Parti 1: Kreensia Kristian

Den bo estudio di Beibel ku Testigunan di Yehova, bo a siña konosé e bèrdat. Loke bo a siña sin duda a yuda bo pa bo tin un bon relashon ku Dios i a duna bo e speransa di bida eterno den un paradeis bou di e Reino di Dios. Bo fe den e Palabra di Dios a bira fuerte, i bo a eksperensiá bendishon kaba debí na bo kontakto estrecho ku e kongregashon kristian. Bo a bin mira kon Yehova ta trata ku su pueblo awe.—Zak. 8:23.

Awor ku bo ta prepará pa batisá, lo ta bon pa bo repasá nos kreensianan kristian básiko ku e ansianonan di kongregashon. (Heb. 6:1-3) Nos ta pidi Yehova bendishoná tur esfuerso ku bo ta hasi pa konos’é i pa e rekompensá bo ku bida eterno.—Huan 17:3.

1. Dikon bo ke batisá?

2. Ken Yehova ta?

• “Bo sa bon awe, i bo tin ku rekordá den bo kurason ku Yehova ta e Dios berdadero den shelu ariba i na tera abou. No tin otro.”—Deu. 4:39, NW.

• “Abo, kende su nòmber ta Yehova, abo so ta e Haltísimo riba henter tera.”—Sal. 83:18, NW.

3. Dikon ta importante pa bo usa Dios su nòmber personal?

• “Pues, boso mester hasi orashon asin’akí: ‘Nos Tata ku ta den shelu, bo nòmber sea santifiká.’”—Mat. 6:9.

• “Tur hende ku invoká e nòmber di Yehova lo ser salbá.”—Rom. 10:13.

4. Ki ta algun palabra ku Beibel ta usa pa deskribí Yehova?

• “E Dios eterno e SEÑOR, e Kreador di e finnan di tera no ta bira kansá ni fatigá.”—Isa. 40:28.

• “Nos Tata ku ta den shelu.”—Mat. 6:9.

• “Dios ta amor.”—1 Huan 4:8.

5. Kiko bo por duna Yehova Dios?

• “Bo tin ku stima Yehova bo Dios ku henter bo kurason, ku henter bo alma, ku henter bo mente i ku tur bo forsa.”—Mar. 12:30.

• “Ta Yehova bo Dios bo tin ku adorá, i ta na e so bo tin ku rindi sirbishi sagrado.”—Luk. 4:8.

6. Dikon bo ke keda leal na Yehova?

• “Sea sabí, mi yu, i hasi mi kurason kontentu, pa mi por kontestá esun ku reprochá mi.”—Pro. 27:11.

7. Na ken bo ta hasi orashon, i den nòmber di ken bo ta hasi orashon?

• “Di bèrdat bèrdat mi [Hesus] ta bisa boso: Kiko ku boso pidi e Tata den mi nòmber, lo e duna boso.”—Huan 16:23.

8. Tokante kiko bo por hasi orashon?

• “Pues, boso mester hasi orashon asin’akí:‘Nos Tata ku ta den shelu, bo nòmber sea santifiká. Laga bo Reino bini. Laga bo boluntat sosodé, meskos ku den shelu, tambe riba tera. Duna nos awe nos pan di kada dia, i pordoná nos nos debenan, meskos ku nos tambe a pordoná esnan ku debe nos. I no laga nos kai den tentashon, ma libra nos di e Malbado.’”—Mat. 6:9-13.

• “Esaki ta e konfiansa ku nos tin den Dios: kiko ku nos pidié ku ta di akuerdo ku su boluntat, e ta tende nos.”—1 Huan 5:14.

9. Kiko por ta un motibu ku Yehova no ta skucha orashon di un persona?

• “Nan lo sklama na SEÑOR, ma e lo no kontestá nan . . . , pasobra nan echonan tabata malu.”—Mik. 3:4.

• “Yehova su wowo ta riba e hustunan, i su orea ta habrí pa nan súplika; pero Yehova ta kontra esnan ku ta hasi malu.”—1 Ped. 3:12.

10. Ken Hesukristu ta?

• “Simon Pedro a kontest’é: ‘Abo ta Kristu, Yu di e Dios bibu.’”—Mat. 16:16.

11. Pakiko Hesus a bini na tera?

• “E Yu di hende no a bini pa ser sirbí, sino pa sirbi i pa duna su alma komo reskate a kambio di hopi hende.”—Mat. 20:28.

• “Mi [Hesus] tin ku deklará e bon notisia di e Reino di Dios na e otro statnan tambe, pasobra ta pa esaki Dios a manda mi.”—Luk. 4:43.

12. Kon bo por mustra bo gratitut pa e echo ku Hesus a sakrifiká su bida pa bo?

• “El a muri pa tur, pa esnan ku ta biba no biba mas pa nan mes, ma pa esun ku a muri pa nan i a ser lantá for di morto.”—2 Kor. 5:15.

13. Ki outoridat Hesus tin?

• “Mi a risibí tur outoridat den shelu i riba tera.”—Mat. 28:18.

• “Dios a hals’é na un puesto mas haltu i bondadosamente a dun’é e nòmber ku ta riba tur otro nòmber.”—Flp. 2:9.

14. Bo ta kere ku Kuerpo Gobernante di Testigunan di Yehova ta “e esklabo fiel i prudente” ku Hesus a nombra?

• “Ken realmente ta e esklabo fiel i prudente ku su Doño a nombra riba su sirbidónan di kas pa duna nan nan kuminda na e debido tempu?”—Mat. 24:45.

15. Spiritu santu ta un persona?

• “E angel a kontest’é: ‘Spiritu santu lo baha riba bo, i poder di e Haltísimo lo tapa bo. Pa e motibu ei tambe, e yu ku nase lo ser yamá santu i Yu di Dios.’”—Luk. 1:35.

• “P’esei, si boso, aunke boso ta malbado, sa di duna boso yunan bon regalo, kuantu mas e Tata ku ta den shelu lo duna spiritu santu na esnan ku pidié!”—Luk. 11:13.

16. Kon Yehova a usa su spiritu santu?

• “Pa medio dje palabra di Yehova shelu mes a ser trahá, i pa medio dje spiritu di su boka tur e ehérsito di nan.”—Sal. 33:6, NW.

• “Boso lo risibí poder ora spiritu santu baha riba boso, i boso lo ta mi testigunan . . . te na e parti mas leu di tera.”—Echo. 1:8.

• “Ningun profesia di e Skritura ta originá di un interpretashon personal. Pasobra profesia no a sali nunka for di boluntat di hende; mas bien, hende a papia di parti di Dios segun ku spiritu santu tabata guia nan.”—2 Ped. 1:20, 21.

17. Kiko e Reino di Dios ta?

• “I den e dianan di e reinan ei e Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan aki, ma e mes lo dura pa semper.”—Dan. 2:44.

18. Kon e Reino di Dios lo benefisiá bo?

• “Lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.”—Rev. 21:4.

19. Kon bo por sa ku pronto nos lo risibí e bendishonnan di e Reino?

• “E disipelnan a bini nan so serka dje i a puntr’é: ‘Bisa nos: Ki dia e kosnan akí lo sosodé, i kiko lo ta e señal di bo presensia i di konklushon di e era akí?’ I Hesus a kontestá nan: ‘. . . Nashon lo lanta kontra nashon i reino kontra reino, i lo tin skarsedat di kuminda i temblor den un lugá tras di otro. I e bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.’”—Mat. 24:3, 4, 7, 14.

• “Den e último dianan lo bini tempunan krítiko, difísil pa trata kuné. Pasobra hende lo stima nan mes, stima plaka; nan lo ta bromadó, arogante, blasfemadó, desobediente na mayornan, malagradesí, desleal, sin kariño; nan lo no ta dispuesto pa sera ningun akuerdo; nan lo ta kalumniadó, sin dominio propio, feros, sin amor pa loke ta bon, traidor, kabesura, hinchá di orguyo, ku ta stima plaser en bes di stima Dios, ku tin aparensia di ta deboto na Dios, ma ku no ta demostrá e deboshon ei den nan bida.”—2 Tim. 3:1-5.

20. Kon bo ta demostrá ku e Reino ta importante pa bo?

• “Sigui buska anto promé e Reino i e hustisia di Dios.”—Mat. 6:33.

• “Hesus a bisa su disipelnan: ‘Si un hende ke sigui mi, lag’é nenga su mes, kue su staka di tormento i sigui mi kontinuamente.’”—Mat. 16:24.

21. Ken Satanas i e demoñonan ta?

• “Boso ta bini di boso tata, e Diabel . . . E tabata un matadó for di kuminsamentu.”—Huan 8:44.

• “E dragon grandi, e kolebra original, esun ku yama Diabel i Satanas, ku ta gaña henter e tera habitá a ser bentá abou;el a ser bentá abou riba tera i su angelnan a ser bentá abou huntu kuné.”—Rev. 12:9.

22. Di kiko Satanas a akusá Yehova i e personanan ku ta adorá Yehova?

• “E muhé a bisa e kolebra: ‘Di fruta di e palunan di e hòfi nos por kome, ma di fruta di e palu ku ta keda meimei di e hòfi, Dios a bisa: “Boso no mester kome di djé ni mishi kuné, pa boso no muri.”’ I e kolebra a bisa e muhé: ‘Siguramente boso lo no muri! Pasobra Dios sa ku e dia ku boso kome di djé, boso wowo lo habri i boso lo ta manera Dios, konosiendo bon i malu.’”—Gén. 3:2-5.

• “Satanas a kontestá SEÑOR i a bisa: ‘Kueru pa kueru! Sí, tur loke un hende tin e lo duna pa su bida.’”—Yòb 2:4.

23. Kon bo por proba ku Satanas su akusashonnan ta falsu?

• “Sirbié [Dios] ku henter bo kurason.”—1 Kró. 28:9.

• “Te na mi morto lo mi no bandoná mi integridat.”—Yòb 27:5.

24. Dikon hende ta muri?

• “Pa medio di ún hende piká a drenta mundu, i morto pa medio di piká, i asina morto a pasa pa tur hende pasobra nan tur a peka.”—Rom. 5:12.

25. Den ki kondishon e mortonan ta?

• “E bibunan sa ku nan lo muri, ma e mortonan no sa nada.”—Ekl. 9:5.

26. Ki speransa tin pa hende ku muri?

• “Lo bai tin un resurekshon di tantu hende hustu komo inhustu.”—Echo. 24:15.

27. Kuantu hende lo goberná huntu ku Hesus den shelu?

• “Wak, i ata e Lamchi pará riba Seru di Sion, i huntu kuné 144.000 ku tabatin su nòmber i nòmber di su Tata skirbí riba nan frenta.”—Rev. 14:1.