Cana cu Dios—Cu Eternidad na Bista

“Nos . . . lo cana den e nomber di Jehova nos Dios te na tempu indefiní, asta pa semper.”—MIKEAS 4:5.

1. Pakico por yama Jehova e “Rey di eternidad”?

JEHOVA DIOS no tabatin principio. Bijbel ta yam’é apropiadamente “e Anciano di Dianan,” ya cu su existencia ta extendé sin fin den pasado. (Daniel 7:9, 13) Jehova lo tin un futuro eterno tambe. E so ta “Rey di eternidad.” (Revelacion 10:6; 15:3) I den su bista, mil aña ta “djis manera e dia di ayera ora el a pasa, i manera un warda di anochi.”—Salmo 90:4.

2. (a) Kico ta Dios su propósito pa hende obediente? (b) Riba kico nos mester enfocá nos speransa i plannan?

² Ya cu e Dunador di bida ta eterno, e por a ofrecé n’e promé pareha humano, Adam i Eva, e prospecto di bida sin fin den Paradijs. Sin embargo, pa motibu di desobedencia, Adam a perde e derecho riba bida eterno, pasando picá i morto na su desendientenan. (Romanonan 5:12) Pero e rebelion di Adam no a stroba e propósito original di Dios. Jehova su boluntad ta pa hende obediente biba pa semper, i lo e cumpli cu su propósito sin falta. (Isaías 55:11) Ta masha apropiado, anto, pa nos enfocá nos speransa i plannan riba sirbi Jehova cu eternidad na bista. Aunke nos kier keda tene “e dia di Jehova” bon na mente, ta vital pa corda cu nos meta ta pa cana cu Dios pa semper.—2 Pedro 3:12.

Jehova Ta Actua na Su Tempu Señalá

3. Con nos sa cu Jehova tin un “tempu señalá” pa cumpli cu su propósito?

³ Como esnan cu ta cana cu Dios, nos ta profundamente interesá den cumpli cu su boluntad. Nos sa cu Jehova ta e Gran Observador di Tempu, i nos tin confiansa cu e nunca ta keda sin cumpli cu su propósito na su tempu señalá. Por ehempel, “ora e límite completo dje tempu a yega, Dios a manda su Yu.” (Galationan 4:4) E angel a bisa apostel Juan cu tin un “tempu señalá” p’e cumplimentu dje cosnan profético cu el a mira den señal. (Revelacion 1:1-3) Tin “e tempu señalá p’e mortonan ser husgá.” (Revelacion 11:18) Mas cu 1.900 aña pasá, apostel Pablo a bisa bou di inspiracion cu Dios “a fiha un dia den cua e tin e propósito di husga e tera habitá den husticia.”—Echonan 17:31.

4. Con nos sa cu Jehova ta deseá di pone un fin n’e mal sistema di cosnan aki?

⁴ Jehova lo trece un fin n’e mal sistema di cosnan aki, pasobra e mundu djawe ta trece reproche riba su nomber. Malbadonan a florecé. (Salmo 92:7) Cu nan palabra i accion, nan ta insultá Dios, i ora e mira hende ofendé i persiguí su sirbidónan, esei ta pena su curason. (Zacarías 2:8) Nada straño cu Jehova a decretá cu pronto lo e caba cu henter e organisacion di Satanas! Dios a determiná exactamente ki tempu esaki lo tuma lugá, i cumplimentu di profecia di Bijbel ta mustra claramente cu nos ta bibando awor den “e tempu di fin.” (Daniel 12:4) Pronto lo e actua p’e bendicion di tur esnan cu ta stim’é.

5. Con Lot i Habacuc a mira e condicionnan rond di nan?

⁵ Jehova su sirbidónan di pasado a anhelá pa mira fin di maldad. Hustu Lot “tabata mashá afligí p’e entrega di hende desafiadó di ley na conducta inmoral.” (2 Pedro 2:7) Afligí p’e condicionnan den cua profeta Habacuc tabata, el a roga: “Te ki dia, o Jehova, mi tin cu grita pa yudansa, sin cu bo tende? Te ki dia lo mi sclama na bo pa yudansa contra violencia, sin cu bo ta salba? Pakico bo ta hací mi wak loke ta perhudicial, i bo ta sigui mira simpel penoso afan? I pakico tin plundermentu i violencia dilanti mi, i pakico pleitu ta sosodé i contencion ta tuma lugá?”—Habacuc 1:2, 3.

6. Kico Jehova a bisa como contesta riba e oracion di Habacuc, i kico nos por siña for di esaki?

⁶ Jehova a contestá Habacuc parcialmente cu e palabranan aki: “E vision ta ainda pa e tempu señalá, i e ta sigui ansha te n’e fin, i lo e no bisa un mentira. Asta si e tarda, keda den expectativa di dje; pasobra lo e ser realisá sin falta. Lo e no ta lat.” (Habacuc 2:3) Asina Dios a duna di conocé cu lo e actua na “e tempu señalá.” Aunke e por parce di tarda, Jehova lo cumpli cu su propósito—sin falta!—2 Pedro 3:9.

Sirbi cu Celo Incansabel

7. Aunke Jesus no tabata sa precis ki tempu e dia di Jehova lo bini, con el a efectuá su actividadnan?

⁷ Nos mester sa Jehova su tempu exacto pa sucesonan tuma lugá promé cu nos por cana cuné cu celo? No, esei no ta necesario. Considerá algun ehempel. Jesus tabata profundamente interesá den e tempu cu Dios su boluntad lo sosodé riba tera mescos cu den shelu. Sí, Cristo a siña su siguidónan pidi: “Nos Tata cu ta den shelu, laga bo nomber sea santificá. Laga bo reino bini. Laga bo boluntad sosodé, mescos cu den shelu, tambe riba tera.” (Mateo 6:9, 10) Aunke Jesus tabata sa cu e peticion aki lo a ser contestá, e no tabata sa e tempu exacto pa cosnan tuma lugá. Den su gran profecia relacioná cu e fin dje sistema di cosnan aki, el a bisa: “En cuanto e dia i ora ei ningun hende no sa, ni e angelnan di shelu ni e Yu, sino solamente e Tata.” (Mateo 24:36) Siendo cu Jesucristo ta para central den e realisacion dje propósitonan di Dios, lo e ta directamente enbolbí den e ehecucion dje enemigunan di su Tata celestial. Pero, tempu Jesus tabata riba tera, ni e no tabata sa ki tempu Dios lo a actua. Esei a hacié ménos celoso den Jehova su sirbishi? Claro cu no! Ora e disipelnan di Jesus a mir’é limpia e tempel celosamente, nan “a corda cu ta pará skirbí: ‘E celo pa bo cas lo devorá mi.’” (Juan 2:17; Salmo 69:9) Jesus a tene su mes completamente ocupá cu e trabou cu Dios a mand’é haci, i el a hacié cu un celo incansabel. Tambe el a sirbi Dios cu eternidad na bista.

8, 9. Ora e disipelnan a puntra Jesus tocante restoracion dje Reino, kico el a bisa nan i con nan a reaccioná?

⁸ Esaki tabata e caso tambe cu Cristo su disipelnan. Jesus a reuní cu nan djis promé cu el a subi na shelu. E relato ta bisa: “Awor, ora nan a reuní, nan a cuminsá puntr’é: ‘Señor, bo ta restorá e reino pa Israel n’e tempu aki?’” Mescos cu nan Doño, nan a anhelá p’e Reino bini. Pero Jesus a contestá: “No ta pertenecé na boso pa haña conocimentu di tempunan of temporadanan cu e Tata a pone bou di su mes hurisdiccion; pero boso lo ricibí poder ora e spiritu santu yega riba boso, i boso lo ta testigo di mi tantu den Jerusalem como den henter Hudea i Samaria i te na e parti mas lehano dje tera.”—Echonan 1:6-8.

⁹ No tin indicacion cu e contesta aki a desanimá e disipelnan. En bes di esei, nan tabata intensamente ocupá den e trabou di predicá. Den un par di siman, nan a yena Jerusalem cu nan siñansa. (Echonan 5:28) I den 30 aña, nan a expandé nan actividad di predicá te n’e grado cu Pablo por a bisa cu e bon nobo a ser predicá “den tur creacion cu ta bou di shelu.” (Colosensenan 1:23) Aunke e Reino no tabata ‘restorá na Israel’ manera e disipelnan a spera incorectamente, ni tabata establecí den shelu durante nan bida, nan a sigui sirbi Jehova celosamente cu eternidad na bista.

Examiná Nos Motibunan

10. E echo cu nos no sa ki dia Dios lo destruí e sistema di Satanas ta permití nos proba kico?

¹⁰ Awe Jehova su sirbidónan tambe ta anhelá pa mira e fin dje sistema di cosnan malbado aki. Pero, nos interes principal no ta nos liberacion pa drenta den e mundu nobo cu Dios a primintí. Nos kier mira Jehova su nomber santificá i su soberania vindicá. P’esei, nos por alegrá cu Dios no a bisa nos e ‘dia ni ora’ cu el a fiha p’e destruccion dje sistema di Satanas. Esaki ta permití nos duna evidencia cu nos ta determiná pa cana cu Dios pa tur eternidad pasobra nos stim’é, i no pasobra nos tin metanan egoista riba término corticu.

11, 12. Den ki manera Satanas a desafiá e integridad di Job, i con e desafio ei ta relacioná cu nos?

¹¹ Manteniendo nos integridad na Dios tambe ta yuda proba cu Diabel tabata ekibocá ora el a acusá cu hustu Job, i pues hende manera e, ta sirbi Dios pa motibu egoista. Despues cu Jehova a describí su sirbidó Job como un homber temeroso di Dios, sin culpa i recto, Satanas a pretendé maliciosamente: “Ta por nada Job a teme Dios? Bo mes no a pone trankera rond di dje i rond di su cas i rond di tur loke e tin na tur banda? Bo a bendicioná e trabou di su man, i su crio di bestia mes a plama riba tera. Pero, pa un cambio, saca bo man, por fabor, i mishi cu tur loke e tin i mira si lo e no maldicioná bo den bo cara mes.” (Job 1:8-11) Dor di warda su integridad bou di prueba, Job a proba cu e pretension malicioso ei tabata falsu.

¹² Dor di pega den un forma similar na un curso di integridad, nos por refutá cualkier acusacion satánico di cu nos ta sirbi Dios solamente pasobra nos sa cu nos ta cerca di haña un recompensa. E echo cu nos no sa e dia exacto cu Dios lo ehecutá su vengansa riba e malbadonan, ta duna nos e oportunidad pa proba cu nos di berdad ta stima Jehova i kier cana den su camindanan pa semper. Esei ta mustra cu nos ta leal na Dios i ta confia den su manera di haci cosnan. Ademas, e echo cu nos no sa ni e dia ni e ora ta yuda nos keda vigilante i spiritualmente lantá pasobra nos ta realisá cu e fin por yega cualkier ora, mescos cu un ladron den anochi. (Mateo 24:42-44) Dor di cana diariamente cu Jehova, nos ta haci su curason alegrá i ta percurá un contesta na Diabel, kende ta haci mofa di dje.—Proverbionan 27:11.

Planea pa Eternidad!

13. Kico Bijbel ta indicá tocante planea pa futuro?

¹³ Esnan cu ta cana cu Dios sa cu ta sabí pa traha plan razonabel pa futuro. Conciente dje problemanan i limitacionnan di behes, hopi hende ta purba haci bon uso di nan hubentud i fortalesa pa nan por tin siguridad financiero ora nan ta mas grandi. Kico anto, di nos futuro spiritual cu ta muchu mas importante? Proverbionan 21:5 ta bisa: “E plannan di esun diligente ta resultá sigur den bentaha, pero ken cu ta purá ta riba caminda sigur pa haña su mes den necesidad.” Ta berdaderamente bentahoso pa planea adelantá cu bista riba eternidad. Siendo cu nos no sa precis ki dia e fin dje sistema aki lo yega, nos tin cu pensa un poco riba nos necesidadnan di futuro. Pero laga nos keda balansá i pone interesnan divino na promé lugá. Hende cu ta falta fe lo por concluí cu bo ta falta vision si bo enfocá bo interesnan riba haci e boluntad di Dios. Pero esei ta e caso?

14, 15. (a) Ki ilustracion Jesus a conta relacioná cu plannan pa futuro? (b) Pakico e homber ricu dje ilustracion di Jesus tabata falta vision?

¹⁴ Jesus a conta un ilustracion iluminador al respecto. El a bisa: “E tereno di un cierto homber ricu a producí bon. P’esei el a cuminsá razoná den su mes, bisando: ‘Kico lo mi haci, ya cu mi no tin mas lugá pa warda mi cosecha?’ Di manera cu el a bisa: ‘Lo mi haci esaki: Lo mi basha mi mangasinanan abou i edificá otronan mas grandi, i ei lo mi warda tur mi grano i tur mi bon cosnan; i lo mi bisa mi alma: “Alma, bo tin hopi bon cos wardá pa hopi aña; bai trankil, come, bebe, gosa.”’ Pero Dios a bis’é: ‘Homber irazonabel, awenochi nan ta exigí bo alma for di bo. Ken anto, lo mester haña loke bo a warda?’ Asina ta pasa cu e hende cu ta warda tesoro pa su mes, pero no ta ricu pa cu Dios.”—Lucas 12:16-21.

¹⁵ Jesus tabata splica cu e homber ricu no tabatin nodi traha pa logra siguridad material pa futuro? No, pasobra e Scritura ta animá trabou duru. (2 Tesalonicensenan 3:10) E eror dje homber ricu tabata cu e no a haci loke tabata necesario pa ta “ricu pa cu Dios.” Asta si e por a disfrutá di su rikesa material pa hopi aña, tog lo el a muri un dia. E tabata falta vision i no a pensa riba eternidad.

16. Pakico nos por dependé cu confiansa riba Jehova pa un futuro sigur?

¹⁶ Cana cu Jehova cu eternidad na bista ta práctico i ta duna muestra di vision. Ta e mihó manera pa planea pa futuro. Aunke ta sabí pa traha plan práctico relacioná cu educacion, empleo i responsabilidadnan di famia, semper nos mester corda cu Jehova nunca ta bandoná su sirbidónan leal. Rey David a canta: “Un homber hóben mi tabata, tambe mi a bira bieu, i tog nunca mi a mira un hende hustu bandoná henteramente, ni su yunan buscando pan.” (Salmo 37:25) Jesus di igual manera a duna siguransa cu Dios lo percurá pa tur esnan cu ta pone e Reino na promé lugá i cu ta cana den e camindanan hustu di Jehova.—Mateo 6:33.

17. Con nos sa cu e fin ta cerca?

¹⁷ Aunke nos ta sirbi Dios cu eternidad na bista, tog nos tin cu keda tene e dia di Jehova bon na mente. Cumplimentu di profecia di Bijbel ta mustra di un manera bibu con cerca e dia ei ta. E siglo aki tabata caracterisá pa guera, pest, temblor i scarcedad di cuminda, huntu cu persecucion di cristiannan berdadero i e predicacion mundial dje bon nobo dje Reino di Dios. Tur esakinan ta rasgonan dje tempu di fin dje mal sistema di cosnan aki. (Mateo 24:7-14; Lucas 21:11) Mundu ta yen di esnan cu ta “stimadó di nan mes, stimadó di placa, presumido, halsá, blasfemadó, desobediente na mayornan, malagradecí, desleal, sin cariño natural, no dispuesto na ningun acuerdo, calumniadó, sin dominio propio, feros, sin amor pa bondad, traicionero, cabesura, hinchá cu orguyo, stimadó di placer mas bien cu stimadó di Dios.” (2 Timoteo 3:1-5) Den e último dianan crítico aki, bida ta difícil pa nos como sirbidó di Jehova. Cuantu nos ta anhelá p’e dia ora e Reino di Jehova lo bari tur maldad! Miéntras tantu, laga nos ta decididu pa cana cu Dios cu eternidad na bista.

Sirbi cu Bida Sin Fin na Bista

18, 19. Kico ta mustra cu fielnan di pasado a sirbi Dios cu eternidad na bista?

¹⁸ Segun cu nos ta cana cu Jehova, laga nos tene na mente e fe cu Abel, Enoc, Noe, Abraham i Sara tabatin. Despues cu Pablo a mencioná nan, el a skirbi: “Den fe tur esakinan a muri, aunke nan no a obtené e cumplimentu dje promesanan, sino a mira nan di leu i a duna nan acohida i a declará públicamente cu nan tabata stranhero i residente temporal den e tera.” (Hebreonan 11:13) E fielnan ei tabata “purba pa alcansá un mihó lugá, esta, unu cu ta pertenecé na shelu.” (Hebreonan 11:16) Den fe, nan a mira padilanti na un mihó lugá bou di gobernacion dje Reino Mesiánico di Dios. Nos por ta sigur cu Dios lo recompensá nan cu bida eterno den e mihó lugá ei: e Paradijs terenal bou di gobernacion di Reino.—Hebreonan 11:39, 40.

¹⁹ Profeta Mikéas a expresá e determinacion dje pueblo di Jehova pa adorá Dios pa tur eternidad. El a skirbi: “Tur pueblo, di nan parti, lo cana cada un den e nomber di nan dios; pero nos, di nos parti, lo cana den e nomber di Jehova nos Dios te na tempu indefiní, asta pa semper.” (Mikéas 4:5) Mikéas a sirbi Jehova lealmente te na su morto. Ora e ser resucitá den e mundu nobo, sin duda e profeta ei lo sigui cana cu Dios pa tur eternidad. Ki un ehempel excelente pa nos cu ta biba leu den e tempu di fin!

20. Kico mester ta nos determinacion?

²⁰ Jehova ta apreciá e amor cu nos ta mustra pa su nomber. (Hebreonan 6:10) E sa cu no ta fácil pa nos mantené integridad na dje den e mundu aki dominá pa Diabel. Sin embargo, miéntras “mundu ta pasa bai . . . esun cu haci e boluntad di Dios ta permanecé pa semper.” (1 Juan 2:17; 5:19) Cu yudansa di Jehova, laga nos ta determiná anto pa wanta e pruebanan cu nos ta enfrentá dia tras dia. Laga nos manera di pensa i estilo di bida enfocá riba e bendicionnan maraviyoso cu nos Tata celestial amoroso a primintí. Esakinan por ta di nos si nos sigui cana cu Dios cu eternidad na bista.—Hudas 20, 21.

Con Lo Bo Respondé?

◻ Kico ta e propósito di Dios pa hende obediente?

◻ Pakico Jehova no a actua ainda pa pone un fin n’e mundu malbado?

◻ Pakico e echo cu nos no sa precis ki dia Dios lo actua no mester mengua nos celo?

◻ Kico ta algun beneficio di cana cu Dios cu eternidad na bista?

[Plachi na página 17]

Pa cana cu Dios nos tin cu sirbié celosamente, mescos cu e promé disipelnan di Cristo a haci