Berdadero Pas—Di Ki Fuente?

“[Jehova] ta haciendo gueranan stop te n’e extremidad dje tera.”—SALMO 46:9.

1. Ki promesa maraviyoso di pas nos ta haña den e profecia di Isaías?

“E TRABOU di berdadero husticia mester bira pas; i e sirbishi di berdadero husticia, trankilidad i siguridad te na tempu indefiní. I mi pueblo tin cu biba den un lugá di habitacion pacífico i den residencianan di pleno confiansa i den lugánan di descanso sin disturbio.” (Isaías 32:17, 18) Ki un bunita promesa! Esei ta un promesa di berdadero pas cu Dios ta realisá.

2, 3. Describí berdadero pas.

² Sin embargo, kico ta berdadero pas? E ta simplemente ausencia di guera? Of e ta meramente un periodo durante cua nacionnan ta prepará p’e siguiente guera? Berdadero pas ta djis un soño? Eseinan ta preguntanan riba cua nos mester haña contestanan confiabel. Na promé lugá, berdadero pas ta muchu mas cu un soño. E pas cu Dios a primintí ta bai muchu mas ayá cu cualkier cos cu e mundu aki por imaginá. (Isaías 64:4) E no ta un pas pa un par di aña of un par di década so. E ta dura pa semper! I e no ta un pas djis pa un grupito privilegiá—e ta incluí shelu i tera, angel i hende. E ta extendé na hende di tur nacion, grupo étnico, idioma i color. E no conocé frontera, ni barera, ni fracaso.—Salmo 72:7, 8; Isaías 48:18.

³ Berdadero pas ta nificá pas tur dia. E ta nificá cu bo ta lanta tur mainta sin pensa riba guera, sin tin cu preocupá tocante bo futuro, futuro di bo yunan, ni sikiera futuro di bo nietunan. E ta nificá pas mental completo. (Colosensenan 3:15) E ta nificá cu lo no tin crímen mas, ni violencia, ni famianan dividí, ni hende desampará, ni hende sufriendo di hamber of muriendo di friu, ni desesperacion ni frustracion mas. Mihó ainda, e pas di Dios ta nificá un mundu sin enfermedad, dolor, tristesa of morto. (Revelacion 21:4) Ki un magnífico speransa nos tin di por disfrutá di berdadero pas pa semper! Esaki no ta e clase di pas i felicidad cu nos tur ta anhelá p’e? Esaki no ta e clase di pas cu nos mester pidi den oracion i traha p’e?

Hende Su Esfuersonan Fracasá

4. Ki esfuersonan pa logra pas e nacionnan a haci, i cu ki resultado?

⁴ Pa siglonan, hende i nacionnan a papia tocante pas, a debatí riba pas, a firma cientos di tratado di pas. I kico tabata e resultado? Den e último 80 añanan, prácticamente nunca tabatin un momento ora un of otro nacion of grupo no tabata den guera contra otro. Claramente, pas a evadí humanidad. Pues e pregunta ta, Pakico tur esfuerso di hende pa establecé pas internacional a fracasá, i pakico hende ta incapas pa producí berdadero pas cu lo dura?

5. Pakico hende su esfuersonan pa logra pas a faya consistentemente?

⁵ E contesta simpel ta cu humanidad no a acudí n’e fuente corecto pa berdadero pas. Bou dje influencia di Satanas e Diabel, hende a crea organisacionnan cu a bira víctima di nan propio debilidad i bicionan—nan golosidad i ambicion, nan sed pa poder i prominencia. Nan a acudí na institucionnan universitario i a establecé organisacionnan cu ta ocupá nan mes cu investigacionnan interdisiplinario, cu solamente a inventá mas formanan di opresion i destruccion. Na ki fuente hende a ser dirigí? Na unda nan a acudí?

6, 7. (a) Ki registro e Liga di Nacionnan a traha pa su mes? (b) Kico ta e registro di Nacionnan Uní?

⁶ Aya na 1919 e nacionnan a pone nan confiansa den e Liga di Nacionnan pa establecé pas permanente. E speransa ei a ser desbaratá ora Mussolini a invadí Etiopia na 1935 i ora guera civil a cuminsá na Spaña na 1936. E Liga a pasa pa olvido ora Guera Mundial II a cuminsá na 1939. E asina yamá pas no a dura ni 20 aña.

⁷ Kico di Nacionnan Uní? El a duna cualkier berdadero speransa di pas duradero rond mundu? Apénas. Mas cu 150 guera i conflicto armá a ser bringá desde cu el a ser fundá na 1945! Nada straño cu Gwynne Dyer, un specialista canades riba tereno di guera i su orígennan, a describí Nacionnan Uní como “un asociacion di yagdor ilegal cu a bira cuidador di animal, no un asamblea di santunan,” i “un comision di papia hopi, pero considerablemente impotente.”—Compará cu Jeremías 6:14; 8:15.

8. Apesar di nan papiamentu tocante pas, kico e nacionnan a bin ta haci? (Isaías 59:8)

⁸ Apesar di nan papiamentu tocante pas, e nacionnan ta sigui inventá i producí arma. E paisnan cu ta patrociná conferencianan di pas hopi biaha ta e mésun paisnan cu ta hiba delantera den e produccion di arma. Interesnan comercial poderoso den e paisnan aki ta promové e produccion di armanan mortífero, incluyendo minanan di tera diabólico cu tur aña ta mata of manca rond di 26.000 adulto civil i mucha. Golosidad i corupcion ta e forsanan motivador. Soborno i restitucion di placa bou di mesa ta un parti integral dje negoshi internacional di arma. Algun político ta enrikesé nan mes dje fuente aki.

9, 10. Kico expertonan di mundu a remarcá relacioná cu guera i esfuersonan humano?

⁹ Na december 1995, e físico polaco i ganador dje Premio Nobel di Pas, Joseph Rotblat, a apelá n’e nacionnan pa caba cu e careda di armamentu. El a bisa: “E único manera pa prevení [un careda di armamentu nobo] ta di abolí guera totalmente.” Bo ta kere cu esaki tin chens di tuma lugá? For di 1928 padilanti, 62 nacion a ratificá e Pacto di Kellogg-Briand, renunciando guera como un medio pa resolvé desacuerdonan. Guera Mundial II a demostrá claramente cu e pacto no tabata bal e papel riba cua el a ser skirbí.

¹⁰ Innegablemente, guera tabata un strobansa constante riba e curso di historia di humanidad. Manera Gwynne Dyer a skirbi, “guera ta un institucion central den civilisacion humano, i e ta mes bieu cu humanidad.” Sí, prácticamente tur civilisacion i imperio tabatin su héroenan militar venerá, su ehércitonan permanente, su batayanan famoso, su academianan militar considerá como santísimo, i su depósito di armanan. Sin embargo, nos siglo a ser caracterisá pa guera mas cu cualkier otro siglo, tantu den forsa di destruccion i den pérdida di bida.

11. Ki factor básico lidernan di mundu a pasa por haltu di dje den nan búskeda pa pas?

¹¹ Ta obvio cu e lidernan di mundu a ignorá e sabiduria básico di Jeremías 10:23: “Mi sa masha bon, O Jehova, cu na hende terenal no ta pertenecé su caminda. No ta pertenecé na hende cu ta canando pa ni sikiera dirigí su paso.” Si hende ignorá Dios, no por tin berdadero pas. Tur esaki ta nificá anto cu guera ta inevitabel den un sociedad civilisá? Esei ta nificá cu pas—berdadero pas—ta un soño imposibel?

Yegando n’e Causa Básico

12, 13. (a) Kico Bijbel ta revelá pa loke ta e causa básico i invisibel di guera? (b) Con Satanas a kita e atencion di humanidad for dje berdadero solucion p’e problemanan di mundu?

¹² Pa contestá e preguntanan ei, nos tin cu comprendé e causanan di guera. Bijbel ta bisa claramente cu e angel rebelde, Satanas, ta e “matador” i “gañador” original i cu “henter e mundu ta drumí den poder dje malbado.” (Juan 8:44; 1 Juan 5:19) Kico el a haci pa promové su mañanan? Nos ta lesa na 2 Corintionan 4:3, 4: “Awor, si e bon nobo cu nos ta declará en realidad ta tapá, e ta tapá entre esnan cu ta pereciendo, entre ken e dios dje sistema di cosnan aki a ciega mente dje incrédulonan, p’e iluminacion dje glorioso bon nobo tocante Cristo, cu ta e imágen di Dios, no yega na nan.” Satanas ta haci tur loke ta posibel pa alehá e atencion di humanidad for dje Reino di Dios como e solucion pa problemanan dje mundu. E ta ciega i ta desviá hende cu cuestionnan social, político i religioso cu ta causa division, di manera cu esakinan ta parce di ta mas importante cu e gobernacion di Dios. E ola mundial recien di nacionalismo ta un ehempel di esaki.

¹³ Satanas e Diabel ta promové nacionalismo i tribalismo, e creencia den e superioridad di un nacion, rasa of tribu riba otro. Odio cu rais profundo cu a ser reprimí pa siglonan ta ser rebibá pa instigá mas guera i conflicto. Federico Mayor, directorgeneral di UNESCO, a spierta contra e tendencia aki: “Asta caminda tolerancia tabata algu prevalente, ta birando mas evidente cu hende ta inclinando na xenofobia [miedu di stranhero], i expresionnan shovinista of racista cu a parce di ta un cos di pasado ta ser tendé cu mas i mas frecuencia.” Kico tabata e resultado? E masacrenan horibel na ex-Yugoslavia i e matansa sangriento entre tribunan na Ruanda ta solamente dos dje desaroyonan ei cu a bira titularnan di noticia.

14. Con Revelacion 6:4 ta describí guera i su efecto den nos tempu?

¹⁴ Bijbel a predicí cu den e tempu di fin dje sistema aki, un cabai color di candela, simbolisando guera, lo galopiá atrabes dje tera. Nos ta lesa na Revelacion 6:4: “Un otro a sali, un cabai color di candela; i na esun sintá ariba dje a ser duná di kita pas for dje tera pa nan mata otro; i un spada grandi a ser duná na dje.” Desde 1914 nos a mira e ginete simbólico aki “kita pas,” i e nacionnan a sigui bringa i haci guera.

15, 16. (a) Kico tabata e papel di religion den guera i matansanan? (b) Con Jehova ta considerá loke religionnan a haci?

¹⁵ Loke no mester pasa por haltu ta e papel di religion den e guera i matansanan aki. E historia sangriento di humanidad por ser atribuí principalmente n’e mal influencia di religion falsu. E teólogo católico, Hans Küng, a skirbi: “No tin discusion cu [religionnan] tabatin i te ainda tin un enorme influencia negativo i destructivo riba humanidad. Nan en berdad ta responsabel pa hopi contencion, conflicto sangriento i, en berdad, ‘gueranan religioso’; . . . i esaki ta conta tambe p’e dos gueranan mundial.”

¹⁶ Con Jehova Dios ta mira e papel di religion falsu den e matansanan i gueranan? Dios su denuncia contra religion falsu, registrá na Revelacion 18:5, ta declará: “Su picánan a montoná huntu te na shelu, i Dios a corda su actonan di inhusticia.” E complicidad di religion falsu cu e gobernantenan político dje mundu a resultá den un culpa di sanger asina grandi, un masa di picánan acumulá asina grandi, cu ta imposibel pa Dios ignorá nan. Pronto lo e eliminá completamente e strobansa aki den e proceso pa trece berdadero pas.—Revelacion 18:21.

E Caminda pa Pas

17, 18. (a) Pakico no ta simplemente un soño irealístico pa kere cu pas eterno ta posibel? (b) Kico Jehova a haci caba pa garantisá cu berdadero pas lo bini?

¹⁷ Si hende, mediante agencianan manera Nacionnan Uní, no por producí pas berdadero i duradero, for di ki fuente berdadero pas lo bini, i con? Ta djis un soño irealístico pa kere cu pas eterno ta posibel? No si nos acudí n’e fuente corecto di pas. I ken esei ta? Salmo 46:9 ta contestá bisando nos cu Jehova “ta haciendo gueranan stop te n’e extremidad dje tera. E ta kibra e arco i ta corta e lansa na pida-pida; e garoshinan e ta kima den candela.” I Jehova a cuminsá caba cu e proceso pa pone fin na guera i establecé berdadero pas. Con? Dor di instalá Cristo Jesus riba su trono di Reino legítimo na 1914 i dor di promové e mayor campaña educacional pa pas den e historia di humanidad. E palabranan profético di Isaías 54:13 ta sigurá nos: “Tur bo yunan lo ta personanan siñá pa Jehova, i e pas di bo yunan lo ta abundante.”

¹⁸ E profecia aki ta ilustrá e principio di causa i efecto—esta, tur efecto tin su causa. Den e caso aki, Jehova su siñansa—e causa—ta transformá hende cu ta gusta bringa den stimadornan di pas cu ta na pas cu Dios. E efecto ta e cambio di curason cu ta haci hende stimadornan di pas. E siñansa aki cu ta cambia curason i mente di hende ta plamando rond mundu asta awor segun cu miyones di hende ta sigui e ehempel dje “Prins di Pas,” Jesucristo.—Isaías 9:6.

19. Kico Jesus a siña tocante berdadero pas?

¹⁹ I kico Jesus a siña tocante berdadero pas? El a papia no solamente tocante pas entre nacionnan sino di pas entre hende den nan relacion cu otro i dje pas interior cu ta resultá for di un bon concenshi. Na Juan 14:27, nos ta lesa Jesus su palabranan na su siguidornan: “Mi ta laga pas cu boso, mi ta duna boso mi pas. Mi no ta dun’é na boso e manera cu mundu ta dun’é. No laga boso curason keda molestiá ni no lagu’e krimp di miedu.” Den ki manera Jesus su pas tabata diferente for di esun dje mundu?

20. Pa medio di kico Jesus lo trece berdadero pas?

²⁰ Na promé lugá, Jesus su pas tabata estrechamente ligá cu su mensahe di Reino. E tabata sa cu e gobiernu celestial hustu, consistiendo di Jesus i 144.000 co-gobernante, lo pone un fin na guera i instigadornan di guera. (Revelacion 14:1, 3) E tabata sa cu lo e producí e condicionnan paradísico pacífico cu el a ofrecé n’e malechor cu a muri banda di dje. Jesus no a ofrec’é un lugá den e Reino celestial, pero el a bisa: “Di berdad mi ta bisá bo awe, Lo bo ta cu mi den Paradijs.”—Lucas 23:43.

21, 22. (a) Ki speransa maraviyosamente sostenedor berdadero pas ta contené? (b) Kico nos tin cu haci pa ta testigo dje bendicion ei?

²¹ Jesus tabata sa tambe cu su Reino lo trece consuelo pa tur esnan cu ta na luto cu ta ehercé fe den dje. Su pas ta incluí e maraviyoso speransa sostenedor di resureccion. Corda su palabranan animador cu nos ta haña na Juan 5:28, 29: “No straña boso riba esaki, pasobra e ora ta bini den cua tur esnan cu ta den e grafnan conmemorativo lo tende su bos i lo sali, esnan cu a haci bon cosnan pa un resureccion di bida, esnan cu a practicá cosnan baho pa un resureccion di huicio.”

²² Bo ta anhelá e tempu ei? Bo a perde stimánan den morto? Bo ta anhelá pa mira nan atrobe? Wel, aceptá e pas cu Jesus ta ofrecé. Tene fe manera esun di Marta, ruman muher di Lázaro, kende a bisa Jesus: “Mi sa cu lo e lanta den e resureccion riba e último dia.” Pero tuma nota di Jesus su contesta animador na Marta: “Ami ta e resureccion i e bida. Esun cu ta ehercé fe den mi, asta si e muri, lo e bolbe na bida; i tur cu ta bibu i ta ehercé fe den mi lo no muri hamas. Abo ta kere esaki?”—Juan 11:24-26.

23. Pakico conocimentu exacto dje Palabra di Dios ta esencial pa haña berdadero pas?

²³ Abo tambe por kere den i beneficiá dje promesa ei. Con? Dor di gana conocimentu exacto dje Palabra di Dios. Ripará con Pablo a enfatisá e importancia di conocimentu exacto: “Nos . . . no a stop di haci oracion pa boso i di pidi pa boso por ser yená cu e conocimentu exacto di su boluntad den tur sabiduria i comprendimentu spiritual, pa boso cana digno di Jehova afin di agrad’é plenamente segun cu boso ta sigui producí fruta den tur bon obra i aumentá den e conocimentu exacto di Dios.” (Colosensenan 1:9, 10) E conocimentu exacto aki lo convencé bo cu Jehova Dios ta e fuente di berdadero pas. Lo e siñá bo tambe kico bo mester haci awor pa bo por djoin e salmista den bisa: “Den pas lo mi cai drumi i pega soño, pasobra abo so, O Jehova, ta hací mi biba den siguridad.”—Salmo 4:8.

Bo Por Splica?

◻ Pakico esfuersonan humano pa logra pas a faya consistentemente?

◻ Kico ta e causa básico di guera?

◻ Pakico pas duradero no ta un soño irealístico?

◻ Kico ta e fuente di berdadero pas?

[Plachi na página 8]

Berdadero pas no ta un soño. E ta e promesa di Dios

[Plachi na página 10]

Desde 1914 e ginete simbólico dje cabai color di candela a kita pas for dje tera

[Plachi na página 11]

Religion i Nacionnan Uní por trece pas?

[Rekonosementu]

UN photo