Ki Futuro Tin Pa Carne i Cabritu?

“Lo e separá hende for di otro, mescos cu un wardador ta separá carné for di cabritu.”—MATEO 25:32.

1, 2. Pakico e comparacion di carné i cabritu mester interesá nos?

JESUCRISTO siguramente tabata e Maestro di mas grandi riba tera. (Juan 7:46) Un di su métodonan di siñansa tabata e uso di comparacion of ilustracion. (Mateo 13:34, 35) Esakinan tabata simpel pero tog poderoso den transmití berdadnan spiritual i profético penetrante.

² Den e comparacion di carné i cabritu, Jesus a señalá na un tempu p’e actua den un capacidad special: “Ora e Yu di hende yega den su gloria, i . . .” (Mateo 25:31) Esaki mester interesá nos pasobra esei ta e ilustracion cu cua Jesus ta concluí su contesta riba e pregunta: “Kico lo ta e señal di bo presencia i dje conclusion dje sistema di cosnan?” (Mateo 24:3) Pero kico esaki ta nificá pa nos?

3. Mas promé den su discurso, kico Jesus a bisa lo desaroyá inmediatamente despues cu e tribulacion grandi cuminsá?

³ Jesus a profetisá cu desaroyonan extraordinario lo bini “inmediatamente despues” dje comienso dje tribulacion grandi, desaroyonan cu nos ta spera. El a bisa cu e ora ei “e señal dje Yu di hende” lo aparecé. Esaki lo afectá profundamente “tur e tribunan dje tera” cu lo “mira e Yu di hende bini riba nubia di cielu cu poder i gran gloria.” E Yu di hende lo ta compañá pa “su angelnan.” (Mateo 24:21, 29-31)a Kico dje comparacion di carné i cabritu? Bijbelnan moderno ta pon’é den capítulo 25, pero e ta parti di Jesus su contesta, dunando mas detaye tocante su binimentu den gloria i enfocando riba su husgamentu di “tur e nacionnan.”—Mateo 25:32.

Representacionnan Simbólico den e Comparacion

4. Ki mencion ta ser hací tocante Jesus na cuminsamentu dje comparacion di carné i cabritu, i ken mas ta ser mencioná?

⁴ Jesus ta cuminsá e comparacion bisando: “Ora e Yu di hende yega.” Probablemente bo sa ken “e Yu di hende” ta. Escritornan di Evangelio hopi biaha a aplicá e expresion ei na Jesus. Asta Jesus mes a haci esei, sin duda teniendo na mente Daniel su vision di “unu manera un Yu di hende” acercando e Anciano di Dianan pa ricibí “gobernacion i dignidad i reino.” (Daniel 7:13, 14; Mateo 26: 63, 64; Marco 14:61, 62) Miéntras Jesus ta esun principal den e comparacion aki, e no ta su so. Mas promé den e discurso aki, manera ta citá na Mateo 24:30, 31, el a bisa cu ora e Yu di hende ‘bini cu poder i gran gloria,’ su angelnan lo hunga un papel vital. Di igual manera, e comparacion di carné i cabritu ta mustra angelnan huntu cu Jesus ora e ta ‘sinta riba su trono glorioso’ pa husga. (Compará cu Mateo 16:27.) Pero e Hues i su angelnan ta den cielu; e hendenan den e comparacion tambe ta den cielu?

5. Con nos por identificá Jesus su “rumannan”?

⁵ Un bistaso n’e comparacion ta revelá tres grupo cu nos mester identificá. Ademas dje carnénan i e cabritunan, e Yu di hende ta agregá e di tres grupo kende su identidad ta crucial pa identificá e carnénan i e cabritunan. Jesus ta yama e di tres grupo aki su rumannan spiritual. (Mateo 25:40, 45) Nan mester ta adoradornan berdadero, pasobra Jesus a bisa: “Ken cu haci e boluntad di mi Tata . . . , esei mes ta mi ruman homber, i ruman muher, i mama.” (Mateo 12:50; Juan 20:17) Mas relevante ainda, Pablo a skirbi di cristiannan cu ta parti dje “simia di Abraham” i kendenan ta yunan di Dios. El a yama esakinan Jesus su “rumannan” i “participante dje yamamentu celestial.”—Hebreonan 2:9–3:1; Galationan 3:26, 29.

6. Ken ta “un dje mas chikitunan” di Jesus su rumannan?

⁶ Pakico Jesus a mencioná “un dje mas chikitunan” di su rumannan? E palabranan ei ta resoná loke e apostelnan a tend’é bisa mas promé. Ora Jesus a haci contraste entre Juan Bautista, kende a muri promé cu Jesus i p’esei tabatin un speransa terenal, cu esnan cu ta alcansá bida celestial, el a bisa: “No a lanta unu mayor cu Juan Bautista; pero esun cu ta menor den e reino di cielu ta mayor cuné.” (Mateo 11:11) Algun persona cu a bai cielu kisas tabata prominente den e congregacion, mescos cu e apostelnan, i otronan tabata ménos prominente, pero nan tur ta Jesus su rumannan spiritual. (Lucas 16:10; 1 Corintionan 15:9; Efesionan 3:8; Hebreonan 8:11) Pues, asta si algun a parce insignificante riba tera, nan tabata su rumannan i mester a ser tratá conforme esei.

Ken e Carnénan i e Cabritunan Ta?

7, 8. Kico Jesus a bisa tocante e carnénan, pues kico nos por concluí tocante nan?

⁷ Nos ta lesa relacioná cu e husgamentu dje carnénan: “[Jesus] lo bisa esnan cu ta na su man drechi, ‘Bini, boso cu a ser bendicioná dor di mi Tata, heredá e reino prepará pa boso for dje fundamentu di mundu. Pasobra mi a haña hamber i boso a duná mi algu di come; mi a haña sed i boso a duná mi algu di bebe. Mi tabata un stranhero i boso a ricibí mi hospitalariamente; sunú, i boso a bistí mi. Mi a bira malu i boso a cuidá mi. Mi tabata den prizon i boso a bishitá mi.’ E ora ei e hustunan lo contest’é cu e palabranan, ‘Señor, ki dia nos a mirá bo cu hamber i a duná bo cuminda, of cu sed, i a duná bo algu di bebe? Ki dia nos a mirá bo un stranhero i a ricibí bo hospitalariamente, of sunú, i a bistí bo? Ki dia nos a mirá bo malu of den prizon i a bishitá bo?’ I contestando e rey lo bisa nan, ‘Di berdad mi ta bisa boso, Te n’e grado cu boso a hacié na un dje mas chikitunan aki di mi rumannan, boso a hacié na mi.’ ”—Mateo 25:34-40.

⁸ Obviamente, e carnénan husgá digno pa ser na Jesus su man drechi di onor i fabor ta representá un clase di hende. (Efesionan 1:20; Hebreonan 1:3) Kico nan a haci i na ki tempu? Jesus ta bisa cu nan bondadosamente, respetuosamente i generosamente a dun’é cuminda, cos di bebe i di bisti, yudand’e ora e tabata malu of den prizon. Ora e carnénan bisa cu nan no a haci esaki na Jesus personalmente, e ta mustra cu sí nan a apoyá su rumannan spiritual, e resto di cristiannan ungí, pues den e sentido ei nan a hacié na dje.

9. Pakico e comparacion no ta aplicá durante e Milenio?

⁹ E comparacion no ta aplicá durante e Milenio, pasobra e ungínan e tempu ei lo no ta personanan humano cu ta sufri di hamber, sed, malesa of encarcelacion. Sin embargo, hopi di nan a experenciá eseinan durante e conclusion dje sistema di cosnan aki. For dje tempu cu Satanas a ser tirá abou na tera, el a haci e resto un obheto special di su rabia, treciendo mofa, tortura i morto riba nan.—Revelacion 12:17.

10, 11. (a) Pakico ta irazonabel pa pensa cu e carnénan ta incluí tur hende cu ta haci un obra bondadoso na Jesus su rumannan? (b) Ken e carnénan ta representá adecuadamente?

¹⁰ Jesus ta bisando cu tur hende cu ta haci un bondad chikitu na un di su rumannan, manera ofrecé un pida pan of un glas di awa, ta cualificá como un dje carnénan aki? Ta cierto cu rindiendo tal bondad por reflehá bondad humano, pero realmente, ta parce cu hopi mas ta enbolbí cu e carnénan dje comparacion aki. Jesus siguramente no tabata refiriendo, por ehempel, na ateonan of cleronan cu pa casualidad ta haci un acto bondadoso na un di su rumannan. Al contrario, dos biaha Jesus a yama e carnénan e “hustunan.” (Mateo 25:37, 46) Pues e carnénan mester ta esnan cu durante un periodo di tempu a sali na yudansa di—apoyando activamente—Cristo su rumannan i a ehercé fe te n’e grado di ricibí un posicion hustu dilanti Dios.

¹¹ Durante e siglonan, hopi hende, manera Abraham por ehempel, a disfrutá di un posicion hustu. (Santiago 2:21-23) Noe, Abraham i otro personanan fiel ta incluí entre e “otro carnénan” cu lo heredá bida den Paradijs bou dje Reino di Dios. Den tempunan recien miyones mas a aceptá adoracion berdadero como otro carné i a bira “un solo tou” cu e ungínan. (Juan 10:16; Revelacion 7:9) E personanan aki cu speransa terenal ta reconocé Jesus su rumannan como embahadornan dje Reino i p’esei a yuda nan—literalmente i spiritualmente. Jesus ta considerá como hací na dje loke e otro carnénan ta haci pa su rumannan riba tera. Hende asina cu ta na bida ora Jesus yega pa husga e nacionnan lo ser husgá como carné.

12. Pakico e carnénan lo por puntra di ki manera nan tabata bondadoso cu Jesus?

¹² Si e otro carnénan ta predicando e bon nobo cu e ungínan i ta yudando nan awor, pa ki motibu nan ta puntra: “Señor, ki dia nos a mirá bo cu hamber i a duná bo cuminda, of cu sed, i a duná bo algu di bebe?” (Mateo 25:37) Lo por tin vários motibu. Esaki ta un comparacion. Pa medio di dje, Jesus ta mustra su interes profundo den su rumannan spiritual; e ta sinti cu nan, e ta sufri cu nan. Jesus a bisa anteriormente: “Esun cu ricibí boso ta ricibí mi tambe, i esun cu ricibí mi ta ricibí tambe esun cu a mandá mi.” (Mateo 10:40) Den e ilustracion aki, Jesus ta extendé e principio, mustrando cu loke ta ser hací (bon of malu) na su rumannan ta yega te den cielu; ta como si fuera e ta ser hací na dje den cielu. Tambe, aki Jesus ta enfatisá Jehova su norma pa husgamentu, haciendo cla cu Dios su huicio, sea faborabel of condenatorio, ta válido i hustu. E cabritunan no por ofrecé e excuus, ‘Wel, si solamente nos a mirá bo personalmente.’

13. Pakico hende semehante na cabritu kisas lo dirigí nan mes na Jesus como “Señor”?

¹³ Unabes nos comprendé na ki tempu e huicio mustrá den e comparacion aki ta ser administrá, nos ta haña un bista mas cla ken e cabritunan ta. E cumplimentu ta ora “e señal dje Yu di hende lo aparecé den cielu, i e ora ei tur e tribunan dje tera lo bati nan mes den lamentacion, i nan lo mira e Yu di hende bini . . . cu poder i gran gloria.” (Mateo 24:29, 30) Sobrebibientenan dje tribulacion riba Babilonia e Grandi cu a trata e rumannan dje Rey cu odio awor kisas desesperadamente ta dirigí nan mes n’e Hues como “Señor,” sperando pa salba nan bida.—Mateo 7:22, 23; compará cu Revelacion 6:15-17.

14. Riba ki base Jesus lo husga e carnénan i e cabritunan?

¹⁴ Sin embargo, Jesus su huicio lo no ta basá riba pretencionnan desesperá di esnan cu ántes tabata baidó di misa, ateo of otro personanan. (2 Tesalonicensenan 1:8) En bes di esei, e hues lo repasá e condicion di curason i accionnan di pasado di hende pa cu asta “un dje mas chikitunan aki [di su rumannan].” Ta cierto cu e cantidad di cristiannan ungí cu a sobra riba tera ta menguando. Sin embargo, tanten cu e ungínan, cu ta forma “e esclabo fiel i discreto,” ta sigui percurá alimento spiritual i guia, carnénan prospectivo tin un oportunidad di haci bon n’e clase di esclabo, mescos cu e ‘multitud grandi for di tur nacion i tribu i pueblo’ a haci.—Revelacion 7:9, 14.

15. (a) Con hopi hende a demostrá di ta manera cabritu? (b) Pakico nos mester evitá di haci e declaracion si un persona ta sea un carné of un cabritu?

¹⁵ Con e rumannan di Cristo i e miyones di otro carnénan uní cu nan como un solo tou a ser tratá? Hopi hende kisas no a atacá personalmente e representantenan di Cristo, pero tampoco nan a trata su pueblo di un manera amoroso. Preferando e mundu malbado, esnan semehante na cabritu ta rechasá e mensahe di Reino, sea tendiend’e directamente of indirectamente. (1 Juan 2:15-17) Naturalmente, den e análisis final, Jesus ta esun kende ta nombrá pa administrá huicio. No ta na nos pa determiná ken ta carné i ken ta cabritu.—Marco 2:8; Lucas 5:22; Juan 2:24, 25; Romanonan 14:10-12; 1 Corintionan 4:5.

Ki Futuro Tin pa Cada Grupo?

16, 17. Ki futuro e carnénan lo tin?

¹⁶ Jesus a duna su huicio dje carnénan: “Bini, boso cu a ser bendicioná dor di mi Tata, heredá e reino prepará pa boso for dje fundamentu di mundu.” Ki un invitacion caluroso—“Bini”! Na kico? Na bida eterno, manera el a expresá djis despues: “E hustunan [lo drenta] den bida eterno.”—Mateo 25:34, 46.

¹⁷ Den e comparacion dje talentonan, Jesus a mustra loke ta ser rekerí di esnan cu lo reina cuné den cielu, pero den e comparacion aki e ta mustra loke ta ser sperá dje súbditonan dje Reino. (Mateo 25:14-23) Netamente debí na nan apoyo di henter alma n’e rumannan di Jesus, e carnénan ta heredá un lugá den e region terenal di su Reino. Nan lo disfrutá di bida riba un tera paradísico—un prospecto cu Dios a prepará pa nan “for dje fundamentu di mundu” di humanidad rescatabel.—Lucas 11:50, 51.

18, 19. (a) Jesus lo administrá ki huicio n’e cabritunan? (b) Con nos por ta sigur cu e cabritunan lo no enfrentá sufrimentu eterno?

¹⁸ Ki un contraste cu e huicio ehecutá riba e cabritunan! “E ora ei lo e bisa en buelta na esnan cu ta na su man robes, ‘Bai for di mi, boso cu a ser maldicioná, na candela eterno prepará p’e Diabel i su angelnan. Pasobra mi a haña hamber, pero boso no a duná mi nada di come, i mi a haña sed, pero boso no a duná mi nada di bebe. Mi tabata un stranhero, pero boso no a ricibí mi hospitalariamente; sunú, pero boso no a bistí mi; malu i den prizon, pero boso no a cuidá mi.’ E ora ei nan tambe lo contestá cu e palabranan, ‘Señor, ki dia nos a mirá bo cu hamber of cu sed of un stranhero of sunú of malu of den prizon i nos no a sirbí bo?’ E ora ei lo e contestá nan cu e palabranan, ‘Di berdad mi ta bisa boso, Te na grado cu boso no a hacié na un dje mas chikitunan aki, boso no a hacié na mi.’ ”—Mateo 25:41-45.

¹⁹ Studiantenan di Bijbel sa cu esaki no por kier men cu alma inmortal di esnan semehante na cabritu lo sufri den un candela eterno. No, pasobra hende ta alma; nan no ta poseé un alma inmortal. (Génesis 2:7; Eclesiástes 9:5, 10; Ezekiel 18:4) Sentenciando e cabritunan pa “candela eterno,” e Hues kier men destruccion sin un futuro speransa, cua tambe lo ta e fin permanente p’e Diabel i su demoñonan. (Revelacion 20:10, 14) P’esei, Jehova su Hues ta establecé huicionan opuesto. E ta bisa n’e carnénan, “Bini”; n’e cabritunan, “Bai for di mi.” E carnénan lo heredá “bida eterno.” E cabritunan lo ricibí “cortamentu eterno.”—Mateo 25:46.b

Kico Esaki Ta Nificá pa Nos?

20, 21. (a) Cristiannan tin ki trabou importante pa haci? (b) Ki trabou di dividí ta tumando lugá awor? (c) Kico lo ta e situacion di hende ora e comparacion di carné i cabritu cuminsá haña cumplimentu?

²⁰ E cuater apostelnan cu a tende Jesus su contesta tocante e señal di su presencia i e conclusion dje sistema di cosnan tabatin hopi cos pa considerá. Nan lo tabatin cu keda lantá i vigilá. (Mateo 24:42) Tambe nan lo tabatin cu haci e trabou di duna testimonio mencioná na Marco 13:10. Testigonan di Jehova ta enérgicamente enbolbí den e trabou ei awe.

²¹ Pero, kico e comprendimentu nobo aki dje comparacion di carné i cabritu ta nificá pa nos? Wel, hende ya caba ta scogiendo na cua banda nan kier ta. Algun ta riba ‘e caminda hanchu cu ta hiba na destruccion,’ miéntras otronan ta purba keda riba ‘e caminda pertá cu ta hiba na bida.’ (Mateo 7:13, 14) Pero e tempu ora Jesus lo pronunciá huicio final riba carné i cabritu describí den e comparacion ta den futuro ainda. Ora e Yu di hende yega den e papel di Hues, lo e determiná cu hopi cristian berdadero—realmente “un multitud grandi” di carné dedicá—lo cualificá pa pasa dor dje parti final di “e tribulacion grandi” i drenta den e mundu nobo. E prospecto ei mester ta awor un fuente di goso. (Revelacion 7:9, 14) N’e otro banda, un cantidad inmenso for di “tur e nacionnan” lo a resultá di ta mescos cu cabritu caprichoso. Nan “lo bai pa cortamentu eterno.” Ki un alivio p’e tera!

22, 23. Ya cu e cumplimentu dje comparacion ta pa futuro ainda, pakico nos trabou di predicacion ta vital awe?

²² Miéntras cu e huicio describí den e comparacion ta den futuro cercano, asta awor aki algu vital ta tumando lugá. Nos como cristiannan ta enbolbí den un trabou salbador di bida di proclamá un mensahe cu ta causa un division entre hende. (Mateo 10:32-39) Pablo a skirbi: “Pasobra ‘tur hende cu inbocá e nomber di Jehova lo ser salbá.’ Sin embargo, con nan lo inbocá esun den ken nan no a pone fe? Con, na nan turno, nan lo pone fe den esun di ken nan no a tende? Con, na nan turno, nan lo tende sin un hende pa predicá?” (Romanonan 10:13, 14) Nos ministerio público ta alcansando hende den mas cu 230 pais cu e nomber di Dios i su mensahe di salbacion. E rumannan ungí di Cristo ainda ta hibando delantera den e trabou aki. Aproximadamente cincu miyon dje otro carnénan a uni cu nan awor. I hende rond mundu ta reaccionando n’e mensahe cu e rumannan di Jesus ta proclamá.

²³ Hopi hende ta haña nos mensahe tende segun cu nos ta predicá di cas pa cas of informalmente. Otronan por haña sa di Testigonan di Jehova i loke nos ta representá den maneranan desconocí pa nos. Ora e tempu di huicio yega, te na ki grado Jesus lo tene hende responsabel pa loke nan comunidad a haci i pa loke mayornan ta haci na nan yunan? Nos no por bisa, i no tin sentido pa speculá. (Compará cu 1 Corintionan 7:14.) Awe hopi hende ta cera porta p’e pueblo di Dios, ta haci mofa di nan of ta participá den persecucion abierto contra nan. Pues, esaki ta un tempu crucial; hende asina por ta desaroyando den esnan cu Jesus lo husga como cabritu.—Mateo 10:22; Juan 15:20; 16:2, 3; Romanonan 2:5, 6.

24. (a) Pakico ta importante pa individuonan reaccioná faborablemente na nos predicacion? (b) E studio aki a yudá bo personalmente tene ki actitud pa cu bo ministerio?

²⁴ Sin embargo, afortunadamente hopi ta reaccioná faborablemente, ta studia e Palabra di Dios i ta bira Testigo di Jehova. Algun cu actualmente ta semehante di cabritu por cambia i bira manera carné. E punto ta cu esnan cu ta reaccioná i ta apoyá activamente e resto dje rumannan di Cristo dje manera ei ta dunando evidencia awor cu lo percurá e base pa nan ser poné na Jesus su man drechi ora, den futuro cercano, e sinta riba su trono pa administrá huicio. Esakinan ta i lo sigui ser bendicioná. Pues, e comparacion aki mester stimulá nos na mas actividad celoso den e ministerio cristian. Promé cu ta muchu lat, nos lo kier haci tur loke ta na nos alcance pa proclamá e bon nobo di Reino i den e manera ei duna otronan e oportunidad pa reaccioná. E ora ei ta na Jesus pa administrá huicio, condenatorio of faborabel.—Mateo 25:46.

[Notanan]

Bo Ta Corda?

◻ Ki paralelonan entre Mateo 24:29-31 i Mateo 25:31-33 ta mustra cu e comparacion di carné i cabritu tin un futuro aplicacion, i na ki tempu esei lo ta?

◻ Ken ta “un dje mas chikitunan” dje rumannan di Jesus?

◻ Con Jesus su uso dje expresion “e hustunan” ta yuda nos identificá ken esakinan ta representá i ken nan no ta representá?

◻ Aunke e comparacion lo ser cumplí den futuro, pakico nos predicacion awor ta importante i urgente?

[Kuadro/Plachi na página 24]

RIPARA E PARALELONAN

Mateo 24:29-31 Mateo 25:31-33

Tin angelnan huntu cuné Angelnan ta yega huntu cuné

[Rekonosementu]

Garo Nalbandian