Nan A Haci e Boluntad di Jehova

Jesus Ta Ser Aclamá Como Mesías i Rey!

E MULTITUD ruidoso cu tabata drentando Jerusalem dia 9 di nísan, 33 E.C., a sorprendé hopi hudiu. Aunke no tabata algu straño pa mira hende basha bini den e stad promé cu e Pascu hudiu, e bishitantenan aki tabata diferente. E figura central entre nan tabata un homber coriendo riba yu di un buricu. E homber tabata Jesucristo, i e hendenan tabata plama nan bistí exterior i rama di palma su dilanti segun cu nan tabata grita: “Salba, nos ta roga, e Yu di David! Bendicioná ta esun cu ta bini den e nomber di Jehova! Salb’é, nos ta roga, den haltura ariba!” Ora nan a mira e multitud, hopi hende cu tabat’ei caba den Jerusalem a ser conmoví pa djoin e procesion.—Mateo 21:7-9; Juan 12:12, 13.

Aunke e tabata ser aclamá awor, Jesus tabata sa cu pruebanan tabata sper’é. Wel, den solamente cincu dia, lo el a ser matá den e mésun stad aki! Sí, Jesus tabata sa cu Jerusalem tabata teritorio hostil, i el a organisá su entrada notabel den e stad cu e pensamentu ei mes na mente.

Un Profecia Antiguo Cumplí

Na 518 P.E.C., Zacarías a predicí Jesus su entrada triunfal den Jerusalem. El a skirbi: “Grita den triunfo, O yu muher di Jerusalem. Mira! Bo rey mes ta bini cerca bo. E ta hustu, sí, salbá; humilde, i coriendo riba un buricu, asta riba un animal plenamente desaroyá, yu di un buricu hembra. . . . I e realmente lo papia pas n’e nacionnan; i su gobernacion lo ta di laman pa laman i dje Riu te na finnan dje tera.”—Zacarías 9:9, 10.

Di manera cu Jesus su entrada den Jerusalem dia 9 di nísan a cumpli cu profecia di Bijbel. Esei no tabata un incidente pa casualidad, sino a ser planeá cuidadosamente. Mas promé, miéntras cu Jesus tabata djis pafó di Jerusalem, el a instruí dos di su disipelnan: “Coge caminda p’e pueblito cu ta den boso bista, i un bes boso lo haña un buricu mará, i un yu huntu cuné; los nan i trece nan pa mi. I si un hende bisa boso algu, boso tin cu bisa, ‘E Señor tin mester di nan.’ Cu esei lo e manda nan un bes.” (Mateo 21:1-3) Pero pakico Jesus kier a drenta Jerusalem coriendo riba un buricu, i kico e reaccion dje multitud a nificá?

Un Mensahe Relacioná cu Gobernacion di Rey

Un imágen visual hopi biaha ta mas poderoso cu e palabra papiá. P’esei, tabatin biaha cu Jehova a laga su profetanan actua nan mensahe pa reforsá nan mensahe profético. (1 Reynan 11:29-32; Jeremías 27:1-6; Ezekiel 4:1-17) E medio di comunicacion sumamente visual aki a laga un impresion permanente den mente di asta e observador cu e curason di mas duru. Den un manera similar, Jesus a actua un mensahe poderoso dor di drenta coriendo riba un buricu den e stad di Jerusalem. Con asina?

Den tempu di Bijbel buricu a ser usá pa propósitonan noble. Por ehempel, Sálomon a bai na su ungimentu como rey coriendo riba e “mula hembra” di su tata, un yu mesclá di un buricu machu. (1 Reynan 1:33-40) Pues pa Jesus drenta Jerusalem coriendo riba un buricu lo a nificá cu e tabata presentando su mes como un rey.a E accionnan dje multitud a reforsá e mensahe aki. E grupo, sin duda consistiendo den su mayoria di galileonan, a plama nan bistí exterior dilanti Jesus—un gesto cu ta pone hende corda e anuncio público di Jehú su reinado. (2 Reynan 9:13) E echo cu nan a referí na Jesus como “e Yu di David” a subrayá su derecho legal pa ricibí gobernacion. (Lucas 1:31-33) I e echo cu nan a usa rama di palma evidentemente a mustra nan sumision na su autoridad como rey.—Compará cu Revelacion 7:9, 10.

Pues e procesion cu a drenta Jerusalem dia 9 di nísan a manda e mensahe cla cu Jesus tabata Dios su Mesías i Rey nombrá. Naturalmente, no ta tur hende tabata contentu pa mira Jesus presentá den e manera aki. E fariseonan en particular a haña cu tabata completamente inapropiado pa Jesus ser duná un onor real asina. “Maestro,” nan a exigí, sin duda cu rabia den nan bos, “reprendé bo disipelnan.” Jesus a contestá: “Mi ta bisa boso, Si esakinan keda ketu, e piedranan lo sclama.” (Lucas 19:39, 40) Sí, e Reino di Dios tabata e tema di Jesus su predicacion. El a proclamá e mensahe aki cu curashi sea cu hende a acept’é of laga.

Les pa Nos

Hopi curashi tabata necesario pa Jesus drenta Jerusalem den e manera cu profeta Zacarías a predicí. E tabata sa cu haciendo esei e tabata provocando e rabia di su enemigunan. Promé cu el a subi na shelu, Jesus a comisioná su siguidornan pa predicá e bon nobo dje Reino di Dios i pa “haci disipel di hende di tur nacion.” (Mateo 24:14; 28:19, 20) Pa efectuá e trabou aki tambe ta exigí curashi. No ta tur hende ta contentu pa tende e mensahe. Algun ta indiferente pa cuné, miéntras cu otronan ta opon’é. Algun gobiernu a pone restriccionnan riba e trabou di predicacion of a prohibié totalmente.

Sin embargo, Testigonan di Jehova ta realisá cu e bon nobo dje Reino establecí di Dios mester ser predicá, sea cu hende ta scucha of laga. (Ezekiel 2:7) Segun cu nan ta sigui cumpli cu e trabou salbador di bida aki, nan ta haña e siguransa aki dje promesa di Jesus: “Mira! mi ta cu boso tur e dianan te n’e conclusion dje sistema di cosnan.”—Mateo 28:20.

[Nota]