Rekonosé e Papel di Kristu den e Organisashon di Dios

‘NA PRINSIPIO Dios a krea shelu i tera,’ i tur loke el a traha tabata “masha bon.” (Gén. 1:1, 31) Yehova a krea hende ku un futuro maravioso nan dilanti. Sinembargo, e rebelion den e hòfi di Eden a interumpí hende su felisidat temporalmente. Ma Yehova su propósito pa tera i pa hende no a kambia. Dios a primintí ku lo tin salbashon pa e desendientenan obediente di Adam. Ademas, Yehova lo a restorá adorashon berdadero i destruí Satanas ku tur su obranan malisioso. (Gén. 3:15) Anto e ora ei tur kos lo bira “masha bon” atrobe. Dios lo logra esaki pa medio di su Yu, Hesukristu. (1 Huan 3:8) P’esei ta masha importante pa nos rekonosé e papel di Kristu den e organisashon di Dios.—Echo. 4:12; Flp. 2:9, 11

E PAPEL DI KRISTU

² Ora nos para ketu na e papel di Kristu den e organisashon di Dios, nos ta ripará ku Hesus tin vários funshon. Hesus ta fungi komo Reskatador di humanidat, Sumo Saserdote, Kabes di e kongregashon kristian, i awor, Rei di e Reino di Dios. Si nos meditá riba e diferente funshonnan akí, nos ta haña mas apresio pa e organisashon di Dios i mas amor pa Kristu Hesus. Beibel ta deskribí algun di e funshonnan akí.

³ Durante Kristu su sirbishi riba tera, a bira bisto ku é ta esun ku lo a hasi posibel pa hende obediente rekonsiliá ku Dios. (Huan 14:6) Komo Reskatador di humanidat, Hesus a entregá su bida i a perkurá e reskate pa salba bida di hopi hende. (Mat. 20:28) Pues, Hesus a hasi muchu mas ku pone ehèmpel di bon kondukta. E ta e persona klave den e propósito di Yehova. Ta pa medio di dje so nos por bolbe haña fabor di Dios. (Echo. 5:31; 2 Kor. 5:18, 19) E morto di sakrifisio i e resurekshon di Hesus a habri kaminda pa hende obediente risibí bendishon eterno bou di e gobernashon di Dios su Reino selestial.

⁴ Komo Sumo Saserdote, Hesus por “tene kompashon ku nos debilidatnan” i perkurá pordon pa piká di su sirbidónan dediká aki riba tera. Apòstel Pablo a splika: “Nos tin un sumo saserdote ku por tene kompashon ku nos debilidatnan, unu ku, meskos ku nos, a ser poné na prueba den tur sentido, pero ku a keda sin piká.” Anto despues Pablo a animá tur hende ku ta pone fe den Hesukristu pa hasi bon uso di e provishon ei pa por rekonsiliá ku Dios. El a bisa: “Laga nos aserká e trono di bondat inmeresí i resa na Dios ku frankesa, pa nos por haña miserikòrdia i risibí bondat inmeresí pa yuda nos na e momento apropiá.”—Heb. 4:14-16; 1 Huan 2:2.

⁵ Hesus ta tambe Kabes di e kongregashon kristian. Meskos ku su siguidónan di promé siglo, awe nos no tin mester di un lider humano. Hesus ta duna guia pa medio di spiritu santu i e wardadónan kualifiká, ku ta duna kuenta na dje i na su Tata selestial pa e manera ku nan ta kuida e tou di Dios. (Heb. 13:17; 1 Ped. 5:2, 3) Den un profesia tokante Hesus, Yehova a bisa: “Mira, mi a hasié un testigu pa e pueblonan, un lider i komandante pa e pueblonan.” (Isa. 55:4) Hesus a konfirmá kumplimentu di e profesia akí ora el a bisa su disipelnan: “No laga nan yama boso lider, pasobra ún so ta boso Lider: Kristu.”—Mat. 23:10.

⁶ Hesus a ekstendé e siguiente invitashon na hende: “Bini serka mi, boso tur ku ta traha duru i ku ta kargá, i lo mi refreská boso. Tuma mi yugo riba boso skouder i siña di mi, pasobra mi tin un genio suave i un kurason humilde, i boso alma lo keda refreská. Pasobra mi yugo ta suave, i mi karga no ta pisá.” (Mat. 11:28-30) Esaki ta reflehá su aktitut mental i su deseo pa yuda nos. E manera suave i refreskante ku Hesukristu ta dirigí asuntu den kongregashon ta proba ku e ta “e bon wardadó,” ku ta imitá su Tata selestial, Yehova Dios.—Huan 10:11; Isa. 40:11.

⁷ Den Pablo su karta na e kristiannan na Korinto, el a splika un otro funshon di Hesukristu, ora el a bisa: “E mester reina komo rei te ora Dios pone tur enemigu bou di su pia. Ma ora ku tur kos keda someté na dje, e ora ei e Yu mes tambe lo someté su mes na Esun ku a someté tur kos na dje, pa Dios por ta tur kos pa tur hende.” (1 Kor. 15:25, 28) Hesus tabata Dios su promé kreashon, i promé ku el a bini na tera, el a fungi komo Dios su “trahadó eksperto.” (Pro. 8:22-31) Tempu ku Hesus tabata riba tera, semper el a hasi boluntat di Dios. El a soportá e prueba di mas difísil ku un hende por pasa aden i a muri fiel na su Tata. (Huan 4:34; 15:10) E Yu di Dios tabata fiel te na morto i p’esei Dios a resusit’é i a dun’é e derecho di ta Rei di e Reino selestial. (Echo. 2:32-36) Anto komo Rei di e Reino, Kristu Hesus tin e asignashon importante di dirigí miónes di kriatura selestial pa nan eliminá e gobièrnunan humano i kaba ku tur maldat for di riba tera. (Pro. 2:21, 22; 2 Tes. 1:6-9; Rev. 19:11-21; 20:1-3) E ora ei e Reino selestial di Dios den man di Kristu lo ta e úniko outoridat riba henter tera.—Rev. 11:15.

KIKO REKONOSÉ E PAPEL DI KRISTU TA ENSERÁ?

⁸ Hesukristu ta un ehèmpel perfekto pa nos. El a haña e enkargo pa kuida nos. Pa nos por benefisiá di su kuido amoroso i atento, nos mester keda leal na Yehova i kana pareu ku su organisashon progresivo.

⁹ E siguidónan di Hesus den promé siglo a rekonosé e papel ku Kristu a hunga den e organisashon di Dios. Nan a traha uní bou di Kristu, nan Lider, i a sigui su guia ku nan a risibí pa medio di spiritu santu. (Echo. 15:12-21) Apòstel Pablo a referí na e union ei den e kongregashon di kristian ungí ora el a skirbi: “Papiando e bèrdat, laga nos krese pa medio di amor den tur kos na armonia ku esun ku ta e kabes, esta, Kristu. Pa medio di dje henter e kurpa ta armoniosamente uní i ta kooperá ku otro mediante tur e djòintnan ku ta duna loke tin mester. Ora kada parti di e kurpa ta funshoná manera mester ta, esaki ta kontribuí na kresementu di e kurpa segun ku e ta edifiká su mes den amor.”—Efe. 4:15, 16.

¹⁰ Ora tur ruman den kongregashon ta kooperá ku otro i ta traha na armonia ku otro bou di nan Lider, Kristu, e kongregashon ta progresá i den dje lo reina un ambiente kaluroso di amor, ku ta un “laso perfekto di union.”—Huan 10:16; Kol. 3:14; 1 Kor. 12:14-26.

¹¹ E susesonan mundial ku ta kumpli ku profesia di Beibel ta duna prueba bon kla ku for di aña 1914 Hesukristu ta Rei di e Reino di Dios. E ta reina awor meimei di su enemigunan. (Sal. 2:1-12; 110:1, 2) Kiko esaki ta nifiká pa nos awe? Pronto Hesus lo hunga su papel komo Rei di reinan i Señor di señornan ora e trese e huisio di Dios kontra su enemigunan. (Rev. 11:15; 12:10; 19:16) E ora ei Yehova lo kumpli ku e promesa ku el a hasi na prinsipio di e rebelion di hende, i lo salba hende ku ta na man drechi di Kristu. (Mat. 25:34) Esta felis nos ta di a rekonosé e papel ku Dios a duna Kristu! Laga nos keda uní pa rònt mundu nos kumpli ku nos sirbishi bou di e guia di Kristu durante e último dianan akí.