Jehova Su Bendicion Riba Nos “Tera”

“Tur cos lo ta bibu caminda e riu yega.”​—EZEKIEL 47:9.

1, 2. (a) Con importante awa ta? (b) Kico e awa dje riu cu Ezekiel a mira den vision ta simbolisá?

AWA ta un líkido asombroso. Tur bida físico ta dependé di dje. Nos niun no por biba pa hopi tempu sin dje. Nos ta dependé riba dje pa limpiesa tambe, ya cu awa por disolvé i laba impuresa bai cuné. P’esei nos ta baña, laba paña i laba asta nos cuminda cuné. Esei lo por salba nos bida.

² Bijbel ta usa awa pa simbolisá Jehova su percuracionnan spiritual pa bida. (Jeremías 2:13; Juan 4:​7-15) Entre e percuracionnan aki tin esun di haci su pueblo limpi mediante e sacrificio di rescate di Cristo i e conocimentu di Dios cu nos ta haña den su Palabra. (Efesionan 5:​25-27) E riu milagroso den Ezekiel su vision cu ta core for dje tempel, ta simbolisá e bendicionnan aki cu ta duna bida. Pero na ki tempu e riu ei ta core, i kico e ta nificá pa nos awe?

Un Riu Ta Core den un Tera Restorá

3. Kico Ezekiel a experenciá, manera Ezekiel 47:​2-12 ta informá?

³ Como hende den cautiverio na Babilonia, Ezekiel su pueblo tabatin hopi necesidad di Jehova su percuracionnan. Ki animador tabata anto, pa Ezekiel mira un stroom chikitu di awa brota for dje santuario i sali for dje tempel dje vision! Un angel ta midi e stroom cada 1.000 codo. E ta bira cada bes mas i mas profundo, di un stroom haltura di enkel, te na haltura di rudia, te na haltura di heup, te bira un riu grandi den cua ta landa mester landa. E riu ta trece bida i fertilidad. (Ezekiel 47:​2-11) E angel a bisa Ezekiel: “Na cantu dje riu grandi lo sali, a lo largu di su cantu n’e banda aki i na e banda aya, tur sorto di palu pa cuminda.” (Ezekiel 47:12a) Ora e riu drenta Laman Morto​—un awa sin bida​—bida ta brota! Piscá ta abundá. Un industria di piscamentu ta florecé.

4, 5. Con e profecia di Joël relacioná cu un riu ta similar na esun di Ezekiel, i pakico esaki ta significativo?

⁴ Kisas e bunita profecia aki a haci e exiliadonan hudiu corda unu skirbí mas cu dos siglo promé: “For dje cas di Jehova lo brota un fuente di awa, i e tin cu muha e vaye torencial dje Palunan di Acacia.”a (Joël 3:18) E profecia di Joël, mescos cu esun di Ezekiel, ta predicí cu un riu lo core for di Dios su cas, e tempel, i trece bida na un region secu.

⁵ Pa hopi tempu caba E Toren di Vigilancia a splica cu e profecia di Joël ta hañando su cumplimentu den nos tempu.b Siguramente anto, mescos ta conta pa e vision similar di Ezekiel. Den e tera restorá di Dios su pueblo awe, mescos cu den Israel di antigwedad, Jehova su bendicionnan en berdad a core na abundancia.

Bendicionnan cu Ta Core na Abundancia

6. E sprengumentu di sanger riba e altar dje vision mester a corda e hudiunan riba kico?

⁶ Kico ta e Fuente dje bendicionnan riba Dios su pueblo restorá? Wel, ripará cu e awa ta core for di Dios su tempel. Mescos awe, e bendicionnan ta bini di Jehova via su gran tempel spiritual​—e areglo pa adoracion puru. E vision di Ezekiel ta agregá un detaye importante. Den e patio interior, e stroom ta core pasa banda dje altar, net sur di dje. (Ezekiel 47:1) E altar ta net meimei dje tempel dje vision. Jehova ta describié den tur detaye na Ezekiel i ta manda pa sprengu sanger di un sacrificio riba dje. (Ezekiel 43:​13-18, 20) E altar ei tabatin gran nificacion pa tur israelita. Hopi tempu pasá e pacto cu Jehova a cera cu nan a ser validá ora Moises a sprengu sanger riba un altar na pia dje Ceru di Sínai. (Exodo 24:​4-8) E sprengumentu di sanger riba e altar dje vision mester a haci nan corda cu una bes nan regresá na nan tera restorá, Jehova su bendicionnan lo a sigui core, tanten cu nan a cumpli cu e pacto cu nan a cera cuné.​—Deuteronomio 28:​1-14.

7. Ki nificacion e altar simbólico tin pa cristiannan awe?

⁷ Mescos tambe awe, Dios su pueblo ta ser bendicioná mediante un pacto, unu mihó, e pacto nobo. (Jeremías 31:​31-34) E tambe a ser validá hopi tempu pasá mediante sanger, esun di Jesucristo. (Hebreonan 9:​15-20) Awe, sea nos ta un dje ungínan cu ta participá den e pacto ei, of ta dje “otro carnénan” cu ta beneficiá di dje, e altar simbólico tin gran nificacion pa nos. E ta simbolisá Dios su boluntad en coneccion cu e sacrificio di Cristo. (Juan 10:16; Hebreonan 10:10) Mescos cu e altar simbólico ta net meimei dje tempel spiritual, Cristo su sacrificio di rescate ta e punto central den adoracion puru. E ta e base pa haña pordon pa nos picánan i p’esei e base tambe pa tur nos speransanan pa futuro. (1 Juan 2:2) P’esei nos ta haci nos máximo esfuerso pa biba segun e ley asociá cu e pacto nobo, “e ley di e Cristo.” (Galationan 6:2) Tanten nos haci esei, nos lo beneficiá di Jehova su percuracionnan pa bida.

8. (a) Kico tabata falta den e patio interior dje tempel di vision? (b) Kico e sacerdotenan den e tempel di vision por a usa pa haci nan mes limpi?

⁸ Un dje beneficionan ei ta un posicion limpi dilanti Jehova. Den e tempel dje vision, e patio interior falta un cos cu tabata masha importante den e patio dje tabernáculo i den e tempel di Sálomon: un ponchera grandi, yamá despues un laman, pa e sacerdotenan baña aden. (Exodo 30:​18-21; 2 Crónicanan 4:​2-6) Kico e sacerdotenan den Ezekiel su tempel dje vision por a usa pa baña anto? Wel, e stroom milagroso ei cu ta core dor dje patio interior! Sí, Jehova lo a bendicioná nan cu e medio pa nan disfrutá di un posicion limpi, of santu.

9. Con esnan dje clase ungí i esnan dje multitud grandi por tin un posicion limpi awe?

⁹ Mescos awe, e ungínan a ser bendicioná cu un posicion limpi dilanti Jehova. Jehova ta considerá nan santu i ta declará nan hustu. (Romanonan 5:​1, 2) Kico dje “multitud grandi,” prefigurá dor dje tribunan no-sacerdotal? Nan ta adorá den e patio exterior, i e mésun stroom ei ta pasa dor dje parti ei tambe dje tempel den e vision. Ta ki apropiado anto, cu apostel Juan a mira e multitud grandi bistí cu paña largu blancu i limpi dunando adoracion den e patio dje tempel spiritual! (Revelacion 7:​9-​14) Sin importá con nan a ser tratá den e mundu degradá aki, nan por ta sigur cu tanten cu nan ta ehercé fe den Cristo su sacrificio di rescate, Jehova ta mira nan como limpi i puru. Con nan ta ehercé fe? Dor di sigui e pasonan di Jesus, teniendo pleno confiansa den e sacrificio di rescate.​—1 Pedro 2:21.

10, 11. Kico ta un rasgo importante dje awa simbólico, i ki relacion esaki tin cu e tremendo expansion dje riu?

¹⁰ Manera ya a ser mencioná caba, tin un otro rasgo vital dje awa simbólico aki: conocimentu. Den e Israel restorá, Jehova a bendicioná su pueblo cu instruccion bíblico mediante e sacerdotenan. (Ezekiel 44:23) Den un manera comparabel, Jehova a bendicioná su pueblo awe cu instruccion amplio tocante su Palabra di berdad, mediante e “sacerdocio real.” (1 Pedro 2:9) Conocimentu di Jehova Dios, di su propósitonan pa humanidad i specialmente di Jesucristo i e Reino Mesiánico a core na cada bes mas abundancia durante e último dianan aki. Esta magnífico ta pa ricibí e riu aki di refrescamentu spiritual cu ta bira mas i mas profundo!​—Daniel 12:4.

¹¹ Mescos cu e riu cu e angel a midi a crece bira cada bes mas profundo, asina e stroom di bendicionnan dunadó di bida cu ta bini di Jehova a aumentá masha tantu mes pa acomodá e fluho di hende cu ta drenta den nos tera spiritual bendicioná. Un otro profecia di restoracion a predicí: “E chikitu mes lo bira mil, i esun menor un nacion poderoso. Ami mes, Jehova, lo aceler’é na su debido tempu.” (Isaías 60:22) E palabranan aki a cumpli: miyones di hende a basha bini pa djoin nos den adoracion puru! Jehova a haci “awa” disponibel na abundancia pa tur cu acudí na dje. (Revelacion 22:17) E ta percurá pa su organisacion terenal distribuí Bijbel i literatura bíblico mundialmente, den cientos di idioma. Mescos tambe, a haci areglo pa tene reunionnan cristian i congresonan na tur parti di mundu, pa asina tur hende por haña e awa cristalino dje berdad. Ki efecto e percuracionnan aki tin riba hende?

E Awa Ta Trece Bida!

12. (a) Con bin e palunan den Ezekiel su vision por producí asina? (b) Kico e palunan fructífero i fiel aki ta representá durante e último dianan?

¹² E riu di Ezekiel su vision ta trece bida i salú. Ora Ezekiel haña sa dje palunan cu lo a crece na cada banda dje riu, e angel ta bis’é: “Nan blachinan lo no marchitá, i nan fruta lo no ser consumí tampoco. . . . I nan fruta mester resultá di ta pa alimento i nan blachinan pa curacion.” Con bin e palunan aki ta producí den e manera asombroso aki? “Pasobra e awa pa nan​—ta for dje santuario mes e ta sali.” (Ezekiel 47:12b) E palunan simbólico aki ta prefigurá tur Dios su percuracionnan pa restorá humanidad na perfeccion riba e base di Jesus su sacrificio di rescate. N’e tempu aki, riba tera, e resto ungí ta hiba delantera den percurá alimento i curacion spiritual. Despues cu tur e 144.000 ricibí nan recompensa celestial, e beneficionan cu ta bini di nan sirbishi sacerdotal como co-gobernante cu Cristo lo extendé mas den futuro, i lo hiba finalmente na e victoria completo riba e morto adámico.​—Revelacion 5:​9, 10; 21:​2-4.

13. Ki curacion a ser lográ durante nos tempu?

¹³ E riu dje vision ta basha bai den e Laman Morto sin bida i ta cura tur loke e mishi cuné. E laman aki ta prefigurá un ambiente spiritualmente morto. Pero bida ta abundá “unda cu e riu di tamaño dòbel yega.” (Ezekiel 47:9) Di igual manera, den e último dianan, unda cu e awa di bida a penetrá, hende a haña bida den un sentido spiritual. E proménan cu a ser revitalisá asina tabata e resto ungí, aya na 1919. Den un sentido spiritual nan a lanta bek na bida for di un estado inactivo, comparabel cu morto. (Ezekiel 37:​1-​14; Revelacion 11:​3, 7-​12) For dje tempu ei padilanti e awanan vital ei a alcansá otro hende spiritualmente morto tambe, i esakinan a haña bida i a forma un multitud grandi di otro carnénan cu ta sigui crece ketu bai. Nan ta stima i ta sirbi Jehova. Pronto, e percuracion aki lo ser extendé na e multitudnan di esnan resucitá.

14. E industria di piscamentu cu ta florecé na cantu di Laman Morto ta un bon ilustracion di kico awe?

¹⁴ Vitalidad spiritual ta hiba na productividad. E industria di piscamentu cu ta florecé na cantu dje laman cu un tempu tabata morto, ta ilustrá esaki. Jesus a bisa su siguidónan: “Lo mi haci boso piscadó di hende.” (Mateo 4:19) Den e último dianan, e trabou di piscamentu a cuminsá cu e recogementu dje resto dje ungínan, pero e no a para ei. E awanan dunadó di bida cu ta sali for di Jehova su tempel spiritual, incluso e bendicion di conocimentu exacto, a alcansá hende di tur nacion. Unda cu e riu grandi ei a yega, hende a haña bida den sentido spiritual.

15. Kico ta mustra cu no ta tur hende lo aceptá Dios su percuracionnan pa bida, i kico ta e resultado final pa esakinan?

¹⁵ Naturalmente, no ta tur hende ta reaccioná faborablemente n’e mensahe di bida awe. I no ta tur esnan resucitá durante e Reinado di Mil Aña di Cristo lo haci esei tampoco. (Isaías 65:20; Revelacion 21:8) E angel ta declará cu partinan dje laman no ta cura. E lugánan sin bida i yen di moeras aki ta ‘ser entregá na salu.’ (Ezekiel 47:11) Pa loke ta e hendenan di nos tempu, no ta tur cu ta bin den contacto cu Jehova su awa dunadó di bida ta acept’é. (Isaías 6:10) Na Armagedon, tur esnan cu a scoge pa keda den un condicion spiritualmente sin bida i malu lo ser entregá na salu, esta, destruí pa semper. (Revelacion 19:​11-21) Sin embargo, esnan cu a sigui bebe fielmente dje awanan aki por spera di sobrebibí i mira e cumplimentu final dje profecia aki.

E Riu Ta Core den Paradijs

16. Na ki tempu i con Ezekiel su vision di tempel lo haña su cumplimentu final?

¹⁶ Mescos cu otro profecianan di restoracion, Ezekiel su vision dje tempel ta haña su cumplimentu final durante e Milenio. E ora ei e clase sacerdotal lo no ta aki riba tera mas. “Nan lo ta sacerdotenan di Dios i di Cristo, i lo reina como reynan cuné [den shelu] p’e mil añanan.” (Revelacion 20:6) E sacerdotenan celestial aki lo ta asociá cu Cristo den aplicá tur e beneficionan di Cristo su sacrificio di rescate. Asina, humanidad hustu lo ser salbá, restorá na perfeccion!​—Juan 3:17.

17, 18. (a) Con Revelacion 22:​1, 2 ta describí un riu dunadó di bida, i na ki tempu principalmente e vision ei ta haña su aplicacion? (b) Den Paradijs, pakico e riu di awa di bida lo pasa den un tempu di gran expansion?

¹⁷ De echo, e riu cu Ezekiel ta mira lo core e ora ei cu e awa di bida mas potente. Esaki ta e tempu principal den cua e profecia registrá na Revelacion 22:​1, 2 ta haña su aplicacion: “El a mustrá mi un riu di awa di bida, cla manera cristal, coriendo for dje trono di Dios i dje Lamchi pasando meimei di su caminda hanchu. I n’e banda aki dje riu i n’e otro banda tabatin palunan di bida produciendo diesdos cosecha di fruta, dunando fruta tur luna. I e blachinan dje palunan tabata pa curacion dje nacionnan.”

¹⁸ Durante e Milenio, tur malesa físico, mental i emocional, lo ser curá. Esaki ta ser bon prefigurá dor dje “curacion dje nacionnan” mediante e palunan simbólico. Danki n’e percuracionnan aplicá dor di Cristo i e 144.000, “ningun residente lo bisa: ‘Mi ta malu.’” (Isaías 33:24) I e riu lo drenta den su tempu di mayor expansion. Lo e mester hancha i profundisá afin di acomodá e miyones, kisas miles di miyones, di hende resucitá cu lo bebe dje awanan di bida puru aki. Den Ezekiel su vision, e riu a cura Laman Morto i a trece bida unda cu su awanan a core. Asina tambe, den Paradijs hende homber i muher lo haña bida den tur sentido, i lo ser curá dje morto adámico heredá si nan ehercé fe den e beneficionan di rescate extendé na nan. Revelacion 20:12 ta predicí cu den e dianan ei lo habri “rolnan” cu lo duna mas lus di comprendimentu for di cua esnan resucitá lo beneficiá. Lamentablemente, algun hende lo nenga di ser curá, asta den Paradijs. E rebeldenan aki ta esnan cu lo ‘ser entregá na e salu’ di destruccion eterno.​—Revelacion 20:15.

19. (a) Con e partimentu dje tera lo haña su cumplimentu den Paradijs? (b) Ki rasgo den Paradijs e stad ta representá? (c) E echo cu e stad ta ubicá na algun distancia for dje tempel ta nificá kico?

¹⁹ N’e tempu ei e partimentu di tera den Ezekiel su vision tambe lo haña su cumplimentu final. Ezekiel a mira con nan ta parti e tera debidamente; mescos tambe, cada cristian fiel por ta sigur cu lo e tin un lugá, un herencia, den Paradijs. Probablemente, e deseo di tin bo mes cas pa cuida i biba aden lo ser cumplí den un manera ordená. (Isaías 65:21; 1 Corintionan 14:33) E stad cu Ezekiel a mira ta prefigurá apropiadamente e areglo di administracion cu ta Jehova su propósito p’e tera nobo. E clase sacerdotal ungí lo no ta físicamente presente mas entre humanidad. Esei ta net loke e vision ta indicá, ya cu e ta mustra cu e stad ta situá den tera “profano,” na un distancia for dje tempel. (Ezekiel 48:15) Aunke e 144.000 ta goberná cu Cristo den shelu, e Rey lo no falta representantenan riba tera. Su súbditonan humano lo beneficiá masha hopi dje guia i instruccion amoroso dje clase di cabesante. Sin embargo, e asiento real di gobernacion lo no ta riba tera sino den shelu. Tur hende riba tera, incluso e clase di cabesante, lo ta sumiso n’e Reino Mesiánico.​—Daniel 2:44; 7:​14, 18, 22.

20, 21. (a) Pakico e nomber dje stad ta apropiado? (b) Nos comprendimentu dje vision di Ezekiel mester impulsá nos pa haci nos mes ki preguntanan?

²⁰ Tuma nota dje palabranan final dje profecia di Ezekiel: “For dje dia ei padilanti e nomber dje stad lo ta: Jehova Mes T’ei.” (Ezekiel 48:35) E stad aki lo no existí pa duna hende poder of influencia; i lo e no t’ei tampoco pa pone hende cumpli cu ningun boluntad di hende. No, ta Jehova su stad e ta, i pa semper lo e reflehá su manera di pensa i su manera amoroso i razonabel di haci cosnan. (Santiago 3:17) Esaki ta duna nos e siguransa alentador cu Jehova lo sigui bendicioná su sociedad humano di “tera nobo” structurá, te den un futuro indefinidamente duradero.​—2 Pedro 3:13.

²¹ Nos no ta emocioná cu e prospecto nos dilanti? Ta bon anto pa nos cada un puntra nos mes: ‘Con mi ta reaccioná n’e bendicionnan maraviyoso revelá den Ezekiel su vision? Mi ta apoyá fielmente e trabou cu superintendentenan amoroso, incluyendo esnan dje resto ungí i e miembronan prospectivo dje clase di cabesante ta haci? Mi bida ta drei rond di adoracion puru? Mi ta saca pleno probecho dje awa di bida cu ta core asina abundantemente awe?’ Laga cada un di nos sigui haci esei i haña deleite den Jehova su percuracionnan pa tur eternidad!

[Nota]

Con Lo Bo Contestá?

◻ Kico e awanan cu ta core for dje tempel ta prefigurá?

◻ Ki curacion Jehova a logra pa medio dje riu simbólico, i pakico e riu a crece bira grandi?

◻ Kico e palunan cantu dje riu ta prefigurá?

◻ Kico e stad lo prefigurá durante e Reino di Mil Aña, i pakico e nomber dje stad ta apropiado?

[Plachi na página 23]

E riu di bida ta representá Dios su percuracion pa salbacion