‘Kòrda Riba e Rumannan Ku Ta Dirigí Boso’

APÒSTEL Pablo a bisa ku nos mester kòrda riba e rumannan ku ta dirigí nos, òf literalmente “esnan ku ta goberná boso.” (Heb. 13:7) For di Pentekòste di aña 33 padilanti, e apòstelnan fiel di nos Señor Hesukristu a fungi komo kuerpo gobernante i a perkurá direkshon i guia pa e kongregashon resien formá. (Echo. 6:2-4) Pero pa rònt di aña 49, e kuerpo gobernante a inkluí persona ku no tabata apòstel di Hesus. Pues, ora nan a tuma desishon riba e asuntu di sirkunsishon, e kuerpo gobernante ei tabata konsistí di “e apòstelnan i e ansianonan na Herúsalèm.” (Echo. 15:1, 2) Nan tabatin e responsabilidat di atendé e asuntunan ku tabatin efekto riba e kristiannan den tur kongregashon. Nan tabata manda karta i dekreto ku a fortalesé e kongregashonnan i a yuda e disipelnan keda uní den pensamentu i akshon. E kongregashonnan tabata sumiso na e kuerpo gobernante i a obedesé nan instrukshonnan, i komo resultado, nan a risibí bendishon di Yehova i a sigui prosperá.—Echo. 8:1, 14, 15; 15:22-31; 16:4, 5; Heb. 13:17.

² Despues di morto di e apòstelnan, a surgi un gran apostasia. (2 Tes. 2:3-12) Manera Hesus a profetisá den su komparashon di e trigu i mal yerba, e mal yerba (kristian falsu) lo a ser sembrá meimei di e trigu (kristian ungí). Atraves di siglo, a permití e dos gruponan akí krese huntu te na e tempu di kosecha, ku lo a tuma lugá na “konklushon di un era.” (Mat. 13:24-30, 36-43) Durante tur e añanan ei, e kristiannan ungí a sigui gosa di Hesus su aprobashon, maske no tabatin un kuerpo gobernante òf un kanal ofisial ku e tabata usa pa guia nan. (Mat. 28:20) Sinembargo, Hesus a profetisá ku kos lo a kambia durante e kosecha.

³ Hesus a puntra: “Ken realmente ta e esklabo fiel i prudente?” Ku e pregunta ei, el a introdusí un ilustrashon komo parti di “e señal” ku el a duna relashoná ku e “konklushon di e era akí.” (Mat. 24:3, 42-47) Hesus a indiká ku e esklabo fiel akí lo ta okupá ku e trabou di perkurá alimento spiritual pa Dios su sirbidónan “na e debido tempu.” Meskos ku Hesus a usa un grupo di hòmber, en bes di un hende so, pa dirigí asuntu den e promé siglo, asina tambe e esklabo fiel ku Hesus ta usa durante e konklushon di e era akí ta un grupo di hòmber i no un hende so.

KON NOS POR IDENTIFIKÁ “E ESKLABO FIEL I PRUDENTE”?

⁴ Ken Hesus a nombra pa alimentá su siguidónan? Ta lógiko ku e ta usa e kristiannan ungí riba tera. Beibel ta yama nan e “saserdotenan ku ta sirbi komo rei,” kendenan a haña e trabou di “‘proklamá tur kaminda e kualidatnan ekselente’ di esun ku a yama [nan] for di skuridat na su lus maravioso.” (1 Ped. 2:9; Mal. 2:7; Rev. 12:17) Pero, ta tur kristian ungí ku ta riba tera ta forma parti di e esklabo fiel? Nò. Pensa riba e milager ku Hesus a hasi ora el a alimentá 5.000 hòmber, sin konta hende muhé ku mucha. El a duna su disipelnan e pannan, i nan na nan turno a parti nan pa e multitut. (Mat. 14:19) El a usa un par di hende pa alimentá un multitut di hende. Awe, e ta perkurá kuminda spiritual na e mes manera.

⁵ Pues anto, “e mayordomo fiel, esun prudente,” ta un grupo chikitu di ruman hòmber ungí ku ta direktamente enbolbí den e trabou di prepará i distribuí kuminda spiritual durante e presensia di Kristu. (Luk. 12:42) Durante e último dianan akí, e rumannan ungí ku ta forma “e esklabo fiel i prudente” ta sirbiendo huntu na e sede mundial di Testigunan di Yehova. E ruman hòmbernan ungí akí ta forma Kuerpo Gobernante di Testigunan di Yehova ku nos konosé awe.

⁶ Kristu ta usa e kuerpo akí pa publiká informashon tokante kumplimentu di profesia di Beibel i pa duna guia adekuá riba aplikashon di prinsipio di Beibel den bida diario. E kongregashonnan di Testigunan di Yehova ta sirbi komo e medio pa distribuí e alimento spiritual akí. (Isa. 43:10; Gal. 6:16) Den tempu bíbliko, un esklabo di konfiansa, òf mayordomo, tabata esun enkargá ku maneho di kas di su doño. Di mes manera, e esklabo fiel i prudente tin e enkargo di sòru pa e fiel sirbidónan di Dios. E ta supervisá e trabou di prediká, e programanan pa asamblea i kongreso, nombramentu di e superintendentenan pa sirbi den e diferente funshonnan den e organisashon, produkshon di literatura basá riba Beibel i propiedat material. Tur esaki ta pa benefisio di e “sirbidónan di kas.”—Mat. 24:45.

⁷ Ken anto ta e “sirbidónan di kas”? Den poko palabra, nan ta e personanan ku ta risibí kuminda spiritual. Na kuminsamentu di e último dianan, tur e sirbidónan akí tabata ungí. Pero despues, un multitut grandi di “otro karné” tambe a bin forma parti di e grupo akí. (Huan 10:16) Ámbos grupo ta ser alimentá ku e kuminda spiritual ku e esklabo fiel ta perkurá.

⁸ Durante e tribulashon grandi, ora Hesus bini pa dikta sentensia i ehekutá huisio riba e sistema malbado akí, lo e nombra e esklabo fiel “riba tur su pertenensianan.” (Mat. 24:46, 47) E kristiannan ungí ku ta forma e esklabo fiel lo haña nan rekompensa den shelu komo ko-gobernante ku Kristu huntu ku e restu di e 144.000. Maske lo no bai tin un esklabo fiel i prudente mas riba tera, Yehova i Hesus lo perkurá guia pa e siudadanonan ku lo biba riba tera ku yudansa di hòmber nombrá pa sirbi komo “prens.”—Sal. 45:16.

DIKON NOS MESTER ‘KÒRDA RIBA E RUMANNAN KU TA DIRIGÍ NOS’?

⁹ Tin hopi motibu pakiko nos mester ‘kòrda riba e rumannan ku ta dirigí nos’ i pone nos konfiansa den nan. Dikon esei ta benefisioso pa nos? Apòstel Pablo a bisa: “Nan ta vigilá boso alma i tin ku duna kuenta i rason pa esaki; pa nan por hasié ku goso i no ku suspiro, pasobra esei lo ta perhudisial pa boso.” (Heb. 13:17) Pues, ta importante pa nos ta sumiso i obediente na e guia di esnan ku ta dirigí nos, pasobra nan ta protehá nos i yuda nos mantené un bon relashon ku Yehova.

¹⁰ Na 1 Korintionan 16:14 Pablo a bisa: “Laga tur boso asuntunan tuma lugá ku amor.” P’esei, ora e rumannan akí ta tuma desishon ku tin efekto riba e pueblo di Dios, nan desishonnan ta basá riba amor. Na 1 Korintionan 13:4-8 nos ta lesa: “Amor tin pasenshi i ta bondadoso. Amor no ta yalurs, e no ta broma, e no ta halsa su mes, e no ta komport’é indesentemente, e no ta buska su mes interes, e no ta rabia lihé. E no ta keda kòrda e malu ku hende a hasié. E no ta alegrá ku inhustisia, ma ta alegrá ku loke ta bèrdat. E ta wanta tur kos, kere tur kos, spera tur kos, soportá tur kos. Amor no ta kaba nunka.” Komo ku tur desishon ku ta na benefisio di Yehova su sirbidónan ta basá riba amor, nos tin tur motibu pa sinti nos mes sigur bou di e guia akí. Ademas, e guia ku nan ta duna nos ta un refleho di e amor ku Yehova tin pa nos.

¹¹ E hòmbernan ku Yehova ta usa pa guia su pueblo ta hende imperfekto, meskos ku den promé siglo. Pero leu den pasado tambe Yehova a usa hende imperfekto pa kumpli ku su boluntat. Noe a traha un arka i a prediká tokante e binidero destrukshon di su tempu. (Gén. 6:13, 14, 22; 2 Ped. 2:5) Yehova a nombra Moises pa saka Su pueblo for di Egipto. (Éks. 3:10) Anto el a inspirá hòmber imperfekto pa skirbi Beibel. (2 Tim. 3:16; 2 Ped. 1:21) E echo ku Yehova ta usa hòmber imperfekto awe pa dirigí e trabou di prediká i di hasi disipel no ta motibu pa nos pèrdè konfiansa den su organisashon. Mas bien, esei ta fortalesé nos pasobra nos sa ku hamas e organisashon akí lo por a logra asina tantu sin e apoyo di Yehova. Atraves di aña, e esklabo fiel a vense hopi difikultat, i esei ta demostrá ku e tin e guia di e spiritu di Dios. Yehova ta bendishoná e parti visibel di su organisashon rikamente awe. P’esei, nos ta duna e organisashon akí nos pleno konfiansa i apoyo.

KON NOS POR DEMOSTRÁ NOS KONFIANSA DEN YEHOVA I SU ORGANISASHON?

¹² Un ruman ku ser nombrá pa okupá un puesto di responsabilidat den kongregashon ta demostrá su konfiansa den Yehova i su organisashon ora e aseptá e asignashon ei di buena gana i kumpli fielmente kuné. (Echo. 20:28) Komo proklamadó di Reino, nos ta partisipá ku hopi entusiasmo den e trabou di kas pa kas, hasi rebishita i dirigí estudio di Beibel. (Mat. 24:14; 28:19, 20) Pa nos por benefisiá plenamente di e alimento spiritual riku ku e esklabo fiel ta perkurá, nos ta prepará pa tur nos reunionnan i ta asistí na nan, inkluso nos asamblea- i kongresonan. Nos ta benefisiá mashá di e animashon ku nos ta haña ora nos ta den kompania di nos rumannan na nos reunionnan.—Heb. 10:24, 25.

¹³ Ora nos ta apoyá e organisashon di Yehova ku nos kontribushon material, nos ta duna prueba ku nos tin konfiansa den su organisashon. (Pro. 3:9, 10) Ademas, si nos mira ku nos rumannan ta den nesesidat, nos ta reakshoná mesora. (Gal. 6:10; 1 Tim. 6:18) Nos amor di ruman ta motivá nos pa hasi esei, i nos ta keda buska oportunidat pa mustra nos apresio pa e bondat di Yehova i su organisashon.—Huan 13:35.

¹⁴ Nos ta mustra nos konfiansa tambe den e organisashon ora nos ta apoyá su desishonnan. Esaki ta nifiká ku nos mester ta humilde i sigui e guia di e rumannan ku ta dirigí e kongregashon, manera ansiano i superintendente di sirkuito. E rumannan akí ta “esnan ku ta dirigí” nos, i nos tin ku obedesé i keda sumiso na nan. (Heb. 13:7, 17) Asta si nos no ta komprondé e motibu tras di sierto desishon, nos sa ku e ta pa nos bienestar eterno, i p’esei nos ta apoy’é. Di e manera ei, nos ta mustra ku nos ta sumiso na nos Doño, Hesukristu. Komo resultado, Yehova ta bendishoná nos pasobra nos ta obedesé su Palabra i su organisashon.

¹⁵ Sí, nos tin tur motibu pa konfia e esklabo fiel i prudente plenamente. Satanas, e dios di e mundu akí, ta hasiendo su máksimo esfuerso pa trese reproche riba e nòmber di Yehova i riba Yehova su organisashon. (2 Kor. 4:4) No bira víktima di Satanas su atakenan astuto! (2 Kor. 2:11) E sa ku a keda “masha poko tempu” promé ku e ser tirá den abismo, i e ta determiná pa hala mas tantu sirbidó di Yehova posibel for di Yehova. (Rev. 12:12) Sinembargo, segun ku Satanas ta intensifiká su esfuersonan, laga nos hala mas serka Yehova. Laga nos pone nos konfiansa den Yehova i den e kanal ku e ta usa pa dirigí su pueblo awe. Asina nos hermandat lo ta mas uní.