Dikon Ta Importante pa Sa si Tin un Kreador?

Ta Hasi un diferensia si bo sa ku tin un Kreador òf nò? Si e evidensianan a konvensé bo ku un Dios todopoderoso ta eksistí, kisas lo bo tin gana di mira e evidensianan ku ta mustra ku ta Dios a inspirá Beibel. I si bo ta konfia loke Beibel ta bisa, lo bo por haña e siguiente benefisionan.

Lo bo disfrutá mas di bida

LOKE BEIBEL TA BISA: “[Dios] a hasi bon, dunando boso áwaseru for di shelu i tempu di bon kosecha, i asina a laga boso haña kuminda na abundansia i a yena boso kurason ku alegria.”—Echonan 14:17.

LOKE ESAKI TA NIFIKÁ: Tur loke bo ta disfrutá di dje den naturalesa ta un regalo di e Kreador. Lo bo ta mas gradisidu ainda pa e regalonan ei ora bo haña sa kuantu e Kreador ta interesá den bo.

Bo por haña bon konseho ku lo yuda bo awor

LOKE BEIBEL TA BISA: “Lo bo sa kiko ta nifiká: ta un hende rekto, biba un bida bon den bista di Dios i di hende, trata tur hende sin hasi distinshon. E ora ei lo bo sa kon bo tin ku biba.”—Proverbionan 2:9, BPK.

LOKE ESAKI TA NIFIKÁ: Komo bo Kreador, Dios sa loke bo tin mester pa ta felis. Ora bo lesa Beibel, bo por siña hopi kos ku por yuda bo den bo bida.

Haña kontesta pa bo preguntanan

LOKE BEIBEL TA BISA: “Lo bo . . . deskubrí e konosementu di Dios.”—Proverbionan 2:5.

LOKE ESAKI TA NIFIKÁ: Si bo sa ku tin un Kreador, bo por haña kontesta pa pregunta importante, manera: Kiko ta e propósito di bida? Dikon tin asina tantu sufrimentu? Kiko ta pasa ku nos ora nos muri? Bo por haña kontesta satisfaktorio den Beibel.

Bo por tin speransa pa futuro

LOKE BEIBEL TA BISA: “‘Mi sa e plannan ku mi tin pa boso,’ SEÑOR ta deklará, ‘plannan pa pas i no pa kalamidat, pa duna boso un futuro i un speransa.’”—Yeremías 29:11.

LOKE ESAKI TA NIFIKÁ: Dios ta primintí ku den futuro lo e eliminá maldat, sufrimentu i asta morto. Ora bo konfia den Dios su promesanan, bo speransa pa futuro lo duna bo e kurashi ku bo tin mester pa trata ku bo problemanan.

Wak ki benefisio algun hende ku ta kere den un Kreador a haña

“Semper mi ta keda impreshoná ora mi mira kon Dios a yuda nos den asina tantu aspekto di bida. E ta yuda nos sa kiko ta mas importante den bida, kon pa trata ku hende i kon pa bira su amigu.”—Cyndi, Merka.

“Komo ku mi ta kere den un Kreador, mi tin un bida dushi i ku propósito. Nunka mi no ta sinti mi laf, pasobra semper mi por siña mas tokante Dios, su kreashon i su Palabra.”—Elise, Fransia.

“Ora mi apliká loke nos Kreador ta siña nos for di Beibel, mi ta mas felis. E ta yuda mi ta ménos krítiko, mas atento i mas felis. Ademas, e ta yuda mi pa ta un mihó tata.”—Peter, Hulanda.

“Promé ku mi a siña tokante Dios, mi tabata djis kome, drumi i lucha pa yega trabou na tempu. Mi no tabata disfrutá di bida. Awor mi ta mira bida komo un regalo maravioso ku nos mester disfrutá di dje i balorá.”—Liz, Estonia.

“Mi ta un hende ku ta preokupá mashá. Komo ku mi sa ku lo bai tin un fin na maldat, inhustisia i sufrimentu, esei ta yuda mi trata ku mi preokupashonnan.”—Adrien, Fransia.