No Tin Pas p’e Mensaheronan Falsu!
“Malechornan mes lo ser cortá . . . Pero e mansunan mes lo poseé e tera, i nan berdaderamente lo haña nan deleite exkisito den e abundancia di pas.”—SALMO 37:9, 11.
1. Pakico nos mester spera pa haña mensaheronan, tantu berdadero como falsu, den “e tempu di fin”?
MENSAHERONAN—falsu of berdadero? Tabatin ámbos clase den tempunan bíblico. Pero kico di nos dia? Na Daniel 12:9, 10, nos ta lesa cu un mensahero celestial a bisa e profeta di Dios: “E palabranan ta ser hací secreto i seyá te cu e tempu di fin. Hopi hende lo limpia nan mes i haci nan mes blancu i lo ser refiná. I e malbadonan siguramente lo actua di un manera malbado, i absolutamente ningun malbado lo comprendé; pero esnan cu tin perspicacia lo comprendé.” Nos ta bibando awor den e “tempu di fin” ei. Nos ta mira un distincion skerpi entre “e malbadonan” i “esnan cu tin perspicacia”? Sigur cu sí!
2. Con Isaías 57:20, 21 ta haña cumplimentu awe?
2 Na capítulo 57, versículo 20 i 21, nos ta lesa e palabranan di Dios su mensahero Isaías: “‘E malbadonan ta manera laman brutu, ora e no por calma, di cua su awanan ta sigui tira lima i lodo na laira. No tin pas,’ mi Dios a bisa, ‘p’e malbadonan.’” Ki apropiadamente e palabranan aki ta describí e mundu aki segun cu e ta acercá siglo 21! Algun hende asta ta puntra, ‘Nos lo alcansá e siglo ei un dia?’ Kico mensaheronan cu tin perspicacia tin di bisa nos?
3. (a) Ki contraste ta ser hací na 1 Juan 5:19? (b) Con “esnan cu tin perspicacia” ta ser describí den Revelacion capítulo 7?
3 Dios a inspirá apostel Juan cu perspicacia. Promé Juan 5:19 ta declará: “Nos sa cu nos ta originá cu Dios, pero henter e mundu ta drumí den poder dje malbado.” Na contraste cu e mundu aki tin e 144.000 israelitanan spiritual, di cua un resto cu ta birando bieu ainda ta riba tera. Uniendo cu esakinan awe tin “un multitud grandi . . . di tur nacion i tribu i pueblo i lenga,” cu awor ta mas cu cincu miyon na cantidad cu tambe tin perspicacia. “Esakinan ta esnan cu ta sali for dje tribulacion grandi.” I pakico nan ta ser recompensá? Pasobra nan tambe “a laba nan pañanan largu i a haci nan blancu den e sanger dje Lamchi” eherciendo fe den Jesus su rescate. Como mensaheronan di lus, nan tambe “ta rindiendo sirbishi sagrado na [Dios] di dia i anochi.”—Revelacion 7:4, 9, 14, 15.
E Asina Yamá Mensaheronan di Pas
4. (a) Pakico e asina yamá mensaheronan di pas den e mundu di Satanas ta destiná pa fracasá? (b) Con Efesionan 4:18, 19 ta aplicá awe?
4 Sin embargo, kico dje asina yamá mensaheronan di pas den e sistema mundano di Satanas? Na Isaías capítulo 33, versículo 7, nos ta lesa: “Mira! Nan héroenan mes a sclama den e caya; e mensaheronan mes di pas lo yora amargamente.” Ki cierto esaki ta di esnan cu ta na careda pariba pabou di un capital dje mundu pa otro, tratando pa trece pas! Ki inútil! Con asina? Pasobra nan ta atacá e síntomanan dje enfermedadnan dje mundu en bes di trata cu e causanan fundamental. Na promé lugá, nan ta ciegu p’e existencia di Satanas, kende apostel Pablo ta describí como “e dios dje sistema di cosnan aki.” (2 Corintionan 4:4) Satanas a sembra simianan di maldad entre humanidad, cu e resultado cu e mayoria, incluyendo hopi dje gobernantenan, awor ta cuadra cu e descripcion di Efesionan 4:18, 19: “Nan ta den scuridad mentalmente, i alehá for dje bida cu ta pertenecé na Dios, pa causa dje ignorancia cu ta den nan, pa causa dje insensibilidad di nan curason. Ya cu nan a yega di ta mas ayá di tur sentido moral, nan a entregá nan mes na libertinahe pa obra tur clase di impuresa cu golosidad.”
5. (a) Pakico organisacionnan humano ta fracasá como hacidónan di pas? (b) Ki mensahe consolador Salmo 37 ta transmití?
5 Ningun organisacion di hende imperfecto por eliminá for di curason humano e golosidad, e egoismo i e odio cu ta asina prevalente awe. Solamente nos Creador, e Señor Soberano Jehova, por haci esei! Ademas, ta solamente e mansunan, un minoria entre humanidad, cu ta dispuesto pa someté nan mes na su guia. Nos por mira e contraste dje resultadonan pa esakinan i p’e malbadonan dje mundu na Salmo 37:9-11: “Malechornan mes lo ser cortá, pero esnan cu ta spera den Jehova ta esnan cu lo poseé e tera. I solamente un poco tempu mas, i e malbado lo no t’ei mas . . . Pero e mansunan mes lo poseé e tera, i nan berdaderamente lo haña nan deleite exkisito den e abundancia di pas.”
6, 7. Ki registro dje religionnan di mundu ta mustra cu nan no a sirbi como mensaheronan di pas?
6 Mensaheronan di pas por ser hañá, anto, entre e religionnan dje mundu enfermo aki? Wel, kico ta e registro di religion te cu awor aki? Historia ta mustra cu religion a participá den, sí, asta tabata e instigador di hopi dje dramamentu di sanger atrabes dje siglonan. Por ehempel, Christian Century dje siman di 30 di augustus, 1995, dunando informe dje agitacion na ex-Yugoslavia, a declará: “Na Bosnia, controlá dor dje serbionan, pastornan ta sinta den e promé rij dje parlamento cu nan mes a designá, i tambe ta den e promé liñanan di bataya, unda unidadnan militar i asta armanan ta ser bendicioná promé cu bataya cuminsá.”
7 Un siglo di trabou di misionero di cristiandad na Africa no a duna mihó resultado, manera a keda bon ilustrá na Ruanda, un pais di cua supuestamente 80 porciento dje poblacion ta católico. The New York Times di 7 di juli, 1995, a informá: “Golias, un revista católico laico cu un orientacion liberal, publicá na Lyons [Francia], tin planeá pa identificá 27 pastor ruandes i cuater soeur mas cu e [revista] ta bisa a mata of a animá e matansanan na Ruanda aña pasá.” Derechonan Africano, un organisacion di derechonan humano na Londen, tabatin e comentario aki: “Ademas di mester duna cuenta pa nan kedamentu ketu, e iglesianan mester duna cuenta tambe p’e participacion activo di algun di su sacerdotenan, pastornan i soeurnan den e genocidio.” Esaki ta parecido n’e situacion den Israel ora Jehova su mensahero berdadero Jeremías a describí e “bergwensa” di Israel, huntu cu su gobernantenan, su sacerdotenan i su profetanan, agregando: “Den bo sayanan a ser hañá e marcanan di sanger dje almanan dje pobernan inocente.”—Jeremías 2:26, 34.
8. Pakico nos por bisa cu Jeremías tabata un mensahero di pas?
8 Hopi bes Jeremías a ser yamá un profeta di catástrofe, pero e por ser yamá tambe Dios su mensahero di pas. El a referí na pas mes tantu biaha cu Isaías a haci promé cuné. Jehova a usa Jeremías pa pronunciá huicio riba Jerusalem, bisando: “E stad aki, for dje dia cu nan a construyé, te cu e dia djawe, a resultá di ta nada mas cu un causa di rabia den mi i un causa di furia den mi, pa mi kit’é for di dilanti mi cara, pa motibu di tur e maldad dje yunan di Israel i dje yunan di Huda cu nan a haci pa ofendé mi, nan, nan reynan, nan prinsnan, nan sacerdotenan i nan profetanan, i e hombernan di Huda i e habitantenan di Jerusalem.” (Jeremías 32:31, 32) Esaki a prefigurá Jehova su huicio riba gobernantenan i clero den cristiandad awe. Pa berdadero pas por prevalecé, e instigadónan aki di maldad i violencia tin cu ser eliminá! Siguramente nan no ta mensaheronan di pas.
Nacionnan Uní Como Hacidó di Pas?
9. Con Nacionnan Uní a pretendé di ta un mensahero di pas?
9 Nacionnan Uní lo no por bira un berdadero mensahero di pas? Al fin i al cabo, e preámbulo di su statuto, proponé na juni 1945, solamente 41 dia promé cu e bom atómico a destruí Hiroshima, a declará su propósito: “pa salba e próximo generacionnan for dje plaga di guera.” E 50 prospecto miembronan di Nacionnan Uní tur mester a “uni [nan] forsa pa mantené pas i siguridad internacional.” Awe Nacionnan Uní tin 185 nacion miembro, tur supuestamente dedicá n’e mésun causa.
10, 11. (a) Con lidernan religioso a expresá nan apoyo na Nacionnan Uní? (b) Den ki manera papanan a malrepresentá “e Bon Nobo dje Reino di Dios”?
10 Atrabes di añanan, Nacionnan Uní a ser aclamá na bos haltu, specialmente dor di lidernan religioso. Dia 11 di april, 1963, Papa Juan XXIII a firma su encíclica titulá “Pacem in Terris” (Pas Riba Tera) den cua el a declará: “Ta nos deseo sincero p’e organisacion di Nacionnan Uní—den su structura i den su recursonan—por bira cada bes mas capas pa manehá e magnitud i noblesa di su tareanan.” Mas despues, na juni 1965, lidernan religioso, cu supuestamente a representá mitar dje poblacion di mundu, a celebrá na San Francisco e di 20 aniversario di Nacionnan Uní. Tambe na 1965, Papa Pablo VI, durante un bishita na Nacionnan Uní, a describié como “e último speransa pa armonia i pas.” Na 1986, Papa Juan Pablo II a cooperá pa promové Nacionnan Uní su Aña Internacional di Pas.
11 Atrobe, durante su bishita na october 1995, e papa a declará: “Awe nos ta celebrando e Bon Nobo dje Reino di Dios.” Pero e papa ta realmente Dios su mensahero dje bon nobo di Reino? Papiando dje problemanan di mundu, el a sigui bisa: “Segun cu nos ta enfrentá e enorme desafionan aki, con nos por keda sin reconocé e papel dje Organisacion di Nacionnan Uní?” En bes di e Reino di Dios, papa a scoge Nacionnan Uní.
Motibunan pa “Yora Amargamente”
12, 13. (a) Con Nacionnan Uní a actua den e manera cu Jeremías 6:14 ta describí? (b) Pakico liderato di Nacionnan Uní ta incluí den e descripcion na Isaías 33:7?
12 E celebracion di e di 50 aniversario di Nacionnan Uní no a revelá ningun berdadero prospecto pa “pas riba tera.” Un escritor a indicá un motibu den e corant The Toronto Star di Cánada, skirbiendo: “Nacionnan Uní ta un leon sin djente, cu ta gruña ora e ser confrontá cu barbaridad humano, pero e tin cu spera pa su miembronan hinca su plancha di djente promé cu e por morde.” Demasiado biaha e mordé ei tabata muchu chikitu i muchu lat. E mensaheronan di pas den e sistema actual dje mundu, i specialmente esnan den cristiandad, ta resonando e palabranan di Jeremías 6:14: “Nan ta trata na sana e kebranto di mi pueblo levemente, bisando, ‘Tin pas! Tin pas!’ ora no tin pas.”
13 Secretarionan-general di Nacionnan Uní un tras di otro a traha duru, i sin duda, sinceramente, pa haci Nacionnan Uní logra. Pero e conflicto constante entre e 185 miembronan, cu nan hopi diferente metanan tocante con pa limitá guera, pa formulá política i pa manehá finansa, a obstaculisá prospectonan di éxito. Den su informe anual pa 1995, e secretario-general dje tempu ei a skirbi cu e ‘fantasma disminuyente di un cataclismo nuclear global’ lo habri e caminda pa “nacionnan traha huntu den direccion di progreso económico i social pa henter humanidad.” Pero el a agregá: “Lamentablemente, e registro di asuntunan di mundu durante e último par di añanan a desmentí pa gran parti e expectativanan optimista ei.” Berdaderamente, e presunto mensaheronan di pas ta ‘yorando amargamente.’
14. (a) Pakico por bisa cu Nacionnan Uní ta tantu financieramente como moralmente bankrut? (b) Con Jeremías 8:15 ta ser cumplí?
14 Un titular den The Orange County Register di California ta bisa: “Nacionnan Uní Ta Financieramente i Moralmente Bankrut.” E artículo a declará cu entre 1945 i 1990, tabatin mas cu 80 guera, exigiendo bida di mas cu 30 miyon hende. E artículo a cita un escritor dje edicion di october 1995 di Reader’s Digest kende “ta describí e operacionnan militar di Nacionnan Uní como caracterisá pa nan ‘comandantenan incompetente, soldatnan indisipliná, aliansa cu agresornan, fracaso pa prevení atrocidadnan i algun bes asta contribuyendo n’e horor.’ Ademas, ‘e grado di malgastamentu, fraude i abusu ta aplastante.’” Den un seccion titulá “Nacionnan Uní 50 Aña Bieu,” The New York Times tabatin e titular “Mal Maneho i Malgastamentu Ta Caba cu e Mihó Intencionnan di Nacionnan Uní.” The Times di Londen, Inglatera, a encabesá un artículo cu e palabranan, “Frágil na Edad di Cincuenta—Nacionnan Uní mester di un programa di ehercisio p’e haña su condicion bek.” De echo, ta manera nos ta lesa na Jeremías capítulo 8, versículo 15: “Tabatin un speramentu pa pas, pero nada bon no a bini; pa un tempu di curacion, pero, mira! teror!” I e menasa di un holocausto nuclear ainda ta cologá riba humanidad. Claramente, Nacionnan Uní no ta e mensahero di pas cu humanidad tin mester.
15. Con Babilonia di antigwedad i su desendiente religioso a resultá di ta destructivo i a la bes ta haci hende sùf?
15 Unda tur esaki lo hiba? Jehova su Palabra profético no ta laga duda. Na promé lugá, kico ta spera e religionnan falsu di mundu cu asina frecuentemente tabatin lasonan masha amical cu Nacionnan Uní? Nan ta desendiente di un solo fuente idólatra, Babilonia di antigwedad. Apropiadamente, nan ta ser describí na Revelacion 17:5 como “Babilonia e Grandi, mama dje muhernan di mala bida i dje cosnan repugnante dje tera.” Jeremías a describí e catástrofe dje conglomeracion hipócrita aki. Manera un muher di mala bida, nan a seducí e políticonan dje tera, a labia Nacionnan Uní i a forma relacionnan ilícito cu su podernan político cu ta miembro. Nan tabata participantenan principal den e gueranan di historia. Un comentarista a declará relacioná cu guera religioso na India: “Karl Marx a referí na religion como e opio dje masanan. Pero e declaracion ei no por ta masha corecto pasobra opio ta un droga cu ta deprimí, e ta haci hende sùf. No, religion ta mas manera ‘crack’ di cocaina. E ta desencadená violencia tremendo i ta un forsa masha destructivo.” E escritor ei tampoco no ta masha corecto. Religion falsu ta haci hende sùf i a la bes ta destructivo.
16. Pakico hende di curason onrado mester hui awor for di Babilonia e Grandi? (Mira tambe Revelacion 18:4, 5.)
16 Kico, anto, hende di curason onrado mester haci? E mensahero di Dios, Jeremías, ta duna nos e contesta: “Hui for di meimei di Babilonia, i laga cada ken percurá escape pa su propio alma. . . . Pasobra ta tempu di vengansa cu ta pertenecé na Jehova.” Nos ta contentu cu miyones di hende a hui for dje cautiverio di Babilonia e Grandi, e imperio mundial di religion falsu. Abo ta un di esakinan? Anto bo por comprendé bon con Babilonia e Grandi a afectá e nacionnan dje tera: “For di su biña e nacionnan a bebe. Ta p’esei e nacionnan ta sigui actua manera loco.”—Jeremías 51:6, 7.
17. Ki huicio ta cla pa ser ehecutá riba Babilonia e Grandi, i kico ta bini despues dje accion ei?
17 Dentro di poco, Jehova lo maniobrá e miembronan ‘enlokesí’ di Nacionnan Uní pa atacá religion falsu, manera Revelacion 17:16 ta describí: “Esakinan lo odia e muher di mala bida i lo hacié desolá i sunú, i lo come su carni i lo kim’é completamente cu candela.” Esaki lo marca e comienso dje tribulacion grandi na cua Mateo 24:21 ta referí i cu lo culminá na Armagedon, e guera dje gran dia di Dios e Todopoderoso. Mescos cu Babilonia di antigwedad, Babilonia e Grandi lo ricibí e huicio pronunciá na Jeremías 51:13, 25: “‘O muher cu ta biba riba hopi awa, abundante den tesoronan, bo fin a yega, e midí di bo actividad lucrativo. Aki mi ta contra bo, O ceru ruinoso,’ ta e expresion di Jehova, ‘abo ruinadó di henter e tera; i lo mi extendé mi man contra bo i lorá bo for dje barancanan skerpi i haci di bo un ceru kimá.’” Nacionnan corupto i instigadó di guera lo sigui religion falsu den destruccion ora e dia di vengansa di Jehova ta bini riba nan tambe.
18. Na ki tempu i den ki manera Isaías 48:22 mester cumpli ainda?
18 Promé Tesalonicensenan 5:3 ta bisa dje malbadonan: “Ki ora cu nan ta bisando: ‘Pas i siguridad!’ e ora ei destruccion repentino lo bini riba nan instantáneamente mescos cu e dolor di angustia riba un muher na estado; i nan lo no scapa di ningun manera.” Esakinan ta esnan di ken Isaías a bisa: “Mira! . . . Mensaheronan mes di pas lo yora amargamente.” (Isaías 33:7) En berdad, manera nos ta lesa na Isaías 48:22, “‘no tin pas,’ Jehova a bisa, ‘p’e malbadonan.’” Pero ki futuro ta spera e mensaheronan berdadero di pas divino? Nos siguiente artículo lo duna nos e contesta.
Preguntanan di Repaso
◻ Cu ki palabranan fuerte profetanan di Dios a desenmascará mensaheronan falsu?
◻ Pakico organisacionnan humano a fracasá den nan intento pa trece pas duradero?
◻ Con mensaheronan berdadero di pas ta para na contraste cu apoyadornan di Nacionnan Uní
◻ Kico e mansunan tin cu haci afin di haña deleite den Jehova su promesa di pas?
[Plachinan na página 15]
Tantu Isaías, Jeremías i Daniel a profetisá dje fracaso di simpel esfuerso humano pa trece pas
[Plachi na página 16]
“Henter e mundu ta drumí den poder dje malbado.”—Apostel Juan
[Plachi na página 17]
“Nan ta den scuridad mentalmente.”—Apostel Pablo