Hasi Pas ku Bo Ruman Promé

Imaginá ku bo ta biba na Galilea, den tempu di Hesus. Bo a biaha bai Herúsalèm pa e Fiesta di Kabaña (òf Ramada). E stat ta yenyen di hende ku a bini for di tur skina di e pais pa nan tambe adorá Yehova. Bo ke ofresé un sakrifisio na Yehova. Pues, ku bo kabritu huntu ku bo, bo ta kuminsá bai den direkshon di e tèmpel. Ku masha difikultat bo ta pasa den e hanchinan yenyen di hende. Ora bo yega, bo ta mira ku kasi no tin lugá mas den tèmpel; tin hopi hende ku tambe a bini pa ofresé sakrifisio. Por fin bo bùrt a yega pa duna e saserdote bo kabritu. Pero, nèt ora bo ta bai dun’é, bo ta kòrda ku un ruman, ku por ta den e multitut òf un kaminda den e stat, tin algu kontra bo. Hesus a splika kiko bo mester hasi. (Lesa Mateo 5:24.) Kon abo i e ruman ku ta sintié ofendí tin ku hasi pas manera Hesus a bisa? Analisá e siguiente puntonan i marka e kontesta korekto.

BO MESTER . . .

• papia ku bo ruman solamente si bo ta haña ku e tin un bon motibu pa sintié ofendí

• purba di konvensé bo ruman ku e ta eksagerá òf ku e mes tambe tin falta

• skucha ku pasenshi ora bo ruman ta splika kon e ta sintié. Asta si bo no ta komprondé kompletamente, di kurason pidié despensa ku bo a lag’é sintié malu. Pidié despensa tambe pa e problemanan ku bo a krea sin ku bo por a yuda

BO RUMAN MESTER . . .

• kana bisa tur hende den e kongregashon kon malu bo a trat’é

• tira e asuntu na bo kara i papia di delaster un detaye i eksigí pa bo atmití bo fout

• rekonosé ku bo mester tabatin kurashi i ku bo mester tabata humilde pa aserk’é, i pordoná bo di kurason

Aunke awendia nos no tin ku ofresé sakrifisio di bestia mas, kon nos por hasi pas ku nos rumannan pa nos adorashon por ta aseptabel den bista di Dios, manera Hesus a siña nos?