isaías a haña su nòmber promé ku el a ser konsebí. A skirbi e nòmber akí riba un tabla i vários testigu konfiabel a konfirmá esaki. Aparentemente nan a tene e asuntu akí sekreto te ora e bebi a nase. Na e momento ei, e testigunan por a duna testimonio i konfirmá ku Isaías a profetisá tokante e nasementu, revelando asina ku e nasementu akí tabatin un nifikashon profétiko. E nòmber ku Dios a manda Isaías duna e yu ta Maher-salal-hasbaz, ku ta nifiká “Hasi Lihé, o Botin!, òf Bai Lihé na e Botin, El A Bai Lihé pa Plùnder.” Isaías a profetisá ku promé ku e mucha por bisa “Mi tata” i “Mi mama,” e menasa ku Siria i e dies tribunan di Israel a plania kontra Huda lo a disparsé.—Isa 8:1-4.
E profesia a mustra ku pronto Huda lo a haña alivio. Esei a sosodé ora Asiria a kaba ku e kampaña di Rei Rezin di Siria i Rei Peka di Israel kontra Huda. E asirionan a kapturá Damasko i despues, na aña 740 P.K. nan a plùnder i destruí e Reino di Israel, kumpliendo asina ku e nifikashon di e nòmber profétiko di Isaías su yu. (2Re 16:5-9; 17:1-6) Sinembargo, en bes di konfia den Yehova, Rei Akas a rekurí na soborno pa haña protekshon di e rei di Asiria pa purba di kaba ku e menasa di Siria i di Israel. Pa e motibu ei, Yehova a permití Asiria bira un menasa grandi pa Huda i a permití nan drenta e tera i yega te na Herúsalèm, manera Isaías a profetisá.—Isa 7:17-20.
Hopi biaha, Isaías a papia di “señalnan” ku Yehova lo a duna relashoná ku su dos yu hòmbernan, i na un okashon relashoná kuné mes. Yehova a mand’é kana “sunú i pia abou” durante tres aña komo señal kontra Egipto i Etiopia, pa duna di komprondé ku e rei di Asiria lo a hiba nan prezu.—Isa 20:1-6; kompará ku Isa 7:11, 14; 19:20; 37:30; 38:7, 22; 55:13; 66:19.
Profesianan Tokante Eksilio i Restorashon. Isaías a profetisá tambe ku Asiria lo no tabata e nashon ku lo a kita e reinan di Huda for di trono i destruí Herúsalèm, ma ku Babilonia lo a hasi esaki. (Isa 39:6, 7) Ora Asiria a inundá Huda “te na garganta,” Isaías a konsolá Rei Ezekías ku e mensahe ku e ehérsitonan asirio lo no por drenta e stat. (Isa 8:7, 8) Yehova a kumpli ku su palabra i a manda un angel pa destruí 185.000 hòmber poderoso i e hefenan di e ehérsito asirio i asina a libra Herúsalèm.—2Kr 32:21.
Loke sin duda a duna Isaías mas goso tabata e privilegio ku Yehova a dun’é di papia i skirbi hopi profesia tokante e restorashon di su stat stimá, Herúsalèm. Aunke Yehova tabata bai permití e pueblo bai den eksilio na Babilonia debí na nan rebelion kontra dje, ku tempu lo el a husga Babilonia di a aktua ku astusia i di ke tene e pueblo di Dios katibu pa semper. Hopi di e profesianan di Isaías ta papia di e huisio di Dios kontra Babilonia i su desolashon pa semper.—Isa 45:1, 2; kap. 13, 14, 46-48.