Bo Oracionnan Ta “Prepará Manera Censia”?

“Laga cu mi oracion por ser prepará manera censia dilanti bo.”—SALMO 141:2.

1, 2. Kico kimamentu di censia a simbolisá?

JEHOVA DIOS a manda su profeta Moises prepará censia sagrado pa usa n’e tabernáculo di adoracion di Israel. E fórmula divino a rekerí un mescla di cuater substancia aromático. (Exodo 30:34-38) En berdad e tabatin un holó dushi.

² E pacto di Ley den cua Dios a introducí e nacion di Israel a stipulá pa kima censia tur dia. (Exodo 30:7, 8) Uso di censia tabatin nificacion special? Sí, pasobra e salmista a canta: “Laga cu mi oracion por ser prepará manera censia dilanti bo [Jehova Dios], hisamentu di mi plant’i mannan, manera e ofrenda di grano di anochi.” (Salmo 141:2) Den e buki di Revelacion, apostel Juan ta describí esnan rond dje trono celestial di Dios cu conchi di oro yen di censia den nan man. “I,” segun e relato inspirá, “e censia ta nificá oracion dje santunan.” (Revelacion 5:8) Pues anto, kimamentu di censia di holó dushi a simbolisá oracion aceptabel cu Jehova su sirbidónan ta haci di dia i anochi.—1 Tesalonicensenan 3:10; Hebreonan 5:7.

3. Kico mester por yuda nos ‘prepará nos oracionnan manera censia dilanti Dios’?

³ Si nos kier pa Dios aceptá nos oracionnan, nos tin cu haci oracion na dje den nomber di Jesucristo. (Juan 16:23, 24) Pero con nos por mehorá e calidad di nos oracionnan? Wel, si nos analisá algun ehempel di Bijbel, nan mester por yuda nos prepará nos oracionnan manera censia dilanti Jehova.—Proverbionan 15:8.

Haci Oracion cu Fe

4. Den ki manera fe ta relacioná cu oracion aceptabel?

⁴ Si nos kier pa nos oracionnan subi na Dios manera censia di holó dushi, nos tin cu haci oracion cu fe. (Hebreonan 11:6) Ora ancianonan cristian haña un persona spiritualmente enfermo cu ta receptivo pa nan yudansa bíblico, nan “oracion di fe lo cura esun enfermo.” (Santiago 5:15) Oracion hací cu fe ta agradá nos Tata celestial. Ora nos ta studia e Palabra di Dios huntu cu oracion tambe nos ta agrad’é. E salmista a manifestá un actitud excelente ora el a canta: “Lo mi hisa mi plant’i mannan na bo mandamentunan cu mi a stima, i lo mi interesá mi mes intensamente den bo regulacionnan. Siñá mi bondad, sensates i conocimentu mes, pasobra den bo mandamentunan mi a ehercé fe.” (Salmo 119:48, 66) Laga nos ‘habri nos plant’i mannan’ den oracion humilde i ehercé fe dor di cumpli cu e mandamentunan di Dios.

5. Kico nos mester haci si nos ta falta sabiduria?

⁵ Suponé cu nos ta falta e sabiduria necesario pa trata cu un prueba. Tal bes nos no ta sigur cu un cierto profecia di Bijbel ta cumpliendo awor. En bes di laga esaki pone nos perde nos stabilidad spiritual, laga nos pidi Dios pa sabiduria. (Galationan 5:7, 8; Santiago 1:5-8) Claro cu nos no por spera pa Dios contestá nos na un manera espectacular. Nos tin cu mustra cu nos oracionnan ta sincero dor di haci loke e ta spera di henter su pueblo. Ta necesario pa nos studia Bijbel i asina edificá nos fe cu yudansa dje publicacionnan cu “e esclabo fiel i discreto” ta percurá. (Mateo 24:45-47; Hosué 1:7, 8) Tambe nos tin cu progresá den conocimentu dor di participá den e reunionnan dje pueblo di Dios riba un base regular.—Hebreonan 10:24, 25.

6. (a) Kico nos tur mester realisá tocante nos tempu i e cumplimentu di profecia di Bijbel? (b) Ademas di pidi p’e nomber di Jehova ser santificá, kico nos mester haci?

⁶ Awe, algun cristian ta sigui tras di interesnan personal i carera. Esei ta indicá cu nan no ta conciente mas cu nos ta hopi leu awor aki den “e tempu di fin.” (Daniel 12:4) Ta apropiado pa compañeronan creyente pidi den oracion p’e personanan ei rebibá of reforsá nan fe den e evidencia bíblico cu Cristo su presencia a cuminsá na 1914 ora Jehova a instal’é como Rey celestial, i cu e ta gobernando meimei di su enemigunan. (Salmo 110:1, 2; Mateo 24:3) Nos tur mester realisá cu e sucesonan profetisá, manera e destruccion di religion falsu, “Babilonia e Grandi,” e atake satánico di Gog di Magog riba e pueblo di Jehova, i nan liberacion di parti di Dios e Todopoderoso n’e guera di Armagedon, por dal aden sorprendentemente di ripiente i cu tur esei por sosodé den un periodo di tempu relativamente corticu. (Revelacion 16:14, 16; 18:1-5; Ezekiel 38:18-23) P’esei, laga nos pidi Dios su yudansa pa keda lantá spiritualmente. Laga nos tur pidi di henter curason p’e nomber di Jehova ser santificá, pa su Reino bini, i pa su boluntad sosodé riba tera mescos cu den shelu. Sí, mare nos sigui ehercé fe i duna evidencia cu nos oracionnan ta sincero. (Mateo 6:9, 10) Sí, laga tur hende cu ta stima Jehova busca promé e Reino i su husticia i participá mas tantu posibel den predicá e bon nobo promé cu e fin yega.—Mateo 6:33; 24:14.

Alabá i Gradicí Jehova

7. Kico ta impresioná bo di David su oracion di cua un parti ta na 1 Crónicanan 29:10-13?

⁷ Un manera importante pa ‘prepará nos oracionnan manera censia’ ta dor di expresá alabansa i gratitud sincero na Dios. Rey David a haci un oracion asina ora e i e pueblo di Israel a contribuí pa cu e construccion dje tempel di Jehova. David a bisa den oracion: “Sea bendicioná, o Jehova, e Dios di Israel nos tata, for di tempu indefiní, sí, te na tempu indefiní. Di bo, o Jehova, ta e grandesa i poder i bunitesa i excelencia i dignidad; pasobra tur loke tin den shelu i riba tera ta di bo. Di bo e reino ta, o Jehova, Esun cu tambe bo a halsa como cabes riba tur. Rikesa i gloria tin pa causa di bo, i abo ta dominá tur cos; i den bo man tin poder i potencia, i den bo man tin abilidad pa haci grandi i pa duna forsa na tur. I awor, o nos Dios, nos ta gradicí bo i ta alabá bo bunita nomber.”—1 Crónicanan 29:10-13.

8. (a) Ki palabranan di alabansa den Salmo 148 pa 150 ta toca bo curason specialmente? (b) Si nos tambe tin e sintimentunan expresá den Salmo 27:4, kico nos lo haci?

⁸ Ki bunita expresion di alabansa i gratitud! Nos oracionnan por laga di ta mes elocuente cu esun di David, pero nan por ta mes sincero sí. E buki di Salmo ta yen di oracion di gradicimentu i di alabansa. Tin palabranan exkisito di alabansa den Salmo 148 te cu 150. Hopi salmo ta expresá gratitud na Dios. “Un cos mi a pidi Jehova,” David a canta. “Esei ta loke lo mi busca, cu mi por biba den e cas di Jehova tur e dianan di mi bida, pa contemplá e agradabilidad di Jehova i pa mira su tempel cu aprecio.” (Salmo 27:4) Laga nos actua na armonia cu oracionnan asina dor di participá cu celo den tur e actividadnan di Jehova su multitudnan congregá. (Salmo 26:12) Dor di haci esaki i meditá riba e Palabra di Dios tur dia, nos lo haña hopi motibu pa acercá Jehova cu alabansa i gratitud sincero.

Busca Jehova Su Yudansa Humildemente

9. Con Rey Asa a haci oracion, i cu ki resultado?

⁹ Si nos ta sirbi Jehova di henter curason como su Testigonan, nos por ta sigur cu e ta tende nos oracionnan pa yudansa. (Isaías 43:10-12) Tuma por ehempel Rey Asa di Huda. E promé 10 añanan di su reinado di 41 aña (977-937 P.E.C.) tabata caracterisá pa pas. Anto un dia un ehército di un miyon homber bou di Zera, e etiopio, a invadí Huda. Aunke Asa i su hombernan tabata hopi ménos na cantidad, nan a sali pa enfrentá e invasornan. Sin embargo, promé cu e bataya, Asa a haci oracion cu fervor. El a reconocé Jehova su poder pa libra hende. Rogando pa yudansa, e rey a bisa: “Riba bo nos ta lèn, i den bo nomber nos a bini contra e multitud aki. O Jehova, abo ta nos Dios. No laga hende mortal retené forsa contra bo.” Ora Jehova a salba Huda pa causa di su gran nomber, esei a resultá den victoria total. (2 Crónicanan 14:1-15) Sea cu Dios ta libra nos for di un prueba of ta fortalecé nos pa want’é, no tin duda cu e ta tende nos súplicanan pa su yudansa.

10. Ora nos no sa con pa trata cu un cierto crísis, con e oracion di Rey Jehósafat por resultá probechoso?

¹⁰ Si nos no sa con pa trata cu un cierto crísis, nos por tin sigur cu Jehova lo tende nos súplicanan pa yudansa. Esaki a keda ilustrá den e dianan di Rey Jehósafat di Huda, kende su reinado di 25 aña a cuminsá na 936 P.E.C. Ora e forsanan combiná di Moab, Amon i e region montañoso di Seir, a menasá Huda, Jehósafat a roga: “O nos Dios, lo bo no ehecutá huicio contra nan? Pasobra den nos no tin poder dilanti e multitud grandi aki cu ta bini contra nos; i nos mes no sa kico nos tin cu haci, pero nos wowonan ta den bo direccion.” Jehova a contestá e oracion humilde ei, bringando pa Huda dor di hinca e enemigunan den un confusion di manera cu nan mes a mata otro. Como resultado, e nacionnan den becindario a haña miedu, i pas a prevalecé den Huda. (2 Crónicanan 20:1-30) Ora nos ta falta e sabiduria necesario pa enfrentá un crísis, mescos cu Jehósafat, nos por bisa den oracion: ‘Nos no sa kico nos tin cu haci, pero nos wowo ta den bo direccion, Jehova.’ Spiritu santu por pone nos corda puntonan bíblico necesario pa resolvé e problema, of Dios por yuda nos den un manera cu ta surpasá razonamentu humano.—Romanonan 8:26, 27.

11. Kico nos por siña tocante oracion for di Nehemías su accionnan en coneccion cu e muraya di Jerusalem?

¹¹ Kisas nos tin cu perseverá den oracion pa haña yudansa di Dios. Nehemías a lamentá, yora, yuna i haci oracion pa hopi dia tocante Jerusalem su muraya ruiná i e situacion grave i difícil dje habitantenan di Huda. (Nehemías 1:1-11) Evidentemente su oracionnan a subi na Dios manera censia di holó dushi. Un dia Rey Artahérhes di Persia a puntra Nehemías cu a mustra deprimí: “Kico ta loke bo ta trata di haña?” “Mesora,” Nehemías ta bisa, “mi a haci oracion n’e Dios di shelu.” Dios a contestá e oracion corticu i silencioso ei, pasobra e rey a permití Nehemías cumpli cu e deseo di su curason dor di bai Jerusalem pa reconstruí su muraya ruiná.—Nehemías 2:1-8.

Laga Jesus Siña Bo Con pa Haci Oracion

12. Con lo bo resumí e puntonan principal di Jesus su oracion modelo cu bo mes palabra?

¹² Di tur e oracionnan registrá den e Scritura, e oracion modelo cu Jesucristo a presentá manera censia di holó dushi ta specialmente instructivo. E Evangelio di Lucas ta bisa: “Un cierto di [Jesus] su disipelnan a bis’é: ‘Señor, siña nos haci oracion, mescos cu Juan tambe a siña su disipelnan.’ Anto el a bisa nan: ‘Ora boso ta haci oracion, bisa: “Tata, laga bo nomber sea santificá. Laga bo reino bini. Duna nos nos pan djawe segun e necesidad dje dia. I pordoná nos nos picánan, pasobra nos mes tambe ta pordoná tur hende cu debe nos; i no hinca nos den tentacion.”’” (Lucas 11:1-4; Mateo 6:9-13) Laga nos considerá e oracion aki. E no tabata algu pa recitá, sino a sirbi como un guia.

13. Con lo bo splica e importancia dje palabranan, “Tata, laga bo nomber sea santificá”?

¹³ “Tata, laga bo nomber sea santificá.” Pa Jehova su sirbidónan dedicá, ta un privilegio special pa dirigí nan mes na dje como Tata. Mescos cu yu ta acercá un tata misericordioso mesora cu cualkier preocupacion, nos mester dedicá tempu regularmente na oracion digno i reverencial na Dios. (Salmo 103:13, 14) Nos oracionnan mester reflehá nos interes den e santificacion di Jehova su nomber pasobra nos ta deseá pa mir’é limpi di tur e desonra cu a ser montoná riba dje. Sí, nos ta deseá p’e nomber di Jehova ser apartá i mantené como santu, of sagrado.—Salmo 5:11; 63:3, 4; 148:12, 13; Ezekiel 38:23.

14. Kico kier men pidi den oracion, “Laga bo reino bini”?

¹⁴ “Laga bo reino bini.” E Reino ta e gobernacion di Jehova expresá mediante e gobiernu celestial Mesiánico den man di su Yu i Jesus su “santunan” asociá. (Daniel 7:13, 14, 18, 27; Revelacion 20:6) Pronto e Reino lo “bini” contra tur opositor terenal dje soberania di Dios, eliminando nan for di esena. (Daniel 2:44) E ora ei e boluntad di Jehova lo ser realisá riba tera, mescos cu den shelu. (Mateo 6:10) Ki un goso esei lo trece pa tur criatura cu ta sirbi e Soberano Universal lealmente!

15. Pidi Jehova pa “nos pan djawe” ta indicá kico?

¹⁵ “Duna nos nos pan djawe segun e necesidad dje dia.” Pidi Jehova p’e alimento “djawe” ta indicá cu nos no ta pidi percuracion na gran abundancia, sino pa nos necesidadnan diario so. Aunke nos ta confia den Dios p’e duna, nos tambe ta traha i ta usa tur medio apropiado disponibel na nos pa por obtené alimento i otro necesidadnan. (2 Tesalonicensenan 3:7-10) Claro cu nos tin cu gradicí nos Percurador celestial, pasobra ta su amor, sabiduria i poder ta tras dje percuracionnan aki.—Echonan 14:15-17.

16. Con nos por ricibí Dios su pordon?

¹⁶ “Pordoná nos nos picánan, pasobra nos mes tambe ta pordoná tur hende cu debe nos.” Siendo cu nos ta imperfecto i pecaminoso, nos no por satisfacé Jehova su normanan perfecto completamente. P’esei, nos tin cu pidi su pordon a base di Jesus su sacrificio di rescate. Pero si nos kier p’e “Tendedor di oracion” aplicá e balor dje sacrificio ei na nos picánan, nos mester ta repentí i dispuesto pa ricibí cualkier disiplina cu e duna nos. (Salmo 65:2; Romanonan 5:8; 6:23; Hebreonan 12:4-11) Ademas, nos por spera pa Dios pordoná nos solamente si nos “a pordoná nos debedónan,” esta, esnan cu a peca contra nos.—Mateo 6:12, 14, 15.

17. Kico e palabranan “No hinca nos den tentacion” ta nificá?

¹⁷ “No hinca nos den tentacion.” Tin bes Bijbel ta bisa cu Jehova ta haci cierto cosnan ora cu eigenlijk e ta djis permití nan. (Rut 1:20, 21) Dios no ta tenta nos pa cometé picá. (Santiago 1:13) Tentacion pa haci malu ta originá cu Diabel, nos carni pecaminoso, i e mundu aki. Satanas ta e Tentador cu ta purba manipulá nos pa peca contra Dios. (Mateo 4:3; 1 Tesalonicensenan 3:5) Ora nos haci e peticion, “No hinca nos den tentacion,” nos ta pidiendo Dios pa no laga nos faya ora nos haña e tentacion pa desobedec’é. E por guia nos pa nos no sucumbí i pa Satanas, “e malbado,” no pone nos peca.—Mateo 6:13; 1 Corintionan 10:13.

Obra na Armonia cu Bo Oracionnan

18. Con nos por traha na armonia cu nos oracionnan pa logra un matrimonio i bida di famia felis?

¹⁸ Jesus su oracion modelo a cubri puntonan principal, pero nos por haci oracion tocante cualkier asuntu. Por ehempel, nos por haci oracion tocante nos deseo pa logra un matrimonio felis. Pa keda puru te ora nos casa, nos por pidi pa dominio propio. Pero e ora ei laga nos obra na armonia cu nos oracionnan dor di evitá literatura i entretenimentu inmoral. Laga nos ta determiná tambe pa ‘casa solamente den Señor.’ (1 Corintionan 7:39; Deuteronomio 7:3, 4) Una bes casá, nos lo tin cu obra na armonia cu nos oracionnan pa logra felicidad dor di aplicá e conseho di Dios. I si nos tin yu, no ta suficiente pa pidi den oracion pa nan bira fiel sirbidó di Jehova. Nos tin cu haci tur loke ta na nos alcanse pa inculcá e berdadnan di Dios den nan mente mediante studio di Bijbel i dor di asistí regularmente na reunionnan cristian cu nan.—Deuteronomio 6:5-9; 31:12; Proverbionan 22:6.

19. Kico nos mester haci si nos ta pidiendo den oracion tocante nos ministerio?

¹⁹ Nos ta pidi bendicion den e ministerio? Anto laga nos actua na armonia cu e oracionnan ei dor di participá significativamente den e trabou di predicá e Reino. Si nos ta pidi pa haña oportunidad pa yuda otro hende subi riba e caminda pa bida eterno, nos tin cu tene bon registro di personanan interesá i ser dispuesto pa incluí studio di Bijbel cu nan den nos programa. Kico si nos ta deseá di cuminsá e trabou di predicá di tempu completo como pionero? Anto laga nos dal paso na armonia cu nos oracion dor di aumentá nos actividad di predicá i dor di participá den e ministerio cu pioneronan. Dor di tuma e pasonan ei, nos lo mustra cu nos ta traha na armonia cu nos oracionnan.

20. Kico e siguiente artículo lo trata cuné?

²⁰ Si nos ta sirbiendo Jehova fielmente, nos por tin sigur cu lo e contestá nos oracionnan cu ta na armonia cu su boluntad. (1 Juan 5:14, 15) Sin duda nos a saca puntonan beneficioso for di un examinacion di algun dje oracionnan registrá den Bijbel. Nos siguiente artículo lo considerá mas instruccion bíblico pa esnan cu ta deseá di ‘prepará nan oracionnan manera censia dilanti Jehova.’

Con Lo Bo Contestá?

◻ Pakico nos tin cu haci oracion cu fe?

◻ Ki papel alabansa i gradicimentu mester hunga den nos oracionnan?

◻ Pakico nos por busca Jehova su yudansa cu confiansa den oracion?

◻ Cua ta algun punto principal dje oracion modelo?

◻ Con nos por obra na armonia cu nos oracionnan?

[Plachi na página 12]]

Mescos cu Rey Jehósafat, tin bes nos lo tin cu bisa den oracion: ‘Nos no sa kico nos tin cu haci, pero nos wowo ta den bo direccion, Jehova’

[Plachi na página 13]

Bo ta haci oracion na armonia cu Jesus su oracion modelo?