Testigonan Cristian Na Fabor di Soberania Divino
“‘Boso [mester] declará na tur parti e excelencianan’ di esun cu a yama boso for di scuridad na su lus maraviyoso.”—1 PEDRO 2:9.
1. Ki testimonio eficas a ser duná tocante Jehova den tempunan pre-cristian?
DEN tempunan pre-cristian, un lista largu di testigo cu curashi a duna testimonio cu Jehova ta e único Dios berdadero. (Hebreonan 11:4–12:1) Firme den nan fe, nan a obedecé Jehova su leynan sin miedu i a nenga di haci compromiso den asuntunan di adoracion. Nan a duna un testimonio poderoso na fabor di Jehova su soberania universal.—Salmo 18:21-23; 47:1, 2.
2. (a) Ken ta Jehova su mayor Testigo? (b) Ken a reemplasá e nacion di Israel como Jehova su testigo? Con nos sa esei?
2 E último i mayor testigo pre-cristian tabata Juan Bautista. (Mateo 11:11) E tabatin e privilegio di anunciá e binimentu di Esun Scogí, i el a introducí Jesus como e Mesías primintí. (Juan 1:29-34) Jesus ta Jehova su mayor Testigo, “e testigo fiel i berdadero.” (Revelacion 3:14) Debí cu Israel carnal a rechasá Jesus, Jehova a rechasá nan i a nombra un nacion nobo, e Israel spiritual di Dios, pa ser su testigo. (Isaías 42:8-12; Juan 1:11, 12; Galationan 6:16) Pedro a cita un profecia tocante Israel i a mustra cu esei a aplicá na “e Israel di Dios,” e congregacion cristian, ora el a bisa: “Boso ta ‘un rasa scogí, un sacerdocio real, un nacion santu, un pueblo pa un posesion special, pa boso declará na tur parti e excelencianan’ di esun cu a yama boso for di scuridad na su lus maraviyoso.”—1 Pedro 2:9; Exodo 19:5, 6; Isaías 43:21; 60:2.
3. Kico ta e responsabilidad primario dje Israel di Dios i dje “multitud grandi”?
3 Pedro su palabranan ta mustra cu e responsabilidad primario dje Israel di Dios ta pa duna un testimonio público tocante e gloria di Jehova. Den nos tempu “un multitud grandi” di testigonan cu tambe ta glorificá Dios públicamente a uni cu e nacion spiritual aki. Nan ta sclama cu un bos duru pa tur tende: “Salbacion nos ta debe na nos Dios, kende ta sintá riba e trono, i n’e Lamchi.” (Revelacion 7:9, 10; Isaías 60:8-10) Con e Israel di Dios i nan compañeronan por cumpli cu nan testimonio? Mediante nan fe i obedencia.
Testigonan Falsu
4. Pakico e hudiunan den tempu di Jesus tabata testigonan falsu?
4 Fe i obedencia ta encerá biba segun principionan piadoso. E importancia di esaki ta ser mirá den loke Jesus a bisa tocante e lidernan religioso hudiu di su dia. Esakinan “a sinta den e asiento di Moises” como maestronan dje Ley. Nan asta a manda misionero pa combertí hende no-creyente. Tog, Jesus a bisa nan: “Boso ta crusa laman i tera secu pa haci un solo prosélito, i ora e bira unu, boso ta hacié merecedor pa Gehena dos bes mas tantu cu boso mes.” E fanáticonan religioso aki tabata testigonan falsu—arogante, hipócrita i faltando amor. (Mateo 23:1-12, 15) Na un ocasion Jesus a bisa algun hudiu: “Boso ta di boso tata e Diabel, i boso kier cumpli cu e deseonan di boso tata.” Pakico Jesus lo a bisa un cos asina na miembronan dje nacion scogí di Dios? Pasobra nan no tabata haci caso dje palabranan di Jehova su Testigo di mas grandi.—Juan 8:41, 44, 47.
5. Con nos sa cu cristiandad a duna un testimonio falsu tocante Dios?
5 Den un manera similar, durante e siglonan desde e tempu di Jesus, cientos di miyones di persona den cristiandad a profesá di ta su disipelnan. Sin embargo, nan no a haci e boluntad di Dios i p’esei no ta ser reconocé dor di Jesus. (Mateo 7:21-23; 1 Corintionan 13:1-3) Cristiandad a manda misioneronan den exterior, di cua hopi indudablemente tabata sincero. Sin embargo, nan a siña hende adorá un dios trinitario cu ta kima pecador den candela di fiernu, i mayoria di esnan cu nan combertí ta mustra tiki evidencia di ta cristian. Por ehempel, e pais africano Ruanda tabata un tereno fértil pa misioneronan católico romano. No obstante, católiconan ruandes tabata totalmente enbolbí den e guera étnico recien n’e pais ei. E fruta den e campo di misionero ei ta mustra cu e no a ricibí un berdadero testimonio cristian for di cristiandad.—Mateo 7:15-20.
Bibando Segun Principionan Piadoso
6. Den ki maneranan bon conducta ta un parti vital di dunamentu di testimonio?
6 Mal conducta di parti di esnan cu ta profesá di ta cristian ta trece reproche riba “e caminda dje berdad.” (2 Pedro 2:2) Un cristian berdadero ta biba segun principionan piadoso. E no ta horta, gaña, estafá of cometé inmoralidad. (Romanonan 2:22) Siguramente e no ta mata su próhimo. Esposonan cristian ta dirigí nan famia amorosamente. Esposanan ta apoyá respetuosamente e direccion ei. Yunan ta ser entrená dor di nan mayornan i ta ser prepará asina pa bira adultonan cristian responsabel. (Efesionan 5:21–6:4) Ta cierto cu nos tur ta imperfecto i ta haci fout. Pero un cristian berdadero ta respetá normanan bíblico i ta haci un esfuerso sincero pa aplicá nan. Esaki ta notabel pa otronan i ta duna un testimonio excelente. Na algun ocasion, esnan cu anteriormente a oponé e berdad a observá e bon conducta di un cristian i a ser ganá den e berdad.—1 Pedro 2:12, 15; 3:1.
7. Ki importante ta pa cristiannan stima un e otro?
7 Jesus a mustra un aspecto vital di conducta cristian ora el a bisa: “Den esaki tur lo sa cu boso ta mi disipelnan, si boso tin amor entre boso.” (Juan 13:35) E mundu di Satanas ta caracterisá pa “inhusticia, perversidad, cudishi, maldad, siendo yen di envidia, asesinato, pleitu, engaño, disposicion malicioso, siendo fluisterar, calumniador, odiador di Dios, insolente, halsá, soberbe, inventor di cosnan perhudicial, desobediente na mayornan.” (Romanonan 1:29, 30) Den un ambiente asina, un organisacion mundial caracterisá pa amor lo ta un evidencia poderoso dje spiritu di Dios na accion—un testimonio eficas. Testigonan di Jehova ta un organisacion asina.—1 Pedro 2:17.
Testigonan Ta Studiantenan di Bijbel
8, 9. (a) Con e salmista a ser fortalecé dor di su estudio di Jehova su Ley i meditacion riba dje? (b) Den ki maneranan estudio di Bijbel i meditacion lo fortalecé nos pa sigui duna testimonio?
8 Pa logra duna un testimonio excelente, un cristian mester conocé i stima Jehova su principionan hustu i berdaderamente odia e corupcion dje mundu. (Salmo 97:10) E mundu ta persuasivo den promové su propio pensamentu i su spiritu por ta difícil pa resistí. (Efesionan 2:1-3; 1 Juan 2:15, 16) Kico por yuda nos mantené e actitud mental corecto? Estudio regular i significativo dje Bijbel. E escritor di Salmo 119 a ripití hopi biaha su amor pa Jehova su Ley. E tabata les’é i meditá riba dje constantemente, “henter dia.” (Salmo 119:92, 93, 97-105) Como resultado, e por a skirbi: “Falsedad mi a odia i di berdad mi ta sigui detest’é. Bo ley mi a stima.” Ademas, su amor profundo a conmov’é pa actua. E ta bisa: “Siete biaha pa dia mi a alabá bo pa causa di bo decisionnan hudicial hustu.”—Salmo 119:163, 164.
9 Den un manera similar, nos estudio regular dje Palabra di Dios i meditacion riba dje lo toca nos curason i conmové nos pa ‘alab’é’—duna testimonio tocante Jehova—frecuentemente, asta “siete biaha pa dia.” (Romanonan 10:10) Na armonia cu esaki, e escritor dje promé salmo ta bisa cu un hende cu ta meditá regularmente riba Jehova su palabranan “siguramente lo yega di ta manera un palu plantá cantu di coriente di awa, cu ta duna su propio fruta den su temporada i di cua su blachinan no ta marchitá, i tur cos cu e haci lo tin éxito.” (Salmo 1:3) Apostel Pablo tambe a mustra e poder dje Palabra di Dios ora el a skirbi: “Tur Scritura ta inspirá di Dios i ta probechoso pa siña, pa reprendé, pa rectificá, pa disipliná den husticia, pa e homber di Dios por ta henteramente competente, completamente ekipá pa tur bon obra.”—2 Timoteo 3:16, 17.
10. Kico ta bisto tocante Jehova su pueblo den e último dianan aki?
10 E crecementu rápido den e cantidad di adoradornan berdadero den e siglo 20 aki ta muestra dje bendicion di Jehova. Sin ningun duda, como grupo, e Testigonan aki di tempu moderno na fabor di soberania divino a cultivá amor pa Jehova su ley den nan curason. Mescos cu e salmista, nan ta ser conmoví pa obedecé Su ley i duna testimonio fielmente “di dia i anochi” tocante e gloria di Jehova.—Revelacion 7:15.
Jehova Su Obranan Poderoso
11, 12. Kico a ser lográ dor dje milagernan cu Jesus i su siguidornan a efectuá?
11 Den e promé siglo, spiritu santu a duna e fiel testigonan cristian poder pa haci milager, locual a duna prueba firme cu nan testimonio tabata berdadero. Ora Juan Bautista tabata den prizon, el a manda disipelnan puntra Jesus: “Bo ta Esun Cu Ta Bini, of nos tin cu spera un otro?” Jesus no a contestá sí of no. Mas bien, el a bisa: “Bai boso caminda i informá na Juan loke boso ta tende i mira: E ciegunan ta mira atrobe i e cohonan ta cana, e leprosonan ta ser hací limpi i e surdunan ta tende, i e mortonan ta ser lantá, i esnan pober ta haña e bon nobo declará na nan; i felis ta esun cu no ta haña causa pa tropieso den mi.” (Mateo 11:3-6) E obranan poderoso aki a sirbi como un testimonio pa Juan cu Jesus tabata en berdad “Esun Cu Ta Bini.”—Echonan 2:22.
12 Den un manera similar, algun di Jesus su siguidornan a cura e enfermonan i asta a lanta e mortonan. (Echonan 5:15, 16; 20:9-12) E milagernan aki tabata manera un testimonio for di Dios mes na nan fabor. (Hebreonan 2:4) I obranan asina a demostrá Jehova su poder todopoderoso. Por ehempel, ta cierto cu Satanas, “e gobernante dje mundu,” tin e medionan pa causa morto. (Juan 14:30; Hebreonan 2:14) Pero ora Pedro a lanta e fiel muher Dórcas for di morto, e por a haci esei solamente cu e poder di Jehova, siendo cu ta solamente E por restorá bida.—Salmo 16:10; 36:9; Echonan 2:25-27; 9:36-43.
13. (a) Den ki manera e milagernan di Bijbel ainda ta duna testimonio di Jehova su poder? (b) Con e cumplimentu di profecia ta hunga un parti vital den proba Jehova su Divinidad?
13 Awe, e obranan milagroso ei no ta tuma lugá mas. Nan a cumpli cu nan propósito. (1 Corintionan 13:8) No obstante, ainda nos tin e registro di nan den Bijbel, di cua hopi hende tabata testigo ocular. Ora cristiannan awe ta hala atencion n’e relatonan histórico aki, e obranan ei ainda ta duna un testimonio eficas di Jehova su poder. (1 Corintionan 15:3-6) Ademas, aya den tempu di Isaías, Jehova a señalá na profecia exacto como un prueba sobresaliente cu E ta e Dios berdadero. (Isaías 46:8-11) Hopi profecia di Bijbel inspirá divinamente ta ser cumplí awe—un cantidad di nan riba e congregacion cristian. (Isaías 60:8-10; Daniel 12:6-12; Malakías 3:17, 18; Mateo 24:9; Revelacion 11:1-13) Ademas di señalá cu nos ta bibando den “e último dianan,” e cumplimentu dje profecianan aki ta vindicá Jehova como e único Dios berdadero.—2 Timoteo 3:1.
14. Den ki maneranan e historia di tempu moderno di Testigonan di Jehova ta un testimonio poderoso cu Jehova ta e Señor Soberano?
14 Finalmente, Jehova ainda ta haci cosnan grandi, cosnan maraviyoso, pa su pueblo. E lus aumentante riba berdad di Bijbel ta ser dirigí dor di Jehova su spiritu. (Salmo 86:10; Revelacion 4:5, 6) E aumentonan sobresaliente cu ta ser informá rond mundu ta evidencia cu Jehova ‘ta acelerand’e na su debido tempu.’ (Isaías 60:22) Ora persecucion amargo a dal aden den un pais tras di otro atrabes dje último dianan, e awante balente di Jehova su pueblo tabata posibel debí n’e apoyo fortalecedor di spiritu santu. (Salmo 18:1, 2, 17, 18; 2 Corintionan 1:8-10) Sí, e historia di tempu moderno di Testigonan di Jehova riba su mes ta un testimonio poderoso cu Jehova ta e Señor Soberano.—Zacarías 4:6.
E Bon Nobo Mester Ser Predicá
15. Ki testimonio extenso mester a ser duná dor dje congregacion cristian?
15 Jehova a nombra Israel como su testigo p’e nacionnan. (Isaías 43:10) Sin embargo, solamente algun israelita a haña un mandamentu divino pa bai i predicá na hende no-israelita, i esaki tabata generalmente pa anunciá Jehova su huicionan. (Jeremías 1:5; Jónas 1:1, 2) No obstante, profecianan den e Scritura Hebreo ta indicá cu Jehova un dia lo a dirigí su atencion n’e nacionnan den un manera extenso, i el a haci esaki mediante e Israel spiritual di Dios. (Isaías 2:2-4; 62:2) Promé cu Jesus a subi na cielu, el a manda su siguidornan: “Bai, pues, i haci disipel di hende di tur nacion.” (Mateo 28:19) Miéntras Jesus tabata concentrá riba “e carnénan perdí dje cas di Israel,” su siguidornan a ser mandá na “tur nacion,” asta “n’e parti mas lehano dje tera.” (Mateo 15:24; Echonan 1:8) E testimonio cristian mester a ser tendé dor di henter humanidad.
16. Ki comision e congregacion cristian di promé siglo a cumpli cuné, i te na ki grado?
16 Pablo a mustra cu el a comprendé esaki bon. Pa aña 61 E.C., e por a bisa cu e bon nobo tabata “produciendo fruta i aumentando den tur e mundu.” E bon nobo no tabata limitá na djis un nacion of un secta so, manera esun cu a ocupá su mes cu “adoracion dje angelnan.” Mas bien, el a ser ‘predicá abiertamente den tur creacion cu ta bou di cielu.’ (Colosensenan 1:6, 23; 2:13, 14, 16-18) Den e manera ei e Israel di Dios den e promé siglo a cumpli cu su comision pa “ ‘declará na tur parti e excelencianan’ di esun cu a yama [nan] for di scuridad na su lus maraviyoso.”
17. Con Mateo 24:14 ta sigui haña cumplimentu den un manera extenso?
17 No obstante, e trabou di predicacion ei dje promé siglo tabata simplemente un muestra delantá di loke lo ser lográ durante e último dianan. Mirando padilanti specialmente na nos tempu, Jesus a bisa: “E bon nobo aki dje reino lo ser predicá den tur e tera habitá como un testimonio pa tur nacion; i e ora ei e fin lo yega.” (Mateo 24:14; Marco 13:10) E profecia aki a ser cumplí? En berdad, el a ser cumplí. For di un cuminsamentu chikitu na 1919, e predicacion dje bon nobo a ser extendé awor na mas cu 230 pais. E testimonio ta ser tendé den e regionnan ártico bou di ijs i den e paisnan tropical cayente i húmedo. Continentenan grandi ta ser cubrí, i islanan remoto ta ser localisá pa asina nan habitantenan por ricibí un testimonio. Asta meimei di gran conmocion, manera e guera na Bosnia i Herzegovina, e bon nobo ta sigui ser predicá. Mescos cu den e promé siglo, e testimonio ta produciendo fruta “den tur e mundu.” E bon nobo ta ser anunciá abiertamente “den tur creacion cu ta bou di cielu.” E resultado? Di promé, e resto cu ta keda dje Israel di Dios a ser recogé “for di tur tribu i lenga i pueblo i nacion.” Di dos, e miyones dje “multitud grandi” a cuminsá ser trecé aden for di “tur nacion i tribu i pueblo i lenga.” (Revelacion 5:9; 7:9) Mateo 24:14 ta sigui cumpli den un manera extenso.
18. Kico ta algun cos cu ta ser lográ dor dje predicacion mundial dje bon nobo?
18 E predicacion mundial dje bon nobo ta yuda duna prueba cu e presencia real di Jesus a cuminsá. (Mateo 24:3) Ademas, e ta e medio principal mediante cua “e cosecha dje tera” ta ser recogé, segun cu e ta dirigí hende n’e único berdadero speransa pa humanidad, Jehova su Reino. (Revelacion 14:15, 16) Siendo cu ta solamente cristiannan berdadero ta participá den e predicacion dje bon nobo, e trabou importante aki ta yuda distinguí e cristiannan berdadero for di esnan falsu. (Malakías 3:18) Den e manera aki, e ta resultá den e salbacion di esnan cu ta predicá i tambe di esnan cu ta reaccioná faborablemente. (1 Timoteo 4:16) Mas importante, predicacion dje bon nobo ta trece alabansa i onor na Jehova Dios, esun cu a manda pa e ser hací, cu ta sostené esnan cu ta hacié, i cu ta hacié fructífero.—2 Corintionan 4:7.
19. Ki determinacion tur cristian ta ser animá pa tin segun cu nan ta drenta e aña nobo di sirbishi?
19 Nada straño cu apostel Pablo tabata conmoví pa bisa: “Ai di mi si mi no declará e bon nobo!” (1 Corintionan 9:16) Cristiannan ta sinti mescos awe. Ta un privilegio magnífico i un gran responsabilidad pa ser “colaboradornan di Dios,” tirando e lus dje berdad den e mundu scur aki. (1 Corintionan 3:9; Isaías 60:2, 3) E trabou cu tabatin un cuminsamentu chikitu na 1919 awor a alcansá proporcionnan asombroso. Casi cincu miyon cristian ta dunando testimonio na fabor di soberania divino segun cu nan ta dedicá mas cu mil miyon ora pa aña pa trece e mensahe di salbacion pa otronan. Ta ki un goso pa tene un parti den e trabou aki di santificá Jehova su nomber! Segun cu nos ta drenta e aña di sirbishi di 1996, laga nos keda determiná pa no reducí nos paso. Mas bien, awor mas cu nunca nos lo haci caso di Pablo su palabranan na Timoteo: “Predicá e palabra, ocupá bo den dje urgentemente.” (2 Timoteo 4:2) Segun cu nos ta haci esei, nos ta pidi den oracion cu tur nos curason pa Jehova sigui bendicioná nos esfuersonan.
Bo Ta Corda?
◻ Ken a reemplasá Israel como Jehova su “testigo” p’e nacionnan?
◻ Con conducta cristian ta contribuí na duna un testimonio?
◻ Pakico estudio di Bijbel i meditacion riba dje ta esencial pa e Testigo cristian?
◻ Den ki manera e historia di tempu moderno di Testigonan di Jehova ta sirbi como evidencia cu Jehova ta e Dios berdadero?
◻ Kico ta ser lográ dor dje predicacion dje bon nobo?
[Plachinan na página 15]
Leu for di ser restringí, e bon nobo ta ser declará awor “den tur creacion cu ta bou di cielu”