Con Pa Fortalecé Enlace Matrimonial

“TA LEGAL pa un homber divorciá di su casá pa tur sorto di motibu?” e fariseonan a puntra, purbando pa cue e Gran Maestro, Jesucristo, den trampa. El a contestá nan dor di referí n’e promé matrimonio humano i a establecé un norma rib’e asuntu: “Loke Dios a uni huntu, no laga ningun hende separá.”

E fariseonan a debatí cu Moises a haci provision pa divorcio dor di prescribí e dunamentu di “un certificado di despedida.” Jesus a contestá nan: “Moises, den bista di boso curason duru, a permití boso pa divorciá di boso esposanan, pero esei no tabata e caso for di principio. Mi ta bisa boso cu ken cu divorciá di su esposá, cu no ta pa motibu di fornicacion i ta casa cu un otro, ta cometé adulterio.”—Mateo 19:3-9.

Originalmente, matrimonio mester tabata un enlace permanente. Ni morto lo no a separá e promé pareha casá, pasobra nan a ser creá como hende perfecto cu bida eterno na bista. Sin embargo, nan a peca. Nan picá a causa daño na matrimonio humano. Morto como enemigu a cuminsá separá pareha casá. Dios ta considerá morto como fin di un matrimonio, manera nos ta lesa den Bijbel: “Un esposa ta mará durante tur e tempu cu su esposo ta na bida. Pero si su esposo drumi den morto, e ta liber pa casa cu ken cu e kier, solamente den Señor.” (1 Corintio 7:39) Esaki ta masha diferente for di ideanan religioso manera ‘suttee,’ caminda un esposa ta ser convencé of forsá pa kima su mes ora su esposo muri den e creencia cu e enlace matrimonial ta sigui den un bida despues di morto.

Provision di Ley Mosaico

P’e tempu cu e ley mosaico a ser duná, relacionnan matrimonial a degenerá te n’e punto cu Jehova, den bista dje curason duru dje israelitanan, a haci provision pa divorcio. (Deuteronomio 24:1) No tabata Dios su propósito p’e israelitanan malusá e ley aki pa divorciá di nan esposanan pa faltanan insignificante, manera ta keda bisto for di su mandamentu cu nan mester a stima nan próhimo mescos cu nan mes. (Levítico 19:18) Asta e dunamentu di un certificado di divorcio a sirbi como un strobansa pasobra, como parti dje proceso di skirbi e certificado, e esposo cu tabata kier un divorcio mester a consultá cu hombernan debidamente autorisá, kendenan lo a haci esfuerso pa busca un reconciliacion. No, Dios no a duna e ley aki pa establecé ningun derecho pa divorciá di un esposa “pa tur sorto di motibu.”—Mateo 19:3.

Sin embargo, mas despues e israelitanan a ignorá e spiritu dje ley i a probechá dje cláusula aki pa haña divorcio riba cualkier base cu a cumbiní nan capricho. Pa siglo cincu P.E.C., nan tabata trata nan esposa di nan hubentud cu traicion, divorciando di nan pa tur sorto di motibu. Jehova a bisa nan firmemente cu el a odia divorcio. (Malaquías 2:14-16) Tabata den e circunstancianan aki cu Jesus a condená divorcio manera e israelitanan tabata practicand’e den su dia.

Unico Base Legítimo pa Divorcio

Tog Jesus a mencioná un base legítimo pa divorcio: fornicacion. (Mateo 5:31, 32; 19:8, 9) E palabra traducí aki como “fornicacion” ta incluí tur sorto di relacion sexual ilegal pafó di matrimonio bíblico, sea cu ta cu un persona dje mésun sexo of e sexo opuesto of cu un animal.

Asina mes, Jesus no tabata recomendando divorcio for di un partner infiel. Ta keda na e partner inocente pa evaluá e consecuencianan enbolbí i dicidí si e kier un divorcio. Esposanan cu ta contemplá un divorcio riba e base bíblico aki tambe lo kier considerá Dios su declaracion ora el a dicta sentencia n’e promé muher pa su picá. Ademas dje sentencia di morto, Dios specíficamente a bisa Eva: “Bo anhelo lo ta pa bo esposo, i lo e dominá bo.” (Génesis 3:16) Commentary on the Old Testament di C. F. Keil i F. Delitzsch, ta describí e “anhelo” aki como “un deseo cu ta yega na rand di un malesa.” Ta cierto cu e anhelo aki no ta asina fuerte den tur esposa, pero ora un esposa inocente ta considerando un divorcio, lo ta sabí p’e tuma na consideracion e necesidadnan emocional cu hende muher a heredá for di Eva. Sin embargo, como cu sexo pafó di matrimonio di parti di un partner culpabel por haci cu un partner inocente ta ser contagiá cu malesa transmití sexualmente, incluyendo AIDS, algun a dicidí na recurí na divorcio manera Jesus a splica.

Orígen di Problema di Famia

Hende su curason a cuminsá bira duru na momentu cu e promé pareha humano a peca contra Dios. (Romano 5:12) E simianan di pleitu di famia a ser sembrá ora e promé pareha humano a peca contra nan Tata celestial. Con asina? Ora e promé muher, Eva, a ser tentá dor di un colebra pa come dje palu prohibí, el a dal bai unbes i a come e fruta. Tabata solamente despues cu el a tuma tal decision significativo cu el a papia cu su esposo riba loke e colebra a bis’é. (Génesis 3:6) Sí, el a actua sin consultá cu su casá. Esaki ta e prototipo dje problemanan cu hopi famia ta enfrentá awe—falta di comunicacion di curason-pa-curason.

Despues, confrontá cu e consecuencianan di nan picá, tantu Adam como Eva a recurí n’e mésun táctica cu hopi pareha ta usa awe ora nan ta den problema, esta, culpa otronan. E promé homber, Adam, a culpa tantu su casá como Jehova pa loke el a haci, bisando: “E muher cu bo a duna pa ta cu mi, el a duná mi fruta dje palu i asina mi a come.” E muher a bisa na su turno: “E colebra—el a gañá mi i asina mi a come.”—Génesis 3:12, 13.

Jehova su pronunciacion di huicio riba Adam i Eva a pronosticá un otro factor ainda den e problemanan cu lo a desaroyá. Encuanto su relacion cu su esposo, Jehova a bisa Eva: “Lo e dominá bo.” Hopi esposo awe, mescos cu Isao, mencioná den nos promé artículo, ta dominá nan esposanan den un manera brutu, sin respet pa sintimentu di nan casá. Tog ainda, hopi esposa ta sigui tene un anhelo p’e atencion di nan esposo. Ora tal anhelo no ta ser satisfacé, e esposanan por exigí tal atencion i actua egoistamente. Siendo cu hopi esposo ta dominá i hopi esposa tin anhelo, egoismo ta prevalecé i pas ta desparcé. Den un informe publicá, titulá “Con pa Analisá Divorcio Djawe,” Shunsuke Serizawa a bisa: “Si nos ignorá e tendencia dje problema fundamental den e cuestion aki di ‘haci cos na bo manera,’ esta dunando prioridad na propio interes, lo bira diripiente imposibel pa analisá divorcionan awe.”

Sin embargo, Jehova a percurá guia den su Palabra afin cu parehanan casá obediente por disfrutá di un midí di felicidad matrimonial asta den nan estado imperfecto. Isao a sigui e direccion di Dios i awor ta disfrutando di un bida di famia felis. Laga nos mira con principio di Bijbel ta yuda hende fortalecé e enlace matrimonial.

Papia Cu Otro

Den hopi matrimonio, falta di comunicacion, tendencia di culpa otro i actitud egoista ta haci cu ta difícil pa esposo i esposa comprendé emocion di otro. “Siendo cu compartimentu di sintimentu ta un rekisito adelantá pa intimidad, e último aki ta rekerí confiansa cabal. I awe confiansa ta scars,” segun investigador Caryl S. Avery. Un acumulacion di sintimentu compartí di mas profundo ta edificá tal confiansa. Esaki ta rekerí comunicacion di curason-pa-curason entre esposo i esposa.

Proverbio ta usa un ilustracion pa animá e compartimentu di pensamentu íntimo, bisando: “Conseho den curason di un homber ta manera awa profundo, pero e homber di dicernimentu ta esun cu lo sak’é afó.” (Proverbio 20:5) Partnernan matrimonial mester usa dicernimentu i saca afó e pensamentunan profundo den curason di nan casá. Imaginá bo cu bo partner ta trastorná. En bes di respondé: “Mi mes tabatin un dia pisá,” pakico no puntra bondadosamente: “Bo tabatin un dia pisá? Kico a pasa?” Por tuma tempu i esfuerso pa scucha bo casá, pero generalmente ta mas placentero i satisfaciente pa dedicá tempu den e manera ei cu ora bo ignorá bo partner i hañá bo ta trata cu emocionnan cargá cu ta explotá despues.

Pa gana confiansa, cada un mester ta onesto i purba expresá sintimentu den un manera cu e otro partner por comprendé. E Palabra di Dios ta insta pa “papia e berdad, pasobra nos ta miembro cu ta pertenecé un n’e otro.” (Efesio 4:25) Papiamentu di e berdad ta rekerí dicernimentu. Suponé un esposa ta sinti cu e no ta wordu tendí. Promé cu e papia, e mester considerá e proverbio: “Cualkier un cu ta retené su dichonan ta poseé conocimentu, i un homber di dicernimentu ta calmu di spiritu.” (Proverbio 17:27) En bes di acusá su casá, “Nunca bo no ta scuchá mi!” lo ta muchu mas mihó pa expresá den un manera calmu su sintimentunan promé cu frustracion i decepcion edificá den dje. Kisas lo e por revelá con e ta sinti dor di bisa algu asina aki, “Mi sa cu bo ta ocupá, pero pasando un poco mas tempu cu bo lo hací mi masha felis.”

Realmente, “tin un frustracion di plan caminda no tin papiamentu confidencial.” (Proverbio 15:22) Bo partner stimá bo, pero esei no ta nificá cu e por lesa bo pensamentu. Cu tacto bo mester laga bo partner sa con bo ta sinti. Esaki lo yudá boso, como pareha casá cristian, haci ahustenan amoroso afin di “observá e unidad di spiritu den e enlace unidor di pas.”—Efesio 4:2, 3.

Tuma Kazuo por ehempel, kende tabata un homber di cua su esposa tabata manda riba dje i cu a gusta hunga weg’i placa. El a haña su mes ta chambucá den debe cu a montoná te na basta cien mil florin. Fiando placa pa cancelá su debenan, el a sink mas hundu den lodo. Despues el a cuminsá studia Bijbel i finalmente a haña e curashi pa conta su esposa tocante su problemanan. E tabata prepará pa enfrentá su acusacionnan. Sin embargo, el a keda sorprendí ora su esposa, kende a studia Bijbel pa mas tantu tempu, a contestá den un manera calmu: “Laga nos purba saca afó con nos ta haci cancelá e debenan.”

Cuminsando e siguiente dia, nan a bishitá nan creditornan i a cuminsá paga nan debenan, asta bendiendo nan cas. A tuma casi un aña pa cancelá e debenan. Kico a cambia Kimie, su esposa? E ta bisa: “E palabranan di Filipense capítulo 4, versículo 6 i 7, en berdad ta cierto. ‘No keda ansioso riba nada, sino cu den tur cos via oracion i súplica huntu cu gradicimentu, duna di conocé boso peticionnan na Dios; i e pas di Dios cu ta surpasá tur pensamentu lo warda boso curason i boso facultadnan mental mediante Cristo Jesus.’” El a agregá: “Un amiga di mi, sorprendí pa mira con alegre mi tabata apesar di dificultad, a cuminsá studia Bijbel cu mi.” Kazuo i su esposa a bautisá desde e tempu ei i awor ta disfrutando di un bida di famia felis.

Ademas di confia otro dor di papia e berdad, esposo i esposanan cu tabatin e experencianan mencioná anteriormente a haci algu cu ta yuda parehanan resolvé nan problemanan matrimonial. Nan a comunicá cu e Originador dje areglo di matrimonio, Jehova Dios. Apesar di presion i dificultad cu parehanan ta enfrentá, lo e bendicioná nan cu e pas di Dios cu ta surpasá tur pensamentu si nan ta haci nan esfuerso pa aplicá su principionan i laga sobrá den su man. Haciendo oracion huntu ta specialmente probechoso. E esposo mester hiba delantera i ‘drama su curason’ dilanti Dios, buscando su guia i direccion riba cualkier problema cu e i su casá ta enfrentando. (Salmo 62:8) Jehova Dios definitivamente lo tende tal oracionnan.

Sí, ta posibel pa fortalecé e enlace di matrimonio. Asta awor, bibando cu tur nos imperfeccionnan den un sociedad turbulento, parehanan casá por haña bastante goso den nan relacion. Bo por haña sugerencia adicional práctico i conseho piadoso den e buki Logrando felicidad den bida di famía, cu e Sociedad Watchtower Bible and Tract of New York, Inc., a publicá. Ademas, parehanan cu sinceramente ta traha pa aplicá principio bíblico tin e speransa di ser mará huntu den amor den e binidero mundu nobo trahá pa Dios.