Nos Tin Motibu pa Sclama di Goso
“Húbilo i alegria nan lo alcansá, i tristesa i suspiro mester hui bai.”—ISAIAS 35:10.
1. Ken awe tin motibu special pa goso?
PROBABLEMENTE bo a ripará cu poco hende tin berdadero goso awendia. Sin embargo, como cristiannan berdadero, Testigonan di Jehova tin goso. I e prospecto di obtené e mésun goso ei ta fácilmente disponibel pa miyones di hende mas no-bautisá ainda, hóben i bieu, cu ta asociá cu e Testigonan. E echo cu awor bo ta lesando e palabranan aki den e revista aki ta indicá cu bo tin e goso aki caba of cu bo tin hopi chens di logr’é.
2. Con e goso di un cristian ta para na contraste cu e estado general di mayoria hende?
2 Mayoria hende ta sinti cu nan bida falta algu. Kico di abo? Ta cierto cu kisas bo no tin tur artefacto material cu lo bo por usa, siguramente no tur loke hende ricu i poderoso djawe tin. I kisas lo bo tin gana di tin mihó salú i vigor. No obstante, nos por bisa cu tur siguransa cu ora ta trata di goso, bo ta mas ricu i mas salú cu mayoria dje miles di miyones di hende riba tera. Con asina?
3. Ki palabranan significativo ta merecé nos atencion, i pakico?
3 Corda e palabranan di Jesus: “E cosnan aki mi a papia cu boso, pa mi goso por ta den boso i pa boso goso por ser hací completo.” (Juan 15:11) “Boso goso por ser hací completo.” Ki un descripcion! Un estudio cabal dje moda cristian di biba lo revelá hopi motibu pa nos goso ser completo. Pero n’e momento aki, tuma nota dje palabranan significativo na Isaías 35:10. Esakinan ta significativo pasobra nan tin hopi di ber cu nos awe. Nos ta lesa: “Esnan rescatá mes dor di Jehova lo bolbe bek i siguramente lo yega na Síon cu un sclamacion gososo; i lo tin alegria pa tempu indefiní riba nan cabes. Húbilo i alegria nan lo alcansá, i tristesa i suspiro mester hui bai.”
4. Ki clase di goso ta ser mencioná na Isaías 35:10, i pakico nos mester duna atencion na esaki?
4 “Alegria pa tempu indefiní.” E frase “pa tempu indefiní” ta un traduccion exacto di loke Isaías a skirbi na hebreo. Pero, manera otro textonan ta confirmá, e nificacion den e versículo aki ta “pa semper.” (Salmo 45:6; 90:2; Isaías 40:28) Pues e alegria lo ta sin fin, den condicionnan cu lo permití—sí, hustificá—alegria eterno. Esei no ta zona encantador? Ma, kisas abo ta mira e versículo ei como djis un comentario riba un situacion teorético, unu cu ta poné bo pensa: ‘Esei en realidad no ta tocá mi n’e grado cu mi problemanan i preocupacionnan di tur dia sí ta tocá mi.’ Pero e echonan ta proba lo contrario. E promesa profético na Isaías 35:10 tin nificacion pa bo awe. Pa haña sa con, laga nos examiná e bunita capítulo aki, Isaías 35, tumando nota di cada parti den su contexto. Bo por ta sigur cu lo bo disfrutá di loke nos haña.
Hende cu Mester A Alegrá
5. Den ki marco di circunstancia profético e profecia den Isaías capítulo 35 ta?
5 Como yudansa, laga nos considerá e antecedente, e marco histórico dje profecia fasinante aki. E profeta hebreo, Isaías, a skirbié rond di 732 P.E.C. Esei tabata décadanan promé cu e ehércitonan babilónico a destruí Jerusalem. Manera Isaías 34:1, 2 ta indicá, Dios a predecí cu e tabata bai expresá vengansa riba e nacionnan, manera Edom, mencioná na Isaías 34:6. Evidentemente el a usa e babilonionan antiguo pa haci esei. Di igual manera, Dios a laga e babilonionan desolá Huda debí cu e hudiunan tabata infiel. E resultado? E pueblo di Dios a ser hibá den cautiverio i nan patria a keda desolá pa 70 aña.—2 Crónicanan 36:15-21.
6. Ki contraste tin entre loke mester a bini riba e edomitanan i loke mester a bini riba e hudiunan?
6 Sin embargo, tin un diferencia significante entre e edomitanan i e hudiunan. E castigu divino riba e edomitanan tabata permanente; cu tempu, nan a disparcé como pueblo. Sí, ainda bo por bishitá e ruinanan bashí den e área caminda e edomitanan tabata biba, manera e restonan mundialmente renombrá di Petra. Pero awe, no tin ningun nacion of pueblo cu por ser identificá como ‘e edomitanan.’ N’e otro banda, e desolacion di Huda causá p’e babilonionan mester a dura pa semper, lagando e pais eternamente sin goso?
7. Con hudiunan cautivo den Babilonia a reaccioná riba Isaías capítulo 35?
7 Aki e profecia maraviyoso den Isaías capítulo 35 tin nificacion emocionante. E por ser yamá un profecia di restoracion, pasobra el a haña su promé cumplimentu ora e hudiunan a bolbe na nan patria na aña 537 P.E.C. E israelitanan cu tabata cautivo den Babilonia a ricibí libertad pa bolbe bek na nan patria. (Esdras 1:1-11) Sin embargo, te ora esei a sosodé e hudiunan cautivo den Babilonia cu a considerá e profecia divino aki lo por a puntra nan mes ki clase di condicionnan nan lo a topa na nan patria nacional, Huda. I den ki condicion nan mes lo tabata? E contestanan ta directamente relacioná cu pakico nos berdaderamente tin motibu pa sclama di goso. Laga nos mira.
8. Ki condicionnan e hudiunan lo a haña ora nan a bolbe bek for di Babilonia? (Compará cu Ezekiel 19:3-6; Oséas 13:8.)
8 E situacion siguramente lo no a parce prometedor p’e hudiunan asta ora nan a tende cu nan lo por a bolbe bek na nan patria. Nan pais a keda desolá pa siete década, henter un duracion di bida. Kico a sosodé cu e pais? Cualkier cunucu cultivá, plantacion di wijndruif of di fruta lo a bira mondi. Hofinan of terenonan cu tabata ser muhá lo a para bira desierto. (Isaías 24:1, 4; 33:9; Ezekiel 6:14) Pensa tambe dje animalnan salbahe cu lo a abundá. Esakinan lo a incluí bestianan carnívoro [cu ta come carni], manera leon i leopardo. (1 Reynan 13:24-28; 2 Reynan 17:25, 26; Cantica di Sálomon 4:8) Tampoco nan por a pasa por haltu di oso, cu tin e abilidad di mata hende homber, muher of mucha. (1 Samuel 17:34-37; 2 Reynan 2:24; Proverbionan 17:12) I lo ta di mas pa mencioná víbora i otro colebranan venenoso, of scorpion. (Génesis 49:17; Deuteronomio 32:33; Job 20:16; Salmo 58:4; 140:3; Lucas 10:19) Si bo tabata huntu cu e hudiunan cu a bolbe for di Babilonia na 537 P.E.C., probablemente lo bo a vacilá pa cana rond den un área asina. Esei no tabata ningun paradijs ora nan a yega.
9. Pa ki motibu esnan cu a bolbe bek tabatin un base pa speransa i confiansa?
9 No obstante, Jehova mes a hiba su adoradornan cas, i e tin e abilidad pa cambia un situacion desolá completamente. Bo no ta kere esei dje Creador? (Job 42:2; Jeremías 32:17, 21, 27, 37, 41) Pues, kico lo el a haci—kico el a haci—p’e hudiunan cu tabata bolbiendo bek i pa nan pais? Ki efecto esaki tin riba e pueblo di Dios den tempu moderno i riba bo situacion—actual i futuro? Promé, laga nos mira kico a tuma lugá den e tempu ei.
Gososo Riba un Situacion Cambiá
10. Ki cambio Isaías 35:1, 2 a profetisá?
10 Kico lo a sosodé ora Ciro a permití e hudiunan bolbe bek n’e pais desolá ei? Lesa e profecia emocionante na Isaías 35:1, 2: “E desierto i e region secu lo hubilá, i e yanura di desierto lo ser gososo i lo florecé manera asafran. Lo e florea sin falta i realmente lo e ta gososo cu goso i cu sclamacion di alegria. E gloria di Líbanon mes mester ser duná na dje, e splendor di Carmelo i di Saron. Lo tin esnan cu lo mira e gloria di Jehova, e splendor di nos Dios.”
11. Na ki conocimentu dje pais Isaías a referí?
11 Den tempunan bíblico, Líbanon, Carmelo i Saron tabata conocí pa nan bunitesa di mata berde. (1 Crónicanan 5:16; 27:29; 2 Crónicanan 26:10; Cantica di Sálomon 2:1; 4:15; Oséas 14:5-7) Isaías a usa e ehempelnan aki pa describí loke e pais transformá lo a bin parce, cu yudansa di Dios. Pero esaki mester tabata simplemente un efecto riba e suela? Siguramente cu no!
12. Pakico nos por bisa cu den e profecia di Isaías capítulo 35 hende ta para central?
12 Isaías 35:2 ta papia dje pais como siendo “gososo cu goso i cu sclamacion di alegria.” Nos sa cu e suela i e matanan no tabata literalmente “gososo cu goso.” Sin embargo, nan transformacion pa bira fértil i productivo por a pone hende sinti asina. (Levítico 23:37-40; Deuteronomio 16:15; Salmo 126:5, 6; Isaías 16:10; Jeremías 25:30; 48:33) E cambionan literal den e tera mes lo a corespondé cu cambionan den hende, pasobra hende ta para central den e profecia aki. P’esei, nos tin motibu pa comprendé cu e palabranan di Isaías a enfocá na promé lugá riba e cambionan den e hudiunan cu a bolbe bek, specialmente nan goso.
13, 14. Ki cambio den hende Isaías 35:3, 4 a profetisá?
13 Di acuerdo cu esei, laga nos examiná mas dje profecia stimulador aki pa mira con el a haña cumplimentu despues dje liberacion i regreso dje hudiunan for di Babilonia. Den versículo 3 i 4, Isaías ta papia tocante otro cambionan den esnan cu a bolbe bek: “Boso fortalecé e mannan débil i haci e rudianan cu ta tambaleá firme. Bisa na esnan cu tin ansiedad di curason: ‘Sea fuerte. No tene miedu. Mira! Boso Dios mes lo bini cu vengansa mes, Dios asta cu un pago. E mes lo bini i salba boso.’”
14 No ta fortalecedor pa pensa cu nos Dios, kende lo por bira bek e condicion desolá dje suela, ta asina interesá den su adoradornan? E no tabata kier p’e hudiunan cautivo sinti nan mes débil, desanimá of cu ansiedad tocante e futuro. (Hebreonan 12:12) Pensa dje condicion di e hudiunan cautivo ei. Aparte di cualkier speransa cu nan por a saca for dje profecianan di Dios tocante nan futuro, lo tabata difícil pa nan ser optimista. Tabata como si fuera nan tabata den un cel scur, sin libertad di move rond i ser activo den sirbi Jehova. Esei por a wel parce pa nan como si no tabatin lus nan dilanti.—Compará cu Deuteronomio 28:29; Isaías 59:10.
15, 16. (a) Kico nos por concluí cu Jehova a haci pa esnan cu a bolbe bek? (b) Pakico esnan cu a bolbe bek lo no a spera sanacionnan físico milagroso, pero kico Dios a haci na armonia cu Isaías 35:5, 6?
15 Sin embargo, ki un cambio a tuma lugá ora Jehova a laga Ciro libra nan pa bolbe cas bek! No tin evidencia bíblico cu ei Dios milagrosamente a habri ningun wowo ciegu dje hudiunan cu a bolbe bek, ni habri orea di ningun hende surdu ni cu el a sana ningun man cu pia cu tabata falta of cu tabata mancaron. Sin embargo, realmente el a haci algu muchu mas magnífico. El a restorá nan n’e lus i libertad di nan pais stimá.
16 No tin ningun indicacion cu esnan cu a bolbe bek a spera pa Jehova efectuá tal sanacionnan físico milagroso. Nan mester a realisá cu Dios no a haci esei cu Isaac, Samson of Eli. (Génesis 27:1; Huesnan 16:21, 26-30; 1 Samuel 3:2-8; 4:15) Pero si nan a spera un cambio divino di nan condicion den sentido figurativo, nan no a keda desapuntá. Siguramente den un sentido figurativo, versículo 5 i 6 a haña un berdadero cumplimentu. Cu exactitud Isaías a profetisá: “N’e tempu ei wowo di esnan ciegu lo ser habrí i orea mes di esnan surdu lo ser habrí. N’e tempu ei esun coho lo subi mescos cu un biná ta subi i lenga di esun muda lo sclama di alegria.”
Haciendo e Pais Mescos cu un Paradijs
17. Ki cambionan físico Jehova evidentemente a efectuá?
17 Esnan cu a bolbe bek siguramente tabatin motibu pa sclama di alegria pa e condicionnan manera esnan cu Isaías a procedé na describí: “Pasobra den e desierto awa lo brota, i riunan den e yanura di desierto. I e suela kimá pa calor lo bira manera un tanki di awa yen di caña, i e suela cu sed manera fonteinnan di awa. Den e lugá di habitacion di chacalnan, un lugá di sosiegu pa nan, lo tin yerba berde cu caña i mata di papiro.” (Isaías 35:6b, 7) Aunke kisas nos no ta mira esei riba henter e region ei awe, e evidencia ta indicá cu e área cu un tempu tabata Huda, tabata “un paradijs idílico.”a
18. Con e hudiunan cu a bolbe bek probablemente lo a reaccioná n’e bendicionnan di Dios?
18 En cuanto e causanan pa goso, pensa riba con e resto hudiu mester a sinti ora nan a repatriá p’e Tera Primintí! Nan tabatin e oportunidad pa tuma e desierto, habitá pa chacal i otro animalnan asina, i transform’é. Lo bo no a haña goso den haci un trabou di restoracion asina, specialmente si bo tabata sa cu Dios tabata bendicionando bo esfuersonan?
19. Den ki sentido e bolbementu bek for di cautiverio babilónico tabata condicional?
19 Sin embargo, no ta tur hudiu cautivo den Babilonia por a of a bolbe bek pa participá den e transformacion gososo ei. Dios a fiha e condicionnan. Ningun persona contaminá cu prácticanan religioso babilónico i pagano tabatin derecho di bolbe bek. (Daniel 5:1, 4, 22, 23; Isaías 52:11) Tampoco ningun persona cu a comprometé su mes di un manera bobo na un curso imprudente. Tur persona asina a ser descualificá. N’e otro banda, esnan cu sí a cumpli cu e normanan di Dios, kende el a considerá como santu den un sentido relativo, por a bolbe na Huda. Nan por a biaha como si fuera riba un Caminda di Santidad. Isaías a haci esei cla den versículo 8: “Siguramente lo yega di tin un caretera ei, asta un caminda; i lo e ser yamá e Caminda di Santidad. Esun impuru lo no pasa riba dje. I lo e ser pa esun canando riba e caminda, i ningun hende bobo lo cana rond riba dje.”
20. Kico e hudiunan no tabatin nodi teme ora nan a bolbe bek, resultando den kico?
20 E hudiunan cu a bolbe bek no tabatin nodi teme ningun atake di hende cu cualidad di bestia of di bandidu. Pakico? Pasobra Jehova lo no a permití hende asina di ser riba e Caminda huntu cu su pueblo cumprá bek. Pues nan por a biaha cu optimismo gososo, cu prospectonan felis. Nota con Isaías a describí esei den conclusion dje profecia aki: “Ningun leon lo resultá di ta ei i e bestianan salbahe feros lo no subi riba dje. Ningun lo ser hañá ei; i esnan cumprá bek mester cana ei. I esnan rescatá mes dor di Jehova lo bolbe bek i siguramente lo yega na Síon cu un sclamacion gososo; i lo tin alegria te na tempu indefiní riba nan cabes. Húbilo i alegria nan lo alcansá, i tristesa i suspiro mester hui bai.”—Isaías 35:9, 10.
21. Con nos awe mester considerá e cumplimentu di Isaías capítulo 35 cu a tuma lugá caba?
21 Ki un cuadro profético nos tin aki! Sin embargo, nos no mester considerá esaki como tratando cu solamente historia di pasado, como si fuera esaki tabata un relato pintoresco cu tin poco di haci cu nos situacion of nos futuro. Echo ta cu e profecia aki tin un cumplimentu asombroso awe entre e pueblo di Dios, di manera cu realmente e ta enbolbé cada un di nos. E ta duna nos motibu sólido pa sclama di goso. E aspectonan aki cu ta enbolbé bo bida awor i den futuro ta ser tratá den e siguiente artículo.
[Nota]
a For di su estudionan dje region, e agrónomo Walter C. Lowdermilk (representando e Organisacion di Nacionnan Uní pa Cuminda i Agricultura) a concluí: “E tera aki un tempu tabata un paradijs idílico.” Tambe el a indicá cu e clima ei no a cambia mashá “desde e tempu romano,” i “e ‘desierto’ cu a reemplasá e tera cu un tempu tabata florecé tabata e obra di hende, no di naturalesa.”
Bo Ta Corda?
◻ Na ki tempu Isaías capítulo 35 a haña su promé cumplimentu?
◻ Ki efecto e cumplimentu inicial dje profecia lo a producí?
◻ Con Jehova a cumpli cu Isaías 35:5, 6?
◻ Ki cambionan den e pais i den nan situacion e hudiunan cu a bolbe bek a experenciá?
[Plachi na página 9]
E ruinanan di Petra, den e área caminda un tempu e edomitanan tabata biba
[Plachi na página 9]
Garo Nalbandian
[Plachi na página 10]
Miéntras e hudiunan tabata den exilio, gran parti di Huda a bira manera un desierto, invadí dor di bestianan feros manera oso i leon
[Plachi na página 10]
Garo Nalbandian
[Plachi na página 10]
Oso i Leon: Parke di Bestia-Safari di Ramat-Gan, Tel Aviv